॥ પૂર્વપીઠિકા ॥

માર્કંડેય ઉવાચ ।
એવં યુદ્ધમભૂદ્ઘોરં રૌદ્રં દૈત્યબલૈઃ સહ ।
નૃસિંહસ્યાંગસંભૂતૈર્નારસિંહૈરનેકશઃ ॥ 1 ॥

દૈત્યકોટિર્હતાસ્તત્ર કેચિદ્ભીતાઃ પલાયિતાઃ ।
તં દૃષ્ટ્વાતીવ સંક્રુદ્ધો હિરણ્યકશિપુઃ સ્વયમ્ ॥ 2 ॥

ભૂતપૂર્વૈરમૃત્યુર્મે ઇતિ બ્રહ્મવરોદ્ધતઃ ।
વવર્ષ શરવર્ષેણ નારસિંહો ભૃશં બલી ॥ 3 ॥

દ્વંદ્વયુદ્ધમભૂદુગ્રં દિવ્યવર્ષસહસ્રકમ્ ।
દૈત્યેંદ્રે સાહસં દૃષ્ટ્વા દેવાશ્ચેંદ્રપુરોગમાઃ ॥ 4 ॥

શ્રેયઃ કસ્ય ભવેદત્ર ઇતિ ચિંતાપરા ભવન્ ।
તદા ક્રુદ્ધો નૃસિંહસ્તુ દૈત્યેંદ્રપ્રહિતાન્યપિ ॥ 5 ॥

વિષ્ણુચક્રં મહાચક્રં કાલચક્રં તુ વૈષ્ણવમ્ ।
રૌદ્રં પાશુપતં બ્રાહ્મં કૌબેરં કુલિશાસનમ્ ॥ 6 ॥

આગ્નેયં વારુણં સૌમ્યં મોહનં સૌરપાર્વતમ્ ।
ભાર્ગવાદિ બહૂન્યસ્ત્રાણ્યભક્ષયત કોપનઃ ॥ 7 ॥

સંધ્યાકાલે સભાદ્વારે સ્વાંકે નિક્ષિપ્ય ભૈરવઃ ।
તતઃ ખડ્ગધરં દૈત્યં જગ્રાહ નરકેસરી ॥ 8 ॥

હિરણ્યકશિપોર્વક્ષો વિદાર્યાતીવ રોષિતઃ ।
ઉદ્ધૃત્ય ચાંત્રમાલાનિ નખૈર્વજ્રસમપ્રભૈઃ ॥ 9 ॥

મેને કૃતાર્થમાત્માનં સર્વતઃ પર્યવૈક્ષત ।
હર્ષિતા દેવતાઃ સર્વાઃ પુષ્પવૃષ્ટિમવાકિરન્ ॥ 10 ॥

દેવદુંદુભયો નેદુર્વિમલાશ્ચ દિશોઽભવન્ ।
નરસિંહમતીવોગ્રં વિકીર્ણવદનં ભૃશમ્ ॥ 11 ॥

લેલિહાનં ચ ગર્જંતં કાલાનલસમપ્રભમ્ ।
અતિરૌદ્રં મહાકાયં મહાદંષ્ટ્રં મહારુતમ્ ॥ 12 ॥

મહાસિંહં મહારૂપં દૃષ્ટ્વા સંક્ષુભિતં જગત્ ।
સર્વદેવગણૈઃ સાર્થં તત્રાગત્ય પિતામહઃ ॥ 13 ॥

આગંતુકૈર્ભૂતપૂર્વૈર્વર્તમાનૈરનુત્તમૈઃ ।
ગુણૈર્નામસહસ્રેણ તુષ્ટાવ શ્રુતિસમ્મતૈઃ ॥ 14 ॥

