𑌪𑌾𑌂𑌡𑌿𑌤𑍍𑌯𑌂 𑌪𑌰𑌮𑍇𑌶𑍍𑌵𑌰𑌿 𑌸𑍍𑌤𑍁𑌤𑌿𑌵𑌿𑌧𑍌 𑌨𑍈𑌵𑌾𑌶𑍍𑌰𑌯𑌂𑌤𑍇 𑌗𑌿𑌰𑌾𑌂
𑌵𑍈𑌰𑌿𑌂𑌚𑌾𑌨𑍍𑌯𑌪𑌿 𑌗𑍁𑌂𑌫𑌨𑌾𑌨𑌿 𑌵𑌿𑌗𑌲𑌦𑍍𑌗𑌰𑍍𑌵𑌾𑌣𑌿 𑌶𑌰𑍍𑌵𑌾𑌣𑌿 𑌤𑍇 ।
𑌸𑍍𑌤𑍋𑌤𑍁𑌂 𑌤𑍍𑌵𑌾𑌂 𑌪𑌰𑌿𑌫𑍁𑌲𑍍𑌲𑌨𑍀𑌲𑌨𑌲𑌿𑌨𑌶𑍍𑌯𑌾𑌮𑌾𑌕𑍍𑌷𑌿 𑌕𑌾𑌮𑌾𑌕𑍍𑌷𑌿 𑌮𑌾𑌂
𑌵𑌾𑌚𑌾𑌲𑍀𑌕𑍁𑌰𑍁𑌤𑍇 𑌤𑌥𑌾𑌪𑌿 𑌨𑌿𑌤𑌰𑌾𑌂 𑌤𑍍𑌵𑌤𑍍𑌪𑌾𑌦𑌸𑍇𑌵𑌾𑌦𑌰𑌃 ॥1॥

𑌤𑌾𑌪𑌿𑌂𑌛𑌸𑍍𑌤𑌬𑌕𑌤𑍍𑌵𑌿𑌷𑍇 𑌤𑌨𑍁𑌭𑍃𑌤𑌾𑌂 𑌦𑌾𑌰𑌿𑌦𑍍𑌰𑍍𑌯𑌮𑍁𑌦𑍍𑌰𑌾𑌦𑍍𑌵𑌿𑌷𑍇
𑌸𑌂𑌸𑌾𑌰𑌾𑌖𑍍𑌯𑌤𑌮𑍋𑌮𑍁𑌷𑍇 𑌪𑍁𑌰𑌰𑌿𑌪𑍋𑌰𑍍𑌵𑌾𑌮𑌾𑌂𑌕𑌸𑍀𑌮𑌾𑌜𑍁𑌷𑍇 ।
𑌕𑌂𑌪𑌾𑌤𑍀𑌰𑌮𑍁𑌪𑍇𑌯𑍁𑌷𑍇 𑌕𑌵𑌯𑌤𑌾𑌂 𑌜𑌿𑌹𑍍𑌵𑌾𑌕𑍁𑌟𑍀𑌂 𑌜𑌗𑍍𑌮𑍁𑌷𑍇
𑌵𑌿𑌶𑍍𑌵𑌤𑍍𑌰𑌾𑌣𑌪𑍁𑌷𑍇 𑌨𑌮𑍋𑌽𑌸𑍍𑌤𑍁 𑌸𑌤𑌤𑌂 𑌤𑌸𑍍𑌮𑍈 𑌪𑌰𑌂𑌜𑍍𑌯𑍋𑌤𑌿𑌷𑍇 ॥2॥

𑌯𑍇 𑌸𑌂𑌧𑍍𑌯𑌾𑌰𑍁𑌣𑌯𑌂𑌤𑌿 𑌶𑌂𑌕𑌰𑌜𑌟𑌾𑌕𑌾𑌂𑌤𑌾𑌰𑌚𑌨𑍍𑌰𑌾𑌰𑍍𑌭𑌕𑌂
𑌸𑌿𑌂𑌦𑍂𑌰𑌂𑌤𑌿 𑌚 𑌯𑍇 𑌪𑍁𑌰𑌂𑌦𑌰𑌵𑌧𑍂𑌸𑍀𑌮𑌂𑌤𑌸𑍀𑌮𑌾𑌂𑌤𑌰𑍇 ।
𑌪𑍁𑌣𑍍𑌯.𑌂 𑌯𑍇 𑌪𑌰𑌿𑌪𑌕𑍍𑌕𑌯𑌂𑌤𑌿 𑌭𑌜𑌤𑌾𑌂 𑌕𑌾𑌂𑌚𑍀𑌪𑍁𑌰𑍇 𑌮𑌾𑌮𑌮𑍀
𑌪𑌾𑌯𑌾𑌸𑍁𑌃 𑌪𑌰𑌮𑍇𑌶𑍍𑌵𑌰𑌪𑍍𑌰𑌣𑌯𑌿𑌨𑍀𑌪𑌾𑌦𑍋𑌦𑍍𑌭𑌵𑌾𑌃 𑌪𑌾𑌂𑌸𑌵𑌃 ॥3॥

𑌕𑌾𑌮𑌾𑌡𑌂𑌬𑌰𑌪𑍂𑌰𑌯𑌾 𑌶𑌶𑌿𑌰𑍁𑌚𑌾 𑌕𑌮𑍍𑌰𑌸𑍍𑌮𑌿𑌤𑌾𑌨𑌾𑌂 𑌤𑍍𑌵𑌿𑌷𑌾
𑌕𑌾𑌮𑌾𑌰𑍇𑌰𑌨𑍁𑌰𑌾𑌗𑌸𑌿𑌂𑌧𑍁𑌮𑌧𑌿𑌕𑌂 𑌕𑌲𑍍𑌲𑍋𑌲𑌿𑌤𑌂 𑌤𑌨𑍍𑌵𑌤𑍀 ।
𑌕𑌾𑌮𑌾𑌕𑍍𑌷𑍀𑌤𑌿 𑌸𑌮𑌸𑍍𑌤𑌸𑌜𑍍𑌜𑌨𑌨𑍁𑌤𑌾 𑌕𑌲𑍍𑌯𑌾𑌣𑌦𑌾𑌤𑍍𑌰𑍀 𑌨𑍃𑌣𑌾𑌂
𑌕𑌾𑌰𑍁𑌣𑍍𑌯𑌾𑌕𑍁𑌲𑌮𑌾𑌨𑌸𑌾 𑌭𑌗𑌵𑌤𑍀 𑌕𑌂𑌪𑌾𑌤𑌟𑍇 𑌜𑍃𑌂𑌭𑌤𑍇 ॥4॥

𑌕𑌾𑌮𑌾𑌕𑍍𑌷𑍀𑌣𑌪𑌰𑌾𑌕𑍍𑌰𑌮𑌪𑍍𑌰𑌕𑌟𑌨𑌂 𑌸𑌂𑌭𑌾𑌵𑌯𑌂𑌤𑍀 𑌦𑍃𑌶𑌾
𑌶𑍍𑌯𑌾𑌮𑌾 𑌕𑍍𑌷𑍀𑌰𑌸𑌹𑍋𑌦𑌰𑌸𑍍𑌮𑌿𑌤𑌰𑍁𑌚𑌿𑌪𑍍𑌰𑌕𑍍𑌷𑌾𑌲𑌿𑌤𑌾𑌶𑌾𑌂𑌤𑌰𑌾 ।
𑌕𑌾𑌮𑌾𑌕𑍍𑌷𑍀𑌜𑌨𑌮𑍌𑌲𑌿𑌭𑍂𑌷𑌣𑌮𑌣𑌿𑌰𑍍𑌵𑌾𑌚𑌾𑌂 𑌪𑌰𑌾 𑌦𑍇𑌵𑌤𑌾
𑌕𑌾𑌮𑌾𑌕𑍍𑌷𑍀𑌤𑌿 𑌵𑌿𑌭𑌾𑌤𑌿 𑌕𑌾𑌪𑌿 𑌕𑌰𑍁𑌣𑌾 𑌕𑌂𑌪𑌾𑌤𑌟𑌿𑌨𑍍𑌯𑌾𑌸𑍍𑌤𑌟𑍇 ॥5॥

𑌶𑍍𑌯𑌾𑌮𑌾 𑌕𑌾𑌚𑌨 𑌚𑌂𑌦𑍍𑌰𑌿𑌕𑌾 𑌤𑍍𑌰𑌿𑌭𑍁𑌵𑌨𑍇 𑌪𑍁𑌣𑍍𑌯𑌾𑌤𑍍𑌮𑌨𑌾𑌮𑌾𑌨𑌨𑍇
𑌸𑍀𑌮𑌾𑌶𑍂𑌨𑍍𑌯𑌕𑌵𑌿𑌤𑍍𑌵𑌵𑌰𑍍𑌷𑌜𑌨𑌨𑍀 𑌯𑌾 𑌕𑌾𑌪𑌿 𑌕𑌾𑌦𑌂𑌬𑌿𑌨𑍀 ।
𑌮𑌾𑌰𑌾𑌰𑌾𑌤𑌿𑌮𑌨𑍋𑌵𑌿𑌮𑍋𑌹𑌨𑌵𑌿𑌧𑍌 𑌕𑌾𑌚𑌿𑌤𑌤𑍍𑌤𑌮𑌃𑌕𑌂𑌦𑌲𑍀
𑌕𑌾𑌮𑌾𑌕𑍍𑌷𑍍𑌯𑌾𑌃 𑌕𑌰𑍁𑌣𑌾𑌕𑌟𑌾𑌕𑍍𑌷𑌲𑌹𑌰𑍀 𑌕𑌾𑌮𑌾𑌯 𑌮𑍇 𑌕𑌲𑍍𑌪𑌤𑌾𑌮𑍍 ॥6॥

𑌪𑍍𑌰𑍌𑌢𑌧𑍍𑌵𑌾𑌂𑌤𑌕𑌦𑌂𑌬𑌕𑍇 𑌕𑍁𑌮𑍁𑌦𑌿𑌨𑍀𑌪𑍁𑌣𑍍𑌯𑌾𑌂𑌕𑍁𑌰𑌂 𑌦𑌰𑍍𑌶𑌯𑌨𑍍
𑌜𑍍𑌯𑍋𑌤𑍍𑌸𑍍𑌨𑌾𑌸𑌂𑌗𑌮𑌨𑍇𑌽𑌪𑌿 𑌕𑍋𑌕𑌮𑌿𑌥𑍁𑌨𑌂 𑌮𑌿𑌶𑍍𑌰𑌂 𑌸𑌮𑍁𑌦𑍍𑌭𑌾𑌵𑌯𑌨𑍍 ।
𑌕𑌾𑌲𑌿𑌂𑌦𑍀𑌲𑌹𑌰𑍀𑌦𑌶𑌾𑌂 𑌪𑍍𑌰𑌕𑌟𑌯𑌨𑍍𑌕𑌮𑍍𑌰𑌾𑌂 𑌨𑌭𑌸𑍍𑌯𑌦𑍍𑌭𑍁𑌤𑌾𑌂
𑌕𑌶𑍍𑌚𑌿𑌨𑍍𑌨𑍇𑌤𑍍𑌰𑌮𑌹𑍋𑌤𑍍𑌸𑌵𑍋 𑌵𑌿𑌜𑌯𑌤𑍇 𑌕𑌾𑌂𑌚𑍀𑌪𑍁𑌰𑍇 𑌶𑍂𑌲𑌿𑌨𑌃 ॥𑍭॥

𑌤𑌂𑌦𑍍𑌰𑌾𑌹𑍀𑌨𑌤𑌮𑌾𑌲𑌨𑍀𑌲𑌸𑍁𑌷𑌮𑍈𑌸𑍍𑌤𑌾𑌰𑍁𑌣𑍍𑌯𑌲𑍀𑌲𑌾𑌗𑍃𑌹𑍈𑌃
𑌤𑌾𑌰𑌾𑌨𑌾𑌥𑌕𑌿𑌶𑍋𑌰𑌲𑌾𑌂𑌛𑌿𑌤𑌕𑌚𑍈𑌸𑍍𑌤𑌾𑌮𑍍𑌰𑌾𑌰𑌵𑌿𑌂𑌦𑍇𑌕𑍍𑌷𑌣𑍈𑌃 ।
𑌮𑌾𑌤𑌃 𑌸𑌂𑌶𑍍𑌰𑌯𑌤𑌾𑌂 𑌮𑌨𑍋 𑌮𑌨𑌸𑌿𑌜𑌪𑍍𑌰𑌾𑌗𑌲𑍍𑌭𑍍𑌯𑌨𑌾𑌡𑌿𑌂𑌧𑌮𑍈𑌃
𑌕𑌂𑌪𑌾𑌤𑍀𑌰𑌚𑌰𑍈𑌰𑍍𑌘𑌨𑌸𑍍𑌤𑌨𑌭𑌰𑍈𑌃 𑌪𑍁𑌣𑍍𑌯𑌾𑌂𑌕𑌰𑍈𑌃 𑌶𑌾𑌂𑌕𑌰𑍈𑌃 ॥𑍮॥

𑌨𑌿𑌤𑍍𑌯𑌂 𑌨𑌿𑌶𑍍𑌚𑌲𑌤𑌾𑌮𑍁𑌪𑍇𑌤𑍍𑌯 𑌮𑌰𑍁𑌤𑌾𑌂 𑌰𑌕𑍍𑌷𑌾𑌵𑌿𑌧𑌿𑌂 𑌪𑍁𑌷𑍍𑌣𑌤𑍀
𑌤𑍇𑌜𑌸𑍍𑌸𑌂𑌚𑌯𑌪𑌾𑌟𑌵𑍇𑌨 𑌕𑌿𑌰𑌣𑌾𑌨𑍁𑌷𑍍𑌣𑌦𑍍𑌯𑍁𑌤𑍇𑌰𑍍𑌮𑍁𑌷𑍍𑌣𑌤𑍀 ।
𑌕𑌾𑌂𑌚𑍀𑌮𑌧𑍍𑌯𑌗𑌤𑌾𑌪𑌿 𑌦𑍀𑌪𑍍𑌤𑌿𑌜𑌨𑌨𑍀 𑌵𑌿𑌶𑍍𑌵𑌾𑌂𑌤𑌰𑍇 𑌜𑍃𑌂𑌭𑌤𑍇
𑌕𑌾𑌚𑌿𑌚𑍍𑌚𑌿𑌤𑍍𑌰𑌮𑌹𑍋 𑌸𑍍𑌮𑍃𑌤𑌾𑌪𑌿 𑌤𑌮𑌸𑌾𑌂 𑌨𑌿𑌰𑍍𑌵𑌾𑌪𑌿𑌕𑌾 𑌦𑍀𑌪𑌿𑌕𑌾 ॥𑍯॥

𑌕𑌾𑌂𑌤𑍈𑌃 𑌕𑍇𑌶𑌰𑍁𑌚𑌾𑌂 𑌚𑌯𑍈𑌰𑍍𑌭𑍍𑌰𑌮𑌰𑌿𑌤𑌂 𑌮𑌂𑌦𑌸𑍍𑌮𑌿𑌤𑍈𑌃 𑌪𑍁𑌷𑍍𑌪𑌿𑌤𑌂
𑌕𑌾𑌂𑌤𑍍𑌯𑌾 𑌪𑌲𑍍𑌲𑌵𑌿𑌤𑌂 𑌪𑌦𑌾𑌂𑌬𑍁𑌰𑍁𑌹𑌯𑍋𑌰𑍍𑌨𑍇𑌤𑍍𑌰𑌤𑍍𑌵𑌿𑌷𑌾 𑌪𑌤𑍍𑌰𑌿𑌤𑌮𑍍 ।
𑌕𑌂𑌪𑌾𑌤𑍀𑌰𑌵𑌨𑌾𑌂𑌤𑌰𑌂 𑌵𑌿𑌦𑌧𑌤𑍀 𑌕𑌲𑍍𑌯𑌾𑌣𑌜𑌨𑍍𑌮𑌸𑍍𑌥𑌲𑍀
𑌕𑌾𑌂𑌚𑍀𑌮𑌧𑍍𑌯𑌮𑌹𑌾𑌮𑌣𑌿𑌰𑍍𑌵𑌿𑌜𑌯𑌤𑍇 𑌕𑌾𑌚𑌿𑌤𑍍𑌕𑍃𑌪𑌾𑌕𑌂𑌦𑌲𑍀 ॥10॥

𑌰𑌾𑌕𑌾𑌚𑌂𑌦𑍍𑌰𑌸𑌮𑌾𑌨𑌕𑌾𑌂𑌤𑌿𑌵𑌦𑌨𑌾 𑌨𑌾𑌕𑌾𑌧𑌿𑌰𑌾𑌜𑌸𑍍𑌤𑍁𑌤𑌾
𑌮𑍂𑌕𑌾𑌨𑌾𑌮𑌪𑌿 𑌕𑍁𑌰𑍍𑌵𑌤𑍀 𑌸𑍁𑌰𑌧𑌨𑍀𑌨𑍀𑌕𑌾𑌶𑌵𑌾𑌗𑍍𑌵𑍈𑌭𑌵𑌮𑍍 ।
𑌶𑍍𑌰𑍀𑌕𑌾𑌂𑌚𑍀𑌨𑌗𑌰𑍀𑌵𑌿𑌹𑌾𑌰𑌰𑌸𑌿𑌕𑌾 𑌶𑍋𑌕𑌾𑌪𑌹𑌂𑌤𑍍𑌰𑍀 𑌸𑌤𑌾𑌮𑍍
𑌏𑌕𑌾 𑌪𑍁𑌣𑍍𑌯𑌪𑌰𑌂𑌪𑌰𑌾 𑌪𑌶𑍁𑌪𑌤𑍇𑌰𑌾𑌕𑌾𑌰𑌿𑌣𑍀 𑌰𑌾𑌜𑌤𑍇 ॥11॥

