এবমারাধ্য গৌরীশং দেবং মৃত্যুংজযেশ্বরম্ ।
মৃতসংজীবনং নাম্না কবচং প্রজপেত্ সদা ॥ 1 ॥
সারাত্সারতরং পুণ্যং গুহ্যাদ্গুহ্যতরং শুভম্ ।
মহাদেবস্য কবচং মৃতসংজীবনামকম্ ॥ 2 ॥
সমাহিতমনা ভূত্বা শৃণুষ্ব কবচং শুভম্ ।
শৃত্বৈতদ্দিব্য কবচং রহস্যং কুরু সর্বদা ॥ 3 ॥
বরাভযকরো যজ্বা সর্বদেবনিষেবিতঃ ।
মৃত্যুংজযো মহাদেবঃ প্রাচ্যাং মাং পাতু সর্বদা ॥ 4 ॥
দধানঃ শক্তিমভযাং ত্রিমুখং ষড্ভুজঃ প্রভুঃ ।
সদাশিবোঽগ্নিরূপী মামাগ্নেয্যাং পাতু সর্বদা ॥ 5 ॥
অষ্টাদশভুজোপেতো দংডাভযকরো বিভুঃ ।
যমরূপী মহাদেবো দক্ষিণস্যাং সদাবতু ॥ 6 ॥
খড্গাভযকরো ধীরো রক্ষোগণনিষেবিতঃ ।
রক্ষোরূপী মহেশো মাং নৈরৃত্যাং সর্বদাবতু ॥ 7 ॥
পাশাভযভুজঃ সর্বরত্নাকরনিষেবিতঃ ।
বরুণাত্মা মহাদেবঃ পশ্চিমে মাং সদাবতু ॥ 8 ॥
গদাভযকরঃ প্রাণনাযকঃ সর্বদাগতিঃ ।
বাযব্যাং মারুতাত্মা মাং শংকরঃ পাতু সর্বদা ॥ 9 ॥
শংখাভযকরস্থো মাং নাযকঃ পরমেশ্বরঃ ।
সর্বাত্মাংতরদিগ্ভাগে পাতু মাং শংকরঃ প্রভুঃ ॥ 10 ॥
শূলাভযকরঃ সর্ববিদ্যানামধিনাযকঃ ।
ঈশানাত্মা তথৈশান্যাং পাতু মাং পরমেশ্বরঃ ॥ 11 ॥
ঊর্ধ্বভাগে ব্রহ্মরূপী বিশ্বাত্মাধঃ সদাবতু ।
শিরো মে শংকরঃ পাতু ললাটং চংদ্রশেখরঃ ॥ 12 ॥
ভ্রূমধ্যং সর্বলোকেশস্ত্রিনেত্রো লোচনেঽবতু ।
ভ্রূযুগ্মং গিরিশঃ পাতু কর্ণৌ পাতু মহেশ্বরঃ ॥ 13 ॥
নাসিকাং মে মহাদেব ওষ্ঠৌ পাতু বৃষধ্বজঃ ।
জিহ্বাং মে দক্ষিণামূর্তির্দংতান্মে গিরিশোঽবতু ॥ 14 ॥
মৃত্যুংজযো মুখং পাতু কংঠং মে নাগভূষণঃ ।
পিনাকি মত্করৌ পাতু ত্রিশূলি হৃদযং মম ॥ 15 ॥
পংচবক্ত্রঃ স্তনৌ পাতু উদরং জগদীশ্বরঃ ।
নাভিং পাতু বিরূপাক্ষঃ পার্শ্বৌ মে পার্বতীপতিঃ ॥ 16 ॥
কটদ্বযং গিরীশো মে পৃষ্ঠং মে প্রমথাধিপঃ ।
গুহ্যং মহেশ্বরঃ পাতু মমোরূ পাতু ভৈরবঃ ॥ 17 ॥
জানুনী মে জগদ্ধর্তা জংঘে মে জগদংবিকা ।
পাদৌ মে সততং পাতু লোকবংদ্যঃ সদাশিবঃ ॥ 18 ॥
গিরিশঃ পাতু মে ভার্যাং ভবঃ পাতু সুতান্মম ।
মৃত্যুংজযো মমাযুষ্যং চিত্তং মে গণনাযকঃ ॥ 19 ॥
সর্বাংগং মে সদা পাতু কালকালঃ সদাশিবঃ ।
এতত্তে কবচং পুণ্যং দেবতানাং চ দুর্লভম্ ॥ 20 ॥
মৃতসংজীবনং নাম্না মহাদেবেন কীর্তিতম্ ।
সহস্রাবর্তনং চাস্য পুরশ্চরণমীরিতম্ ॥ 21 ॥
যঃ পঠেচ্চৃণুযান্নিত্যং শ্রাবযেত্সু সমাহিতঃ ।
স কালমৃত্যুং নির্জিত্য সদাযুষ্যং সমশ্নুতে ॥ 22 ॥
হস্তেন বা যদা স্পৃষ্ট্বা মৃতং সংজীবযত্যসৌ ।
আধযোব্যাধযস্তস্য ন ভবংতি কদাচন ॥ 23 ॥
কালমৃত্যুমপি প্রাপ্তমসৌ জযতি সর্বদা ।
অণিমাদিগুণৈশ্বর্যং লভতে মানবোত্তমঃ ॥ 24 ॥
যুদ্ধারংভে পঠিত্বেদমষ্টাবিংশতিবারকম্ ।
যুদ্ধমধ্যে স্থিতঃ শত্রুঃ সদ্যঃ সর্বৈর্ন দৃশ্যতে ॥ 25 ॥
ন ব্রহ্মাদীনি চাস্ত্রাণি ক্ষযং কুর্বংতি তস্য বৈ ।
বিজযং লভতে দেবযুদ্ধমধ্যেঽপি সর্বদা ॥ 26 ॥
প্রাতরুত্থায সততং যঃ পঠেত্কবচং শুভম্ ।
অক্ষয্যং লভতে সৌখ্যমিহলোকে পরত্র চ ॥ 27 ॥
সর্বব্যাধিবিনির্মুক্তঃ সর্বরোগবিবর্জিতঃ ।
অজরামরণো ভূত্বা সদা ষোডশবার্ষিকঃ ॥ 28 ॥
বিচরত্যখিলান্লোকান্প্রাপ্য ভোগাংশ্চ দুর্লভান্ ।
তস্মাদিদং মহাগোপ্যং কবচং সমুদাহৃতম্ ॥ 29 ॥
মৃতসংজীবনং নাম্না দেবতৈরপি দুর্লভম্ ॥ 30 ॥
ইতি বসিষ্ঠ কৃত মৃতসংজীবন কবচ স্তোত্রম্ ॥
