𑌆𑌦𑍌 𑌕𑌰𑍍𑌮𑌪𑍍𑌰𑌸𑌂𑌗𑌾𑌤𑍍𑌕𑌲𑌯𑌤𑌿 𑌕𑌲𑍁𑌷𑌂 𑌮𑌾𑌤𑍃𑌕𑍁𑌕𑍍𑌷𑍌 𑌸𑍍𑌥𑌿𑌤𑌂 𑌮𑌾𑌂
𑌵𑌿𑌣𑍍𑌮𑍂𑌤𑍍𑌰𑌾𑌮𑍇𑌧𑍍𑌯𑌮𑌧𑍍𑌯𑍇 𑌕𑍍𑌵𑌥𑌯𑌤𑌿 𑌨𑌿𑌤𑌰𑌾𑌂 𑌜𑌾𑌠𑌰𑍋 𑌜𑌾𑌤𑌵𑍇𑌦𑌾𑌃 ।
𑌯𑌦𑍍𑌯𑌦𑍍𑌵𑍈 𑌤𑌤𑍍𑌰 𑌦𑍁𑌃𑌖𑌂 𑌵𑍍𑌯𑌥𑌯𑌤𑌿 𑌨𑌿𑌤𑌰𑌾𑌂 𑌶𑌕𑍍𑌯𑌤𑍇 𑌕𑍇𑌨 𑌵𑌕𑍍𑌤𑍁𑌂
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 1॥

𑌬𑌾𑌲𑍍𑌯𑍇 𑌦𑍁𑌃𑌖𑌾𑌤𑌿𑌰𑍇𑌕𑍋 𑌮𑌲𑌲𑍁𑌲𑌿𑌤𑌵𑌪𑍁𑌃 𑌸𑍍𑌤𑌨𑍍𑌯𑌪𑌾𑌨𑍇 𑌪𑌿𑌪𑌾𑌸𑌾
𑌨𑍋 𑌶𑌕𑍍𑌤𑌶𑍍𑌚𑍇𑌂𑌦𑍍𑌰𑌿𑌯𑍇𑌭𑍍𑌯𑍋 𑌭𑌵𑌗𑍁𑌣𑌜𑌨𑌿𑌤𑌾𑌃 𑌜𑌂𑌤𑌵𑍋 𑌮𑌾𑌂 𑌤𑍁𑌦𑌂𑌤𑌿 ।
𑌨𑌾𑌨𑌾𑌰𑍋𑌗𑌾𑌦𑌿𑌦𑍁𑌃𑌖𑌾𑌦𑍍𑌰𑍁𑌦𑌨𑌪𑌰𑌵𑌶𑌃 𑌶𑌂𑌕𑌰𑌂 𑌨 𑌸𑍍𑌮𑌰𑌾𑌮𑌿
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 2॥

𑌪𑍍𑌰𑍌𑌢𑍋𑌽𑌹𑌂 𑌯𑍌𑌵𑌨𑌸𑍍𑌥𑍋 𑌵𑌿𑌷𑌯𑌵𑌿𑌷𑌧𑌰𑍈𑌃 𑌪𑌂𑌚𑌭𑌿𑌰𑍍𑌮𑌰𑍍𑌮𑌸𑌂𑌧𑍌
𑌦𑌷𑍍𑌟𑍋 𑌨𑌷𑍍𑌟𑍋 𑌵𑌿𑌵𑍇𑌕𑌃 𑌸𑍁𑌤𑌧𑌨𑌯𑍁𑌵𑌤𑌿𑌸𑍍𑌵𑌾𑌦𑍁𑌸𑍌𑌖𑍍𑌯𑍇 𑌨𑌿𑌷𑌣𑍍𑌣𑌃 ।
𑌶𑍈𑌵𑍀𑌚𑌿𑌂𑌤𑌾𑌵𑌿𑌹𑍀𑌨𑌂 𑌮𑌮 𑌹𑍃𑌦𑌯𑌮𑌹𑍋 𑌮𑌾𑌨𑌗𑌰𑍍𑌵𑌾𑌧𑌿𑌰𑍂𑌢𑌂
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 3॥