𑌜𑌾𑌤𑌾 𑌶𑍀𑌤𑌲𑌶𑍈𑌲𑌤𑌃 𑌸𑍁𑌕𑍃𑌤𑌿𑌨𑌾𑌂 𑌦𑍃𑌶𑍍𑌯𑌾 𑌪𑌰𑌂 𑌦𑍇𑌹𑌿𑌨𑌾𑌂
𑌲𑍋𑌕𑌾𑌨𑌾𑌂 𑌕𑍍𑌷𑌣𑌮𑌾𑌤𑍍𑌰𑌸𑌂𑌸𑍍𑌮𑌰𑌣𑌤𑌃 𑌸𑌂𑌤𑌾𑌪𑌵𑌿𑌚𑍍𑌛𑍇𑌦𑌿𑌨𑍀 ।
𑌆𑌶𑍍𑌚𑌰𑍍𑌯𑌂 𑌬𑌹𑍁 𑌖𑍇𑌲𑌨𑌂 𑌵𑌿𑌤𑌨𑍁𑌤𑍇 𑌨𑍈𑌶𑍍𑌚𑌲𑍍𑌯𑌮𑌾𑌬𑌿𑌭𑍍𑌰𑌤𑍀
𑌕𑌂𑌪𑌾𑌯𑌾𑌸𑍍𑌤𑌟𑌸𑍀𑌮𑍍𑌨𑌿 𑌕𑌾𑌪𑌿 𑌤𑌟𑌿𑌨𑍀 𑌕𑌾𑌰𑍁𑌣𑍍𑌯𑌪𑌾𑌥𑍋𑌮𑌯𑍀 ॥12॥

𑌐𑌕𑍍𑌯𑌂 𑌯𑍇𑌨 𑌵𑌿𑌰𑌚𑍍𑌯𑌤𑍇 𑌹𑌰𑌤𑌨𑍌 𑌦𑌂𑌭𑌾𑌵𑌪𑍁𑌂𑌭𑌾𑌵𑍁𑌕𑍇
𑌰𑍇𑌖𑌾 𑌯𑌤𑍍𑌕𑌚𑌸𑍀𑌮𑍍𑌨𑌿 𑌶𑍇𑌖𑌰𑌦𑌶𑌾𑌂 𑌨𑍈𑌶𑌾𑌕𑌰𑍀 𑌗𑌾𑌹𑌤𑍇 ।
𑌔𑌨𑍍𑌨𑌤𑍍𑌯𑌂 𑌮𑍁𑌹𑍁𑌰𑍇𑌤𑌿 𑌯𑍇𑌨 𑌸 𑌮𑌹𑌾𑌨𑍍𑌮𑍇𑌨𑌾𑌸𑌖𑌃 𑌸𑌾𑌨𑍁𑌮𑌾𑌨𑍍
𑌕𑌂𑌪𑌾𑌤𑍀𑌰𑌵𑌿𑌹𑌾𑌰𑌿𑌣𑌾 𑌸𑌶𑌰𑌣𑌾𑌸𑍍𑌤𑍇𑌨𑍈𑌵 𑌧𑌾𑌮𑍍𑌨𑌾 𑌵𑌯𑌮𑍍 ॥13॥

𑌅𑌕𑍍𑌷𑍍𑌣𑍋𑌶𑍍𑌚 𑌸𑍍𑌤𑌨𑌯𑍋𑌃 𑌶𑍍𑌰𑌿𑌯𑌾 𑌶𑍍𑌰𑌵𑌣𑌯𑍋𑌰𑍍𑌬𑌾𑌹𑍍𑌵𑍋𑌶𑍍𑌚 𑌮𑍂𑌲𑌂 𑌸𑍍𑌪𑍃𑌶𑌨𑍍
𑌉𑌤𑍍𑌤𑌂𑌸𑍇𑌨 𑌮𑍁𑌖𑍇𑌨 𑌚 𑌪𑍍𑌰𑌤𑌿𑌦𑌿𑌨𑌂 𑌦𑍍𑌰𑍁𑌹𑍍𑌯𑌨𑍍𑌪𑌯𑍋𑌜𑌨𑍍𑌮𑌨𑍇 ।
𑌮𑌾𑌧𑍁𑌰𑍍𑌯𑍇𑌣 𑌗𑌿𑌰𑌾𑌂 𑌗𑌤𑍇𑌨 𑌮𑍃𑌦𑍁𑌨𑌾 𑌹𑌂𑌸𑌾𑌂𑌗𑌨𑌾𑌂 𑌹𑍍𑌰𑍇𑌪𑌯𑌨𑍍
𑌕𑌾𑌂𑌚𑍀𑌸𑍀𑌮𑍍𑌨𑌿 𑌚𑌕𑌾𑌸𑍍𑌤𑌿 𑌕𑍋𑌽𑌪𑌿 𑌕𑌵𑌿𑌤𑌾𑌸𑌂𑌤𑌾𑌨𑌬𑍀𑌜𑌾𑌂𑌕𑍁𑌰𑌃 ॥14॥

𑌖𑌂𑌡𑌂 𑌚𑌾𑌂𑌦𑍍𑌰𑌮𑌸𑌂 𑌵𑌤𑌂𑌸𑌮𑌨𑌿𑌶𑌂 𑌕𑌾𑌂𑌚𑍀𑌪𑍁𑌰𑍇 𑌖𑍇𑌲𑌨𑌂
𑌕𑌾𑌲𑌾𑌯𑌶𑍍𑌛𑌵𑌿𑌤𑌸𑍍𑌕𑌰𑍀𑌂 𑌤𑌨𑍁𑌰𑍁𑌚𑌿𑌂 𑌕𑌰𑍍𑌣𑌜𑌪𑍇 𑌲𑍋𑌚𑌨𑍇 ।
𑌤𑌾𑌰𑍁𑌣𑍍𑌯𑍋𑌷𑍍𑌮𑌨𑌖𑌂𑌪𑌚𑌂 𑌸𑍍𑌤𑌨𑌭𑌰𑌂 𑌜𑌂𑌘𑌾𑌸𑍍𑌪𑍃𑌶𑌂 𑌕𑍁𑌂𑌤𑌲𑌂
𑌭𑌾𑌗𑍍𑌯𑌂 𑌦𑍇𑌶𑌿𑌕𑌸𑌂𑌚𑌿𑌤𑌂 𑌮𑌮 𑌕𑌦𑌾 𑌸𑌂𑌪𑌾𑌦𑌯𑍇𑌦𑌂𑌬𑌿𑌕𑍇 ॥15॥

𑌤𑌨𑍍𑌵𑌾𑌨𑌂 𑌨𑌿𑌜𑌕𑍇𑌲𑌿𑌸𑍌𑌧𑌸𑌰𑌣𑌿𑌂 𑌨𑍈𑌸𑌰𑍍𑌗𑌿𑌕𑍀𑌣𑌾𑌂 𑌗𑌿𑌰𑌾𑌂
𑌕𑍇𑌦𑌾𑌰𑌂 𑌕𑌵𑌿𑌮𑌲𑍍𑌲𑌸𑍂𑌕𑍍𑌤𑌿𑌲𑌹𑌰𑍀𑌸𑌸𑍍𑌯𑌶𑍍𑌰𑌿𑌯𑌾𑌂 𑌶𑌾𑌶𑍍𑌵𑌤𑌮𑍍 ।
𑌅𑌂𑌹𑍋𑌵𑌂𑌚𑌨𑌚𑍁𑌂𑌚𑍁 𑌕𑌿𑌂𑌚𑌨 𑌭𑌜𑍇 𑌕𑌾𑌂𑌚𑍀𑌪𑍁𑌰𑍀𑌮𑌂𑌡𑌨𑌂
𑌪𑌰𑍍𑌯𑌾𑌯𑌚𑍍𑌛𑌵𑌿 𑌪𑌾𑌕𑌶𑌾𑌸𑌨𑌮𑌣𑍇𑌃 𑌪𑍌𑌷𑍍𑌪𑍇𑌷𑌵𑌂 𑌪𑍌𑌰𑍁𑌷𑌮𑍍 ॥16॥

𑌆𑌲𑍋𑌕𑍇 𑌮𑍁𑌖𑌪𑌂𑌕𑌜𑍇 𑌚 𑌦𑌧𑌤𑍀 𑌸𑍌𑌧𑌾𑌕𑌰𑍀𑌂 𑌚𑌾𑌤𑍁𑌰𑍀𑌂
𑌚𑍂𑌡𑌾𑌲𑌂𑌕𑍍𑌰𑌿𑌯𑌮𑌾𑌣𑌪𑌂𑌕𑌜𑌵𑌨𑍀𑌵𑍈𑌰𑌾𑌗𑌮𑌪𑍍𑌰𑌕𑍍𑌰𑌿𑌯𑌾 ।
𑌮𑍁𑌗𑍍𑌧𑌸𑍍𑌮𑍇𑌰𑌮𑍁𑌖𑍀 𑌘𑌨𑍍𑌸𑌤𑌨𑌤𑌟𑍀𑌮𑍂𑌰𑍍𑌚𑍍𑌛𑌾𑌲𑌮𑌧𑍍𑌯𑌾𑌂𑌚𑌿𑌤𑌾
𑌕𑌾𑌂𑌚𑍀𑌸𑍀𑌮𑌨𑌿 𑌕𑌾𑌮𑌿𑌨𑍀 𑌵𑌿𑌜𑌯𑌤𑍇 𑌕𑌾𑌚𑌿𑌜𑍍𑌜𑌗𑌨𑍍𑌮𑍋𑌹𑌿𑌨𑍀 ॥1𑍭॥

𑌯𑌸𑍍𑌮𑌿𑌨𑍍𑌨𑌂𑌬 𑌭𑌵𑌤𑍍𑌕𑌟𑌾𑌕𑍍𑌷𑌰𑌜𑌨𑍀 𑌮𑌂𑌦𑍇𑌽𑌪𑌿 𑌮𑌂𑌦𑌸𑍍𑌮𑌿𑌤-
𑌜𑍍𑌯𑍋𑌤𑍍𑌸𑍍𑌨𑌾𑌸𑌂𑌸𑍍𑌨𑌪𑌿𑌤𑌾 𑌭𑌵𑌤𑍍𑌯𑌭𑌿𑌮𑍁𑌖𑍀 𑌤𑌂 𑌪𑍍𑌰𑌤𑍍𑌯𑌹𑍋 𑌦𑍇𑌹𑌿𑌨𑌮𑍍 ।
𑌦𑍍𑌰𑌕𑍍𑌷𑌾𑌮𑌾𑌕𑍍𑌷𑌿𑌕𑌮𑌾𑌧𑍁𑌰𑍀𑌮𑌦𑌭𑌰𑌵𑍍𑌰𑍀𑌡𑌾𑌕𑌰𑍀 𑌵𑍈𑌖𑌰𑍀
𑌕𑌾𑌮𑌾𑌕𑍍𑌷𑌿 𑌸𑍍𑌵𑌯𑌮𑌾𑌤𑌨𑍋𑌤𑍍𑌯𑌭𑌿𑌸𑍃𑌤𑌿𑌂 𑌵𑌾𑌮𑍇𑌕𑍍𑌷𑌣𑍇𑌵 𑌕𑍍𑌷𑌣𑌮𑍍 ॥1𑍮॥

𑌕𑌾𑌲𑌿𑌂𑌦𑍀𑌜𑌲𑌕𑌾𑌂𑌤𑌯𑌃 𑌸𑍍𑌮𑌿𑌤𑌰𑍁𑌚𑌿𑌸𑍍𑌵𑌰𑍍𑌵𑌾𑌹𑌿𑌨𑍀𑌪𑌾𑌥𑌸𑌿
𑌪𑍍𑌰𑍌𑌢𑌧𑍍𑌵𑌾𑌂𑌤𑌰𑍁𑌚𑌃 𑌸𑍍𑌫𑍁𑌟𑌾𑌧𑌰𑌮𑌹𑍋𑌲𑍌𑌹𑌿𑌤𑍍𑌯𑌸𑌂𑌧𑍍𑌯𑍋𑌦𑌯𑍇 ।
𑌮𑌣𑌿𑌕𑍍𑌯𑍋𑌪𑌲𑌕𑍁𑌂𑌡𑌲𑌾𑌂𑌶𑍁𑌶𑌿𑌖𑌿𑌨𑌿 𑌵𑍍𑌯𑌾𑌮𑌿𑌶𑍍𑌰𑌧𑍂𑌮𑌶𑍍𑌰𑌿𑌯𑌃
𑌕𑌲𑍍𑌯𑌾𑌣𑍈𑌕𑌭𑍁𑌵𑌃 𑌕𑌟𑌾𑌕𑍍𑌷𑌸𑍁𑌷𑌮𑌾𑌃 𑌕𑌾𑌮𑌾𑌕𑍍𑌷𑌿 𑌰𑌾𑌜𑌂𑌤𑌿 𑌤𑍇 ॥1𑍯॥

𑌕𑌲𑌕𑌲𑌰𑌣𑌤𑍍𑌕𑌾𑌂𑌚𑍀 𑌕𑌾𑌂𑌚𑍀𑌵𑌿𑌭𑍂𑌷𑌣𑌮𑌾𑌲𑌿𑌕𑌾
𑌕𑌚𑌭𑌰𑌲𑌸𑌚𑍍𑌚𑌂𑌦𑍍𑌰𑌾 𑌚𑌂𑌦𑍍𑌰𑌾𑌵𑌤𑌂𑌸𑌸𑌧𑌰𑍍𑌮𑌿𑌣𑍀 ।
𑌕𑌵𑌿𑌕𑍁𑌲𑌗𑌿𑌰𑌃 𑌶𑍍𑌰𑌾𑌵𑌂𑌶𑍍𑌰𑌾𑌵𑌂 𑌮𑌿𑌲𑌤𑍍𑌪𑍁𑌲𑌕𑌾𑌂𑌕𑍁𑌰𑌾
𑌵𑌿𑌰𑌚𑌿𑌤𑌶𑌿𑌰𑌃𑌕𑌂𑌪𑌾 𑌕𑌂𑌪𑌾𑌤𑌟𑍇 𑌪𑌰𑌿𑌶𑍋𑌭𑌤𑍇 ॥20॥

𑌸𑌰𑌸𑌵𑌚𑌸𑌾𑌂 𑌵𑍀𑌚𑍀 𑌨𑍀𑌚𑍀𑌭𑌵𑌨𑍍𑌮𑌧𑍁𑌮𑌾𑌧𑍁𑌰𑍀
𑌭𑌰𑌿𑌤𑌭𑍁𑌵𑌨𑌾 𑌕𑍀𑌰𑍍𑌤𑌿𑌰𑍍𑌮𑍂𑌰𑍍𑌤𑌿𑌰𑍍𑌮𑌨𑍋𑌭𑌵𑌜𑌿𑌤𑍍𑌵𑌰𑍀 ।
𑌜𑌨𑌨𑌿 𑌮𑌨𑌸𑍋 𑌯𑍋𑌗𑍍𑌯𑌂 𑌭𑍋𑌗𑍍𑌯𑌂 𑌨𑍃𑌣𑌾𑌂 𑌤𑌵 𑌜𑌾𑌯𑌤𑍇
𑌕𑌥𑌮𑌿𑌵 𑌵𑌿𑌨𑌾 𑌕𑌾𑌂𑌚𑍀𑌭𑍂𑌷𑍇 𑌕𑌟𑌾𑌕𑍍𑌷𑌤𑌰𑌂𑌗𑌿𑌤𑌮𑍍 ॥21॥

𑌭𑍍𑌰𑌮𑌰𑌿𑌤𑌸𑌰𑌿𑌤𑍍𑌕𑍂𑌲𑍋 𑌨𑍀𑌲𑍋𑌤𑍍𑌪𑌲𑌪𑍍𑌰𑌭𑌯𑌾𑌽𑌽𑌭𑌯𑌾
𑌨𑌤𑌜𑌨𑌤𑌮𑌃𑌖𑌂𑌡𑍀 𑌤𑍁𑌂𑌡𑍀𑌰𑌸𑍀𑌮𑍍𑌨𑌿 𑌵𑌿𑌜𑍃𑌂𑌭𑌤𑍇 ।
𑌅𑌚𑌲𑌤𑌪𑌸𑌾𑌮𑍇𑌕𑌃 𑌪𑌾𑌕𑌃 𑌪𑍍𑌰𑌸𑍂𑌨𑌶𑌰𑌾𑌸𑌨-
𑌪𑍍𑌰𑌤𑌿𑌭𑌟𑌮𑌨𑍋𑌹𑌾𑌰𑍀 𑌨𑌾𑌰𑍀𑌕𑍁𑌲𑍈𑌕𑌶𑌿𑌖𑌾𑌮𑌣𑌿𑌃 ॥22॥

𑌮𑌧𑍁𑌰𑌵𑌚𑌸𑍋 𑌮𑌂𑌦𑌸𑍍𑌮𑍇𑌰𑌾 𑌮𑌤𑌂𑌗𑌜𑌗𑌾𑌮𑌿𑌨𑌃
𑌤𑌰𑍁𑌣𑌿𑌮𑌜𑍁𑌷𑌸𑍍𑌤𑌾𑌪𑌿𑌚𑍍𑌛𑌾𑌭𑌾𑌸𑍍𑌤𑌮𑌃𑌪𑌰𑌿𑌪𑌂𑌥𑌿𑌨𑌃 ।
𑌕𑍁𑌚𑌭𑌰𑌨𑌤𑌾𑌃 𑌕𑍁𑌰𑍍𑌯𑍁𑌰𑍍𑌭𑌦𑍍𑌰𑌂 𑌕𑍁𑌰𑌂𑌗𑌵𑌿𑌲𑍋𑌚𑌨𑌾𑌃
𑌕𑌲𑌿𑌤𑌕𑌰𑍁𑌣𑌾𑌃 𑌕𑌾𑌂𑌚𑍀𑌭𑌾𑌜𑌃 𑌕𑌪𑌾𑌲𑌿𑌮𑌹𑍋𑌤𑍍𑌸𑌵𑌾𑌃 ॥23॥

