ଦାଲ୍ଭ୍ୟଃ
କାର୍ୟାରଂଭେଷୁ ସର୍ଵେଷୁ ଦୁଃସ୍ଵପ୍ନେଷୁ ଚ ସତ୍ତମ ।
ଅମାଂଗଲ୍ୟେଷୁ ଦୃଷ୍ଟେଷୁ ୟଜ୍ଜପ୍ତଵ୍ୟଂ ତଦୁଚ୍ୟତାମ୍ ॥ 1 ॥

ୟେନାରଂଭାଶ୍ଚ ସିଦ୍ଧ୍ୟଂତି ଦୁଃସ୍ଵପ୍ନଶ୍ଚୋପଶାମ୍ୟତି ।
ଅମଂଗଲାନାଂ ଦୃଷ୍ଟାନାଂ ପରିହାରଶ୍ଚ ଜାୟତେ ॥ 2 ॥

ଶ୍ରୀ ପୁଲସ୍ତ୍ୟଃ:
ଜନାର୍ଦନଂ ଭୂତପତିଂ ଜଗଦ୍ଗୁରୁଂ ସ୍ମରନ୍ ମନୁଷ୍ୟଃ ସତତଂ ମହାମୁନେ ।
ଦୁଷ୍ଟାନ୍ୟଶେଷଣ୍ୟପହଂତି ସାଧୟତି ଅଶେଷକାର୍ୟାଣି ଚ ୟାନ୍ୟଭୀପ୍ସତି ॥ 3 ॥

ଶୃଣୁଷ୍ଵ ଚାନ୍ୟତ୍ ଗଦତୋ ମମାଖିଲଂ ଵଦାମି ୟତ୍ ତେ ଦ୍ଵିଜଵର୍ୟ! ମଂଗଲମ୍ ।
ସର୍ଵାର୍ଥସିଦ୍ଧିଂ ପ୍ରଦଦାତି ୟତ୍ ସଦା ନିହଂତ୍ୟ୍ଶେଷାଣି ଚ ପାତକାନି ॥ 4 ॥

ପ୍ରତିଷ୍ଟିତଂ ୟତ୍ର ଜଗଚ୍ଚରାଚରଂ ଜଗତ୍ତ୍ରୟେ ୟୋ ଜଗତଶ୍ଚ ହେତୁଃ ।
ଜଗଚ୍ଚ ପାତ୍ୟତ୍ତି ଚ ୟଃ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 5 ॥

ଵ୍ୟୋମାଂବୁଵାୟ୍ଵଗ୍ନିମହୀସ୍ଵରୂପୈଃ ଵିସ୍ତାରଵାନ୍ ୟୋଽଣୁତରୋଽଣୁଭାଵାତ୍ ।
ଅସ୍ଥୂଲସୂକ୍ଷ୍ମଃ ସତତଂ ପରେଶ୍ଵରୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 6 ॥

ୟସ୍ମାତ୍ ପରସ୍ମାତ୍ ପୁରୁଷାଦନଂତାତ୍ ଅନାଦିମଧ୍ୟାଦଧିକଂ ନ କିଂଚିତ୍ ।
ସ ହେତୁହେତୁଃ ପରମେଶ୍ଵରେଶ୍ଵରଃ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 7 ॥

ହିରଣ୍ୟଗର୍ଭାଚ୍ୟୁତରୁଦ୍ରରୂପୀ ସୃଜତ୍ୟଶେଷଂ ପରିପାତି ହଂତି ।
ଗୁଣାଗ୍ରଣୀର୍ୟୋ ଭଗଵାନ୍ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 8 ॥

ପରଃ ସୁରାଣାଂ ପରମୋଽସୁରାଣାଂ ପରୋ ୟତୀନାଂ ପରମୋ ମୁନୀନାମ୍ ।
ପରଃ ସମସ୍ତସ୍ୟ ଚ ୟଃ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 9 ॥

ଧ୍ୟାତୋ ମୁନୀନାମପକଲ୍ମଷୈର୍ୟୋ ଦଦାତି ମୁକ୍ତିଂ ପରମେଶ୍ଵରେଶ୍ଵରଃ ।
ମନୋଭିରାମଃ ପୁରୁଷଃ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 10 ॥

