നാഽഹം ദേഹോ നേംദ്രിയാണ്യംതരംഗം
നാഽഹംകാരഃ പ്രാണവര്ഗോ ന ചാഽഹമ് ।
ദാരാപത്യക്ഷേത്രവിത്താദിദൂര-
സ്സാക്ഷീ നിത്യഃ പ്രത്യഗാത്മാ ശിവോഽഹമ് ॥ 1 ॥
രജ്ജ്വജ്ഞാനാദ്ഭാതി രജ്ജുര്യഥാ ഹി-
സ്സ്വാത്മാജ്ഞാനാദാത്മനോ ജീവഭാവഃ ।
ആപ്തോക്ത്യാ ഹി ഭ്രാംതിനാശേ സ രജ്ജു-
ര്ജീവോ നാഽഹം ദേശികോക്ത്യാ ശിവോഽഹമ് ॥ 2 ॥
അഭാതീദം വിശ്വമാത്മന്യസത്യം
സത്യജ്ഞാനാനംദരൂപേ വിമോഹാത് ।
നിദ്രാമോഹാ-ത്സ്വപ്നവത്തന്ന സത്ത്യം
ശുദ്ധഃ പൂര്ണോ നിത്യ ഏകശ്ശിവോഽഹമ് ॥ 3 ॥
മത്തോ നാന്യത്കിംചിദത്രാപ്തി വിശ്വം
സത്യം ബാഹ്യം വസ്തുമായോപക്ലുപ്തമ് ।
ആദര്ശാംതര്ഭാസമാനസ്യ തുല്യം
മയ്യദ്വൈതേ ഭാതി തസ്മാച്ഛിവോഽഹമ് ॥ 4 ॥
നാഽഹം ജാതോ ന പ്രവൃദ്ധോ ന നഷ്ടോ
ദേഹസ്യോക്താഃ പ്രാകൃതാസ്സർവധര്മാഃ ।
കര്തൃത്വാദി-ശ്ചിന്മയസ്യാസ്തി നാഽഹം
കാരസ്യൈവ ഹ്യാത്മനോ മേ ശിവോഽഹമ് ॥ 5 ॥
നാഽഹം ജാതോ ജന്മമൃത്യുഃ കുതോ മേ
നാഽഹം പ്രാണഃ ക്ഷുത്പിപാസേ കുതോ മേ ।
നാഽഹം ചിത്തം ശോകമോഹൌ കുതോ മേ
നാഽഹം കര്താ ബംധമോക്ഷൌ കുതോ മേ ॥ 6 ॥
ഇതി ശ്രീമച്ഛംകരഭവത്പാദാചാര്യ സ്വാമി വിരചിതാത്മപംചകമ് ॥