𑌵𑌾𑌰𑍍𑌧𑌕𑍍𑌯𑍇 𑌚𑍇𑌂𑌦𑍍𑌰𑌿𑌯𑌾𑌣𑌾𑌂 𑌵𑌿𑌗𑌤𑌗𑌤𑌿𑌮𑌤𑌿𑌶𑍍𑌚𑌾𑌧𑌿𑌦𑍈𑌵𑌾𑌦𑌿𑌤𑌾𑌪𑍈𑌃
𑌪𑌾𑌪𑍈 𑌰𑍋𑌗𑍈𑌰𑍍𑌵𑌿𑌯𑍋𑌗𑍈𑌸𑍍𑌤𑍍𑌵𑌨𑌵𑌸𑌿𑌤𑌵𑌪𑍁𑌃 𑌪𑍍𑌰𑍌𑌢𑌹𑍀𑌨𑌂 𑌚 𑌦𑍀𑌨𑌮𑍍 ।
𑌮𑌿𑌥𑍍𑌯𑌾𑌮𑍋𑌹𑌾𑌭𑌿𑌲𑌾𑌷𑍈𑌰𑍍𑌭𑍍𑌰𑌮𑌤𑌿 𑌮𑌮 𑌮𑌨𑍋 𑌧𑍂𑌰𑍍𑌜𑌟𑍇𑌰𑍍𑌧𑍍𑌯𑌾𑌨𑌶𑍂𑌨𑍍𑌯𑌂
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 4॥

𑌸𑍍𑌨𑌾𑌤𑍍𑌵𑌾 𑌪𑍍𑌰𑌤𑍍𑌯𑍂𑌷𑌕𑌾𑌲𑍇 𑌸𑍍𑌨𑌪𑌨𑌵𑌿𑌧𑌿𑌵𑌿𑌧𑍌 𑌨𑌾𑌹𑍃𑌤𑌂 𑌗𑌾𑌂𑌗𑌤𑍋𑌯𑌂
𑌪𑍂𑌜𑌾𑌰𑍍𑌥𑌂 𑌵𑌾 𑌕𑌦𑌾𑌚𑌿𑌦𑍍𑌬𑌹𑍁𑌤𑌰𑌗𑌹𑌨𑌾𑌤𑍍𑌖𑌂𑌡𑌬𑌿𑌲𑍍𑌵𑍀𑌦𑌲𑌾𑌨𑌿 ।
𑌨𑌾𑌨𑍀𑌤𑌾 𑌪𑌦𑍍𑌮𑌮𑌾𑌲𑌾 𑌸𑌰𑌸𑌿 𑌵𑌿𑌕𑌸𑌿𑌤𑌾 𑌗𑌂𑌧𑌧𑍂𑌪𑍈𑌃 𑌤𑍍𑌵𑌦𑌰𑍍𑌥𑌂
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 5॥

𑌦𑍁𑌗𑍍𑌧𑍈𑌰𑍍𑌮𑌧𑍍𑌵𑌾𑌜𑍍𑌯𑌯𑍁𑌕𑍍𑌤𑍈𑌰𑍍𑌦𑌧𑌿𑌸𑌿𑌤𑌸𑌹𑌿𑌤𑍈𑌃 𑌸𑍍𑌨𑌾𑌪𑌿𑌤𑌂 𑌨𑍈𑌵 𑌲𑌿𑌂𑌗𑌂
𑌨𑍋 𑌲𑌿𑌪𑍍𑌤𑌂 𑌚𑌂𑌦𑌨𑌾𑌦𑍍𑌯𑍈𑌃 𑌕𑌨𑌕𑌵𑌿𑌰𑌚𑌿𑌤𑍈𑌃 𑌪𑍂𑌜𑌿𑌤𑌂 𑌨 𑌪𑍍𑌰𑌸𑍂𑌨𑍈𑌃 ।
𑌧𑍂𑌪𑍈𑌃 𑌕𑌰𑍍𑌪𑍂𑌰𑌦𑍀𑌪𑍈𑌰𑍍𑌵𑌿𑌵𑌿𑌧𑌰𑌸𑌯𑍁𑌤𑍈𑌰𑍍𑌨𑍈𑌵 𑌭𑌕𑍍𑌷𑍍𑌯𑍋𑌪𑌹𑌾𑌰𑍈𑌃
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 6॥