ઓં નમઃ શ્રીમદ્દિવ્યલક્ષ્મીનૃસિંહ સહસ્રનામસ્તોત્રમહામંત્રસ્ય બ્રહ્મા ઋષિઃ, શ્રીલક્ષ્મીનૃસિંહો દેવતા, અનુષ્ટુપ્છંદઃ, શ્રીનૃસિંહઃ પરમાત્મા બીજં, લક્ષ્મીર્માયા શક્તિઃ, જીવો બીજં, બુદ્ધિઃ શક્તિઃ, ઉદાનવાયુઃ બીજં, સરસ્વતી શક્તિઃ, વ્યંજનાનિ બીજાનિ, સ્વરાઃ શક્તયઃ, ઓં ક્ષ્રૌં હ્રીં ઇતિ બીજાનિ, ઓં શ્રીં
અં આં ઇતિ શક્તયઃ, વિકીર્ણનખદંષ્ટ્રાયુધાયેતિ કીલકં, અકારાદિતિ બોધકં, શ્રીલક્ષ્મીનૃસિંહ પ્રસાદસિદ્ધ્યર્થે શ્રીલક્ષ્મીનૃસિંહ સહસ્રનામસ્તોત્ર મંત્રજપે વિનિયોગઃ ।

ન્યાસઃ –
ઓં શ્રીલક્ષ્મીનૃસિંહાય નમઃ – અંગુષ્ઠાભ્યાં નમઃ ।
ઓં વજ્રનખાય નમઃ – તર્જનીભ્યાં નમઃ ।
ઓં મહારુદ્રાય નમઃ – મધ્યમાભ્યાં નમઃ ।
ઓં સર્વતોમુખાય નમઃ – અનામિકાભ્યાં નમઃ ।
ઓં વિકટાસ્યાય નમઃ – કનિષ્ઠિકાભ્યાં નમઃ ।
ઓં વીરાય નમઃ – કરતલકરપૃષ્ઠાભ્યાં નમઃ ।
એવં હૃદયાદિન્યાસઃ ।

દિગ્બંધઃ –
ઓં ઐંદ્રીં દિશં સુદર્શનેન બધ્નામિ નમશ્ચક્રાય સ્વાહા ।
ઓં આગ્નેયીં દિશં સુદર્શનેન બધ્નામિ નમશ્ચક્રાય સ્વાહા ।
ઓં યામ્યાં દિશં સુદર્શનેન બધ્નામિ નમશ્ચક્રાય સ્વાહા ।
ઓં નૈરૃતિં દિશં સુદર્શનેન બધ્નામિ નમશ્ચક્રાય સ્વાહા ।
ઓં વારુણીં દિશં સુદર્શનેન બધ્નામિ નમશ્ચક્રાય સ્વાહા ।
ઓં વાયવીં દિશં સુદર્શનેન બધ્નામિ નમશ્ચક્રાય સ્વાહા ।
ઓં કૌબેરીં દિશં સુદર્શનેન બધ્નામિ નમશ્ચક્રાય સ્વાહા ।
ઓં ઈશાનીં દિશં સુદર્શનેન બધ્નામિ નમશ્ચક્રાય સ્વાહા ।
ઓં ઊર્ધ્વાં દિશં સુદર્શનેન બધ્નામિ નમશ્ચક્રાય સ્વાહા ।
ઓં અધસ્તાદ્દિશં દિશં સુદર્શનેન બધ્નામિ નમશ્ચક્રાય સ્વાહા ।
ઓં અંતરિક્ષાં દિશં સુદર્શનેન બધ્નામિ નમશ્ચક્રાય સ્વાહા ।

અથ ધ્યાનમ્ ।
સત્યજ્ઞાનસુખસ્વરૂપમમલં ક્ષીરાબ્ધિમધ્યે સ્થિતં
યોગારૂઢમતિપ્રસન્નવદનં ભૂષાસહસ્રોજ્વલમ્ ।
ત્ર્યક્ષં ચક્રપિનાકસાભયકરાન્ બિભ્રાણમર્કચ્છવિં
છત્રીભૂતફણીંદ્રમિંદુધવલં લક્ષ્મીનૃસિંહં ભજે ॥ 1 ॥