𑌕𑌮𑌲𑌸𑍁𑌷𑌮𑌾𑌕𑍍𑌷𑍍𑌯𑌾𑌰𑍋𑌹𑍇 𑌵𑌿𑌚𑌕𑍍𑌷𑌣𑌵𑍀𑌕𑍍𑌷𑌣𑌾𑌃
𑌕𑍁𑌮𑍁𑌦𑌸𑍁𑌕𑍃𑌤𑌕𑍍𑌰𑍀𑌡𑌾𑌚𑍂𑌡𑌾𑌲𑌕𑍁𑌂𑌤𑌲𑌬𑌂𑌧𑍁𑌰𑌾𑌃 ।
𑌰𑍁𑌚𑌿𑌰𑌰𑍁𑌚𑌿𑌭𑌿𑌸𑍍𑌤𑌾𑌪𑌿𑌚𑍍𑌛𑌶𑍍𑌰𑍀𑌪𑍍𑌰𑌪𑌂𑌚𑌨𑌚𑍁𑌂𑌚𑌵𑌃
𑌪𑍁𑌰𑌵𑌿𑌜𑌯𑌿𑌨𑌃 𑌕𑌂𑌪𑌾𑌤𑍀𑌰𑍇 𑌸𑍍𑌫𑍁𑌰𑌂𑌤𑌿 𑌮𑌨𑍋𑌰𑌥𑌾𑌃 ॥24॥

𑌕𑌲𑌿𑌤𑌰𑌤𑌯𑌃 𑌕𑌾𑌂𑌚𑍀𑌲𑍀𑌲𑌾𑌵𑌿𑌧𑍌 𑌕𑌵𑌿𑌮𑌂𑌡𑌲𑍀-
𑌵𑌚𑌨𑌲𑌹𑌰𑍀𑌵𑌾𑌸𑌂𑌤𑍀𑌨𑌾𑌂 𑌵𑌸𑌂𑌤𑌵𑌿𑌭𑍂𑌤𑌯𑌃 ।
𑌕𑍁𑌶𑌲𑌵𑌿𑌧𑌯𑍇 𑌭𑍂𑌯𑌾𑌸𑍁𑌰𑍍𑌮𑍇 𑌕𑍁𑌰𑌂𑌗𑌵𑌿𑌲𑍋𑌚𑌨𑌾𑌃
𑌕𑍁𑌸𑍁𑌮𑌵𑌿𑌶𑌿𑌖𑌾𑌰𑌾𑌤𑍇𑌰𑌕𑍍𑌷𑍍𑌣𑌾𑌂 𑌕𑍁𑌤𑍂𑌹𑌲𑌵𑌿𑌭𑍍𑌰𑌮𑌾𑌃 ॥25॥

𑌕𑌬𑌲𑌿𑌤𑌤𑌮𑌸𑍍𑌕𑌾𑌂𑌡𑌾𑌸𑍍𑌤𑍁𑌂𑌡𑍀𑌰𑌮𑌂𑌡𑌲𑌮𑌂𑌡𑌨𑌾𑌃
𑌸𑌰𑌸𑌿𑌜𑌵𑌨𑍀𑌸𑌂𑌤𑌾𑌨𑌾𑌨𑌾𑌮𑌰𑍁𑌂𑌤𑍁𑌦𑌶𑍇𑌖𑌰𑌾𑌃 ।
𑌨𑌯𑌨𑌸𑌰𑌣𑍇𑌰𑍍𑌨𑍇𑌦𑍀𑌯𑌂𑌸𑌃 𑌕𑌦𑌾 𑌨𑍁 𑌭𑌵𑌂𑌤𑌿 𑌮𑍇
𑌤𑌰𑍁𑌣𑌜𑌲𑌦𑌶𑍍𑌯𑌾𑌮𑌾𑌃 𑌶𑌂𑌭𑍋𑌸𑍍𑌤𑌪𑌃𑌫𑌲𑌵𑌿𑌭𑍍𑌰𑌮𑌾𑌃 ॥26॥

𑌅𑌚𑌰𑌮𑌮𑌿𑌷𑍁𑌂 𑌦𑍀𑌨𑌂 𑌮𑍀𑌨𑌧𑍍𑌵𑌜𑌸𑍍𑌯 𑌮𑍁𑌖𑌶𑍍𑌰𑌿𑌯𑌾
𑌸𑌰𑌸𑌿𑌜𑌭𑍁𑌵𑍋 𑌯𑌾𑌨𑌂 𑌮𑍍𑌲𑌾𑌨𑌂 𑌗𑌤𑍇𑌨 𑌚 𑌮𑌂𑌜𑍁𑌨𑌾 ।
𑌤𑍍𑌰𑌿𑌦𑌶𑌸𑌦𑌸𑌾𑌮𑌨𑍍𑌨𑌂 𑌖𑌿𑌨𑍍𑌨𑌂 𑌗𑌿𑌰𑌾 𑌚 𑌵𑌿𑌤𑌨𑍍𑌵𑌤𑍀
𑌤𑌿𑌲𑌕𑌯𑌤𑌿 𑌸𑌾 𑌕𑌂𑌪𑌾𑌤𑍀𑌰𑌂 𑌤𑍍𑌰𑌿𑌲𑍋𑌚𑌨𑌸𑍁𑌂𑌦𑌰𑍀 ॥2𑍭॥

𑌜𑌨𑌨𑌿 𑌭𑍁𑌵𑌨𑍇 𑌚𑌂𑌕𑍍𑌰𑌮𑍍𑌯𑍇𑌽𑌹𑌂 𑌕𑌿𑌯𑌂𑌤𑌮𑌨𑍇𑌹𑌸𑌂
𑌕𑍁𑌪𑍁𑌰𑍁𑌷𑌕𑌰𑌭𑍍𑌰𑌷𑍍𑌟𑍈𑌰𑍍𑌦𑍁𑌷𑍍𑌟𑍈𑌰𑍍𑌧𑌨𑍈𑌰𑍁𑌦𑌰𑌂𑌭𑌰𑌿𑌃 ।
𑌤𑌰𑍁𑌣𑌕𑌰𑍁𑌣𑍇 𑌤𑌂𑌦𑍍𑌰𑌾𑌶𑍂𑌨𑍍𑌯𑍇 𑌤𑌰𑌂𑌗𑌯 𑌲𑍋𑌚𑌨𑍇
𑌨𑌮𑌤𑌿 𑌮𑌯𑌿 𑌤𑍇 𑌕𑌿𑌂𑌚𑌿𑌤𑍍𑌕𑌾𑌂𑌚𑍀𑌪𑍁𑌰𑍀𑌮𑌣𑌿𑌦𑍀𑌪𑌿𑌕𑍇 ॥2𑍮॥

𑌮𑍁𑌨𑌿𑌜𑌨𑌮𑌨𑌃𑌪𑍇𑌟𑍀𑌰𑌤𑍍𑌨𑌂 𑌸𑍍𑌫𑍁𑌰𑌤𑍍𑌕𑌰𑍁𑌣𑌾𑌨𑌟𑍀-
𑌵𑌿𑌹𑌰𑌣𑌕𑌲𑌾𑌗𑍇𑌹𑌂 𑌕𑌾𑌂𑌚𑍀𑌪𑍁𑌰𑍀𑌮𑌣𑌿𑌭𑍂𑌷𑌣𑌮𑍍 ।
𑌜𑌗𑌤𑌿 𑌮𑌹𑌤𑍋 𑌮𑍋𑌹𑌵𑍍𑌯𑌾𑌧𑍇𑌰𑍍𑌨𑍃𑌣𑌾𑌂 𑌪𑌰𑌮𑍌𑌷𑌧𑌂
𑌪𑍁𑌰𑌹𑌰𑌦𑍃𑌶𑌾𑌂 𑌸𑌾𑌫𑌲𑍍𑌯𑌂 𑌮𑍇 𑌪𑍁𑌰𑌃 𑌪𑌰𑌿𑌜𑍃𑌂𑌭𑌤𑌾𑌮𑍍 ॥2𑍯॥

𑌮𑍁𑌨𑌿𑌜𑌨𑌮𑍋𑌧𑌾𑌮𑍍𑌨𑍇 𑌧𑌾𑌮𑍍𑌨𑍇 𑌵𑌚𑍋𑌮𑌯𑌜𑌾𑌹𑍍𑌨𑌵𑍀-
𑌹𑌿𑌮𑌗𑌿𑌰𑌿𑌤𑌟𑌪𑍍𑌰𑌾𑌗𑍍𑌭𑌾𑌰𑌾𑌯𑌾𑌕𑍍𑌷𑌰𑌾𑌯 𑌪𑌰𑌾𑌤𑍍𑌮𑌨𑍇 ।
𑌵𑌿𑌹𑌰𑌣𑌜𑍁𑌷𑍇 𑌕𑌾𑌂𑌚𑍀𑌦𑍇𑌶𑍇 𑌮𑌹𑍇𑌶𑍍𑌵𑌰𑌲𑍋𑌚𑌨-
𑌤𑍍𑌰𑌿𑌤𑌯𑌸𑌰𑌸𑌕𑍍𑌰𑍀𑌡𑌾𑌸𑍌𑌧𑌾𑌂𑌗𑌣𑌾𑌯 𑌨𑌮𑍋 𑌨𑌮𑌃 ॥30॥

𑌮𑌰𑌕𑌤𑌰𑍁𑌚𑌾𑌂 𑌪𑍍𑌰𑌤𑍍𑌯𑌾𑌦𑍇𑌶𑌂 𑌮𑌹𑍇𑌶𑍍𑌵𑌰𑌚𑌕𑍍𑌷𑍁𑌷𑌾𑌮𑍍
𑌅𑌮𑍃𑌤𑌲𑌹𑌰𑍀𑌪𑍂𑌰𑌂 𑌪𑌾𑌰𑌂 𑌭𑌵𑌾𑌖𑍍𑌯𑌪𑌯𑍋𑌨𑌿𑌧𑍇𑌃 ।
𑌸𑍁𑌚𑌰𑌿𑌤𑌫𑌲𑌂 𑌕𑌾𑌂𑌚𑍀𑌭𑌾𑌜𑍋 𑌜𑌨𑌸𑍍𑌯 𑌪𑌚𑍇𑌲𑌿𑌮𑌂
𑌹𑌿𑌮𑌶𑌿𑌖𑌰𑌿𑌣𑍋 𑌵𑌂𑌶𑌸𑍍𑌯𑍈𑌕𑌂 𑌵𑌤𑌂𑌸𑌮𑍁𑌪𑌾𑌸𑍍𑌮𑌹𑍇 ॥31॥

𑌪𑍍𑌰𑌣𑌮𑌨𑌦𑌿𑌨𑌾𑌰𑌂𑌭𑍇 𑌕𑌂𑌪𑌾𑌨𑌦𑍀𑌸𑌖𑌿 𑌤𑌾𑌵𑌕𑍇
𑌸𑌰𑌸𑌕𑌵𑌿𑌤𑍋𑌨𑍍𑌮𑍇𑌷𑌃 𑌪𑍂𑌷𑌾 𑌸𑌤𑌾𑌂 𑌸𑌮𑍁𑌦𑌂𑌚𑌿𑌤𑌃 ।
𑌪𑍍𑌰𑌤𑌿𑌭𑌟𑌮𑌹𑌾𑌪𑍍𑌰𑍌𑌢𑌪𑍍𑌰𑍋𑌦𑍍𑌯𑌤𑍍𑌕𑌵𑌿𑌤𑍍𑌵𑌕𑍁𑌮𑍁𑌦𑍍𑌵𑌤𑍀𑌂
𑌨𑌯𑌤𑌿 𑌤𑌰𑌸𑌾 𑌨𑌿𑌦𑍍𑌰𑌾𑌮𑍁𑌦𑍍𑌰𑌾𑌂 𑌨𑌗𑍇𑌶𑍍𑌵𑌰𑌕𑌨𑍍𑌯𑌕𑍇 ॥32॥

𑌶𑌮𑌿𑌤𑌜𑌡𑌿𑌮𑌾𑌰𑌂𑌭𑌾 𑌕𑌂𑌪𑌾𑌤𑌟𑍀𑌨𑌿𑌕𑌟𑍇𑌚𑌰𑍀
𑌨𑌿𑌹𑌤𑌦𑍁𑌰𑌿𑌤𑌸𑍍𑌤𑍋𑌮𑌾 𑌸𑍋𑌮𑌾𑌰𑍍𑌧𑌮𑍁𑌦𑍍𑌰𑌿𑌤𑌕𑍁𑌂𑌤𑌲𑌾 ।
𑌫𑌲𑌿𑌤𑌸𑍁𑌮𑌨𑍋𑌵𑌾𑌂𑌛𑌾 𑌪𑌾𑌂𑌚𑌾𑌯𑍁𑌧𑍀 𑌪𑌰𑌦𑍇𑌵𑌤𑌾
𑌸𑌫𑌲𑌯𑌤𑍁 𑌮𑍇 𑌨𑍇𑌤𑍍𑌰𑍇 𑌗𑍋𑌤𑍍𑌰𑍇𑌶𑍍𑌵𑌰𑌪𑍍𑌰𑌿𑌯𑌨𑌂𑌦𑌿𑌨𑍀 ॥33॥

𑌮𑌮 𑌤𑍁 𑌧𑌿𑌷𑌣𑌾 𑌪𑍀𑌡𑍍𑌯𑌾 𑌜𑌾𑌡𑍍𑌯𑌾𑌤𑌿𑌰𑍇𑌕 𑌕𑌥𑌂 𑌤𑍍𑌵𑌯𑌾
𑌕𑍁𑌮𑍁𑌦𑌸𑍁𑌷𑌮𑌾𑌮𑍈𑌤𑍍𑌰𑍀𑌪𑌾𑌤𑍍𑌰𑍀𑌵𑌤𑌂𑌸𑌿𑌤𑌕𑍁𑌂𑌤𑌲𑌾𑌮𑍍 ।
𑌜𑌗𑌤𑌿 𑌶𑌮𑌿𑌤𑌸𑍍𑌤𑌂𑌭𑌾𑌂 𑌕𑌂𑌪𑌾𑌨𑌦𑍀𑌨𑌿𑌲𑌯𑌾𑌮𑌸𑍌
𑌶𑍍𑌰𑌿𑌯𑌤𑌿 𑌹𑌿 𑌗𑌲𑌤𑍍𑌤𑌂𑌦𑍍𑌰𑌾 𑌚𑌂𑌦𑍍𑌰𑌾𑌵𑌤𑌂𑌸𑌸𑌧𑌰𑍍𑌮𑌿𑌣𑍀𑌮𑍍 ॥34॥

𑌪𑌰𑌿𑌮𑌲𑌪𑌰𑍀𑌪𑌾𑌕𑍋𑌦𑍍𑌰𑍇𑌕𑌂 𑌪𑌯𑍋𑌮𑍁𑌚𑌿 𑌕𑌾𑌂𑌚𑌨𑍇
𑌶𑌿𑌖𑌰𑌿𑌣𑌿 𑌪𑍁𑌨𑌰𑍍𑌦𑍍𑌬𑍈𑌧𑍀𑌭𑌾𑌵𑌂 𑌶𑌶𑌿𑌨𑍍𑌯𑌰𑍁𑌣𑌾𑌤𑌪𑌮𑍍 ।
𑌅𑌪𑌿 𑌚 𑌜𑌨𑌯𑌨𑍍𑌕𑌂𑌬𑍋𑌰𑍍𑌲𑌕𑍍𑌷𑍍𑌮𑍀𑌮𑌨𑌂𑌬𑍁𑌨𑌿 𑌕𑍋𑌽𑌪𑍍𑌯𑌸𑍌
𑌕𑍁𑌸𑍁𑌮𑌧𑌨𑍁𑌷𑌃 𑌕𑌾𑌂𑌚𑍀𑌦𑍇𑌶𑍇 𑌚𑌕𑌾𑌸𑍍𑌤𑌿 𑌪𑌰𑌾𑌕𑍍𑌰𑌮𑌃 ॥35॥

𑌪𑍁𑌰𑌦𑌮𑌯𑌿𑌤𑍁𑌰𑍍𑌵𑌾𑌮𑍋𑌤𑍍𑌸𑌂𑌗𑌸𑍍𑌥𑌲𑍇𑌨 𑌰𑌸𑌜𑍍𑌞𑌯𑌾
𑌸𑌰𑌸𑌕𑌵𑌿𑌤𑌾𑌭𑌾𑌜𑌾 𑌕𑌾𑌂𑌚𑍀𑌪𑍁𑌰𑍋𑌦𑌰𑌸𑍀𑌮𑌯𑌾 ।
𑌤𑌟𑌪𑌰𑌿𑌸𑌰𑍈𑌰𑍍𑌨𑍀𑌹𑌾𑌰𑌾𑌦𑍍𑌰𑍇𑌰𑍍𑌵𑌚𑍋𑌭𑌿𑌰𑌕𑍃𑌤𑍍𑌰𑌿𑌮𑍈𑌃
𑌕𑌿𑌮𑌿𑌵 𑌨 𑌤𑍁𑌲𑌾𑌮𑌸𑍍𑌮𑌚𑍍𑌚𑍇𑌤𑍋 𑌮𑌹𑍇𑌶𑍍𑌵𑌰𑌿 𑌗𑌾𑌹𑌤𑍇 ॥36॥