𑌨𑍋 𑌶𑌕𑍍𑌯𑌂 𑌸𑍍𑌮𑌾𑌰𑍍𑌤𑌕𑌰𑍍𑌮 𑌪𑍍𑌰𑌤𑌿𑌪𑌦𑌗𑌹𑌨𑌪𑍍𑌰𑌤𑍍𑌯𑌵𑌾𑌯𑌾𑌕𑍁𑌲𑌾𑌖𑍍𑌯𑌂
𑌶𑍍𑌰𑍌𑌤𑍇 𑌵𑌾𑌰𑍍𑌤𑌾 𑌕𑌥𑌂 𑌮𑍇 𑌦𑍍𑌵𑌿𑌜𑌕𑍁𑌲𑌵𑌿𑌹𑌿𑌤𑍇 𑌬𑍍𑌰𑌹𑍍𑌮𑌮𑌾𑌰𑍍𑌗𑌾𑌨𑍁𑌸𑌾𑌰𑍇 । 𑌵𑌰𑍍 𑌬𑍍𑌰𑌹𑍍𑌮𑌮𑌾𑌰𑍍𑌗𑍇 𑌸𑍁𑌸𑌾𑌰𑍇
𑌜𑍍𑌞𑌾𑌤𑍋 𑌧𑌰𑍍𑌮𑍋 𑌵𑌿𑌚𑌾𑌰𑍈𑌃 𑌶𑍍𑌰𑌵𑌣𑌮𑌨𑌨𑌯𑍋𑌃 𑌕𑌿𑌂 𑌨𑌿𑌦𑌿𑌧𑍍𑌯𑌾𑌸𑌿𑌤𑌵𑍍𑌯𑌂
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 𑍭॥

𑌧𑍍𑌯𑌾𑌤𑍍𑌵𑌾 𑌚𑌿𑌤𑍍𑌤𑍇 𑌶𑌿𑌵𑌾𑌖𑍍𑌯𑌂 𑌪𑍍𑌰𑌚𑍁𑌰𑌤𑌰𑌧𑌨𑌂 𑌨𑍈𑌵 𑌦𑌤𑍍𑌤𑌂 𑌦𑍍𑌵𑌿𑌜𑍇𑌭𑍍𑌯𑍋
𑌹𑌵𑍍𑌯𑌂 𑌤𑍇 𑌲𑌕𑍍𑌷𑌸𑌂𑌖𑍍𑌯𑍈𑌰𑍍𑌹𑍁𑌤𑌵𑌹𑌵𑌦𑌨𑍇 𑌨𑌾𑌰𑍍𑌪𑌿𑌤𑌂 𑌬𑍀𑌜𑌮𑌂𑌤𑍍𑌰𑍈𑌃 ।
𑌨𑍋 𑌤𑌪𑍍𑌤𑌂 𑌗𑌾𑌂𑌗𑌾𑌤𑍀𑌰𑍇 𑌵𑍍𑌰𑌤𑌜𑌪𑌨𑌿𑌯𑌮𑍈𑌃 𑌰𑍁𑌦𑍍𑌰𑌜𑌾𑌪𑍍𑌯𑍈𑌰𑍍𑌨 𑌵𑍇𑌦𑍈𑌃
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 𑍮॥

