చన్ద్రశేఖర చన్ద్రశేఖర చన్ద్రశేఖర పాహిమామ్ ।
చన్ద్రశేఖర చన్ద్రశేఖర చన్ద్రశేఖర రక్షమామ్ ॥ (2)
రత్నసాను శరాసనం రజతాద్రి శృఙ్గ నికేతనం
శిఞ్జినీకృత పన్నగేశ్వర మచ్యుతానల సాయకమ్ ।
క్షిప్రదగ్ద పురత్రయం త్రిదశాలయై-రభివన్దితం
చన్ద్రశేఖరమాశ్రయే మమ కిం కరిష్యతి వై యమః ॥ 1 ॥
పఞ్చపాదప పుష్పగన్ధ పదామ్బుజ ద్వయశోభితం
ఫాలలోచన జాతపావక దగ్ధ మన్మధ విగ్రహమ్ ।
భస్మదిగ్ధ కళేబరం భవనాశనం భవ మవ్యయం
చన్ద్రశేఖర చన్ద్రశేఖర చన్ద్రశేఖర రక్షమామ్ ॥ 2 ॥
మత్తవారణ ముఖ్యచర్మ కృతోత్తరీయ మనోహరం
పఙ్కజాసన పద్మలోచన పూజితాఙ్ఘ్రి సరోరుహమ్ ।
దేవ సిన్ధు తరఙ్గ శ్రీకర సిక్త శుభ్ర జటాధరం
చన్ద్రశేఖర చన్ద్రశేఖర చన్ద్రశేఖర పాహిమామ్ ॥ 3 ॥
యక్ష రాజసఖం భగాక్ష హరం భుజఙ్గ విభూషణమ్
శైలరాజ సుతా పరిష్కృత చారువామ కళేబరమ్ ।
క్షేళ నీలగళం పరశ్వధ ధారిణం మృగధారిణమ్
చన్ద్రశేఖర చన్ద్రశేఖర చన్ద్రశేఖర పాహిమామ్ ॥ 4 ॥
కుణ్డలీకృత కుణ్డలీశ్వర కుణ్డలం వృషవాహనం
నారదాది మునీశ్వర స్తుతవైభవం భువనేశ్వరమ్ ।
అన్ధకాన్తక మాశ్రితామర పాదపం శమనాన్తకం
చన్ద్రశేఖర చన్ద్రశేఖర చన్ద్రశేఖర రక్షమామ్ ॥ 5 ॥
భేషజం భవరోగిణా మఖిలాపదా మపహారిణం
దక్షయజ్ఞ వినాశనం త్రిగుణాత్మకం త్రివిలోచనమ్ ।
భక్తి ముక్తి ఫలప్రదం సకలాఘ సఙ్ఘ నిబర్హణం
చన్ద్రశేఖర చన్ద్రశేఖర చన్ద్రశేఖర రక్షమామ్ ॥ 6 ॥
భక్తవత్సల-మర్చితం నిధిమక్షయం హరిదమ్బరం
సర్వభూత పతిం పరాత్పర-మప్రమేయ మనుత్తమమ్ ।
సోమవారుణ భూహుతాశన సోమ పాద్యఖిలాకృతిం
చన్ద్రశేఖర చన్ద్రశేఖర చన్ద్రశేఖర పాహిమామ్ ॥ 7 ॥
విశ్వసృష్టి విధాయకం పునరేవపాలన తత్పరం
సంహరం తమపి ప్రపఞ్చ మశేషలోక నివాసినమ్ ।
క్రీడయన్త మహర్నిశం గణనాథ యూథ సమన్వితం
చన్ద్రశేఖర చన్ద్రశేఖర చన్ద్రశేఖర రక్షమామ్ ॥ 8 ॥
మృత్యుభీత మృకణ్డుసూనుకృతస్తవం శివసన్నిధౌ
యత్ర కుత్ర చ యః పఠేన్న హి తస్య మృత్యుభయం భవేత్ ।
పూర్ణమాయురరోగతామఖిలార్థసమ్పదమాదరం
చన్ద్రశేఖర ఏవ తస్య దదాతి ముక్తిమయత్నతః ॥ 9 ॥