ସୁରେଂଦ୍ରଵୈଵସ୍ଵତଵିତ୍ତପାଂବୁପସ୍ଵରୂପରୂପୀ ପରିପାତି ୟୋ ଜଗତ୍ ।
ସ ଶୁଦ୍ଧଶୁଦ୍ଧଃ ପରମେଶ୍ଵରେଶ୍ଵରୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 11 ॥

ୟନ୍ନାମସଂକୀର୍ତନତୋ ଵିମୁଚ୍ୟତେ ହ୍ୟନେକଜନ୍ମାର୍ଜିତପାପସଂଚୟାତ୍ ।
ପାପେଂଧନାଗ୍ନିଃ ସ ସଦୈଵ ନିର୍ମଲୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 12 ॥

ୟେନୋଦ୍ଧୃତେୟଂ ଧରଣୀ ରସାତଲାତ୍ ଅଶେଷସୃଷ୍ଟିସ୍ଥିତିକାରଣାଦିକମ୍ ।
ବିଭର୍ତି ଵିଶ୍ଵଂ ଜଗତଃ ସ ମୂଲଂ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 13 ॥

ପାଦେଷୁ ଵେଦା ଜଠରେ ଚରାଚରଂ ରୋମସ୍ଵଶେଷା ମୁନୟୋ ମୁଖେ ମଖାଃ ।
ୟସ୍ୟେଶ୍ଵରେଶସ୍ୟ ସ ସର୍ଵଦା ପ୍ରଭୁଃ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 14 ॥

ସମସ୍ତ ୟଜ୍ଞାଂଗମୟଂ ଵପୁଃ ପ୍ରଭୋଃ ୟସ୍ୟାଂଗମୀଶେଶ୍ଵରସଂସ୍ତୁତସ୍ୟ ।
ଵରାହରୂପୀ ଭଗଵାନ୍ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 15 ॥

ଵିକ୍ଷୋଭ୍ୟ ସର୍ଵୋଦଧିତୋୟସଂଭଵଂ ଦଧାର ଧାତ୍ରୀଂ ଜଗତଶ୍ଚ ୟୋ ଭୁଵମ୍ ।
ୟଜ୍ଞେଶ୍ଵରୋ ୟଜ୍ଞପୁମାନ୍ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 16 ॥

ପାତାଲମୂଲେଶ୍ଵରଭୋଗିସଂହତୋ ଵିନ୍ୟସ୍ୟ ପାଦୌ ପୃତିଵୀଂ ଚ ବିଭ୍ରତଃ ।
ୟସ୍ୟୋପମାନଂ ନ ବଭୂଵ ସୋଽଚ୍ୟୁତୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 17 ॥

ସଘର୍ଘରଂ ୟସ୍ୟ ଚ ବୃଂହିତଂ ମୁହୁଃ ସନଂଦନାଦ୍ୟୈର୍ଜନଲୋକସଂଶ୍ରିତୈଃ ।
ଶ୍ରୁତଂ ଜୟେତ୍ୟୁକ୍ତିପରୈଃ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 18 ॥

ଏକାର୍ଣଵାଦ୍ ୟସ୍ୟ ମହୀୟସୌ ମହୀଂ ଆଦାୟ ଵେଗେନ ଖମୁତ୍ପତିଷ୍ୟତଃ ।
ନତଂ ଵପୁର୍ୟୋଗିଵରୈଃ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 19 ॥

ହତୋ ହିରଣ୍ୟାକ୍ଷମହାସୁରଃ ପୁରା ପୁରାଣପୁଂସା ପରମେଣ ୟେନ ।
ଵରାହରୂପଃ ସ ପତିଃ ପ୍ରଜାପତିଃ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 20 ॥

ଦଂଷ୍ଟ୍ରାକରାଲଂ ସୁରଭୀତିନାଶକଂ କୃତଂ ଵପୁର୍ଦିଵ୍ୟନୃସିଂହରୂପିଣା ।
ତ୍ରାତୁଂ ଜଗତ୍ ୟେନ ସ ସର୍ଵଦା ପ୍ରଭୁଃ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 21 ॥

