શેષાચલં સમાસાદ્ય કશ્યપાદ્યા મહર્ષયઃ ।
વેંકટેશં રમાનાથં શરણં પ્રાપુરંજસા ॥ 1 ॥
કલિસંતારકં મુખ્યં સ્તોત્રમેતજ્જપેન્નરઃ ।
સપ્તર્ષિવાક્પ્રસાદેન વિષ્ણુસ્તસ્મૈ પ્રસીદતિ ॥ 2 ॥
કશ્યપ ઉવાચ –
કાદિહ્રીમંતવિદ્યાયાઃ પ્રાપ્યૈવ પરદેવતા ।
કલૌ શ્રીવેંકટેશાખ્યા તામહં શરણં ભજે ॥ 3 ॥
અત્રિરુવાચ –
અકારાદિક્ષકારાંતવર્ણૈર્યઃ પ્રતિપાદ્યતે ।
કલૌ સ વેંકટેશાખ્યઃ શરણં મે રમાપતિઃ ॥ 4 ॥
ભરદ્વાજ ઉવાચ –
ભગવાન્ ભાર્ગવીકાંતો ભક્તાભીપ્સિતદાયકઃ ।
ભક્તસ્ય વેંકટેશાખ્યો ભરદ્વાજસ્ય મે ગતિઃ ॥ 5 ॥
વિશ્વામિત્ર ઉવાચ –
વિરાડ્વિષ્ણુર્વિધાતા ચ વિશ્વવિજ્ઞાનવિગ્રહઃ ।
વિશ્વામિત્રસ્ય શરણં વેંકટેશો વિભુઃ સદા ॥ 6 ॥
ગૌતમ ઉવાચ –
ગૌર્ગૌરીશપ્રિયો નિત્યં ગોવિંદો ગોપતિર્વિભુઃ ।
શરણં ગૌતમસ્યાસ્તુ વેંકટાદ્રિશિરોમણિઃ ॥ 7 ॥
જમદગ્નિરુવાચ –
જગત્કર્તા જગદ્ભર્તા જગદ્ધર્તા જગન્મયઃ ।
જમદગ્નેઃ પ્રપન્નસ્ય જીવેશો વેંકટેશ્વરઃ ॥ 8 ॥
વસિષ્ઠ ઉવાચ –
વસ્તુવિજ્ઞાનમાત્રં યન્નિર્વિશેષં સુખં ચ સત્ ।
તદ્બ્રહ્મૈવાહમસ્મીતિ વેંકટેશં ભજે સદા ॥ 9 ॥
સપ્તર્ષિરચિતં સ્તોત્રં સર્વદા યઃ પઠેન્નરઃ ।
સોઽભયં પ્રાપ્નુયાત્સત્યં સર્વત્ર વિજયી ભવેત્ ॥ 10 ॥
ઇતિ સપ્તર્ષિભિઃ કૃતં શ્રી વેંકટેશ્વર શરણાગતિ સ્તોત્રમ્ ।
