శ్రీభైరవ ఉవాచ ।
దేవేశి దేహరక్షార్థం కారణం కథ్యతాం ధ్రువమ్ ।
మ్రియన్తే సాధకా యేన వినా శ్మశానభూమిషు ॥
రణేషు చాతిఘోరేషు మహావాయుజలేషు చ ।
శృఙ్గిమకరవజ్రేషు జ్వరాదివ్యాధివహ్నిషు ॥

శ్రీదేవ్యువాచ ।
కథయామి శృణు ప్రాజ్ఞ బటోస్తు కవచం శుభమ్ ।
గోపనీయం ప్రయత్నేన మాతృజారోపమం యథా ॥
తస్య ధ్యానం త్రిధా ప్రోక్తం సాత్త్వికాదిప్రభేదతః ।
సాత్త్వికం రాజసం చైవ తామసం దేవ తత్ శృణు ॥

ధ్యానమ్ –
వన్దే బాలం స్ఫటికసదృశం కుణ్డలోద్భాసివక్త్రం
దివ్యాకల్పైర్నవమణిమయైః కిఙ్కిణీనూపురాద్యైః ।
దీప్తాకారం విశదవదనం సుప్రసన్నం త్రినేత్రం
హస్తాబ్జాభ్యాం బటుకమనిశం శూలఖడ్గౌదధానమ్ ॥ 1 ॥

ఉద్యద్భాస్కరసన్నిభం త్రినయనం రక్తాఙ్గరాగస్రజం
స్మేరాస్యం వరదం కపాలమభయం శూలం దధానం కరైః ।
నీలగ్రీవముదారభూషణశతం శీతాంశుచూడోజ్జ్వలం
బన్ధూకారుణవాససం భయహరం దేవం సదా భావయే ॥ 2 ॥

ధ్యాయేన్నీలాద్రికాన్తం శశిశకలధరం ముణ్డమాలం మహేశం
దిగ్వస్త్రం పిఙ్గకేశం డమరుమథ సృణిం ఖడ్గశూలాభయాని ।
నాగం ఘణ్టాం కపాలం కరసరసిరుహైర్విభ్రతం భీమదంష్ట్రం
సర్పాకల్పం త్రినేత్రం మణిమయవిలసత్కిఙ్కిణీ నూపురాఢ్యమ్ ॥ 3 ॥

అస్య వటుకభైరవకవచస్య మహాకాల ఋషిరనుష్టుప్ఛన్దః శ్రీవటుకభైరవో దేవతా బం బీజం హ్రీం శక్తిరాపదుద్ధారణాయేతి కీలకం మమ సర్వాభీష్టసిద్ధ్యర్థే వినియోగః ।

కవచమ్ –
ఓం శిరో మే భైరవః పాతు లలాటం భీషణస్తథా ।
నేత్రే చ భూతహననః సారమేయానుగో భ్రువౌ ॥ 1

భూతనాథశ్చ మే కర్ణౌ కపోలౌ ప్రేతవాహనః ।
నాసాపుటౌ తథోష్ఠౌ చ భస్మాఙ్గః సర్వభూషణః ॥ 2

భీషణాస్యో మమాస్యం చ శక్తిహస్తో గలం మమ ।
స్కన్ధౌ దైత్యరిపుః పాతు బాహూ అతులవిక్రమః ॥ 3

పాణీ కపాలీ మే పాతు ముణ్డమాలాధరో హృదమ్ ।
వక్షఃస్థలం తథా శాన్తః కామచారీ స్తనం మమ ॥ 4

ఉదరం చ స మే తుష్టః క్షేత్రేశః పార్శ్వతస్తథా ।
క్షేత్రపాలః పృష్ఠదేశం క్షేత్రాఖ్యో నాభితస్తథా ॥ 5

కటిం పాపౌఘనాశశ్చ బటుకో లిఙ్గదేశకమ్ ।
గుదం రక్షాకరః పాతు ఊరూ రక్షాకరః సదా ॥ 6

జానూ చ ఘుర్ఘురారావో జఙ్ఘే రక్షతు రక్తపః ।
గుల్ఫౌ చ పాదుకాసిద్ధః పాదపృష్ఠం సురేశ్వరః ॥ 7