𑌨𑌯𑌨𑌯𑍁𑌗𑌲𑍀𑌮𑌾𑌸𑍍𑌮𑌾𑌕𑍀𑌨𑌾𑌂 𑌕𑌦𑌾 𑌨𑍁 𑌫𑌲𑍇𑌗𑍍𑌰𑌹𑍀𑌂
𑌵𑌿𑌦𑌧𑌤𑌿 𑌗𑌤𑍌 𑌵𑍍𑌯𑌾𑌕𑍁𑌰𑍍𑌵𑌾𑌣𑌾 𑌗𑌜𑍇𑌂𑌦𑍍𑌰𑌚𑌮𑌤𑍍𑌕𑍍𑌰𑌿𑌯𑌾𑌮𑍍 ।
𑌮𑌰𑌤𑌕𑌰𑍁𑌚𑍋 𑌮𑌾𑌹𑍇𑌶𑌾𑌨𑌾 𑌘𑌨𑌸𑍍𑌤𑌨𑌨𑌮𑍍𑌰𑌿𑌤𑌾𑌃
𑌸𑍁𑌕𑍃𑌤𑌵𑌿𑌭𑌵𑌾𑌃 𑌪𑍍𑌰𑌾𑌂𑌚𑌃 𑌕𑌾𑌂𑌚𑍀𑌵𑌤𑌂𑌸𑌧𑍁𑌰𑌂𑌧𑌰𑌾𑌃 ॥3𑍭॥

𑌮𑌨𑌸𑌿𑌜𑌯𑌶𑌃𑌪𑌾𑌰𑌂𑌪𑌰𑍍𑌯𑌂 𑌮𑌰𑌂𑌦𑌝𑌰𑍀𑌸𑍁𑌵𑌾𑌂
𑌕𑌵𑌿𑌕𑍁𑌲𑌗𑌿𑌰𑌾𑌂 𑌕𑌂𑌦𑌂 𑌕𑌂𑌪𑌾𑌨𑌦𑍀𑌤𑌟𑌮𑌂𑌡𑌨𑌮𑍍 ।
𑌮𑌧𑍁𑌰𑌲𑌲𑌿𑌤𑌂 𑌮𑌤𑍍𑌕𑌂 𑌚𑌕𑍍𑌷𑍁𑌰𑍍𑌮𑌨𑍀𑌷𑌿𑌮𑌨𑍋𑌹𑌰𑌂
𑌪𑍁𑌰𑌵𑌿𑌜𑌯𑌿𑌨𑌃 𑌸𑌰𑍍𑌵𑌸𑍍𑌵𑌂 𑌤𑌤𑍍𑌪𑍁𑌰𑌸𑍍𑌕𑍁𑌰𑍁𑌤𑍇 𑌕𑌦𑌾 ॥3𑍮॥

𑌶𑌿𑌥𑌿𑌲𑌿𑌤𑌤𑌮𑍋𑌲𑍀𑌲𑌾𑌂 𑌨𑍀𑌲𑌾𑌰𑌵𑌿𑌂𑌦𑌵𑌿𑌲𑍋𑌚𑌨𑌾𑌂
𑌦𑌹𑌨𑌵𑌿𑌲𑌸𑌤𑍍𑌫𑌾𑌲𑌾𑌂 𑌶𑍍𑌰𑍀𑌕𑌾𑌮𑌕𑍋𑌟𑌿𑌮𑍁𑌪𑌾𑌸𑍍𑌮𑌹𑍇 ।
𑌕𑌰𑌧𑍃𑌤𑌸𑌚𑍍𑌛𑍂𑌲𑌾𑌂 𑌕𑌾𑌲𑌾𑌰𑌿𑌚𑌿𑌤𑍍𑌤𑌹𑌰𑌾𑌂 𑌪𑌰𑌾𑌂
𑌮𑌨𑌸𑌿𑌜𑌕𑍃𑌪𑌾𑌲𑍀𑌲𑌾𑌂 𑌲𑍋𑌲𑌾𑌲𑌕𑌾𑌮𑌲𑌿𑌕𑍇𑌕𑍍𑌷𑌣𑌾𑌮𑍍 ॥3𑍯॥

𑌕𑌲𑌾𑌲𑍀𑌲𑌾𑌶𑌾𑌲𑌾 𑌕𑌵𑌿𑌕𑍁𑌲𑌵𑌚𑌃𑌕𑍈𑌰𑌵𑌵𑌨𑍀-
𑌶𑌰𑌜𑍍𑌜𑍍𑌯𑍋𑌤𑍍𑌸𑍍𑌨𑌾𑌧𑌾𑌰𑌾 𑌶𑌶𑌧𑌰𑌶𑌿𑌶𑍁𑌶𑍍𑌲𑌾𑌘𑍍𑌯𑌮𑍁𑌕𑍁𑌟𑍀 ।
𑌪𑍁𑌨𑍀𑌤𑍇 𑌨𑌃 𑌕𑌂𑌪𑌾𑌪𑍁𑌲𑌿𑌨𑌤𑌟𑌸𑍌𑌹𑌾𑌰𑍍𑌦𑌤𑌰𑌲𑌾
𑌕𑌦𑌾 𑌚𑌕𑍍𑌷𑍁𑌰𑍍𑌮𑌾𑌰𑍍𑌗𑌂 𑌕𑌨𑌕𑌗𑌿𑌰𑌿𑌧𑌾𑌨𑍁𑌷𑍍𑌕𑌮𑌹𑌿𑌷𑍀 ॥40॥

𑌨𑌮𑌃 𑌸𑍍𑌤𑌾𑌨𑍍𑌨𑌮𑍍𑌰𑍇𑌭𑍍𑌯𑌃 𑌸𑍍𑌤𑌨𑌗𑌰𑌿𑌮𑌗𑌰𑍍𑌵𑍇𑌣 𑌗𑍁𑌰𑍁𑌣𑌾
𑌦𑌧𑌾𑌨𑍇𑌭𑍍𑌯𑌶𑍍𑌚𑍂𑌡𑌾𑌭𑌰𑌣𑌮𑌮𑍃𑌤𑌸𑍍𑌯𑌂𑌦𑌿 𑌶𑌿𑌶𑌿𑌰𑌮𑍍 ।
𑌸𑌦𑌾 𑌵𑌾𑌸𑍍𑌤𑌵𑍇𑌭𑍍𑌯𑌃 𑌸𑍁𑌵𑌿𑌧𑌭𑍁𑌵𑌿 𑌕𑌂𑌪𑌾𑌖𑍍𑌯𑌸𑌰𑌿𑌤𑍇
𑌯𑌶𑍋𑌵𑍍𑌯𑌾𑌪𑌾𑌰𑍇𑌭𑍍𑌯𑌃 𑌸𑍁𑌕𑍃𑌤𑌵𑌿𑌭𑌵𑍇𑌭𑍍𑌯𑍋 𑌰𑌤𑌿𑌪𑌤𑍇𑌃 ॥41॥

𑌅𑌸𑍂𑌯𑌂𑌤𑍀 𑌕𑌾𑌚𑌿𑌨𑍍𑌮𑌰𑌕𑌤𑌰𑍁𑌚𑍋 𑌨𑌾𑌕𑌿𑌮𑍁𑌕𑍁𑌟𑍀-
𑌕𑌦𑌂𑌬𑌂 𑌚𑍁𑌂𑌬𑌂𑌤𑍀 𑌚𑌰𑌣𑌨𑌖𑌚𑌂𑌦𑍍𑌰𑌾𑌂𑌶𑍁𑌪𑌟𑌲𑍈𑌃 ।
𑌤𑌮𑍋𑌮𑍁𑌦𑍍𑌰𑌾𑌂 𑌵𑌿𑌦𑍍𑌰𑌾𑌵𑌯𑌤𑍁 𑌮𑌮 𑌕𑌾𑌂𑌚𑍀𑌰𑍍𑌨𑌿𑌲𑌯𑌨𑌾
𑌹𑌰𑍋𑌤𑍍𑌸𑌂𑌗𑌶𑍍𑌰𑍀𑌮𑌨𑍍𑌮𑌣𑌿𑌗𑍃𑌹𑌮𑌹𑌾𑌦𑍀𑌪𑌕𑌲𑌿𑌕𑌾 ॥42॥

𑌅𑌨𑌾𑌦𑍍𑌯𑌂𑌤𑌾 𑌕𑌾𑌚𑌿𑌤𑍍𑌸𑍁𑌜𑌨𑌨𑌯𑌨𑌾𑌨𑌂𑌦𑌜𑌨𑌨𑍀
𑌨𑌿𑌰𑍁𑌂𑌧𑌾𑌨𑌾 𑌕𑌾𑌂𑌤𑌿𑌂 𑌨𑌿𑌜𑌰𑍁𑌚𑌿𑌵𑌿𑌲𑌾𑌸𑍈𑌰𑍍𑌜𑌲𑌮𑍁𑌚𑌾𑌮𑍍 ।
𑌸𑍍𑌮𑌰𑌾𑌰𑍇𑌸𑍍𑌤𑌾𑌰𑌲𑍍𑌯𑌂 𑌮𑌨𑌸𑌿 𑌜𑌨𑌯𑌂𑌤𑍀 𑌸𑍍𑌵𑌯𑌮𑌹𑍋
𑌗𑌲𑌤𑍍𑌕𑌂𑌪𑌾 𑌶𑌂𑌪𑌾 𑌪𑌰𑌿𑌲𑌸𑌤𑌿 𑌕𑌂𑌪𑌾𑌪𑌰𑌿𑌸𑌰𑍇 ॥43॥

𑌸𑍁𑌧𑌾𑌡𑌿𑌂𑌡𑍀𑌰𑌶𑍍𑌰𑍀𑌃 𑌸𑍍𑌮𑌿𑌤𑌰𑍁𑌚𑌿𑌷𑍁 𑌤𑍁𑌂𑌡𑍀𑌰𑌵𑌿𑌷𑌯𑌂
𑌪𑌰𑌿𑌷𑍍𑌕𑍁𑌰𑍍𑌵𑌾𑌣𑌾𑌸𑍌 𑌪𑌰𑌿𑌹𑌸𑌿𑌤𑌨𑍀𑌲𑍋𑌤𑍍𑌪𑌲𑌰𑍁𑌚𑌿𑌃 ।
𑌸𑍍𑌤𑌨𑌾𑌭𑍍𑌯𑌾𑌮𑌾𑌨𑌮𑍍𑌰𑌾 𑌸𑍍𑌤𑌬𑌕𑌯𑌤𑍁 𑌮𑍇 𑌕𑌾𑌂𑌕𑍍𑌷𑌿𑌤𑌤𑌰𑍁𑌂
𑌦𑍃𑌶𑌾𑌮𑍈𑌶𑌾𑌨𑍀𑌨𑌾𑌂 𑌸𑍁𑌕𑍃𑌤𑌫𑌲𑌪𑌾𑌂𑌡𑌿𑌤𑍍𑌯𑌗𑌰𑌿𑌮𑌾 ॥44॥

𑌕𑍃𑌪𑌾𑌧𑌾𑌰𑌾𑌦𑍍𑌰𑍋𑌣𑍀 𑌕𑍃𑌪𑌣𑌧𑌿𑌷𑌣𑌾𑌨𑌾𑌂 𑌪𑍍𑌰𑌣𑌮𑌤𑌾𑌂
𑌨𑌿𑌹𑌂𑌤𑍍𑌰𑍀 𑌸𑌂𑌤𑌾𑌪𑌂 𑌨𑌿𑌗𑌮𑌮𑍁𑌕𑍁𑌟𑍋𑌤𑍍𑌤𑌂𑌸𑌕𑌲𑌿𑌕𑌾 ।
𑌪𑌰𑌾 𑌕𑌾𑌂𑌚𑍀𑌲𑍀𑌲𑌾𑌪𑌰𑌿𑌚𑌯𑌵𑌤𑍀 𑌪𑌰𑍍𑌵𑌤𑌸𑍁𑌤𑌾
𑌗𑌿𑌰𑌾𑌂 𑌨𑍀𑌵𑍀 𑌦𑍇𑌵𑍀 𑌗𑌿𑌰𑌿𑌶𑌪𑌰𑌤𑌂𑌤𑍍𑌰𑌾 𑌵𑌿𑌜𑌯𑌤𑍇 ॥45॥

𑌕𑌵𑌿𑌤𑍍𑌵𑌶𑍍𑌰𑍀𑌕𑌂𑌦𑌃 𑌸𑍁𑌕𑍃𑌤𑌪𑌰𑌿𑌪𑌾𑌟𑍀 𑌹𑌿𑌮𑌗𑌿𑌰𑍇𑌃
𑌵𑌿𑌧𑌾𑌤𑍍𑌰𑍀 𑌵𑌿𑌶𑍍𑌵𑍇𑌷𑌾𑌂 𑌵𑌿𑌷𑌮𑌶𑌰𑌵𑍀𑌰𑌧𑍍𑌵𑌜𑌪𑌟𑍀 ।
𑌸𑌖𑍀 𑌕𑌂𑌪𑌾𑌨𑌦𑍍𑌯𑌾𑌃 𑌪𑌦𑌹𑌸𑌿𑌤𑌪𑌾𑌥𑍋𑌜𑌯𑍁𑌗𑌲𑍀
𑌪𑍁𑌰𑌾𑌣𑍋 𑌪𑌾𑌯𑌾𑌨𑍍𑌨𑌃 𑌪𑍁𑌰𑌮𑌥𑌨𑌸𑌾𑌮𑍍𑌰𑌾𑌜𑍍𑌯𑌪𑌦𑌵𑍀 ॥46॥

𑌦𑌰𑌿𑌦𑍍𑌰𑌾𑌣𑌾 𑌮𑌧𑍍𑌯𑍇 𑌦𑌰𑌦𑌲𑌿𑌤𑌤𑌾𑌪𑌿𑌚𑍍𑌛𑌸𑍁𑌷𑌮𑌾𑌃
𑌸𑍍𑌤𑌨𑌾𑌭𑍋𑌗𑌕𑍍𑌕𑌾𑌂𑌤𑌾𑌸𑍍𑌤𑌰𑍁𑌣𑌹𑌰𑌿𑌣𑌾𑌂𑌕𑌾𑌂𑌕𑌿𑌤𑌕𑌚𑌾𑌃 ।
𑌹𑌰𑌾𑌧𑍀𑌨𑌾 𑌨𑌾𑌨𑌾𑌵𑌿𑌬𑍁𑌧𑌮𑍁𑌕𑍁𑌟𑍀𑌚𑍁𑌂𑌬𑌿𑌤𑌪𑌦𑌾𑌃
𑌕𑌦𑌾 𑌕𑌂𑌪𑌾𑌤𑍀𑌰𑍇 𑌕𑌥𑌯 𑌵𑌿𑌹𑌰𑌾𑌮𑍋 𑌗𑌿𑌰𑌿𑌸𑍁𑌤𑍇 ॥4𑍭॥

𑌵𑌰𑍀𑌵𑌰𑍍𑌤𑍁 𑌸𑍍𑌥𑍇𑌮𑌾 𑌤𑍍𑌵𑌯𑌿 𑌮𑌮 𑌗𑌿𑌰𑌾𑌂 𑌦𑍇𑌵𑌿 𑌮𑌨𑌸𑍋
𑌨𑌰𑍀𑌨𑌰𑍍𑌤𑍁 𑌪𑍍𑌰𑍌𑌢𑌾 𑌵𑌦𑌨𑌕𑌮𑌲𑍇 𑌵𑌾𑌕𑍍𑌯𑌲𑌹𑌰𑍀 ।
𑌚𑌰𑍀𑌚𑌰𑍍𑌤𑍁 𑌪𑍍𑌰𑌜𑍍𑌞𑌾𑌜𑌨𑌨𑌿 𑌜𑌡𑌿𑌮𑌾𑌨𑌃 𑌪𑌰𑌜𑌨𑍇
𑌸𑌰𑍀𑌸𑌰𑍍𑌤𑍁 𑌸𑍍𑌵𑍈𑌰𑌂 𑌜𑌨𑌨𑌿 𑌮𑌯𑌿 𑌕𑌾𑌮𑌾𑌕𑍍𑌷𑌿 𑌕𑌰𑍁𑌣𑌾 ॥4𑍮॥

𑌕𑍍𑌷𑌣𑌾𑌤𑍍𑌤𑍇 𑌕𑌾𑌮𑌾𑌕𑍍𑌷𑌿 𑌭𑍍𑌰𑌮𑌰𑌸𑍁𑌷𑌮𑌾𑌶𑌿𑌕𑍍𑌷𑌣𑌗𑍁𑌰𑍁𑌃
𑌕𑌟𑌾𑌕𑍍𑌷𑌵𑍍𑌯𑌾𑌕𑍍𑌷𑍇𑌪𑍋 𑌮𑌮 𑌭𑌵𑌤𑍁 𑌮𑍋𑌕𑍍𑌷𑌾𑌯 𑌵𑌿𑌪𑌦𑌾𑌮𑍍 ।
𑌨𑌰𑍀𑌨𑌰𑍍𑌤𑍁 𑌸𑍍𑌵𑍈𑌰𑌂 𑌵𑌚𑌨𑌲𑌹𑌰𑍀 𑌨𑌿𑌰𑍍𑌜𑌰𑌪𑍁𑌰𑍀-
𑌸𑌰𑌿𑌦𑍍𑌵𑍀𑌚𑍀𑌨𑍀𑌚𑍀𑌕𑌰𑌣𑌪𑌟𑍁𑌰𑌾𑌸𑍍𑌯𑍇 𑌮𑌮 𑌸𑌦𑌾 ॥4𑍯॥

𑌪𑍁𑌰𑌸𑍍𑌤𑌾𑌨𑍍𑌮𑍇 𑌭𑍂𑌯𑌃𑌪𑍍𑌰𑌶𑌮𑌨𑌪𑌰𑌃 𑌸𑍍𑌤𑌾𑌨𑍍𑌮𑌮 𑌰𑍁𑌜𑌾𑌂
𑌪𑍍𑌰𑌚𑌾𑌰𑌸𑍍𑌤𑍇 𑌕𑌂𑌪𑌾𑌤𑌟𑌵𑌿𑌹𑍃𑌤𑌿𑌸𑌂𑌪𑌾𑌦𑌿𑌨𑌿 𑌦𑍃𑌶𑍋𑌃 ।
𑌇𑌮𑌾𑌂 𑌯𑌾𑌚𑍍𑌞𑌾𑌮𑍂𑌰𑍀𑌕𑍁𑌰𑍁 𑌸𑌪𑌦𑌿 𑌦𑍂𑌰𑍀𑌕𑍁𑌰𑍁 𑌤𑌮𑌃-
𑌪𑌰𑍀𑌪𑌾𑌕𑌂 𑌮𑌤𑍍𑌕𑌂 𑌸𑌪𑌦𑌿 𑌬𑍁𑌧𑌲𑍋𑌕𑌂 𑌚 𑌨𑌯 𑌮𑌾𑌮𑍍 ॥50॥