ଦୈତ୍ୟେଂଦ୍ରଵକ୍ଷଃସ୍ଥଲଦାରଦାରୁଣୈଃ
କରେରୁହୈର୍ୟଃ କ୍ରକଚାନୁକାରିଭିଃ ।
ଵିଚ୍ଛେଦ ଲୋକସ୍ୟ ଭୟାନି ସୋଽଚ୍ୟୁତୋ
ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 22 ॥

ଦଂତାଂତଦୀପ୍ତଦ୍ୟୁତିନିର୍ମଲାନି ୟଃ ଚକାର ସର୍ଵାଣି ଦିଶାଂ ମୁଖାନି ।
ନିନାଦଵିତ୍ରାସିତଦାନଵୋ ହ୍ୟସୌ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 23 ॥

ୟନ୍ନାମସଂକୀର୍ତନତୋ ମହାଭୟାତ୍ ଵିମୋକ୍ଷମାପ୍ନୋତି ନ ସଂଶୟଂ ନରଃ ।
ସ ସର୍ଵଲୋକାର୍ତିହରୋ ନୃକେସରୀ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 24 ॥

ସଟାକରାଲଭ୍ରମଣାନିଲାହତାଃ ସ୍ଫୁଟଂତି ୟସ୍ୟାଂବୁଧରାଃ ସମଂତତଃ ।
ସ ଦିଵ୍ୟସିଂହଃ ସ୍ଫୁରିତାନଲେକ୍ଷଣୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 25 ॥

ୟଦୀକ୍ଷଣଜ୍ୟୋତିଷି ରଶ୍ମିମଂଡଲଂ ପ୍ରଲୀନମୀଷନ୍ନ ରରାଜ ଭାସ୍ଵତଃ ।
କୁତଃ ଶଶାଂକସ୍ୟ ସ ଦିଵ୍ୟରୂପଧୃକ୍ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 26 ॥

ଅଶେଷଦେଵେଶନରେଶ୍ଵରେଶ୍ଵରୈଃ ସଦା ସ୍ତୁତଂ ୟଚ୍ଚରିତଂ ମହାଦ୍ଭୁତମ୍ ।
ସ ସର୍ଵଲୋକାର୍ତିହରୋ ମହାହରିଃ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 27 ॥

ଦ୍ରଵଂତି ଦୈତ୍ୟାଃ ପ୍ରଣମଂତି ଦେଵତାଃ ନଶ୍ୟଂତି ରକ୍ଷାଂସି ଅପୟାଂତି ଚାରୟଃ ।
ୟତ୍କୀର୍ତନାତ୍ ସୋଽଦ୍ଭୁତରୂପକେସରୀ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 28 ॥

ଋକ୍ପାଵିତଂ ୟୋ ୟଜୁଷା ହି ଶ୍ରୀମତ୍ ସାମଧ୍ଵନିଧ୍ଵସ୍ତସମସ୍ତପାତକମ୍ ।
ଚକ୍ରେ ଜଗତ୍ ଵାମନକଃ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 29 ॥

ୟତ୍ପାଦଵିନ୍ୟାସପଵିତ୍ରତାଂ ମହୀ ୟୟୌ ଵିୟଚ୍ଚର୍ଗ୍ୟଜୁଷାମୁଦୀରଣାତ୍ ।
ସ ଵାମନୋ ଦିଵ୍ୟଶରୀରରୂପଦୃଂ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 30 ॥

ୟସ୍ମିନ୍ ପ୍ରୟାତେଽସୁରଭୂଭୃତୋଽଧ୍ଵରାତ୍ ନନାମ ଖେଦାଦଵନିଃ ସସାଗରା ।
ସ ଵାମନଃ ସର୍ଵଜଗନ୍ମୟଃ ସଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 31 ॥

ମହାଦ୍ଭୁତେ ଦୈତ୍ୟପତେର୍ମହାଧ୍ଵରେ ୟସ୍ମିନ୍ ପ୍ରଵିଷ୍ଟେ କ୍ଷୁଭିତଂ ମହାସୁରୈଃ ।
ସ ଵାମନୋଽଂତସ୍ଥିତସପ୍ତଲୋକଧୃଂ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 32 ॥