ఆపాదమస్తకం చైవ ఆపదుద్ధారణస్తథా ।
సహస్రారే మహాపద్మే కర్పూరధవలో గురుః ॥ 8

పాతు మాం వటుకో దేవో భైరవః సర్వకర్మసు ।
పూర్వ స్యామసితాఙ్గో మే దిశి రక్షతు సర్వదా ॥ 9

ఆగ్నేయ్యాం చ రురుః పాతు దక్షిణే చణ్డభైరవః ।
నైరృత్యాం క్రోధనః పాతు మామున్మత్తస్తు పశ్చిమే ॥ 10

వాయవ్యాం మే కపాలీ చ నిత్యం పాయాత్ సురేశ్వరః ।
భీషణో భైరవః పాతూత్తరస్యాం దిశి సర్వదా ॥ 11

సంహారభైరవః పాతు దిశ్యైశాన్యాం మహేశ్వరః ।
ఊర్ధ్వే పాతు విధాతా వై పాతాలే నన్దికో విభుః ॥ 12

సద్యోజాతస్తు మాం పాయాత్ సర్వతో దేవసేవితః ।
వామదేవోఽవతు ప్రీతో రణే ఘోరే తథావతు ॥ 13

జలే తత్పురుషః పాతు స్థలే పాతు గురుః సదా ।
డాకినీపుత్రకః పాతు దారాంస్తు లాకినీసుతః ॥ 14

పాతు సాకలకో భ్రాతౄన్ శ్రియం మే సతతం గిరః ।
లాకినీపుత్రకః పాతు పశూనశ్వానజాంస్తథా ॥ 15

మహాకాలోఽవతు చ్ఛత్రం సైన్యం వై కాలభైరవః ।
రాజ్యం రాజ్యశ్రియం పాయాత్ భైరవో భీతిహారకః ॥ 16

రక్షాహీనన్తు యత్ స్థానం వర్జితం కవచేన చ ।
తత్ సర్వం రక్ష మే దేవ త్వం యతః సర్వరక్షకః ॥ 17

ఏతత్ కవచమీశాన తవ స్నేహాత్ ప్రకాశితమ్ ।
నాఖ్యేయం నరలోకేషు సారభూతం చ సుశ్రియమ్ ॥ 18

యస్మై కస్మై న దాతవ్యం కవచేశం సుదుర్లభమ్ ।
న దేయం పరశిష్యేభ్యః కృపణేభ్యశ్చ శఙ్కర ॥ 19

యో దదాతి నిషిద్ధేభ్యః స వై భ్రష్టో భవేద్ధ్రువమ్ ।
అనేన కవచేశేన రక్షాం కృత్వా ద్విజోత్తమః ॥ 20

విచరన్ యత్ర కుత్రాపి విఘ్నౌఘైః ప్రాప్యతే న సః ।
మన్త్రేణ మ్రియతే యోగీ కవచం యన్న రక్షితః ॥ 21

తస్మాత్ సర్వప్రయత్నేన దుర్లభం పాపచేతసామ్ ।
భూర్జే రమ్భాత్వచే వాపి లిఖిత్వా విధివత్ ప్రభో ॥ 22

ధారయేత్ పాఠయేద్వాపి సమ్పఠేద్వాపి నిత్యశః ।
సమ్ప్రాప్నోతి ప్రభావం వై కవచస్యాస్య వర్ణితమ్ ॥ 23

నమో భైరవదేవాయ సారభూతాయ వై నమః ।
నమస్త్రైలోక్యనాథాయ నాథనాథాయ వై నమః ॥ 24

ఇతి విశ్వసారోద్ధారతన్త్రే ఆపదుద్ధారకల్పే భైరవభైరవీసంవాదే వటుకభైరవకవచం సమాప్తమ్ ॥