𑌉𑌦𑌂𑌚𑌂𑌤𑍀 𑌕𑌾𑌂𑌚𑍀𑌨𑌗𑌰𑌨𑌿𑌲𑌯𑍇 𑌤𑍍𑌵𑌤𑍍𑌕𑌰𑍁𑌣𑌯𑌾
𑌸𑌮𑍃𑌦𑍍𑌧𑌾 𑌵𑌾𑌗𑍍𑌧𑌾𑌟𑍀 𑌪𑌰𑌿𑌹𑌸𑌿𑌤𑌮𑌾𑌧𑍍𑌵𑍀 𑌕𑌵𑌯𑌤𑌾𑌮𑍍 ।
𑌉𑌪𑌾𑌦𑌤𑍍𑌤𑍇 𑌮𑌾𑌰𑌪𑍍𑌰𑌤𑌿𑌭𑌟𑌜𑌟𑌾𑌜𑍂𑌟𑌮𑍁𑌕𑍁𑌟𑍀-
𑌕𑍁𑌟𑍀𑌰𑍋𑌲𑍍𑌲𑌾𑌸𑌿𑌨𑍍𑌯𑌾𑌃 𑌶𑌤𑌮𑌖𑌤𑌟𑌿𑌨𑍍𑌯𑌾 𑌜𑌯𑌪𑌟𑍀𑌮𑍍 ॥51॥

𑌶𑍍𑌰𑌿𑌯𑌂 𑌵𑌿𑌦𑍍𑌯𑌾𑌂 𑌦𑌦𑍍𑌯𑌾𑌜𑍍𑌜𑌨𑌨𑌿 𑌨𑌮𑌤𑌾𑌂 𑌕𑍀𑌰𑍍𑌤𑌿𑌮𑌮𑌿𑌤𑌾𑌂
𑌸𑍁𑌪𑍁𑌤𑍍𑌰𑌾𑌨𑍍 𑌪𑍍𑌰𑌾𑌦𑌤𑍍𑌤𑍇 𑌤𑌵 𑌝𑌟𑌿𑌤𑌿 𑌕𑌾𑌮𑌾𑌕𑍍𑌷𑌿 𑌕𑌰𑍁𑌣𑌾 ।
𑌤𑍍𑌰𑌿𑌲𑍋𑌕𑍍𑌯𑌾𑌮𑌾𑌧𑌿𑌕𑍍𑌯𑌂 𑌤𑍍𑌰𑌿𑌪𑍁𑌰𑌪𑌰𑌿𑌪𑌂𑌥𑌿𑌪𑍍𑌰𑌣𑌯𑌿𑌨𑌿
𑌪𑍍𑌰𑌣𑌾𑌮𑌸𑍍𑌤𑍍𑌵𑌤𑍍𑌪𑌾𑌦𑍇 𑌶𑌮𑌿𑌤𑌦𑍁𑌰𑌿𑌤𑍇 𑌕𑌿𑌂 𑌨 𑌕𑍁𑌰𑍁𑌤𑍇 ॥52॥

𑌮𑌨𑌃𑌸𑍍𑌤𑌂𑌭𑌂 𑌸𑍍𑌤𑌂𑌭𑌂 𑌗𑌮𑌯𑌦𑍁𑌪𑌕𑌂𑌪𑌂 𑌪𑍍𑌰𑌣𑌮𑌤𑌾𑌂
𑌸𑌦𑌾 𑌲𑍋𑌲𑌂 𑌨𑍀𑌲𑌂 𑌚𑌿𑌕𑍁𑌰𑌜𑌿𑌤𑌲𑍋𑌲𑌂𑌬𑌨𑌿𑌕𑌰𑌮𑍍 ।
𑌗𑌿𑌰𑌾𑌂 𑌦𑍂𑌰𑌂 𑌸𑍍𑌮𑍇𑌰𑌂 𑌧𑍃𑌤𑌶𑌶𑌿𑌕𑌿𑌶𑍋𑌰𑌂 𑌪𑌶𑍁𑌪𑌤𑍇𑌃
𑌦𑍃𑌶𑌾𑌂 𑌯𑍋𑌗𑍍𑌯𑌂 𑌭𑍋𑌗𑍍𑌯𑌂 𑌤𑍁𑌹𑌿𑌨𑌗𑌿𑌰𑌿𑌭𑌾𑌗𑍍𑌯𑌂 𑌵𑌿𑌜𑌯𑌤𑍇 ॥53॥

𑌘𑌨𑌶𑍍𑌯𑌾𑌮𑌾𑌨𑍍𑌕𑌾𑌮𑌾𑌂𑌤𑌕𑌮𑌹𑌿𑌷𑌿 𑌕𑌾𑌮𑌾𑌕𑍍𑌷𑌿 𑌮𑌧𑍁𑌰𑌾𑌨𑍍
𑌦𑍃𑌶𑌾𑌂 𑌪𑌾𑌤𑌾𑌨𑍇𑌤𑌾𑌨𑌮𑍃𑌤𑌜𑌲𑌶𑍀𑌤𑌾𑌨𑌨𑍁𑌪𑌮𑌾𑌨𑍍 ।
𑌭𑌵𑍋𑌤𑍍𑌪𑌾𑌤𑍇 𑌭𑍀𑌤𑍇 𑌮𑌯𑌿 𑌵𑌿𑌤𑌰 𑌨𑌾𑌥𑍇 𑌦𑍃𑌢𑌭𑌵-
𑌨𑍍𑌮𑌨𑌶𑍍𑌶𑍋𑌕𑍇 𑌮𑍂𑌕𑍇 𑌹𑌿𑌮𑌗𑌿𑌰𑌿𑌪𑌤𑌾𑌕𑍇 𑌕𑌰𑍁𑌣𑌯𑌾 ॥54॥

𑌨𑌤𑌾𑌨𑌾𑌂 𑌮𑌂𑌦𑌾𑌨𑌾𑌂 𑌭𑌵𑌨𑌿𑌗𑌲𑌬𑌂𑌧𑌾𑌕𑍁𑌲𑌧𑌿𑌯𑌾𑌂
𑌮𑌹𑌾𑌂𑌧𑍍𑌯𑌾𑌂 𑌰𑍁𑌂𑌧𑌾𑌨𑌾𑌮𑌭𑌿𑌲𑌷𑌿𑌤𑌸𑌂𑌤𑌾𑌨𑌲𑌤𑌿𑌕𑌾𑌮𑍍 ।
𑌚𑌰𑌂𑌤𑍀𑌂 𑌕𑌂𑌪𑌾𑌯𑌾𑌸𑍍𑌤𑌟𑌭𑍁𑌵𑌿 𑌸𑌵𑌿𑌤𑍍𑌰𑍀𑌂 𑌤𑍍𑌰𑌿𑌜𑌗𑌤𑌾𑌂
𑌸𑍍𑌮𑌰𑌾𑌮𑌸𑍍𑌤𑌾𑌂 𑌨𑌿𑌤𑍍𑌯𑌂 𑌸𑍍𑌮𑌰𑌮𑌥𑌨𑌜𑍀𑌵𑌾𑌤𑍁𑌕𑌲𑌿𑌕𑌾𑌮𑍍 ॥55॥

𑌪𑌰𑌾 𑌵𑌿𑌦𑍍𑌯𑌾 𑌹𑍃𑌦𑍍𑌯𑌾𑌶𑍍𑌰𑌿𑌤𑌮𑌦𑌨𑌵𑌿𑌦𑍍𑌯𑌾 𑌮𑌰𑌕𑌤-
𑌪𑍍𑌰𑌭𑌾𑌨𑍀𑌲𑌾 𑌲𑍀𑌲𑌾𑌪𑌰𑌵𑌶𑌿𑌤𑌶𑍂𑌲𑌾𑌯𑍁𑌧𑌮𑌨𑌾𑌃 ।
𑌤𑌮𑌃𑌪𑍂𑌰𑌂 𑌦𑍂𑌰𑌂 𑌚𑌰𑌣𑌨𑌤𑌪𑍌𑌰𑌂𑌦𑌰𑌪𑍁𑌰𑍀-
𑌮𑍃𑌗𑌾𑌕𑍍𑌷𑍀 𑌕𑌾𑌮𑌾𑌕𑍍𑌷𑍀 𑌕𑌮𑌲𑌤𑌰𑌲𑌾𑌕𑍍𑌷𑍀 𑌨𑌯𑌤𑍁 𑌮𑍇 ॥56॥

𑌅𑌹𑌂𑌤𑌾𑌖𑍍𑌯𑌾 𑌮𑌤𑍍𑌕𑌂 𑌕𑌬𑌲𑌯𑌤𑌿 𑌹𑌾 𑌹𑌂𑌤 𑌹𑌰𑌿𑌣𑍀
𑌹𑌠𑌾𑌤𑍍𑌸𑌂𑌵𑌿𑌦𑍍𑌰𑍂𑌪𑌂 𑌹𑌰𑌮𑌹𑌿𑌷𑌿 𑌸𑌸𑍍𑌯𑌾𑌂𑌕𑍁𑌰𑌮𑌸𑍌 ।
𑌕𑌟𑌾𑌕𑍍𑌷𑌵𑍍𑌯𑌾𑌕𑍍𑌷𑍇𑌪𑌪𑍍𑌰𑌕𑌟𑌹𑌰𑌿𑌪𑌾𑌷𑌾𑌣𑌪𑌟𑌲𑍈𑌃
𑌇𑌮𑌾𑌮𑍁𑌚𑍍𑌚𑍈𑌰𑍁𑌚𑍍𑌚𑌾𑌟𑌯 𑌝𑌟𑌿𑌤𑌿 𑌕𑌾𑌮𑌾𑌕𑍍𑌷𑌿 𑌕𑍃𑌪𑌯𑌾 ॥5𑍭॥

𑌬𑍁𑌧𑍇 𑌵𑌾 𑌮𑍂𑌕𑍇 𑌵𑌾 𑌤𑌵 𑌪𑌤𑌤𑌿 𑌯𑌸𑍍𑌮𑌿𑌨𑍍𑌕𑍍𑌷𑌣𑌮𑌸𑍌
𑌕𑌟𑌾𑌕𑍍𑌷𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌜𑌡𑌿𑌮𑌕𑍍𑌷𑍋𑌦𑌪𑌟𑌿𑌮𑌾 ।
𑌕𑌥𑌂𑌕𑌾𑌰𑌂 𑌨𑌾𑌸𑍍𑌮𑍈 𑌕𑌰𑌮𑍁𑌕𑍁𑌲𑌚𑍂𑌡𑌾𑌲𑌮𑍁𑌕𑍁𑌟𑌾
𑌨𑌮𑍋𑌵𑌾𑌕𑌂 𑌬𑍍𑌰𑍂𑌯𑍁𑌰𑍍𑌨𑌮𑍁𑌚𑌿𑌪𑌰𑌿𑌪𑌂𑌥𑌿𑌪𑍍𑌰𑌭𑍃𑌤𑌯𑌃 ॥5𑍮॥

𑌪𑍍𑌰𑌤𑍀𑌚𑍀𑌂 𑌪𑌶𑍍𑌯𑌾𑌮𑌃 𑌪𑍍𑌰𑌕𑌟𑌰𑍁𑌚𑌿𑌨𑍀𑌵𑌾𑌰𑌕𑌮𑌣𑌿-
𑌪𑍍𑌰𑌭𑌾𑌸𑌧𑍍𑌰𑍀𑌚𑍀𑌨𑌾𑌂 𑌪𑍍𑌰𑌦𑌲𑌿𑌤𑌷𑌡𑌾𑌧𑌾𑌰𑌕𑌮𑌲𑌾𑌮𑍍 ।
𑌚𑌰𑌂𑌤𑍀𑌂 𑌸𑍌𑌷𑍁𑌮𑍍𑌨𑍇 𑌪𑌥𑌿 𑌪𑌰𑌪𑌦𑍇𑌂𑌦𑍁𑌪𑍍𑌰𑌵𑌿𑌗𑌲-
𑌤𑍍𑌸𑍁𑌧𑌾𑌰𑍍𑌦𑍍𑌰𑌾𑌂 𑌕𑌾𑌮𑌾𑌕𑍍𑌷𑍀𑌂 𑌪𑌰𑌿𑌣𑌤𑌪𑌰𑌂𑌜𑍍𑌯𑍋𑌤𑌿𑌰𑍁𑌦𑌯𑌾𑌮𑍍 ॥5𑍯॥

𑌜𑌂𑌭𑌾𑌰𑌾𑌤𑌿𑌪𑍍𑌰𑌭𑍃𑌤𑌿𑌮𑍁𑌕𑍁𑌟𑍀𑌃 𑌪𑌾𑌦𑌯𑍋𑌃 𑌪𑍀𑌠𑌯𑌂𑌤𑍀
𑌗𑍁𑌂𑌫𑌾𑌨𑍍𑌵𑌾𑌚𑌾𑌂 𑌕𑌵𑌿𑌜𑌨𑌕𑍃𑌤𑌾𑌨𑍍𑌸𑍍𑌵𑍈𑌰𑌮𑌾𑌰𑌾𑌮𑌯𑌂𑌤𑍀 ।
𑌶𑌂𑌪𑌾𑌲𑌕𑍍𑌷𑍍𑌮𑍀𑌂 𑌮𑌣𑌿𑌗𑌣𑌰𑍁𑌚𑌾𑌪𑌾𑌟𑌲𑍈𑌃 𑌪𑍍𑌰𑌾𑌪𑌯𑌂𑌤𑍀
𑌕𑌂𑌪𑌾𑌤𑍀𑌰𑍇 𑌕𑌵𑌿𑌪𑌰𑌿𑌷𑌦𑌾𑌂 𑌜𑍃𑌂𑌭𑌤𑍇 𑌭𑌾𑌗𑍍𑌯𑌸𑍀𑌮𑌾 ॥60॥

𑌚𑌂𑌦𑍍𑌰𑌾𑌪𑍀𑌡𑌾𑌂 𑌚𑌤𑍁𑌰𑌵𑌦𑌨𑌾𑌂 𑌚𑌂𑌚𑌲𑌾𑌪𑌾𑌂𑌗𑌲𑍀𑌲𑌾𑌂
𑌕𑍁𑌂𑌦𑌸𑍍𑌮𑍇𑌰𑌾𑌂 𑌕𑍁𑌚𑌭𑌰𑌨𑌤𑌾𑌂 𑌕𑍁𑌂𑌤𑌲𑍋𑌦𑍍𑌧𑍂𑌤𑌭𑍃𑌂𑌗𑌾𑌮𑍍 ।
𑌮𑌾𑌰𑌾𑌰𑌾𑌤𑍇𑌰𑍍𑌮𑌦𑌨𑌶𑌿𑌖𑌿𑌨𑌂 𑌮𑌾𑌂𑌸𑌲𑌂 𑌦𑍀𑌪𑌯𑌂𑌤𑍀𑌂
𑌕𑌾𑌮𑌾𑌕𑍍𑌷𑍀𑌂 𑌤𑌾𑌂 𑌕𑌵𑌿𑌕𑍁𑌲𑌗𑌿𑌰𑌾𑌂 𑌕𑌲𑍍𑌪𑌵𑌲𑍍𑌲𑍀𑌮𑍁𑌪𑌾𑌸𑍇 ॥61॥

𑌕𑌾𑌲𑌾𑌂𑌭𑍋𑌦𑌪𑍍𑌰𑌕𑌰𑌸𑍁𑌷𑌮𑌾𑌂 𑌕𑌾𑌂𑌤𑌿𑌭𑌿𑌸𑍍𑌤𑌿𑌰𑍍𑌜𑌯𑌂𑌤𑍀
𑌕𑌲𑍍𑌯𑌾𑌣𑌾𑌨𑌾𑌮𑍁𑌦𑌯𑌸𑌰𑌣𑌿𑌃 𑌕𑌲𑍍𑌪𑌵𑌲𑍍𑌲𑍀 𑌕𑌵𑍀𑌨𑌾𑌮𑍍 ।
𑌕𑌂𑌦𑌰𑍍𑌪𑌾𑌰𑍇𑌃 𑌪𑍍𑌰𑌿𑌯𑌸𑌹𑌚𑌰𑍀 𑌕𑌲𑍍𑌮𑌷𑌾𑌣𑌾𑌂 𑌨𑌿𑌹𑌂𑌤𑍍𑌰𑍀
𑌕𑌾𑌂𑌚𑍀𑌦𑍇𑌶𑌂 𑌤𑌿𑌲𑌕𑌯𑌤𑌿 𑌸𑌾 𑌕𑌾𑌪𑌿 𑌕𑌾𑌰𑍁𑌣𑍍𑌯𑌸𑍀𑌮𑌾 ॥62॥