ସଂଘୈଃ ସୁରାଣାଂ ଦିଵି ଭୂତଲସ୍ଥିତୈଃ ତଥା ମନୁଷ୍ୟୈର୍ଗଗନେ ଚ ଖେଚରୈଃ ।
ସ୍ତୁତଃ କ୍ରମାଦ୍ ୟଃ ପ୍ରଚ୍ଚାର ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 33 ॥

କ୍ରାଂତ୍ଵା ଧରିତ୍ରୀଂ ଗଗନଂ ତଥା ଦିଵଂ ମରୁତ୍ପତେର୍ୟଃ ପ୍ରଦଦୌ ତ୍ରିଵିଷ୍ଟପମ୍ ।
ସ ଦେଵଦେଵୋ ଭୁଵନେଶ୍ଵରେଶ୍ଵରୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 34 ॥

ଅନୁଗ୍ରହଂ ଚାପି ବଲେରନୁତ୍ତ୍ମଂ ଚକାର ୟଶ୍ଚେଂଦ୍ରପଦୋପମଂ କ୍ଷଣାତ୍ ।
ସୁରାଂଶ୍ଚ ୟଜ୍ଞାଂଶଭୁଜଃ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 35 ॥

ରସାତଲାଦ୍ ୟେନ ପୁରା ସମାହୃତାଃ ସମସ୍ତଵେଦା ଜଲଚାରରିରୂପିଣା ।
ସ କୈଟଭାରିମଧୁହାଽଂବୁଶାୟୀ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 36 ॥

ନିଃକ୍ଷତ୍ରିୟଂ ୟଶ୍ଚ ଚକାର ମେଦିନୀଂ ଅନେକଶୋ ବାହୁଵନଂ ତଥାଽଚ୍ଛିନତ୍ ।
ୟଃ କାର୍ତଵୀର୍ୟସ୍ୟ ସ ଭାର୍ଗଵୋତ୍ତମୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 37 ॥

ନିହତ୍ୟ ୟୋ ଵାଲିନମୁଗ୍ରଵିକ୍ରମଂ
ନିବଦ୍ଧ୍ୟ ସେତୁଂ ଜଲଧୌ ଦଶାନନମ୍ ।
ଜଘାନ ଚାନ୍ୟାନ୍ ରଜନୀଚରାନ୍ ଅସୌ
ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 38 ॥

ଚିକ୍ଷେପ ବାଲଃ ଶକଟଂ, ବଭଂଜ ୟୋ ୟମାର୍ଜୁନଂ, କଂସମରିଂ ଜଘାନ ଚ ।
ମମର୍ଦ ଚାଣୂରମୁଖାନ୍ ସ ସର୍ଵଦା ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 39 ॥

ପ୍ରାତଃ ସହସ୍ରାଂଶୁମରୀଚିନିର୍ମଲଂ କରେଣ ବିଭ୍ରତ୍ ଭଗଵାନ୍ ସୁଦର୍ଶନମ୍ ।
କୌମୋଦକୀ ଚାପି ଗଦାମନଂତୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 40 ॥

ହିମେଂଦୁକୁଂଦସ୍ଫଟିକାଭନିର୍ମଲଂ ମୁଖାନିଲାପୂରିତମୀଶ୍ଵରେଶ୍ଵରଃ ।
ମଧ୍ୟାହ୍ନକାଲେଽପି ସ ଶନ୍ଖମୁଦ୍ଵହନ୍ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 41 ॥

ତଥାପରାହ୍ଣେ ପ୍ରଵିକାସି ପଂକଜଂ ଵକ୍ଷସ୍ଥଲେନ ଶ୍ରିୟମୁଦ୍ଵହନ୍ ହରିଃ ।
ଵିସ୍ତାରିପଦ୍ମାୟତପତ୍ରଲୋଚନୋ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 42 ॥

ସର୍ଵେଷୁ କାଲେଷୁ ସମସ୍ତଦେଶେଷୁ ଅଶେଷକାର୍ୟେଷୁ ତଥେଶ୍ଵରେଶ୍ଵରଃ ।
ସର୍ଵୈଃ ସ୍ଵରୂପୈର୍ଭଗଵାନ୍ ଅନାଦିମାନ୍ ମମାସ୍ତୁ ମାଂଗଲ୍ୟଵିଵୃଦ୍ଧୟେ ହରିଃ ॥ 43 ॥

