ശേഷാചലം സമാസാദ്യ കശ്യപാദ്യാ മഹര്ഷയഃ ।
വേംകടേശം രമാനാഥം ശരണം പ്രാപുരംജസാ ॥ 1 ॥
കലിസംതാരകം മുഖ്യം സ്തോത്രമേതജ്ജപേന്നരഃ ।
സപ്തര്ഷിവാക്പ്രസാദേന വിഷ്ണുസ്തസ്മൈ പ്രസീദതി ॥ 2 ॥
കശ്യപ ഉവാച –
കാദിഹ്രീമംതവിദ്യായാഃ പ്രാപ്യൈവ പരദേവതാ ।
കലൌ ശ്രീവേംകടേശാഖ്യാ താമഹം ശരണം ഭജേ ॥ 3 ॥
അത്രിരുവാച –
അകാരാദിക്ഷകാരാംതവര്ണൈര്യഃ പ്രതിപാദ്യതേ ।
കലൌ സ വേംകടേശാഖ്യഃ ശരണം മേ രമാപതിഃ ॥ 4 ॥
ഭരദ്വാജ ഉവാച –
ഭഗവാന് ഭാര്ഗവീകാംതോ ഭക്താഭീപ്സിതദായകഃ ।
ഭക്തസ്യ വേംകടേശാഖ്യോ ഭരദ്വാജസ്യ മേ ഗതിഃ ॥ 5 ॥
വിശ്വാമിത്ര ഉവാച –
വിരാഡ്വിഷ്ണുർവിധാതാ ച വിശ്വവിജ്ഞാനവിഗ്രഹഃ ।
വിശ്വാമിത്രസ്യ ശരണം വേംകടേശോ വിഭുഃ സദാ ॥ 6 ॥
ഗൌതമ ഉവാച –
ഗൌര്ഗൌരീശപ്രിയോ നിത്യം ഗോവിംദോ ഗോപതിർവിഭുഃ ।
ശരണം ഗൌതമസ്യാസ്തു വേംകടാദ്രിശിരോമണിഃ ॥ 7 ॥
ജമദഗ്നിരുവാച –
ജഗത്കര്താ ജഗദ്ഭര്താ ജഗദ്ധര്താ ജഗന്മയഃ ।
ജമദഗ്നേഃ പ്രപന്നസ്യ ജീവേശോ വേംകടേശ്വരഃ ॥ 8 ॥
വസിഷ്ഠ ഉവാച –
വസ്തുവിജ്ഞാനമാത്രം യന്നിർവിശേഷം സുഖം ച സത് ।
തദ്ബ്രഹ്മൈവാഹമസ്മീതി വേംകടേശം ഭജേ സദാ ॥ 9 ॥
സപ്തര്ഷിരചിതം സ്തോത്രം സർവദാ യഃ പഠേന്നരഃ ।
സോഽഭയം പ്രാപ്നുയാത്സത്യം സർവത്ര വിജയീ ഭവേത് ॥ 10 ॥
ഇതി സപ്തര്ഷിഭിഃ കൃതം ശ്രീ വേംകടേശ്വര ശരണാഗതി സ്തോത്രമ് ।