ઉપાસ્મહે નૃસિંહાખ્યં બ્રહ્મ વેદાંતગોચરમ્ ।
ભૂયોલાલિતસંસારચ્છેદહેતું જગદ્ગુરુમ્ ॥ 2 ॥

અથ સ્તોત્રમ્ ।
બ્રહ્મોવાચ ।
ઓં હ્રીં શ્રીં ઐં ક્ષ્રૌમ્ ॥
ઓં નમો નારસિંહાય વજ્રદંષ્ટ્રાય વજ્રિણે ।
વજ્રદેહાય વજ્રાય નમો વજ્રનખાય ચ ॥ 1 ॥

વાસુદેવાય વંદ્યાય વરદાય વરાત્મને ।
વરદાભયહસ્તાય વરાય વરરૂપિણે ॥ 2 ॥

વરેણ્યાય વરિષ્ઠાય શ્રીવરાય નમો નમઃ ।
પ્રહ્લાદવરદાયૈવ પ્રત્યક્ષવરદાય ચ ॥ 3 ॥

પરાત્પરપરેશાય પવિત્રાય પિનાકિને ।
પાવનાય પ્રસન્નાય પાશિને પાપહારિણે ॥ 4 ॥

પુરુષ્ટુતાય પુણ્યાય પુરુહૂતાય તે નમઃ ।
તત્પુરુષાય તથ્યાય પુરાણપુરુષાય ચ ॥ 5 ॥

પુરોધસે પૂર્વજાય પુષ્કરાક્ષાય તે નમઃ ।
પુષ્પહાસાય હાસાય મહાહાસાય શારંગિણે ॥ 6 ॥

સિંહાય સિંહરાજાય જગદ્વશ્યાય તે નમઃ ।
અટ્ટહાસાય રોષાય જલવાસાય તે નમઃ ॥ 7 ॥

ભૂતાવાસાય ભાસાય શ્રીનિવાસાય ખડ્ગિને ।
ખડ્ગજિહ્વાય સિંહાય ખડ્ગવાસાય તે નમઃ ॥ 8 ॥

નમો મૂલાધિવાસાય ધર્મવાસાય ધન્વિને ।
ધનંજયાય ધન્યાય નમો મૃત્યુંજયાય ચ ॥ 9 ॥

શુભંજયાય સૂત્રાય નમઃ શત્રુંજયાય ચ ।
નિરંજનાય નીરાય નિર્ગુણાય ગુણાય ચ ॥ 10 ॥

નિષ્પ્રપંચાય નિર્વાણપ્રદાય નિબિડાય ચ ।
નિરાલંબાય નીલાય નિષ્કલાય કલાય ચ ॥ 11 ॥

નિમેષાય નિબંધાય નિમેષગમનાય ચ ।
નિર્દ્વંદ્વાય નિરાશાય નિશ્ચયાય નિરાય ચ ॥ 12 ॥

નિર્મલાય નિબંધાય નિર્મોહાય નિરાકૃતે ।
નમો નિત્યાય સત્યાય સત્કર્મનિરતાય ચ ॥ 13 ॥

સત્યધ્વજાય મુંજાય મુંજકેશાય કેશિને ।
હરીશાય ચ શેષાય ગુડાકેશાય વૈ નમઃ ॥ 14 ॥

સુકેશાયોર્ધ્વકેશાય કેશિસંહારકાય ચ ।
જલેશાય સ્થલેશાય પદ્મેશાયોગ્રરૂપિણે ॥ 15 ॥

કુશેશયાય કૂલાય કેશવાય નમો નમઃ ।
સૂક્તિકર્ણાય સૂક્તાય રક્તજિહ્વાય રાગિણે ॥ 16 ॥

દીપ્તરૂપાય દીપ્તાય પ્રદીપ્તાય પ્રલોભિને ।
પ્રચ્છિન્નાય પ્રબોધાય પ્રભવે વિભવે નમઃ ॥ 17 ॥

