𑌮𑍁𑌦𑌾𑌕𑌰𑌾𑌤𑍍𑌤 𑌮𑍋𑌦𑌕𑌂 𑌸𑌦𑌾 𑌵𑌿𑌮𑍁𑌕𑍍𑌤𑌿 𑌸𑌾𑌧𑌕𑌮𑍍 ।
𑌕𑌳𑌾𑌧𑌰𑌾𑌵𑌤𑌂𑌸𑌕𑌂 𑌵𑌿𑌲𑌾𑌸𑌿𑌲𑍋𑌕 𑌰𑌕𑍍𑌷𑌕𑌮𑍍 ।
𑌅𑌨𑌾𑌯𑌕𑍈𑌕 𑌨𑌾𑌯𑌕𑌂 𑌵𑌿𑌨𑌾𑌶𑌿𑌤𑍇𑌭 𑌦𑍈𑌤𑍍𑌯𑌕𑌮𑍍 ।
𑌨𑌤𑌾𑌶𑍁𑌭𑌾𑌶𑍁 𑌨𑌾𑌶𑌕𑌂 𑌨𑌮𑌾𑌮𑌿 𑌤𑌂 𑌵𑌿𑌨𑌾𑌯𑌕𑌮𑍍 ॥ 1 ॥
𑌨𑌤𑍇𑌤𑌰𑌾𑌤𑌿 𑌭𑍀𑌕𑌰𑌂 𑌨𑌵𑍋𑌦𑌿𑌤𑌾𑌰𑍍𑌕 𑌭𑌾𑌸𑍍𑌵𑌰𑌮𑍍 ।
𑌨𑌮𑌤𑍍𑌸𑍁𑌰𑌾𑌰𑌿 𑌨𑌿𑌰𑍍𑌜𑌰𑌂 𑌨𑌤𑌾𑌧𑌿𑌕𑌾𑌪𑌦𑍁𑌦𑍍𑌢𑌰𑌮𑍍 ।
𑌸𑍁𑌰𑍇𑌶𑍍𑌵𑌰𑌂 𑌨𑌿𑌧𑍀𑌶𑍍𑌵𑌰𑌂 𑌗𑌜𑍇𑌶𑍍𑌵𑌰𑌂 𑌗𑌣𑍇𑌶𑍍𑌵𑌰𑌮𑍍 ।
𑌮𑌹𑍇𑌶𑍍𑌵𑌰𑌂 𑌤𑌮𑌾𑌶𑍍𑌰𑌯𑍇 𑌪𑌰𑌾𑌤𑍍𑌪𑌰𑌂 𑌨𑌿𑌰𑌂𑌤𑌰𑌮𑍍 ॥ 2 ॥
𑌸𑌮𑌸𑍍𑌤 𑌲𑍋𑌕 𑌶𑌂𑌕𑌰𑌂 𑌨𑌿𑌰𑌸𑍍𑌤 𑌦𑍈𑌤𑍍𑌯 𑌕𑍁𑌂𑌜𑌰𑌮𑍍 ।
𑌦𑌰𑍇𑌤𑌰𑍋𑌦𑌰𑌂 𑌵𑌰𑌂 𑌵𑌰𑍇𑌭 𑌵𑌕𑍍𑌤𑍍𑌰𑌮𑌕𑍍𑌷𑌰𑌮𑍍 ।
𑌕𑍃𑌪𑌾𑌕𑌰𑌂 𑌕𑍍𑌷𑌮𑌾𑌕𑌰𑌂 𑌮𑍁𑌦𑌾𑌕𑌰𑌂 𑌯𑌶𑌸𑍍𑌕𑌰𑌮𑍍 ।
𑌮𑌨𑌸𑍍𑌕𑌰𑌂 𑌨𑌮𑌸𑍍𑌕𑍃𑌤𑌾𑌂 𑌨𑌮𑌸𑍍𑌕𑌰𑍋𑌮𑌿 𑌭𑌾𑌸𑍍𑌵𑌰𑌮𑍍 ॥ 3 ॥
