𑌮𑌹𑌾𑌯𑍋𑌗𑌪𑍀𑌠𑍇 𑌤𑌟𑍇 𑌭𑍀𑌮𑌰𑌥𑍍𑌯𑌾
𑌵𑌰𑌂 𑌪𑍁𑌂𑌡𑌰𑍀𑌕𑌾𑌯 𑌦𑌾𑌤𑍁𑌂 𑌮𑍁𑌨𑍀𑌂𑌦𑍍𑌰𑍈𑌃 ।
𑌸𑌮𑌾𑌗𑌤𑍍𑌯 𑌤𑌿𑌷𑍍𑌠𑌂𑌤𑌮𑌾𑌨𑌂𑌦𑌕𑌂𑌦𑌂
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ 1 ॥
𑌤𑌟𑌿𑌦𑍍𑌵𑌾𑌸𑌸𑌂 𑌨𑍀𑌲𑌮𑍇𑌘𑌾𑌵𑌭𑌾𑌸𑌂
𑌰𑌮𑌾𑌮𑌂𑌦𑌿𑌰𑌂 𑌸𑍁𑌂𑌦𑌰𑌂 𑌚𑌿𑌤𑍍𑌪𑍍𑌰𑌕𑌾𑌶𑌮𑍍 ।
𑌵𑌰𑌂 𑌤𑍍𑌵𑌿𑌷𑍍𑌟𑌕𑌾𑌯𑌾𑌂 𑌸𑌮𑌨𑍍𑌯𑌸𑍍𑌤𑌪𑌾𑌦𑌂
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ 2 ॥
𑌪𑍍𑌰𑌮𑌾𑌣𑌂 𑌭𑌵𑌾𑌬𑍍𑌧𑍇𑌰𑌿𑌦𑌂 𑌮𑌾𑌮𑌕𑌾𑌨𑌾𑌂
𑌨𑌿𑌤𑌂𑌬𑌃 𑌕𑌰𑌾𑌭𑍍𑌯𑌾𑌂 𑌧𑍃𑌤𑍋 𑌯𑍇𑌨 𑌤𑌸𑍍𑌮𑌾𑌤𑍍 ।
𑌵𑌿𑌧𑌾𑌤𑍁𑌰𑍍𑌵𑌸𑌤𑍍𑌯𑍈 𑌧𑍃𑌤𑍋 𑌨𑌾𑌭𑌿𑌕𑍋𑌶𑌃
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ 3 ॥
𑌸𑍍𑌫𑍁𑌰𑌤𑍍𑌕𑍌𑌸𑍍𑌤𑍁𑌭𑌾𑌲𑌂𑌕𑍃𑌤𑌂 𑌕𑌂𑌠𑌦𑍇𑌶𑍇
𑌶𑍍𑌰𑌿𑌯𑌾 𑌜𑍁𑌷𑍍𑌟𑌕𑍇𑌯𑍂𑌰𑌕𑌂 𑌶𑍍𑌰𑍀𑌨𑌿𑌵𑌾𑌸𑌮𑍍 ।
𑌶𑌿𑌵𑌂 𑌶𑌾𑌂𑌤𑌮𑍀𑌡𑍍𑌯𑌂 𑌵𑌰𑌂 𑌲𑍋𑌕𑌪𑌾𑌲𑌂
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ 4 ॥
𑌶𑌰𑌚𑍍𑌚𑌂𑌦𑍍𑌰𑌬𑌿𑌂𑌬𑌾𑌨𑌨𑌂 𑌚𑌾𑌰𑍁𑌹𑌾𑌸𑌂
𑌲𑌸𑌤𑍍𑌕𑍁𑌂𑌡𑌲𑌾𑌕𑍍𑌰𑌾𑌂𑌤𑌗𑌂𑌡𑌸𑍍𑌥𑌲𑌾𑌂𑌤𑌮𑍍 ।
𑌜𑌪𑌾𑌰𑌾𑌗𑌬𑌿𑌂𑌬𑌾𑌧𑌰𑌂 𑌕𑌂𑌜𑌨𑍇𑌤𑍍𑌰𑌂
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ 5 ॥