𑌊𑌰𑍀𑌕𑍁𑌰𑍍𑌵𑌨𑍍𑌨𑍁𑌰𑌸𑌿𑌜𑌤𑌟𑍇 𑌚𑌾𑌤𑍁𑌰𑍀𑌂 𑌭𑍂𑌧𑌰𑌾𑌣𑌾𑌂
𑌪𑌾𑌥𑍋𑌜𑌾𑌨𑌾𑌂 𑌨𑌯𑌨𑌯𑍁𑌗𑌲𑍇 𑌪𑌰𑌿𑌪𑌂𑌥𑍍𑌯𑌂 𑌵𑌿𑌤𑌨𑍍𑌵𑌨𑍍 ।
𑌕𑌂𑌪𑌾𑌤𑍀𑌰𑍇 𑌵𑌿𑌹𑌰𑌤𑌿 𑌰𑍁𑌚𑌾 𑌮𑍋𑌘𑌯𑌨𑍍𑌮𑍇𑌘𑌶𑍈𑌲𑍀𑌂
𑌕𑍋𑌕𑌦𑍍𑌵𑍇𑌷𑌂 𑌶𑌿𑌰𑌸𑌿 𑌕𑌲𑌯𑌨𑍍𑌕𑍋𑌽𑌪𑌿 𑌵𑌿𑌦𑍍𑌯𑌾𑌵𑌿𑌶𑍇𑌷𑌃 ॥63॥

𑌕𑌾𑌂𑌚𑍀𑌲𑍀𑌲𑌾𑌪𑌰𑌿𑌚𑌯𑌵𑌤𑍀 𑌕𑌾𑌪𑌿 𑌤𑌾𑌪𑌿𑌚𑍍𑌛𑌲𑌕𑍍𑌷𑍍𑌮𑍀𑌃
𑌜𑌾𑌡𑍍𑌯𑌾𑌰𑌣𑍍𑌯𑍇 𑌹𑍁𑌤𑌵𑌹𑌶𑌿𑌖𑌾 𑌜𑌨𑍍𑌮𑌭𑍂𑌮𑌿𑌃 𑌕𑍃𑌪𑌾𑌯𑌾𑌃 ।
𑌮𑌾𑌕𑌂𑌦𑌶𑍍𑌰𑍀𑌰𑍍𑌮𑌧𑍁𑌰𑌕𑌵𑌿𑌤𑌾𑌚𑌾𑌤𑍁𑌰𑍀 𑌕𑍋𑌕𑌿𑌲𑌾𑌨𑌾𑌂
𑌮𑌾𑌰𑍍𑌗𑍇 𑌭𑍂𑌯𑌾𑌨𑍍𑌮𑌮 𑌨𑌯𑌨𑌯𑍋𑌰𑍍𑌮𑌾𑌨𑍍𑌮𑌥𑍀 𑌕𑌾𑌪𑌿 𑌵𑌿𑌦𑍍𑌯𑌾 ॥64॥

𑌸𑍇𑌤𑍁𑌰𑍍𑌮𑌾𑌤𑌰𑍍𑌮𑌰𑌤𑌕𑌮𑌯𑍋 𑌭𑌕𑍍𑌤𑌿𑌭𑌾𑌜𑌾𑌂 𑌭𑌵𑌾𑌬𑍍𑌧𑍌
𑌲𑍀𑌲𑌾𑌲𑍋𑌲𑌾 𑌕𑍁𑌵𑌲𑌯𑌮𑌯𑍀 𑌮𑌾𑌨𑍍𑌮𑌥𑍀 𑌵𑍈𑌜𑌯𑌂𑌤𑍀 ।
𑌕𑌾𑌂𑌚𑍀𑌭𑍂𑌷𑌾 𑌪𑌶𑍁𑌪𑌤𑌿𑌦𑍃𑌶𑌾𑌂 𑌕𑌾𑌪𑌿 𑌕𑌾𑌲𑌾𑌂𑌜𑌨𑌾𑌲𑍀
𑌮𑌤𑍍𑌕𑌂 𑌦𑍁𑌃𑌖𑌂 𑌶𑌿𑌥𑌿𑌲𑌯𑌤𑍁 𑌤𑍇 𑌮𑌂𑌜𑍁𑌲𑌾𑌪𑌾𑌂𑌗𑌮𑌾𑌲𑌾 ॥65॥

𑌵𑍍𑌯𑌾𑌵𑍃𑌣𑍍𑌵𑌾𑌨𑌾𑌃 𑌕𑍁𑌵𑌲𑌯𑌦𑌲𑌪𑍍𑌰𑌕𑍍𑌰𑌿𑌯𑌾𑌵𑍈𑌰𑌮𑍁𑌦𑍍𑌰𑌾𑌂
𑌵𑍍𑌯𑌾𑌕𑍁𑌰𑍍𑌵𑌾𑌣𑌾 𑌮𑌨𑌸𑌿𑌜𑌮𑌹𑌾𑌰𑌾𑌜𑌸𑌾𑌮𑍍𑌰𑌾𑌜𑍍𑌯𑌲𑌕𑍍𑌷𑍍𑌮𑍀𑌮𑍍 ।
𑌕𑌾𑌂𑌚𑍀𑌲𑍀𑌲𑌾𑌵𑌿𑌹𑍃𑌤𑌿𑌰𑌸𑌿𑌕𑍇 𑌕𑌾𑌂𑌕𑍍𑌷𑌿𑌤𑌂 𑌨𑌃 𑌕𑍍𑌰𑌿𑌯𑌾𑌸𑍁𑌃
𑌬𑌂𑌧𑌚𑍍𑌛𑍇𑌦𑍇 𑌤𑌵 𑌨𑌿𑌯𑌮𑌿𑌨𑌾𑌂 𑌬𑌦𑍍𑌧𑌦𑍀𑌕𑍍𑌷𑌾𑌃 𑌕𑌟𑌾𑌕𑍍𑌷𑌾𑌃 ॥66॥

𑌕𑌾𑌲𑌾𑌂𑌭𑍋𑌦𑍇 𑌶𑌶𑌿𑌰𑍁𑌚𑌿 𑌦𑌲𑌂 𑌕𑍈𑌤𑌕𑌂 𑌦𑌰𑍍𑌶𑌯𑌂𑌤𑍀
𑌮𑌧𑍍𑌯𑍇𑌸𑍌𑌦𑌾𑌮𑌿𑌨𑌿 𑌮𑌧𑍁𑌲𑌿𑌹𑌾𑌂 𑌮𑌾𑌲𑌿𑌕𑌾𑌂 𑌰𑌾𑌜𑌯𑌂𑌤𑍀 ।
𑌹𑌂𑌸𑌾𑌰𑌾𑌵𑌂 𑌵𑌿𑌕𑌚𑌕𑌮𑌲𑍇 𑌮𑌂𑌜𑍁𑌮𑍁𑌲𑍍𑌲𑌾𑌸𑌯𑌂𑌤𑍀
𑌕𑌂𑌪𑌾𑌤𑍀𑌰𑍇 𑌵𑌿𑌲𑌸𑌤𑌿 𑌨𑌵𑌾 𑌕𑌾𑌪𑌿 𑌕𑌾𑌰𑍁𑌣𑍍𑌯𑌲𑌕𑍍𑌷𑍍𑌮𑍀𑌃 ॥6𑍭॥

𑌚𑌿𑌤𑍍𑌰𑌂 𑌚𑌿𑌤𑍍𑌰𑌂 𑌨𑌿𑌜𑌮𑍃𑌦𑍁𑌤𑌯𑌾 𑌭𑌰𑍍𑌤𑍍𑌸𑌯𑌨𑍍𑌪𑌲𑍍𑌲𑌵𑌾𑌲𑍀𑌂
𑌪𑍁𑌂𑌸𑌾𑌂 𑌕𑌾𑌮𑌾𑌨𑍍𑌭𑍁𑌵𑌿 𑌚 𑌨𑌿𑌯𑌤𑌂 𑌪𑍂𑌰𑌯𑌨𑍍𑌪𑍁𑌣𑍍𑌯𑌭𑌾𑌜𑌾𑌮𑍍 ।
𑌜𑌾𑌤𑌃 𑌶𑍈𑌲𑌾𑌨𑍍𑌨 𑌤𑍁 𑌜𑌲𑌨𑌿𑌧𑍇𑌃 𑌸𑍍𑌵𑍈𑌰𑌸𑌂𑌚𑌾𑌰𑌶𑍀𑌲𑌃
𑌕𑌾𑌂𑌚𑍀𑌭𑍂𑌷𑌾 𑌕𑌲𑌯𑌤𑍁 𑌶𑌿𑌵𑌂 𑌕𑍋𑌽𑌪𑌿 𑌚𑌿𑌂𑌤𑌾𑌮𑌣𑌿𑌰𑍍𑌮𑍇 ॥6𑍮॥

𑌤𑌾𑌮𑍍𑌰𑌾𑌂𑌭𑍋𑌜𑌂 𑌜𑌲𑌦𑌨𑌿𑌕𑌟𑍇 𑌤𑌤𑍍𑌰 𑌬𑌂𑌧𑍂𑌕𑌪𑍁𑌷𑍍𑌪𑌂
𑌤𑌸𑍍𑌮𑌿𑌨𑍍𑌮𑌲𑍍𑌲𑍀𑌕𑍁𑌸𑍁𑌮𑌸𑍁𑌷𑌮𑌾𑌂 𑌤𑌤𑍍𑌰 𑌵𑍀𑌣𑌾𑌨𑌿𑌨𑌾𑌦𑌮𑍍 ।
𑌵𑍍𑌯𑌾𑌵𑍃𑌨𑍍𑌵𑌾𑌨𑌾 𑌸𑍁𑌕𑍃𑌤𑌲𑌹𑌰𑍀 𑌕𑌾𑌪𑌿 𑌕𑌾𑌂𑌚𑌿𑌨𑌗𑌰𑍍𑌯𑌾𑌮𑍍
𑌐𑌶𑌾𑌨𑍀 𑌸𑌾 𑌕𑌲𑌯𑌤𑌿𑌤𑌰𑌾𑌮𑍈𑌂𑌦𑍍𑌰𑌜𑌾𑌲𑌂 𑌵𑌿𑌲𑌾𑌸𑌮𑍍 ॥6𑍯॥

𑌆𑌹𑌾𑌰𑌾𑌂𑌶𑌂 𑌤𑍍𑌰𑌿𑌦𑌶𑌸𑌦𑌸𑌾𑌮𑌾𑌶𑍍𑌰𑌯𑍇 𑌚𑌾𑌤𑌕𑌾𑌨𑌾𑌮𑍍
𑌆𑌕𑌾𑌶𑍋𑌪𑌰𑍍𑌯𑌪𑌿 𑌚 𑌕𑌲𑌯𑌨𑍍𑌨𑌾𑌲𑌯𑌂 𑌤𑍁𑌂𑌗𑌮𑍇𑌷𑌾𑌮𑍍 ।
𑌕𑌂𑌪𑌾𑌤𑍀𑌰𑍇 𑌵𑌿𑌹𑌰𑌤𑌿𑌤𑌰𑌾𑌂 𑌕𑌾𑌮𑌧𑍇𑌨𑍁𑌃 𑌕𑌵𑍀𑌨𑌾𑌂
𑌮𑌂𑌦𑌸𑍍𑌮𑍇𑌰𑍋 𑌮𑌦𑌨𑌨𑌿𑌗𑌮𑌪𑍍𑌰𑌕𑍍𑌰𑌿𑌯𑌾𑌸𑌂𑌪𑍍𑌰𑌦𑌾𑌯𑌃 ॥𑍭0॥

𑌆𑌰𑍍𑌦𑍍𑌰𑍀𑌭𑍂𑌤𑍈𑌰𑌵𑌿𑌰𑌲𑌕𑍃𑌪𑍈𑌰𑌾𑌤𑍍𑌤𑌲𑍀𑌲𑌾𑌵𑌿𑌲𑌾𑌸𑍈𑌃
𑌆𑌸𑍍𑌥𑌾𑌪𑍂𑌰𑍍𑌣𑍈𑌰𑌧𑌿𑌕𑌚𑌪𑌲𑍈𑌰𑌂𑌚𑌿𑌤𑌾𑌂𑌭𑍋𑌜𑌶𑌿𑌲𑍍𑌪𑍈𑌃 ।
𑌕𑌾𑌂𑌤𑍈𑌰𑍍𑌲𑌕𑍍𑌷𑍍𑌮𑍀𑌲𑌲𑌿𑌤𑌭𑌵𑌨𑍈𑌃 𑌕𑌾𑌂𑌤𑌿𑌕𑍈𑌵𑌲𑍍𑌯𑌸𑌾𑌰𑍈𑌃
𑌕𑌾𑌶𑍍𑌮𑌲𑍍𑌯𑌂 𑌨𑌃 𑌕𑌬𑌲𑌯𑌤𑍁 𑌸𑌾 𑌕𑌾𑌮𑌕𑍋𑌟𑍀 𑌕𑌟𑌾𑌕𑍍𑌷𑍈𑌃 ॥𑍭1॥

𑌆𑌧𑍂𑌨𑍍𑌵𑌂𑌤𑍍𑌯𑍈 𑌤𑌰𑌲𑌨𑌯𑌨𑍈𑌰𑌾𑌂𑌗𑌜𑍀𑌂 𑌵𑍈𑌜𑌯𑌂𑌤𑍀𑌮𑍍
𑌆𑌨𑌂𑌦𑌿𑌨𑍍𑌯𑍈 𑌨𑌿𑌜𑌪𑌦𑌜𑍁𑌷𑌾𑌮𑌾𑌤𑍍𑌤𑌕𑌾𑌂𑌚𑍀𑌪𑍁𑌰𑌾𑌯𑍈 ।
𑌆𑌸𑍍𑌮𑌾𑌕𑍀𑌨𑌂 𑌹𑍃𑌦𑌯𑌮𑌖𑌿𑌲𑍈𑌰𑌾𑌗𑌮𑌾𑌨𑌾𑌂 𑌪𑍍𑌰𑌪𑌂𑌚𑍈𑌃
𑌆𑌰𑌾𑌧𑍍𑌯𑌾𑌯𑍈 𑌸𑍍𑌪𑍃𑌹𑌯𑌤𑌿𑌤𑌰𑌾𑌮𑌦𑌿𑌮𑌾𑌯𑍈 𑌜𑌨𑌨𑍍𑌯𑍈 ॥𑍭2॥

𑌦𑍂𑌰𑌂 𑌵𑌾𑌚𑌾𑌂 𑌤𑍍𑌰𑌿𑌦𑌶𑌸𑌦𑌸𑌾𑌂 𑌦𑍁𑌃𑌖𑌸𑌿𑌂𑌧𑍋𑌸𑍍𑌤𑌰𑌿𑌤𑍍𑌰𑌂
𑌮𑍋𑌹𑌕𑍍𑌷𑍍𑌵𑍇𑌲𑌕𑍍𑌷𑌿𑌤𑌿𑌰𑍁𑌹𑌵𑌨𑍇 𑌕𑍍𑌰𑍂𑌰𑌧𑌾𑌰𑌂 𑌕𑍁𑌠𑌾𑌰𑌮𑍍 ।
𑌕𑌂𑌪𑌾𑌤𑍀𑌰𑌪𑍍𑌰𑌣𑌯𑌿 𑌕𑌵𑌿𑌭𑌿𑌰𑍍𑌵𑌰𑍍𑌣𑌿𑌤𑍋𑌦𑍍𑌯𑌚𑍍𑌚𑌰𑌿𑌤𑍍𑌰𑌂
𑌶𑌾𑌂𑌤𑍍𑌯𑍈 𑌸𑍇𑌵𑍇 𑌸𑌕𑌲𑌵𑌿𑌪𑌦𑌾𑌂 𑌶𑌾𑌂𑌕𑌰𑌂 𑌤𑌤𑍍𑌕𑌲𑌤𑍍𑌰𑌮𑍍 ॥𑍭3॥

𑌖𑌂𑌡𑍀𑌕𑍃𑌤𑍍𑌯 𑌪𑍍𑌰𑌕𑍃𑌤𑌿𑌕𑍁𑌟𑌿𑌲𑌂 𑌕𑌲𑍍𑌮𑌷𑌂 𑌪𑍍𑌰𑌾𑌤𑌿𑌭𑌶𑍍𑌰𑍀-
𑌶𑍁𑌂𑌡𑍀𑌰𑌤𑍍𑌵𑌂 𑌨𑌿𑌜𑌪𑌦𑌜𑍁𑌷𑌾𑌂 𑌶𑍂𑌨𑍍𑌯𑌤𑌂𑌦𑍍𑌰𑌂 𑌦𑌿𑌶𑌂𑌤𑍀 ।
𑌤𑍁𑌂𑌡𑍀𑌰𑌾𑌖𑍍𑌯𑍈 𑌮𑌹𑌤𑌿 𑌵𑌿𑌷𑌯𑍇 𑌸𑍍𑌵𑌰𑍍𑌣𑌵𑍃𑌷𑍍𑌟𑌿𑌪𑍍𑌰𑌦𑌾𑌤𑍍𑌰𑍀
𑌚𑌂𑌡𑍀 𑌦𑍇𑌵𑍀 𑌕𑌲𑌯𑌤𑌿 𑌰𑌤𑌿𑌂 𑌚𑌂𑌦𑍍𑌰𑌚𑍂𑌡𑌾𑌲𑌚𑍂𑌡𑍇 ॥𑍭4॥

𑌯𑍇𑌨 𑌖𑍍𑌯𑌾𑌤𑍋 𑌭𑌵𑌤𑌿 𑌸 𑌗𑍃𑌹𑍀 𑌪𑍂𑌰𑍁𑌷𑍋 𑌮𑍇𑌰𑍁𑌧𑌨𑍍𑌵𑌾
𑌯𑌦𑍍𑌦𑍃𑌕𑍍𑌕𑍋𑌣𑍇 𑌮𑌦𑌨𑌨𑌿𑌗𑌮𑌪𑍍𑌰𑌾𑌭𑌵𑌂 𑌬𑍋𑌭𑌵𑍀𑌤𑌿 ।
𑌯𑌤𑍍𑌪𑍍𑌰𑍀𑌤𑍍𑌯𑍈𑌵 𑌤𑍍𑌰𑌿𑌜𑌗𑌦𑌧𑌿𑌪𑍋 𑌜𑍃𑌂𑌭𑌤𑍇 𑌕𑌿𑌂𑌪𑌚𑌾𑌨𑌃
𑌕𑌂𑌪𑌾𑌤𑍀𑌰𑍇 𑌸 𑌜𑌯𑌤𑌿 𑌮𑌹𑌾𑌨𑍍𑌕𑌶𑍍𑌚𑌿𑌦𑍋𑌜𑍋𑌵𑌿𑌶𑍇𑌷𑌃 ॥𑍭5॥