𑌅𑌕𑌿𑌂𑌚𑌨𑌾𑌰𑍍𑌤𑌿 𑌮𑌾𑌰𑍍𑌜𑌨𑌂 𑌚𑌿𑌰𑌂𑌤𑌨𑍋𑌕𑍍𑌤𑌿 𑌭𑌾𑌜𑌨𑌮𑍍 ।
𑌪𑍁𑌰𑌾𑌰𑌿 𑌪𑍂𑌰𑍍𑌵 𑌨𑌂𑌦𑌨𑌂 𑌸𑍁𑌰𑌾𑌰𑌿 𑌗𑌰𑍍𑌵 𑌚𑌰𑍍𑌵𑌣𑌮𑍍 ।
𑌪𑍍𑌰𑌪𑌂𑌚 𑌨𑌾𑌶 𑌭𑍀𑌷𑌣𑌂 𑌧𑌨𑌂𑌜𑌯𑌾𑌦𑌿 𑌭𑍂𑌷𑌣𑌮𑍍 ।
𑌕𑌪𑍋𑌲 𑌦𑌾𑌨𑌵𑌾𑌰𑌣𑌂 𑌭𑌜𑍇 𑌪𑍁𑌰𑌾𑌣 𑌵𑌾𑌰𑌣𑌮𑍍 ॥ 4 ॥
𑌨𑌿𑌤𑌾𑌂𑌤 𑌕𑌾𑌂𑌤𑌿 𑌦𑌂𑌤 𑌕𑌾𑌂𑌤𑌿 𑌮𑌂𑌤 𑌕𑌾𑌂𑌤𑌿 𑌕𑌾𑌤𑍍𑌮𑌜𑌮𑍍 ।
𑌅𑌚𑌿𑌂𑌤𑍍𑌯 𑌰𑍂𑌪𑌮𑌂𑌤 𑌹𑍀𑌨 𑌮𑌂𑌤𑌰𑌾𑌯 𑌕𑍃𑌂𑌤𑌨𑌮𑍍 ।
𑌹𑍃𑌦𑌂𑌤𑌰𑍇 𑌨𑌿𑌰𑌂𑌤𑌰𑌂 𑌵𑌸𑌂𑌤𑌮𑍇𑌵 𑌯𑍋𑌗𑌿𑌨𑌾𑌮𑍍 ।
𑌤𑌮𑍇𑌕𑌦𑌂𑌤𑌮𑍇𑌵 𑌤𑌂 𑌵𑌿𑌚𑌿𑌂𑌤𑌯𑌾𑌮𑌿 𑌸𑌂𑌤𑌤𑌮𑍍 ॥ 5 ॥
𑌮𑌹𑌾𑌗𑌣𑍇𑌶 𑌪𑌂𑌚𑌰𑌤𑍍𑌨𑌮𑌾𑌦𑌰𑍇𑌣 𑌯𑍋𑌽𑌨𑍍𑌵𑌹𑌮𑍍 ।
𑌪𑍍𑌰𑌜𑌲𑍍𑌪𑌤𑌿 𑌪𑍍𑌰𑌭𑌾𑌤𑌕𑍇 𑌹𑍃𑌦𑌿 𑌸𑍍𑌮𑌰𑌨𑍍 𑌗𑌣𑍇𑌶𑍍𑌵𑌰𑌮𑍍 ।
𑌅𑌰𑍋𑌗𑌤𑌾𑌮𑌦𑍋𑌷𑌤𑌾𑌂 𑌸𑍁𑌸𑌾𑌹𑌿𑌤𑍀𑌂 𑌸𑍁𑌪𑍁𑌤𑍍𑌰𑌤𑌾𑌮𑍍 ।
𑌸𑌮𑌾𑌹𑌿𑌤𑌾𑌯𑍁 𑌰𑌷𑍍𑌟𑌭𑍂𑌤𑌿 𑌮𑌭𑍍𑌯𑍁𑌪𑍈𑌤𑌿 𑌸𑍋𑌽𑌚𑌿𑌰𑌾𑌤𑍍 ॥