𑌕𑌿𑌰𑍀𑌟𑍋𑌜𑍍𑌜𑍍𑌵𑌲𑌤𑍍𑌸𑌰𑍍𑌵𑌦𑌿𑌕𑍍𑌪𑍍𑌰𑌾𑌂𑌤𑌭𑌾𑌗𑌂
𑌸𑍁𑌰𑍈𑌰𑌰𑍍𑌚𑌿𑌤𑌂 𑌦𑌿𑌵𑍍𑌯𑌰𑌤𑍍𑌨𑍈𑌰𑌨𑌰𑍍𑌘𑍈𑌃 ।
𑌤𑍍𑌰𑌿𑌭𑌂𑌗𑌾𑌕𑍃𑌤𑌿𑌂 𑌬𑌰𑍍𑌹𑌮𑌾𑌲𑍍𑌯𑌾𑌵𑌤𑌂𑌸𑌂
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ 6 ॥
𑌵𑌿𑌭𑍁𑌂 𑌵𑍇𑌣𑍁𑌨𑌾𑌦𑌂 𑌚𑌰𑌂𑌤𑌂 𑌦𑍁𑌰𑌂𑌤𑌂
𑌸𑍍𑌵𑌯𑌂 𑌲𑍀𑌲𑌯𑌾 𑌗𑍋𑌪𑌵𑍇𑌷𑌂 𑌦𑌧𑌾𑌨𑌮𑍍 ।
𑌗𑌵𑌾𑌂 𑌬𑍃𑌂𑌦𑌕𑌾𑌨𑌂𑌦𑌦𑌂 𑌚𑌾𑌰𑍁𑌹𑌾𑌸𑌂
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ ॥
𑌅𑌜𑌂 𑌰𑍁𑌕𑍍𑌮𑌿𑌣𑍀𑌪𑍍𑌰𑌾𑌣𑌸𑌂𑌜𑍀𑌵𑌨𑌂 𑌤𑌂
𑌪𑌰𑌂 𑌧𑌾𑌮 𑌕𑍈𑌵𑌲𑍍𑌯𑌮𑍇𑌕𑌂 𑌤𑍁𑌰𑍀𑌯𑌮𑍍 ।
𑌪𑍍𑌰𑌸𑌨𑍍𑌨𑌂 𑌪𑍍𑌰𑌪𑌨𑍍𑌨𑌾𑌰𑍍𑌤𑌿𑌹𑌂 𑌦𑍇𑌵𑌦𑍇𑌵𑌂
𑌪𑌰𑌬𑍍𑌰𑌹𑍍𑌮𑌲𑌿𑌂𑌗𑌂 𑌭𑌜𑍇 𑌪𑌾𑌂𑌡𑍁𑌰𑌂𑌗𑌮𑍍 ॥ ॥
𑌸𑍍𑌤𑌵𑌂 𑌪𑌾𑌂𑌡𑍁𑌰𑌂𑌗𑌸𑍍𑌯 𑌵𑍈 𑌪𑍁𑌣𑍍𑌯𑌦𑌂 𑌯𑍇
𑌪𑌠𑌂𑌤𑍍𑌯𑍇𑌕𑌚𑌿𑌤𑍍𑌤𑍇𑌨 𑌭𑌕𑍍𑌤𑍍𑌯𑌾 𑌚 𑌨𑌿𑌤𑍍𑌯𑌮𑍍 ।
𑌭𑌵𑌾𑌂𑌭𑍋𑌨𑌿𑌧𑌿𑌂 𑌤𑍇𑌽𑌪𑌿 𑌤𑍀𑌰𑍍𑌤𑍍𑌵𑌾𑌂𑌤𑌕𑌾𑌲𑍇
𑌹𑌰𑍇𑌰𑌾𑌲𑌯𑌂 𑌶𑌾𑌶𑍍𑌵𑌤𑌂 𑌪𑍍𑌰𑌾𑌪𑍍𑌨𑍁𑌵𑌂𑌤𑌿 ॥ ॥
𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸 𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑍍𑌪𑌾𑌦𑌾𑌚𑌾𑌰𑍍𑌯 𑌵𑌿𑌰𑌚𑌿𑌤𑌂 𑌶𑍍𑌰𑍀 𑌪𑌾𑌂𑌡𑍁𑌰𑌂𑌗𑌾𑌷𑍍𑌟𑌕𑌮𑍍 ।