𑌨𑌗𑍍𑌨𑍋 𑌨𑌿𑌃𑌸𑌂𑌗𑌶𑍁𑌦𑍍𑌧𑌸𑍍𑌤𑍍𑌰𑌿𑌗𑍁𑌣𑌵𑌿𑌰𑌹𑌿𑌤𑍋 𑌧𑍍𑌵𑌸𑍍𑌤𑌮𑍋𑌹𑌾𑌂𑌧𑌕𑌾𑌰𑍋
𑌨𑌾𑌸𑌾𑌗𑍍𑌰𑍇 𑌨𑍍𑌯𑌸𑍍𑌤𑌦𑍃𑌷𑍍𑌟𑌿𑌰𑍍𑌵𑌿𑌦𑌿𑌤𑌭𑌵𑌗𑍁𑌣𑍋 𑌨𑍈𑌵 𑌦𑍃𑌷𑍍𑌟𑌃 𑌕𑌦𑌾𑌚𑌿𑌤𑍍 ।
𑌉𑌨𑍍𑌮𑌨𑍍𑌯𑌾𑌽𑌵𑌸𑍍𑌥𑌯𑌾 𑌤𑍍𑌵𑌾𑌂 𑌵𑌿𑌗𑌤𑌕𑌲𑌿𑌮𑌲𑌂 𑌶𑌂𑌕𑌰𑌂 𑌨 𑌸𑍍𑌮𑌰𑌾𑌮𑌿
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 𑍯॥

𑌸𑍍𑌥𑌿𑌤𑍍𑌵𑌾 𑌸𑍍𑌥𑌾𑌨𑍇 𑌸𑌰𑍋𑌜𑍇 𑌪𑍍𑌰𑌣𑌵𑌮𑌯𑌮𑌰𑍁𑌤𑍍𑌕𑍁𑌂𑌭𑌕𑍇 (𑌕𑍁𑌂𑌡𑌲𑍇) 𑌸𑍂𑌕𑍍𑌷𑍍𑌮𑌮𑌾𑌰𑍍𑌗𑍇
𑌶𑌾𑌂𑌤𑍇 𑌸𑍍𑌵𑌾𑌂𑌤𑍇 𑌪𑍍𑌰𑌲𑍀𑌨𑍇 𑌪𑍍𑌰𑌕𑌟𑌿𑌤𑌵𑌿𑌭𑌵𑍇 𑌜𑍍𑌯𑍋𑌤𑌿𑌰𑍂𑌪𑍇𑌽𑌪𑌰𑌾𑌖𑍍𑌯𑍇 ।
𑌲𑌿𑌂𑌗𑌜𑍍𑌞𑍇 𑌬𑍍𑌰𑌹𑍍𑌮𑌵𑌾𑌕𑍍𑌯𑍇 𑌸𑌕𑌲𑌤𑌨𑍁𑌗𑌤𑌂 𑌶𑌂𑌕𑌰𑌂 𑌨 𑌸𑍍𑌮𑌰𑌾𑌮𑌿
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 10॥

𑌹𑍃𑌦𑍍𑌯𑌂 𑌵𑍇𑌦𑌾𑌂𑌤𑌵𑍇𑌦𑍍𑌯𑌂 𑌹𑍃𑌦𑌯𑌸𑌰𑌸𑌿𑌜𑍇 𑌦𑍀𑌪𑍍𑌤𑌮𑍁𑌦𑍍𑌯𑌤𑍍𑌪𑍍𑌰𑌕𑌾𑌶𑌂
𑌸𑌤𑍍𑌯𑌂 𑌶𑌾𑌂𑌤𑌸𑍍𑌵𑌰𑍂𑌪𑌂 𑌸𑌕𑌲𑌮𑍁𑌨𑌿𑌮𑌨𑌃𑌪𑌦𑍍𑌮𑌷𑌂𑌡𑍈𑌕𑌵𑍇𑌦𑍍𑌯𑌮𑍍 ।
𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑍇 𑌸𑍁𑌷𑍁𑌪𑍍𑌤𑍌 𑌤𑍍𑌰𑌿𑌗𑍁𑌣𑌵𑌿𑌰𑌹𑌿𑌤𑌂 𑌶𑌂𑌕𑌰𑌂 𑌨 𑌸𑍍𑌮𑌰𑌾𑌮𑌿
𑌕𑍍𑌷𑌂𑌤𑌵𑍍𑌯𑍋 𑌮𑍇𑌽𑌪𑌰𑌾𑌧𑌃 𑌶𑌿𑌵 𑌶𑌿𑌵 𑌶𑌿𑌵 𑌭𑍋 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 11॥

