కుబేరో ధనద శ్రీదః రాజరాజో ధనేశ్వరః ।
ధనలక్ష్మీప్రియతమో ధనాఢ్యో ధనికప్రియః ॥ 1 ॥

దాక్షిణ్యో ధర్మనిరతః దయావన్తో ధృఢవ్రతః ।
దివ్య లక్షణ సమ్పన్నో దీనార్తి జనరక్షకః ॥ 2 ॥

ధాన్యలక్ష్మీ సమారాధ్యో ధైర్యలక్ష్మీ విరాజితః ।
దయారూపో ధర్మబుద్ధిః ధర్మ సంరక్షణోత్సకః ॥ 3 ॥

నిధీశ్వరో నిరాలమ్బో నిధీనాం పరిపాలకః ।
నియన్తా నిర్గుణాకారః నిష్కామో నిరుపద్రవః ॥ 4 ॥

నవనాగ సమారాధ్యో నవసఙ్ఖ్యా ప్రవర్తకః ।
మాన్యశ్చైత్రరథాధీశః మహాగుణగణాన్వితః ॥ 5 ॥

యాజ్ఞికో యజనాసక్తః యజ్ఞభుగ్యజ్ఞరక్షకః ।
రాజచన్ద్రో రమాధీశో రఞ్జకో రాజపూజితః ॥ 6 ॥

విచిత్రవస్త్రవేషాఢ్యః వియద్గమన మానసః ।
విజయో విమలో వన్ద్యో వన్దారు జనవత్సలః ॥ 7 ॥

విరూపాక్ష ప్రియతమో విరాగీ విశ్వతోముఖః ।
సర్వవ్యాప్తో సదానన్దః సర్వశక్తి సమన్వితః ॥ 8 ॥

సామదానరతః సౌమ్యః సర్వబాధానివారకః ।
సుప్రీతః సులభః సోమో సర్వకార్యధురన్ధరః ॥ 9 ॥

సామగానప్రియః సాక్షాద్విభవ శ్రీ విరాజితః ।
అశ్వవాహన సమ్ప్రీతో అఖిలాణ్డ ప్రవర్తకః ॥ 10 ॥

అవ్యయోర్చన సమ్ప్రీతః అమృతాస్వాదన ప్రియః ।
అలకాపురసంవాసీ అహఙ్కారవివర్జితః ॥ 11 ॥

ఉదారబుద్ధిరుద్దామవైభవో నరవాహనః ।
కిన్నరేశో వైశ్రవణః కాలచక్రప్రవర్తకః ॥ 12 ॥

అష్టలక్ష్మ్యా సమాయుక్తః అవ్యక్తోఽమలవిగ్రహః ।
లోకారాధ్యో లోకపాలో లోకవన్ద్యో సులక్షణః ॥ 13 ॥

సులభః సుభగః శుద్ధో శఙ్కరారాధనప్రియః ।
శాన్తః శుద్ధగుణోపేతః శాశ్వతః శుద్ధవిగ్రహః ॥ 14 ॥

సర్వాగమజ్ఞో సుమతిః సర్వదేవగణార్చకః ।
శఙ్ఖహస్తధరః శ్రీమాన్ పరం జ్యోతిః పరాత్పరః ॥ 15 ॥

శమాదిగుణసమ్పన్నః శరణ్యో దీనవత్సలః ।
పరోపకారీ పాపఘ్నః తరుణాదిత్యసన్నిభః ॥ 16 ॥

దాన్తః సర్వగుణోపేతః సురేన్ద్రసమవైభవః ।
విశ్వఖ్యాతో వీతభయః అనన్తానన్తసౌఖ్యదః ॥ 17 ॥

ప్రాతః కాలే పఠేత్ స్తోత్రం శుచిర్భూత్వా దినే దినే ।
తేన ప్రాప్నోతి పురుషః శ్రియం దేవేన్ద్రసన్నిభమ్ ॥ 18 ॥

ఇతి శ్రీ కుబేర స్తోత్రమ్ ॥