એવમારાધ્ય ગૌરીશં દેવં મૃત્યુંજયેશ્વરમ્ ।
મૃતસંજીવનં નામ્ના કવચં પ્રજપેત્ સદા ॥ 1 ॥
સારાત્સારતરં પુણ્યં ગુહ્યાદ્ગુહ્યતરં શુભમ્ ।
મહાદેવસ્ય કવચં મૃતસંજીવનામકમ્ ॥ 2 ॥
સમાહિતમના ભૂત્વા શૃણુષ્વ કવચં શુભમ્ ।
શૃત્વૈતદ્દિવ્ય કવચં રહસ્યં કુરુ સર્વદા ॥ 3 ॥
વરાભયકરો યજ્વા સર્વદેવનિષેવિતઃ ।
મૃત્યુંજયો મહાદેવઃ પ્રાચ્યાં માં પાતુ સર્વદા ॥ 4 ॥
દધાનઃ શક્તિમભયાં ત્રિમુખં ષડ્ભુજઃ પ્રભુઃ ।
સદાશિવોઽગ્નિરૂપી મામાગ્નેય્યાં પાતુ સર્વદા ॥ 5 ॥
અષ્ટાદશભુજોપેતો દંડાભયકરો વિભુઃ ।
યમરૂપી મહાદેવો દક્ષિણસ્યાં સદાવતુ ॥ 6 ॥
ખડ્ગાભયકરો ધીરો રક્ષોગણનિષેવિતઃ ।
રક્ષોરૂપી મહેશો માં નૈરૃત્યાં સર્વદાવતુ ॥ 7 ॥
પાશાભયભુજઃ સર્વરત્નાકરનિષેવિતઃ ।
વરુણાત્મા મહાદેવઃ પશ્ચિમે માં સદાવતુ ॥ 8 ॥
ગદાભયકરઃ પ્રાણનાયકઃ સર્વદાગતિઃ ।
વાયવ્યાં મારુતાત્મા માં શંકરઃ પાતુ સર્વદા ॥ 9 ॥
શંખાભયકરસ્થો માં નાયકઃ પરમેશ્વરઃ ।
સર્વાત્માંતરદિગ્ભાગે પાતુ માં શંકરઃ પ્રભુઃ ॥ 10 ॥
શૂલાભયકરઃ સર્વવિદ્યાનામધિનાયકઃ ।
ઈશાનાત્મા તથૈશાન્યાં પાતુ માં પરમેશ્વરઃ ॥ 11 ॥
ઊર્ધ્વભાગે બ્રહ્મરૂપી વિશ્વાત્માધઃ સદાવતુ ।
શિરો મે શંકરઃ પાતુ લલાટં ચંદ્રશેખરઃ ॥ 12 ॥
ભ્રૂમધ્યં સર્વલોકેશસ્ત્રિનેત્રો લોચનેઽવતુ ।
ભ્રૂયુગ્મં ગિરિશઃ પાતુ કર્ણૌ પાતુ મહેશ્વરઃ ॥ 13 ॥
નાસિકાં મે મહાદેવ ઓષ્ઠૌ પાતુ વૃષધ્વજઃ ।
જિહ્વાં મે દક્ષિણામૂર્તિર્દંતાન્મે ગિરિશોઽવતુ ॥ 14 ॥
મૃત્યુંજયો મુખં પાતુ કંઠં મે નાગભૂષણઃ ।
પિનાકિ મત્કરૌ પાતુ ત્રિશૂલિ હૃદયં મમ ॥ 15 ॥
પંચવક્ત્રઃ સ્તનૌ પાતુ ઉદરં જગદીશ્વરઃ ।
નાભિં પાતુ વિરૂપાક્ષઃ પાર્શ્વૌ મે પાર્વતીપતિઃ ॥ 16 ॥
કટદ્વયં ગિરીશો મે પૃષ્ઠં મે પ્રમથાધિપઃ ।
ગુહ્યં મહેશ્વરઃ પાતુ મમોરૂ પાતુ ભૈરવઃ ॥ 17 ॥
જાનુની મે જગદ્ધર્તા જંઘે મે જગદંબિકા ।
પાદૌ મે સતતં પાતુ લોકવંદ્યઃ સદાશિવઃ ॥ 18 ॥
ગિરિશઃ પાતુ મે ભાર્યાં ભવઃ પાતુ સુતાન્મમ ।
મૃત્યુંજયો મમાયુષ્યં ચિત્તં મે ગણનાયકઃ ॥ 19 ॥
સર્વાંગં મે સદા પાતુ કાલકાલઃ સદાશિવઃ ।
એતત્તે કવચં પુણ્યં દેવતાનાં ચ દુર્લભમ્ ॥ 20 ॥
મૃતસંજીવનં નામ્ના મહાદેવેન કીર્તિતમ્ ।
સહસ્રાવર્તનં ચાસ્ય પુરશ્ચરણમીરિતમ્ ॥ 21 ॥
યઃ પઠેચ્ચૃણુયાન્નિત્યં શ્રાવયેત્સુ સમાહિતઃ ।
સ કાલમૃત્યું નિર્જિત્ય સદાયુષ્યં સમશ્નુતે ॥ 22 ॥
હસ્તેન વા યદા સ્પૃષ્ટ્વા મૃતં સંજીવયત્યસૌ ।
આધયોવ્યાધયસ્તસ્ય ન ભવંતિ કદાચન ॥ 23 ॥
કાલમૃત્યુમપિ પ્રાપ્તમસૌ જયતિ સર્વદા ।
અણિમાદિગુણૈશ્વર્યં લભતે માનવોત્તમઃ ॥ 24 ॥
યુદ્ધારંભે પઠિત્વેદમષ્ટાવિંશતિવારકમ્ ।
યુદ્ધમધ્યે સ્થિતઃ શત્રુઃ સદ્યઃ સર્વૈર્ન દૃશ્યતે ॥ 25 ॥
ન બ્રહ્માદીનિ ચાસ્ત્રાણિ ક્ષયં કુર્વંતિ તસ્ય વૈ ।
વિજયં લભતે દેવયુદ્ધમધ્યેઽપિ સર્વદા ॥ 26 ॥
પ્રાતરુત્થાય સતતં યઃ પઠેત્કવચં શુભમ્ ।
અક્ષય્યં લભતે સૌખ્યમિહલોકે પરત્ર ચ ॥ 27 ॥
સર્વવ્યાધિવિનિર્મુક્તઃ સર્વરોગવિવર્જિતઃ ।
અજરામરણો ભૂત્વા સદા ષોડશવાર્ષિકઃ ॥ 28 ॥
વિચરત્યખિલાન્લોકાન્પ્રાપ્ય ભોગાંશ્ચ દુર્લભાન્ ।
તસ્માદિદં મહાગોપ્યં કવચં સમુદાહૃતમ્ ॥ 29 ॥
મૃતસંજીવનં નામ્ના દેવતૈરપિ દુર્લભમ્ ॥ 30 ॥
ઇતિ વસિષ્ઠ કૃત મૃતસંજીવન કવચ સ્તોત્રમ્ ॥