𑌚𑌂𑌦𑍍𑌰𑍋𑌦𑍍𑌭𑌾𑌸𑌿𑌤𑌶𑍇𑌖𑌰𑍇 𑌸𑍍𑌮𑌰𑌹𑌰𑍇 𑌗𑌂𑌗𑌾𑌧𑌰𑍇 𑌶𑌂𑌕𑌰𑍇
𑌸𑌰𑍍𑌪𑍈𑌰𑍍𑌭𑍂𑌷𑌿𑌤𑌕𑌂𑌠𑌕𑌰𑍍𑌣𑌵𑌿𑌵𑌰𑍇 𑌨𑍇𑌤𑍍𑌰𑍋𑌤𑍍𑌥𑌵𑍈𑌶𑍍𑌵𑌾𑌨𑌰𑍇 । 𑌯𑍁𑌗𑌲𑍇
𑌦𑌂𑌤𑌿𑌤𑍍𑌵𑌕𑍍𑌕𑍃𑌤𑌸𑍁𑌂𑌦𑌰𑌾𑌂𑌬𑌰𑌧𑌰𑍇 𑌤𑍍𑌰𑍈𑌲𑍋𑌕𑍍𑌯𑌸𑌾𑌰𑍇 𑌹𑌰𑍇
𑌮𑍋𑌕𑍍𑌷𑌾𑌰𑍍𑌥𑌂 𑌕𑍁𑌰𑍁 𑌚𑌿𑌤𑍍𑌤𑌵𑍃𑌤𑍍𑌤𑌿𑌮𑌚𑌲𑌾𑌮𑌨𑍍𑌯𑍈𑌸𑍍𑌤𑍁 𑌕𑌿𑌂 𑌕𑌰𑍍𑌮𑌭𑌿𑌃 ॥ 12॥

𑌕𑌿𑌂 𑌵𑌾𑌽𑌨𑍇𑌨 𑌧𑌨𑍇𑌨 𑌵𑌾𑌜𑌿𑌕𑌰𑌿𑌭𑌿𑌃 𑌪𑍍𑌰𑌾𑌪𑍍𑌤𑍇𑌨 𑌰𑌾𑌜𑍍𑌯𑍇𑌨 𑌕𑌿𑌂
𑌕𑌿𑌂 𑌵𑌾 𑌪𑍁𑌤𑍍𑌰𑌕𑌲𑌤𑍍𑌰𑌮𑌿𑌤𑍍𑌰𑌪𑌶𑍁𑌭𑌿𑌰𑍍𑌦𑍇𑌹𑍇𑌨 𑌗𑍇𑌹𑍇𑌨 𑌕𑌿𑌮𑍍 ।
𑌜𑍍𑌞𑌾𑌤𑍍𑌵𑍈𑌤𑌤𑍍𑌕𑍍𑌷𑌣𑌭𑌂𑌗𑍁𑌰𑌂 𑌸𑌪𑌦𑌿 𑌰𑍇 𑌤𑍍𑌯𑌾𑌜𑍍𑌯𑌂 𑌮𑌨𑍋 𑌦𑍂𑌰𑌤𑌃
𑌸𑍍𑌵𑌾𑌤𑍍𑌮𑌾𑌰𑍍𑌥𑌂 𑌗𑍁𑌰𑍁𑌵𑌾𑌕𑍍𑌯𑌤𑍋 𑌭𑌜 𑌮𑌨 𑌶𑍍𑌰𑍀𑌪𑌾𑌰𑍍𑌵𑌤𑍀𑌵𑌲𑍍𑌲𑌭𑌮𑍍 ॥ 13॥

