పాదుకే యతిరాజస్య కథయన్తి యదాఖ్యయా ।
తస్య దాశరథేః పాదౌ శిరసా ధారయామ్యహమ్ ॥

పాషణ్డద్రుమషణ్డదావదహనశ్చార్వాకశైలాశనిః
బౌద్ధధ్వాన్తనిరాసవాసరపతిర్జైనేభకణ్ఠీరవః ।
మాయావాది భుజఙ్గభఙ్గగరుడస్త్రైవిద్య చూడామణిః
శ్రీరఙ్గేశజయధ్వజో విజయతే రామానుజోఽయం మునిః ॥ 1 ॥

పాషణ్డ షణ్డగిరిఖణ్డనవజ్రదణ్డాః
ప్రచ్ఛన్నబౌద్ధమకరాలయమన్థదణ్డాః ।
వేదాన్తసారసుఖదర్శనదీపదణ్డాః
రామానుజస్య విలసన్తిమునేస్త్రిదణ్డాః ॥ 2 ॥

చారిత్రోద్ధారదణ్డం చతురనయపథాలఙ్క్రియాకేతుదణ్డం
సద్విద్యాదీపదణ్డం సకలకలికథాసంహృతేః కాలదణ్డమ్ ।
త్రయ్యన్తాలమ్బదణ్డం త్రిభువనవిజయచ్ఛత్రసౌవర్ణదణ్డమ్
ధత్తేరామానుజార్యః ప్రతికథకశిరో వజ్రదణ్డం త్రిదణ్డమ్ ॥ 3 ॥

త్రయ్యా మాఙ్గళ్యసూత్రం త్రిథాయుగపయుగ రోహణాలమ్బసూత్రం
సద్విద్యాదీపసూత్రం సగుణనయవిదాం సమ్బదాంహారసూత్రమ్ ।
ప్రజ్ఞాసూత్రం బుధానాం ప్రశమధనమనః పద్మినీనాలసూత్రం
రక్షాసూత్రం మునీనాం జయతి యతిపతేర్వక్షసి బ్రహ్మసూత్రమ్ ॥ 4 ॥

పాషణ్డసాగరమహాబడబాముఖాగ్నిః
శ్రీరఙ్గరాజచరణామ్బుజమూలదాసః ।
శ్రీవిష్ణులోకమణి మణ్డపమార్గదాయీ
రామానుజో విజయతే యతిరాజరాజః ॥ 5 ॥