𑌧𑌨𑍍𑌯𑌾 𑌧𑌨𑍍𑌯𑌾 𑌗𑌤𑌿𑌰𑌿𑌹 𑌗𑌿𑌰𑌾𑌂 𑌦𑍇𑌵𑌿 𑌕𑌾𑌮𑌾𑌕𑍍𑌷𑌿 𑌯𑌨𑍍𑌮𑍇
𑌨𑌿𑌂𑌦𑍍𑌯𑌾𑌂 𑌭𑌿𑌂𑌦𑍍𑌯𑌾𑌤𑍍𑌸𑌪𑌦𑌿 𑌜𑌡𑌤𑌾𑌂 𑌕𑌲𑍍𑌮𑌷𑌾𑌦𑍁𑌨𑍍𑌮𑌿𑌷𑌂𑌤𑍀𑌮𑍍 ।
𑌸𑌾𑌧𑍍𑌵𑍀 𑌮𑌾𑌧𑍍𑌵𑍀𑌰𑌸𑌮𑌧𑍁𑌰𑌤𑌾𑌭𑌂𑌜𑌿𑌨𑍀 𑌮𑌂𑌜𑍁𑌰𑍀𑌤𑌿𑌃
𑌵𑌾𑌣𑍀𑌵𑍇𑌣𑍀 𑌝𑌟𑌿𑌤𑌿 𑌵𑍃𑌣𑍁𑌤𑌾𑌤𑍍𑌸𑍍𑌵𑌰𑍍𑌧𑍁𑌨𑍀𑌸𑍍𑌪𑌰𑍍𑌧𑌿𑌨𑍀 𑌮𑌾𑌮𑍍 ॥𑍭6॥

𑌯𑌸𑍍𑌯𑌾 𑌵𑌾𑌟𑍀 𑌹𑍃𑌦𑌯𑌕𑌮𑌲𑌂 𑌕𑍌𑌸𑍁𑌮𑍀 𑌯𑍋𑌗𑌭𑌾𑌜𑌾𑌂
𑌯𑌸𑍍𑌯𑌾𑌃 𑌪𑍀𑌠𑍀 𑌸𑌤𑌤𑌶𑌿𑌶𑌿𑌰𑌾 𑌶𑍀𑌕𑌰𑍈𑌰𑍍𑌮𑌾𑌕𑌰𑌂𑌦𑍈𑌃 ।
𑌯𑌸𑍍𑌯𑌾𑌃 𑌪𑍇𑌟𑍀 𑌶𑍍𑌰𑍁𑌤𑌿𑌪𑌰𑌿𑌚𑌲𑌨𑍍𑌮𑍌𑌲𑌿𑌰𑌤𑍍𑌨𑌸𑍍𑌯 𑌕𑌾𑌂𑌚𑍀
𑌸𑌾 𑌮𑍇 𑌸𑍋𑌮𑌾𑌭𑌰𑌣𑌮𑌹𑌿𑌷𑍀 𑌸𑌾𑌧𑌯𑍇𑌤𑍍𑌕𑌾𑌂𑌕𑍍𑌷𑌿𑌤𑌾𑌨𑌿 ॥𑍭𑍭॥

𑌏𑌕𑌾 𑌮𑌾𑌤𑌾 𑌸𑌕𑌲𑌜𑌗𑌤𑌾𑌮𑍀𑌯𑍁𑌷𑍀 𑌧𑍍𑌯𑌾𑌨𑌮𑍁𑌦𑍍𑌰𑌾𑌮𑍍
𑌏𑌕𑌾𑌮𑍍𑌰𑌾𑌧𑍀𑌶𑍍𑌵𑌰𑌚𑌰𑌣𑌯𑍋𑌰𑍇𑌕𑌤𑌾𑌨𑌾𑌂 𑌸𑌮𑌿𑌂𑌧𑍇 ।
𑌤𑌾𑌟𑌂𑌕𑍋𑌦𑍍𑌯𑌨𑍍𑌮𑌣𑌿𑌗𑌣𑌰𑍁𑌚𑌾 𑌤𑌾𑌮𑍍𑌰𑌕𑌰𑍍𑌣𑌪𑍍𑌰𑌦𑍇𑌶𑌾
𑌤𑌾𑌰𑍁𑌣𑍍𑌯𑌶𑍍𑌰𑍀𑌸𑍍𑌤𑌬𑌕𑌿𑌤𑌤𑌨𑍁𑌸𑍍𑌤𑌾𑌪𑌸𑍀 𑌕𑌾𑌪𑌿 𑌬𑌾𑌲𑌾 ॥𑍭𑍮॥

𑌦𑌂𑌤𑌾𑌦𑌂𑌤𑌿𑌪𑍍𑌰𑌕𑌟𑌨𑌕𑌰𑍀 𑌦𑌂𑌤𑌿𑌭𑌿𑌰𑍍𑌮𑌂𑌦𑌯𑌾𑌨𑍈𑌃
𑌮𑌂𑌦𑌾𑌰𑌾𑌣𑌾𑌂 𑌮𑌦𑌪𑌰𑌿𑌣𑌤𑌿𑌂 𑌮𑌥𑍍𑌨𑌤𑍀 𑌮𑌂𑌦𑌹𑌾𑌸𑍈𑌃 ।
𑌅𑌂𑌕𑍂𑌰𑌾𑌭𑍍𑌯𑌾𑌂 𑌮𑌨𑌸𑌿𑌜𑌤𑌰𑍋𑌰𑌂𑌕𑌿𑌤𑍋𑌰𑌾𑌃 𑌕𑍁𑌚𑌾𑌭𑍍𑌯𑌾-
𑌮𑌂𑌤𑌃𑌕𑌾𑌂𑌚𑌿 𑌸𑍍𑌫𑍁𑌰𑌤𑌿 𑌜𑌗𑌤𑌾𑌮𑌾𑌦𑌿𑌮𑌾 𑌕𑌾𑌪𑌿 𑌮𑌾𑌤𑌾 ॥𑍭𑍯॥

𑌤𑍍𑌰𑌿𑌯𑌂𑌬𑌕𑌕𑍁𑌟𑍁𑌂𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀𑌮𑌿𑌂𑌦𑌿𑌰𑌾𑌂
𑌪𑍁𑌲𑌿𑌂𑌦𑌪𑌤𑌿𑌸𑍁𑌂𑌦𑌰𑍀𑌂 𑌤𑍍𑌰𑌿𑌪𑍁𑌰𑌭𑍈𑌰𑌵𑍀𑌂 𑌭𑌾𑌰𑌤𑍀𑌮𑍍 ।
𑌮𑌤𑌂𑌗𑌕𑍁𑌲𑌨𑌾𑌯𑌿𑌕𑌾𑌂 𑌮𑌹𑌿𑌷𑌮𑌰𑍍𑌦𑌨𑍀𑌂 𑌮𑌾𑌤𑍃𑌕𑌾𑌂
𑌭𑌣𑌂𑌤𑌿 𑌵𑌿𑌬𑍁𑌧𑍋𑌤𑍍𑌤𑌮𑌾 𑌵𑌿𑌹𑍃𑌤𑌿𑌮𑍇𑌵 𑌕𑌾𑌮𑌾𑌕𑍍𑌷𑌿 𑌤𑍇 ॥𑍮0॥

𑌮𑌹𑌾𑌮𑍁𑌨𑌿𑌮𑌨𑍋𑌨𑌟𑍀 𑌮𑌹𑌿𑌤𑌰𑌮𑍍𑌯𑌕𑌂𑌪𑌾𑌤𑌟𑍀-
𑌕𑍁𑌟𑍀𑌰𑌕𑌵𑌿𑌹𑌾𑌰𑌿𑌣𑍀 𑌕𑍁𑌟𑌿𑌲𑌬𑍋𑌧𑌸𑌂𑌹𑌾𑌰𑌿𑌣𑍀 ।
𑌸𑌦𑌾 𑌭𑌵𑌤𑍁 𑌕𑌾𑌮𑌿𑌨𑍀 𑌸𑌕𑌲𑌦𑍇𑌹𑌿𑌨𑌾𑌂 𑌸𑍍𑌵𑌾𑌮𑌿𑌨𑍀
𑌕𑍃𑌪𑌾𑌤𑌿𑌶𑌯𑌕𑌿𑌂𑌕𑌰𑍀 𑌮𑌮 𑌵𑌿𑌭𑍂𑌤𑌯𑍇 𑌶𑌾𑌂𑌕𑌰𑍀 ॥𑍮1॥

𑌜𑌡𑌾𑌃 𑌪𑍍𑌰𑌕𑍃𑌤𑌿𑌨𑌿𑌰𑍍𑌧𑌨𑌾 𑌜𑌨𑌵𑌿𑌲𑍋𑌚𑌨𑌾𑌰𑍁𑌂𑌤𑍁𑌦𑌾
𑌨𑌰𑌾 𑌜𑌨𑌨𑌿 𑌵𑍀𑌕𑍍𑌷𑌣𑌂 𑌕𑍍𑌷𑌣𑌮𑌵𑌾𑌪𑍍𑌯 𑌕𑌾𑌮𑌾𑌕𑍍𑌷𑌿 𑌤𑍇 ।
𑌵𑌚𑌸𑍍𑌸𑍁 𑌮𑌧𑍁𑌮𑌾𑌧𑍁𑌰𑍀𑌂 𑌪𑍍𑌰𑌕𑌟𑌯𑌂𑌤𑌿 𑌪𑍌𑌰𑌂𑌦𑌰𑍀-
𑌵𑌿𑌭𑍂𑌤𑌿𑌷𑍁 𑌵𑌿𑌡𑌂𑌬𑌨𑌾𑌂 𑌵𑌪𑍁𑌷𑌿 𑌮𑌾𑌨𑍍𑌮𑌥𑍀𑌂 𑌪𑍍𑌰𑌕𑍍𑌰𑌿𑌯𑌾𑌮𑍍 ॥𑍮2॥

𑌘𑌨𑍍𑌸𑌤𑌨𑌤𑌟𑌸𑍍𑌫𑍁𑌟𑌸𑍍𑌫𑍁𑌰𑌿𑌤𑌕𑌂𑌚𑍁𑌲𑍀𑌚𑌂𑌚𑌲𑍀-
𑌕𑍃𑌤𑌤𑍍𑌰𑌿𑌪𑍁𑌰𑌶𑌾𑌸𑌨𑌾 𑌸𑍁𑌜𑌨𑌶𑍀𑌲𑌿𑌤𑍋𑌪𑌾𑌸𑌨𑌾 ।
𑌦𑍃𑌶𑍋𑌃 𑌸𑌰𑌣𑌿𑌮𑌶𑍍𑌨𑍁𑌤𑍇 𑌮𑌮 𑌕𑌦𑌾 𑌨𑍁 𑌕𑌾𑌂𑌚𑍀𑌪𑍁𑌰𑍇
𑌪𑌰𑌾 𑌪𑌰𑌮𑌯𑍋𑌗𑌿𑌨𑌾𑌂 𑌮𑌨𑌸𑌿 𑌚𑌿𑌤𑍍𑌕𑍁𑌲𑌾 𑌪𑍁𑌷𑍍𑌕𑌲𑌾 ॥𑍮3॥

𑌕𑌵𑍀𑌂𑌦𑍍𑌰𑌹𑍃𑌦𑌯𑍇𑌚𑌰𑍀 𑌪𑌰𑌿𑌗𑍃𑌹𑍀𑌤𑌕𑌾𑌂𑌚𑍀𑌪𑍁𑌰𑍀
𑌨𑌿𑌰𑍂𑌢𑌕𑌰𑍁𑌣𑌾𑌝𑌰𑍀 𑌨𑌿𑌖𑌿𑌲𑌲𑍋𑌕𑌰𑌕𑍍𑌷𑌾𑌕𑌰𑍀 ।
𑌮𑌨𑌃𑌪𑌥𑌦𑌵𑍀𑌯𑌸𑍀 𑌮𑌦𑌨𑌶𑌾𑌸𑌨𑌪𑍍𑌰𑍇𑌯𑌸𑍀
𑌮𑌹𑌾𑌗𑍁𑌣𑌗𑌰𑍀𑌯𑌸𑍀 𑌮𑌮 𑌦𑍃𑌶𑍋𑌽𑌸𑍍𑌤𑍁 𑌨𑍇𑌦𑍀𑌯𑌸𑍀 ॥𑍮4॥

𑌧𑌨𑍇𑌨 𑌨 𑌰𑌮𑌾𑌮𑌹𑍇 𑌖𑌲𑌜𑌨𑌾𑌨𑍍𑌨 𑌸𑍇𑌵𑌾𑌮𑌹𑍇
𑌨 𑌚𑌾𑌪𑌲𑌮𑌯𑌾𑌮𑌹𑍇 𑌭𑌵𑌭𑌯𑌾𑌨𑍍𑌨 𑌦𑍂𑌯𑌾𑌮𑌹𑍇 ।
𑌸𑍍𑌥𑌿𑌰𑌾𑌂 𑌤𑌨𑍁𑌮𑌹𑍇𑌤𑌰𑌾𑌂 𑌮𑌨𑌸𑌿 𑌕𑌿𑌂 𑌚 𑌕𑌾𑌂𑌚𑍀𑌰𑌤-
𑌸𑍍𑌮𑌰𑌾𑌂𑌤𑌕𑌕𑍁𑌟𑍁𑌂𑌬𑌿𑌨𑍀𑌚𑌰𑌣𑌪𑌲𑍍𑌲𑌵𑍋𑌪𑌾𑌸𑌨𑌾𑌮𑍍 ॥𑍮5॥

𑌸𑍁𑌰𑌾𑌃 𑌪𑌰𑌿𑌜𑌨𑌾 𑌵𑌪𑍁𑌰𑍍𑌮𑌨𑌸𑌿𑌜𑌾𑌯 𑌵𑍈𑌰𑌾𑌯𑌤𑍇
𑌤𑍍𑌰𑌿𑌵𑌿𑌷𑍍𑌟𑌪𑌨𑌿𑌤𑌂𑌬𑌿𑌨𑍀𑌕𑍁𑌚𑌤𑌟𑍀 𑌚 𑌕𑍇𑌲𑍀𑌗𑌿𑌰𑌿𑌃 ।
𑌗𑌿𑌰𑌃 𑌸𑍁𑌰𑌭𑌯𑍋 𑌵𑌯𑌸𑍍𑌤𑌰𑍁𑌣𑌿𑌮𑌾 𑌦𑌰𑌿𑌦𑍍𑌰𑌸𑍍𑌯 𑌵𑌾
𑌕𑌟𑌾𑌕𑍍𑌷𑌸𑌰𑌣𑍌 𑌕𑍍𑌷𑌣𑌂 𑌨𑌿𑌪𑌤𑌿𑌤𑌸𑍍𑌯 𑌕𑌾𑌮𑌾𑌕𑍍𑌷𑌿 𑌤𑍇 ॥𑍮6॥

𑌪𑌵𑌿𑌤𑍍𑌰𑌯 𑌜𑌗𑌤𑍍𑌤𑍍𑌰𑌯𑍀𑌵𑌿𑌬𑍁𑌧𑌬𑍋𑌧𑌜𑍀𑌵𑌾𑌤𑍁𑌭𑌿𑌃
𑌪𑍁𑌰𑌤𑍍𑌰𑌯𑌵𑌿𑌮𑌰𑍍𑌦𑌿𑌨𑌃 𑌪𑍁𑌲𑌕𑌕𑌂𑌚𑍁𑌲𑍀𑌦𑌾𑌯𑌿𑌭𑌿𑌃 ।
𑌭𑌵𑌕𑍍𑌷𑌯𑌵𑌿𑌚𑌕𑍍𑌷𑌣𑍈𑌰𑍍𑌵𑍍𑌯𑌸𑌨𑌮𑍋𑌕𑍍𑌷𑌣𑍈𑌰𑍍𑌵𑍀𑌕𑍍𑌷𑌣𑍈𑌃
𑌨𑌿𑌰𑌕𑍍𑌷𑌰𑌶𑌿𑌰𑍋𑌮𑌣𑌿𑌂 𑌕𑌰𑍁𑌣𑌯𑍈𑌵 𑌕𑌾𑌮𑌾𑌕𑍍𑌷𑌿 𑌮𑌾𑌮𑍍 ॥𑍮𑍭॥

𑌕𑌦𑌾 𑌕𑌲𑌿𑌤𑌖𑍇𑌲𑌨𑌾𑌃 𑌕𑌰𑍁𑌣𑌯𑍈𑌵 𑌕𑌾𑌂𑌚𑍀𑌪𑍁𑌰𑍇
𑌕𑌲𑌾𑌯𑌮𑍁𑌕𑍁𑌲𑌤𑍍𑌵𑌿𑌷𑌃 𑌶𑍁𑌭𑌕𑌦𑌂𑌬𑌪𑍂𑌰𑍍𑌣𑌾𑌂𑌕𑍁𑌰𑌾𑌃 ।
𑌪𑌯𑍋𑌧𑌰𑌭𑌰𑌾𑌲𑌸𑌾𑌃 𑌕𑌵𑌿𑌜𑌨𑍇𑌷𑍁 𑌤𑍇 𑌬𑌂𑌧𑍁𑌰𑌾𑌃
𑌪𑌚𑍇𑌲𑌿𑌮𑌕𑍃𑌪𑌾𑌰𑌸𑌾 𑌪𑌰𑌿𑌪𑌤𑌂𑌤𑌿 𑌮𑌾𑌰𑍍𑌗𑍇 𑌦𑍃𑌶𑍋𑌃 ॥𑍮𑍮॥