𑌪𑍌𑌰𑍋𑌹𑌿𑌤𑍍𑌯𑌂 𑌰𑌜𑌨𑌿𑌚𑌰𑌿𑌤𑌂 𑌗𑍍𑌰𑌾𑌮𑌣𑍀𑌤𑍍𑌵𑌂 𑌨𑌿𑌯𑍋𑌗𑍋
𑌮𑌾𑌠𑌾𑌪𑌤𑍍𑌯𑌂 𑌹𑍍𑌯𑌨𑍃𑌤𑌵𑌚𑌨𑌂 𑌸𑌾𑌕𑍍𑌷𑌿𑌵𑌾𑌦𑌃 𑌪𑌰𑌾𑌨𑍍𑌨𑌮𑍍 ।
𑌬𑍍𑌰𑌹𑍍𑌮𑌦𑍍𑌵𑍇𑌷𑌃 𑌖𑌲𑌜𑌨𑌰𑌤𑌿𑌃 𑌪𑍍𑌰𑌾𑌣𑌿𑌨𑌾𑌂 𑌨𑌿𑌰𑍍𑌦𑌯𑌤𑍍𑌵𑌂
𑌮𑌾 𑌭𑍂𑌦𑍇𑌵𑌂 𑌮𑌮 𑌪𑌶𑍁𑌪𑌤𑍇 𑌜𑌨𑍍𑌮𑌜𑌨𑍍𑌮𑌾𑌂𑌤𑌰𑍇𑌷𑍁 ॥ 14॥

𑌆𑌯𑍁𑌰𑍍𑌨𑌶𑍍𑌯𑌤𑌿 𑌪𑌶𑍍𑌯𑌤𑌾𑌂 𑌪𑍍𑌰𑌤𑌿𑌦𑌿𑌨𑌂 𑌯𑌾𑌤𑌿 𑌕𑍍𑌷𑌯𑌂 𑌯𑍌𑌵𑌨𑌂
𑌪𑍍𑌰𑌤𑍍𑌯𑌾𑌯𑌾𑌂𑌤𑌿 𑌗𑌤𑌾𑌃 𑌪𑍁𑌨𑌰𑍍𑌨 𑌦𑌿𑌵𑌸𑌾𑌃 𑌕𑌾𑌲𑍋 𑌜𑌗𑌦𑍍𑌭𑌕𑍍𑌷𑌕𑌃 ।
𑌲𑌕𑍍𑌷𑍍𑌮𑍀𑌸𑍍𑌤𑍋𑌯𑌤𑌰𑌂𑌗𑌭𑌂𑌗𑌚𑌪𑌲𑌾 𑌵𑌿𑌦𑍍𑌯𑍁𑌚𑍍𑌚𑌲𑌂 𑌜𑍀𑌵𑌿𑌤𑌂
𑌤𑌸𑍍𑌮𑌾𑌤𑍍𑌤𑍍𑌵𑌾𑌂 𑌶𑌰𑌣𑌾𑌗𑌤𑌂 𑌶𑌰𑌣𑌦 𑌤𑍍𑌵𑌂 𑌰𑌕𑍍𑌷 𑌰𑌕𑍍𑌷𑌾𑌧𑍁𑌨𑌾 ॥ 15॥ 𑌤𑌸𑍍𑌮𑌾𑌨𑍍𑌮𑌾𑌂

𑌵𑌂𑌦𑍇 𑌦𑍇𑌵𑌮𑍁𑌮𑌾𑌪𑌤𑌿𑌂 𑌸𑍁𑌰𑌗𑍁𑌰𑍁𑌂 𑌵𑌂𑌦𑍇 𑌜𑌗𑌤𑍍𑌕𑌾𑌰𑌣𑌂
𑌵𑌂𑌦𑍇 𑌪𑌨𑍍𑌨𑌗𑌭𑍂𑌷𑌣𑌂 𑌮𑍃𑌗𑌧𑌰𑌂 𑌵𑌂𑌦𑍇 𑌪𑌶𑍂𑌨𑌾𑌂 𑌪𑌤𑌿𑌮𑍍 ।
𑌵𑌂𑌦𑍇 𑌸𑍂𑌰𑍍𑌯𑌶𑌶𑌾𑌂𑌕𑌵𑌹𑍍𑌨𑌿𑌨𑌯𑌨𑌂 𑌵𑌂𑌦𑍇 𑌮𑍁𑌕𑍁𑌂𑌦𑌪𑍍𑌰𑌿𑌯𑌂
𑌵𑌂𑌦𑍇 𑌭𑌕𑍍𑌤𑌜𑌨𑌾𑌶𑍍𑌰𑌯𑌂 𑌚 𑌵𑌰𑌦𑌂 𑌵𑌂𑌦𑍇 𑌶𑌿𑌵𑌂 𑌶𑌂𑌕𑌰𑌮𑍍 ॥16॥