ଏତତ୍ ପଠନ୍ ଦାଲ୍ଭ୍ୟ ସମସ୍ତପାପୈଃ
ଵିମୁଚ୍ୟତେ ଵିଷ୍ଣୁପରୋ ମନୁଷ୍ୟଃ ।
ସିଦ୍ଧ୍ୟଂତି କାର୍ୟାଣି ତଥାଽସ୍ୟ ସର୍ଵାନ୍
ଅର୍ଥାନଵାପ୍ନୋତି ୟଥେଚ୍ଛତେ ତାନ୍ ॥ 44 ॥

ଦୁଃସ୍ଵପ୍ନଃ ପ୍ରଶମମୁପୈତି ପଠ୍ୟମାନେ
ସ୍ତୋତ୍ରେଽସ୍ମିନ୍ ଶ୍ରଵଣଵିଧୌ ସଦୋଦ୍ୟତସ୍ୟ ।
ପ୍ରାରଂଭୋ ଦ୍ରୁତମୁପୟାତି ସିଦ୍ଧିମୀଶଃ
ପାପାନି କ୍ଷପୟତି ଚାସ୍ୟ ଦେଵଦେଵଃ ॥ 45 ॥

ମାଂଗଲ୍ୟଂ ପରମପଦଂ ସଦାଽର୍ଥସିଦ୍ଧିଂ
ନିର୍ଵିଘ୍ନାମଧିକଫଲାଂ ଶ୍ରିୟଂ ଦଦାତି ।
କିଂ ଲୋକେ ତଦିହ ପରତ୍ର ଚାପି ପୁଂସାଂ
ୟଦ୍ଵିଷ୍ଣୁପ୍ରଵଣଧିୟାଂ ନ ଦାଲ୍ଭ୍ୟ! ସାଧ୍ୟମ୍ ॥ 46 ॥

ଦେଵେଂଦ୍ରସ୍ତ୍ରିଭୁଵନମର୍ଥମେକପିଂଗଃ
ସଂସିଦ୍ଧିଂ ତ୍ରିଭୁଵନଗାଂ ଚ କାର୍ତଵୀର୍ୟଃ ।
ଵୈଦେହଃ ପରମପଦଂ ପ୍ରସାଦ୍ୟ ଵିଷ୍ଣୁଂ
ସଂପ୍ରାପ୍ତାଃ ସକଲଫଲପ୍ରଦୋ ହି ଵିଷ୍ଣୁଃ ॥ 47 ॥

ସର୍ଵାରଂଭେଷୁ ଦାଲ୍ଭ୍ୟୈତଦ୍ ଦୁଃସ୍ଵପ୍ନେଷୁ ଚ ପଂଡିତଃ ।
ଜପେଦେକମନା ଵିଷ୍ଣୌ ତଥାଽମଂଗଲ୍ୟଦର୍ଶନେ ॥ 48 ॥

ଶମଂ ପ୍ରୟାଂତି ଦୁଷ୍ଟାନି ଗ୍ରହପୀଡାଶ୍ଚ ଦାରୁଣାଃ ।
କର୍ମାରଂଭାଶ୍ଚ ସିଦ୍ଧ୍ୟଂତି ପୁଣ୍ୟମାପ୍ନୋତି ଚୋତ୍ତମମ୍ ॥ 49 ॥

ହରିର୍ଦଦାତି ଭଦ୍ରାଣି ମଂଗଲ୍ୟସ୍ତୁତିସଂସ୍ତୁତଃ ।
କରୋତ୍ୟଖିଲରୂପୈସ୍ତୁ ରକ୍ଷାମକ୍ଷତଶକ୍ତିଭୃତ୍ ॥ 50 ॥

॥ ଶ୍ରୀଵିଷ୍ଣୁଧର୍ମୋତ୍ତରାଂତର୍ଗତଃ ମାଂଗଲ୍ୟସ୍ତଵଃ ସଂପୂର୍ଣଃ ॥