𑌅𑌶𑍋𑌧𑍍𑌯𑌮𑌚𑌲𑍋𑌦𑍍𑌭𑌵𑌂 𑌹𑍃𑌦𑌯𑌨𑌂𑌦𑌨𑌂 𑌦𑍇𑌹𑌿𑌨𑌾𑌮𑍍
𑌅𑌨𑌰𑍍𑌘𑌮𑌧𑌿𑌕𑌾𑌂𑌚𑌿 𑌤𑌤𑍍𑌕𑌿𑌮𑌪𑌿 𑌰𑌤𑍍𑌨𑌮𑍁𑌦𑍍𑌦𑍍𑌯𑍋𑌤𑌤𑍇 ।
𑌅𑌨𑍇𑌨 𑌸𑌮𑌲𑌂𑌕𑍃𑌤𑌾 𑌜𑌯𑌤𑌿 𑌶𑌂𑌕𑌰𑌾𑌂𑌕𑌸𑍍𑌥𑌲𑍀
𑌕𑌦𑌾𑌸𑍍𑌯 𑌮𑌮 𑌮𑌾𑌨𑌸𑌂 𑌵𑍍𑌰𑌜𑌤𑌿 𑌪𑍇𑌟𑌿𑌕𑌾𑌵𑌿𑌭𑍍𑌰𑌮𑌮𑍍 ॥𑍮𑍯॥

𑌪𑌰𑌾𑌮𑍃𑌤𑌝𑌰𑍀𑌪𑍍𑌲𑍁𑌤𑌾 𑌜𑌯𑌤𑌿 𑌨𑌿𑌤𑍍𑌯𑌮𑌂𑌤𑌶𑍍𑌚𑌰𑍀
𑌭𑍁𑌵𑌾𑌮𑌪𑌿 𑌬𑌹𑌿𑌶𑍍𑌚𑌰𑍀 𑌪𑌰𑌮𑌸𑌂𑌵𑌿𑌦𑍇𑌕𑌾𑌤𑍍𑌮𑌿𑌕𑌾 ।
𑌮𑌹𑌦𑍍𑌭𑌿𑌰𑌪𑌰𑍋𑌕𑍍𑌷𑌿𑌤𑌾 𑌸𑌤𑌤𑌮𑍇𑌵 𑌕𑌾𑌂𑌚𑍀𑌪𑍁𑌰𑍇
𑌮𑌮𑌾𑌨𑍍𑌵𑌹𑌮𑌹𑌂𑌮𑌤𑌿𑌰𑍍𑌮𑌨𑌸𑌿 𑌭𑌾𑌤𑍁 𑌮𑌾𑌹𑍇𑌶𑍍𑌵𑌰𑍀 ॥𑍯0॥

𑌤𑌮𑍋𑌵𑌿𑌪𑌿𑌨𑌧𑌾𑌵𑌿𑌨𑌂 𑌸𑌤𑌤𑌮𑍇𑌵 𑌕𑌾𑌂𑌚𑍀𑌪𑍁𑌰𑍇
𑌵𑌿𑌹𑌾𑌰𑌰𑌸𑌿𑌕𑌾 𑌪𑌰𑌾 𑌪𑌰𑌮𑌸𑌂𑌵𑌿𑌦𑍁𑌰𑍍𑌵𑍀𑌰𑍁𑌹𑍇 ।
𑌕𑌟𑌾𑌕𑍍𑌷𑌨𑌿𑌗𑌲𑍈𑌰𑍍𑌦𑍃𑌢𑌂 𑌹𑍃𑌦𑌯𑌦𑍁𑌷𑍍𑌟𑌦𑌂𑌤𑌾𑌵𑌲𑌂
𑌚𑌿𑌰𑌂 𑌨𑌯𑌤𑍁 𑌮𑌾𑌮𑌕𑌂 𑌤𑍍𑌰𑌿𑌪𑍁𑌰𑌵𑍈𑌰𑌿𑌸𑍀𑌮𑌂𑌤𑌿𑌨𑍀 ॥𑍯1॥

𑌤𑍍𑌵𑌮𑍇𑌵 𑌸𑌤𑌿 𑌚𑌂𑌡𑌿𑌕𑌾 𑌤𑍍𑌵𑌮𑌸𑌿 𑌦𑍇𑌵𑌿 𑌚𑌾𑌮𑍁𑌂𑌡𑌿𑌕𑌾
𑌤𑍍𑌵𑌮𑍇𑌵 𑌪𑌰𑌮𑌾𑌤𑍃𑌕𑌾 𑌤𑍍𑌵𑌮𑌪𑌿 𑌯𑍋𑌗𑌿𑌨𑍀𑌰𑍂𑌪𑌿𑌣𑍀 ।
𑌤𑍍𑌵𑌮𑍇𑌵 𑌕𑌿𑌲 𑌶𑌾𑌂𑌭𑌵𑍀 𑌤𑍍𑌵𑌮𑌸𑌿 𑌕𑌾𑌮𑌕𑍋𑌟𑍀 𑌜𑌯𑌾
𑌤𑍍𑌵𑌮𑍇𑌵 𑌵𑌿𑌜𑌯𑌾 𑌤𑍍𑌵𑌯𑌿 𑌤𑍍𑌰𑌿𑌜𑌗𑌦𑌂𑌬 𑌕𑌿𑌂 𑌬𑍍𑌰𑍂𑌮𑌹𑍇 ॥𑍯2॥

𑌪𑌰𑍇 𑌜𑌨𑌨𑌿 𑌪𑌾𑌰𑍍𑌵𑌤𑌿 𑌪𑍍𑌰𑌣𑌤𑌪𑌾𑌲𑌿𑌨𑌿 𑌪𑍍𑌰𑌾𑌤𑌿𑌭-
𑌪𑍍𑌰𑌦𑌾𑌤𑍍𑌰𑌿 𑌪𑌰𑌮𑍇𑌶𑍍𑌵𑌰𑌿 𑌤𑍍𑌰𑌿𑌜𑌗𑌦𑌾𑌶𑍍𑌰𑌿𑌤𑍇 𑌶𑌾𑌶𑍍𑌵𑌤𑍇 ।
𑌤𑍍𑌰𑌿𑌯𑌂𑌬𑌕𑌕𑍁𑌟𑍁𑌂𑌬𑌿𑌨𑌿 𑌤𑍍𑌰𑌿𑌪𑌦𑌸𑌂𑌗𑌿𑌨𑌿 𑌤𑍍𑌰𑍀𑌕𑍍𑌷𑌣𑍇
𑌤𑍍𑌰𑌿𑌶𑌕𑍍𑌤𑌿𑌮𑌯𑌿 𑌵𑍀𑌕𑍍𑌷𑌣𑌂 𑌮𑌯𑌿 𑌨𑌿𑌧𑍇𑌹𑌿 𑌕𑌾𑌮𑌾𑌕𑍍𑌷𑌿 𑌤𑍇 ॥𑍯3॥

𑌮𑌨𑍋𑌮𑌧𑍁𑌕𑌰𑍋𑌤𑍍𑌸𑌵𑌂 𑌵𑌿𑌦𑌧𑌤𑍀 𑌮𑌨𑍀𑌷𑌾𑌜𑍁𑌷𑌾𑌂
𑌸𑍍𑌵𑌯𑌂𑌪𑍍𑌰𑌭𑌵𑌵𑍈𑌖𑌰𑍀𑌵𑌿𑌪𑌿𑌨𑌵𑍀𑌥𑌿𑌕𑌾𑌲𑌂𑌬𑌿𑌨𑍀 ।
𑌅𑌹𑍋 𑌶𑌿𑌶𑌿𑌰𑌿𑌤𑌾 𑌕𑍃𑌪𑌾𑌮𑌧𑍁𑌰𑌸𑍇𑌨 𑌕𑌂𑌪𑌾𑌤𑌟𑍇
𑌚𑌰𑌾𑌚𑌰𑌵𑌿𑌧𑌾𑌯𑌿𑌨𑍀 𑌚𑌲𑌤𑌿 𑌕𑌾𑌪𑌿 𑌚𑌿𑌨𑍍𑌮𑌂𑌜𑌰𑍀 ॥𑍯4॥

𑌕𑌲𑌾𑌵𑌤𑌿 𑌕𑌲𑌾𑌭𑍃𑌤𑍋 𑌮𑍁𑌕𑍁𑌟𑌸𑍀𑌮𑍍𑌨𑌿 𑌲𑍀𑌲𑌾𑌵𑌤𑌿
𑌸𑍍𑌪𑍃𑌹𑌾𑌵𑌤𑌿 𑌮𑌹𑍇𑌶𑍍𑌵𑌰𑍇 𑌭𑍁𑌵𑌨𑌮𑍋𑌹𑌨𑍇 𑌭𑌾𑌸𑍍𑌵𑌤𑌿 ।
𑌪𑍍𑌰𑌭𑌾𑌵𑌤𑌿 𑌰𑌮𑍇 𑌸𑌦𑌾 𑌮𑌹𑌿𑌤𑌰𑍂𑌪𑌶𑍋𑌭𑌾𑌵𑌤𑌿
𑌤𑍍𑌵𑌰𑌾𑌵𑌤𑌿 𑌪𑌰𑍇 𑌸𑌤𑌾𑌂 𑌗𑍁𑌰𑍁𑌕𑍃𑌪𑌾𑌂𑌬𑍁𑌧𑌾𑌰𑌾𑌵𑌤𑌿 ॥𑍯5॥

𑌤𑍍𑌵𑌯𑍈𑌵 𑌜𑌗𑌦𑌂𑌬𑌯𑌾 𑌭𑍁𑌵𑌨𑌮𑌂𑌡𑌲𑌂 𑌸𑍂𑌯𑌤𑍇
𑌤𑍍𑌵𑌯𑍈𑌵 𑌕𑌰𑍁𑌣𑌾𑌰𑍍𑌦𑍍𑌰𑌯𑌾 𑌤𑌦𑌪𑌿 𑌰𑌕𑍍𑌷𑌣𑌂 𑌨𑍀𑌯𑌤𑍇 ।
𑌤𑍍𑌵𑌯𑍈𑌵 𑌖𑌰𑌕𑍋𑌪𑌯𑌾 𑌨𑌯𑌨𑌪𑌾𑌵𑌕𑍇 𑌹𑍂𑌯𑌤𑍇
𑌤𑍍𑌵𑌯𑍈𑌵 𑌕𑌿𑌲 𑌨𑌿𑌤𑍍𑌯𑌯𑌾 𑌜𑌗𑌤𑌿 𑌸𑌂𑌤𑌤𑌂 𑌸𑍍𑌥𑍀𑌯𑌤𑍇 ॥𑍯6॥

𑌚𑌰𑌾𑌚𑌰𑌜𑌗𑌨𑍍𑌮𑌯𑍀𑌂 𑌸𑌕𑌲𑌹𑍃𑌨𑍍𑌮𑌯𑍀𑌂 𑌚𑌿𑌨𑍍𑌮𑌯𑍀𑌂
𑌗𑍁𑌣𑌤𑍍𑌰𑌯𑌮𑌯𑍀𑌂 𑌜𑌗𑌤𑍍𑌤𑍍𑌰𑌯𑌮𑌯𑍀𑌂 𑌤𑍍𑌰𑌿𑌧𑌾𑌮𑌾𑌮𑌯𑍀𑌮𑍍 ।
𑌪𑌰𑌾𑌪𑌰𑌮𑌯𑍀𑌂 𑌸𑌦𑌾 𑌦𑌶𑌦𑌿𑌶𑌾𑌂 𑌨𑌿𑌶𑌾𑌹𑌰𑍍𑌮𑌯𑍀𑌂
𑌪𑌰𑌾𑌂 𑌸𑌤𑌤𑌸𑌨𑍍𑌮𑌯𑍀𑌂 𑌮𑌨𑌸𑌿 𑌚𑌿𑌨𑍍𑌮𑌯𑍀𑌂 𑌶𑍀𑌲𑌯𑍇 ॥𑍯𑍭॥

𑌜𑌯 𑌜𑌗𑌦𑌂𑌬𑌿𑌕𑍇 𑌹𑌰𑌕𑍁𑌟𑍁𑌂𑌬𑌿𑌨𑌿 𑌵𑌕𑍍𑌤𑍍𑌰𑌰𑍁𑌚𑌾
𑌜𑌿𑌤𑌶𑌰𑌦𑌂𑌬𑍁𑌜𑍇 𑌘𑌨𑌵𑌿𑌡𑌂𑌬𑌿𑌨𑌿 𑌕𑍇𑌶𑌰𑍁𑌚𑌾 ।
𑌪𑌰𑌮𑌵𑌲𑌂𑌬𑌨𑌂 𑌕𑍁𑌰𑍁 𑌸𑌦𑌾 𑌪𑌰𑌰𑍂𑌪𑌧𑌰𑍇
𑌮𑌮 𑌗𑌤𑌸𑌂𑌵𑌿𑌦𑍋 𑌜𑌡𑌿𑌮𑌡𑌂𑌬𑌰𑌤𑌾𑌂𑌡𑌵𑌿𑌨𑌃 ॥𑍯𑍮॥

𑌭𑍁𑌵𑌨𑌜𑌨𑌨𑌿 𑌭𑍂𑌷𑌾𑌭𑍂𑌤𑌚𑌂𑌦𑍍𑌰𑍇 𑌨𑌮𑌸𑍍𑌤𑍇
𑌕𑌲𑍁𑌷𑌶𑌮𑌨𑌿 𑌕𑌂𑌪𑌾𑌤𑍀𑌰𑌗𑍇𑌹𑍇 𑌨𑌮𑌸𑍍𑌤𑍇 ।
𑌨𑌿𑌖𑌿𑌲𑌨𑌿𑌗𑌮𑌵𑍇𑌦𑍍𑌯𑍇 𑌨𑌿𑌤𑍍𑌯𑌰𑍂𑌪𑍇 𑌨𑌮𑌸𑍍𑌤𑍇
𑌪𑌰𑌶𑌿𑌵𑌮𑌯𑌿 𑌪𑌾𑌶𑌚𑍍𑌛𑍇𑌦𑌹𑌸𑍍𑌤𑍇 𑌨𑌮𑌸𑍍𑌤𑍇 ॥𑍯𑍯॥

𑌕𑍍𑌵𑌣𑌤𑍍𑌕𑌾𑌂𑌚𑍀 𑌕𑌾𑌂𑌚𑍀𑌪𑍁𑌰𑌮𑌣𑌿𑌵𑌿𑌪𑌂𑌚𑍀𑌲𑌯𑌝𑌰𑍀-
𑌶𑌿𑌰𑌃𑌕𑌂𑌪𑌾 𑌕𑌂𑌪𑌾𑌵𑌸𑌤𑌿𑌰𑌨𑍁𑌕𑌂𑌪𑌾𑌜𑌲𑌨𑌿𑌧𑌿𑌃 ।
𑌘𑌨𑌶𑍍𑌯𑌾𑌮𑌾 𑌶𑍍𑌯𑌾𑌮𑌾 𑌕𑌠𑌿𑌨𑌕𑍁𑌚𑌸𑍀𑌮𑌾 𑌮𑌨𑌸𑌿 𑌮𑍇
𑌮𑍃𑌗𑌾𑌕𑍍𑌷𑍀 𑌕𑌾𑌮𑌾𑌕𑍍𑌷𑍀 𑌹𑌰𑌨𑌟𑌨𑌸𑌾𑌕𑍍𑌷𑍀 𑌵𑌿𑌹𑌰𑌤𑌾𑌤𑍍 ॥100॥

𑌸𑌮𑌰𑌵𑌿𑌜𑌯𑌕𑍋𑌟𑍀 𑌸𑌾𑌧𑌕𑌾𑌨𑌂𑌦𑌧𑌾𑌟𑍀
𑌮𑍃𑌦𑍁𑌗𑍁𑌣𑌪𑌰𑌿𑌪𑍇𑌟𑍀 𑌮𑍁𑌖𑍍𑌯𑌕𑌾𑌦𑌂𑌬𑌵𑌾𑌟𑍀 ।
𑌮𑍁𑌨𑌿𑌨𑍁𑌤𑌪𑌰𑌿𑌪𑌾𑌟𑍀 𑌮𑍋𑌹𑌿𑌤𑌾𑌜𑌾𑌂𑌡𑌕𑍋𑌟𑍀
𑌪𑌰𑌮𑌶𑌿𑌵𑌵𑌧𑍂𑌟𑍀 𑌪𑌾𑌤𑍁 𑌮𑌾𑌂 𑌕𑌾𑌮𑌕𑍋𑌟𑍀 ॥101॥

𑌇𑌮𑌂 𑌪𑌰𑌵𑌰𑌪𑍍𑌰𑌦𑌂 𑌪𑍍𑌰𑌕𑍃𑌤𑌿𑌪𑍇𑌶𑌲𑌂 𑌪𑌾𑌵𑌨𑌂
𑌪𑌰𑌾𑌪𑌰𑌚𑌿𑌦𑌾𑌕𑍃𑌤𑌿𑌪𑍍𑌰𑌕𑌟𑌨𑌪𑍍𑌰𑌦𑍀𑌪𑌾𑌯𑌿𑌤𑌮𑍍 ।
𑌸𑍍𑌤𑌵𑌂 𑌪𑌠𑌤𑌿 𑌨𑌿𑌤𑍍𑌯𑌦𑌾 𑌮𑌨𑌸𑌿 𑌭𑌾𑌵𑌯𑌨𑍍𑌨𑌂𑌬𑌿𑌕𑌾𑌂
𑌜𑌪𑍈𑌰𑌲𑌮𑌲𑌂 𑌮𑌖𑍈𑌰𑌧𑌿𑌕𑌦𑍇𑌹𑌸𑌂𑌶𑍋𑌷𑌣𑍈𑌃 ॥102॥

॥ 𑌇𑌤𑌿 𑌸𑍍𑌤𑍁𑌤𑌿𑌶𑌤𑌕𑌂 𑌸𑌂𑌪𑍂𑌰𑍍𑌣𑌮𑍍 ॥