నమామీశమీశాన నిర్వాణరూపం
విభుం వ్యాపకం బ్రహ్మవేద-స్వరూపమ్ ।
నిజం నిర్గుణం నిర్వికల్పం నిరీహం
చిదాకాశ-మాకాశవాసం భజేఽహమ్ ॥ 1 ॥
నిరాకారమోఙ్కారమూలం తురీయం
గిరాజ్ఞానగోతీతమీశం గిరీశమ్ ।
కరాలం మహాకాలకాలం కృపాలుం
గుణాగార-సంసారపారం నతోఽహమ్ ॥ 2 ॥
తుషారాద్రి-సఙ్కాశగౌరం గభీరం
మనోభూతకోటి-ప్రభాసీ శరీరమ్ ।
స్ఫురన్మౌలికల్లోలినీ చారుగఙ్గా
లసద్భాల-బాలేన్దు కణ్ఠే భుజఙ్గమ్ ॥ 3 ॥
చలత్కుణ్డలం శుభ్రనేత్రం విశాలం
ప్రసన్నాననం నీలకణ్ఠం దయాలుమ్ ।
మృగాధీశ-చర్మామ్బరం ముణ్డమాలం
ప్రియం శఙ్కరం సర్వనాథం భజామి ॥ 4 ॥
ప్రచణ్డం ప్రకృష్టం ప్రగల్భం పరేశం
అఖణ్డం భజే భానుకోటిప్రకాశమ్ ।
త్రయీ-శూల-నిర్మూలనం శూలపాణిం
భజేఽహం భవానీపతిం భావగమ్యమ్ ॥ 5 ॥
కలాతీత-కల్యాణ-కల్పాన్తకారీ
సదా సజ్జనానన్ద-దాతా పురారీ ।
చిదానన్ద సన్దోహమోహాపహారీ
ప్రసీద ప్రసీద ప్రభో మన్మథారీ ॥ 6 ॥
న యావదుమానాథ-పాదారవిన్దం
భజన్తీహ లోకే పరే వా నరాణామ్ ।
న తావత్సుఖం శాన్తి సన్తాపనాశం
ప్రసీద ప్రభో సర్వభూతాధివాసమ్ ॥ 7 ॥
న జానామి యోగం జపం నైవ పూజాం
నతోఽహం సదా సర్వదా దేవ తుభ్యమ్ ।
జరా-జన్మ-దుఃఖౌఘతాతప్యమానం
ప్రభో పాహి శాపాన్నమామీశ శమ్భో ॥ 8 ॥
రుద్రాష్టకమిదం ప్రోక్తం విప్రేణ హరతుష్టయే ।
యే పఠన్తి నరా భక్త్యా తేషాం శమ్భుః ప్రసీదతి ॥ 9 ॥
॥ ఇతి శ్రీరామచరితమానసే ఉత్తరకాణ్డే శ్రీగోస్వామి తులసీదాసకృతం
శ్రీరుద్రాష్టకం సమ్పూర్ణమ్ ॥