𑌗𑌾𑌤𑍍𑌰𑌂 𑌭𑌸𑍍𑌮𑌸𑌿𑌤𑌂 𑌸𑌿𑌤𑌂 𑌚 𑌹𑌸𑌿𑌤𑌂 𑌹𑌸𑍍𑌤𑍇 𑌕𑌪𑌾𑌲𑌂 𑌸𑌿𑌤𑌂 𑌵𑌰𑍍 𑌸𑍍𑌮𑌿𑌤𑌂 𑌚
𑌖𑌟𑍍𑌵𑌾𑌂𑌗𑌂 𑌚 𑌸𑌿𑌤𑌂 𑌸𑌿𑌤𑌶𑍍𑌚 𑌵𑍃𑌷𑌭𑌃 𑌕𑌰𑍍𑌣𑍇 𑌸𑌿𑌤𑍇 𑌕𑍁𑌂𑌡𑌲𑍇 ।
𑌗𑌂𑌗𑌾 𑌫𑍇𑌨𑌸𑌿𑌤𑌾 𑌜𑌟𑌾 𑌪𑌶𑍁𑌪𑌤𑍇𑌶𑍍𑌚𑌂𑌦𑍍𑌰𑌃 𑌸𑌿𑌤𑍋 𑌮𑍂𑌰𑍍𑌧𑌨𑌿
𑌸𑍋𑌽𑌯𑌂 𑌸𑌰𑍍𑌵𑌸𑌿𑌤𑍋 𑌦𑌦𑌾𑌤𑍁 𑌵𑌿𑌭𑌵𑌂 𑌪𑌾𑌪𑌕𑍍𑌷𑌯𑌂 𑌸𑌰𑍍𑌵𑌦𑌾 ॥ 1𑍭॥

𑌕𑌰𑌚𑌰𑌣𑌕𑍃𑌤𑌂 𑌵𑌾𑌕𑍍𑌕𑌾𑌯𑌜𑌂 𑌕𑌰𑍍𑌮𑌜𑌂 𑌵𑌾
𑌶𑍍𑌰𑌵𑌣𑌨𑌯𑌨𑌜𑌂 𑌵𑌾 𑌮𑌾𑌨𑌸𑌂 𑌵𑌾𑌽𑌪𑌰𑌾𑌧𑌮𑍍 ।
𑌵𑌿𑌹𑌿𑌤𑌮𑌵𑌿𑌹𑌿𑌤𑌂 𑌵𑌾 𑌸𑌰𑍍𑌵𑌮𑍇𑌤𑌤𑍍𑌕𑍍𑌷𑍍𑌮𑌸𑍍𑌵
𑌶𑌿𑌵 𑌶𑌿𑌵 𑌕𑌰𑍁𑌣𑌾𑌬𑍍𑌧𑍇 𑌶𑍍𑌰𑍀𑌮𑌹𑌾𑌦𑍇𑌵 𑌶𑌂𑌭𑍋 ॥ 1𑍮॥

॥ 𑌇𑌤𑌿 𑌶𑍍𑌰𑍀𑌮𑌦𑍍 𑌶𑌂𑌕𑌰𑌾𑌚𑌾𑌰𑍍𑌯𑌕𑍃𑌤 𑌶𑌿𑌵𑌾𑌪𑌰𑌾𑌧𑌕𑍍𑌷𑌮𑌾𑌪𑌣𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ॥