પ્રભંજનાય પાંથાય પ્રમાયાપ્રમિતાય ચ ।
પ્રકાશાય પ્રતાપાય પ્રજ્વલાયોજ્જ્વલાય ચ ॥ 18 ॥

જ્વાલામાલાસ્વરૂપાય જ્વલજ્જિહ્વાય જ્વાલિને ।
મહોજ્જ્વલાય કાલાય કાલમૂર્તિધરાય ચ ॥ 19 ॥

કાલાંતકાય કલ્પાય કલનાય કૃતે નમઃ ।
કાલચક્રાય શક્રાય વષટ્ચક્રાય ચક્રિણે ॥ 20 ॥

અક્રૂરાય કૃતાંતાય વિક્રમાય ક્રમાય ચ ।
કૃત્તિને કૃત્તિવાસાય કૃતઘ્નાય કૃતાત્મને ॥ 21 ॥

સંક્રમાય ચ ક્રુદ્ધાય ક્રાંતલોકત્રયાય ચ ।
અરૂપાય સ્વરૂપાય હરયે પરમાત્મને ॥ 22 ॥

અજયાયાદિદેવાય અક્ષયાય ક્ષયાય ચ ।
અઘોરાય સુઘોરાય ઘોરઘોરતરાય ચ ॥ 23 ॥

નમોઽસ્ત્વઘોરવીર્યાય લસદ્ઘોરાય તે નમઃ ।
ઘોરાધ્યક્ષાય દક્ષાય દક્ષિણાઽઽર્યાય શંભવે ॥ 24 ॥

અમોઘાય ગુણૌઘાય અનઘાયાઽઘહારિણે ।
મેઘનાદાય નાદાય તુભ્યં મેઘાત્મને નમઃ ॥ 25 ॥

મેઘવાહનરૂપાય મેઘશ્યામાય માલિને ।
વ્યાલયજ્ઞોપવીતાય વ્યાઘ્રદેહાય વૈ નમઃ ॥ 26 ॥

વ્યાઘ્રપાદાય ચ વ્યાઘ્રકર્મિણે વ્યાપકાય ચ ।
વિકટાસ્યાય વીરાય વિષ્ટરશ્રવસે નમઃ ॥ 27 ॥

વિકીર્ણનખદંષ્ટ્રાય નખદંષ્ટ્રાયુધાય ચ ।
વિષ્વક્સેનાય સેનાય વિહ્વલાય બલાય ચ ॥ 28 ॥

વિરૂપાક્ષાય વીરાય વિશેષાક્ષાય સાક્ષિણે ।
વીતશોકાય વિસ્તીર્ણવદનાય નમો નમઃ ॥ 29 ॥

વિધાનાય વિધેયાય વિજયાય જયાય ચ ।
વિબુધાય વિભાવાય નમો વિશ્વંભરાય ચ ॥ 30 ॥

વીતરાગાય વિપ્રાય વિટંકનયનાય ચ ।
વિપુલાય વિનીતાય વિશ્વયોને નમો નમઃ ॥ 31 ॥

વિડંબનાય વિત્તાય વિશ્રુતાય વિયોનયે । [ચિદંબરાય]
વિહ્વલાય વિવાદાય નમો વ્યાહૃતયે નમઃ ॥ 32 ॥

વિલાસાય વિકલ્પાય મહાકલ્પાય તે નમઃ ।
બહુકલ્પાય કલ્પાય કલ્પાતીતાય શિલ્પિને ॥ 33 ॥

કલ્પનાય સ્વરૂપાય ફણિતલ્પાય વૈ નમઃ ।
તટિત્પ્રભાય તાર્ક્ષ્યાય તરુણાય તરસ્વિને ॥ 34 ॥

તપનાય તરક્ષાય તાપત્રયહરાય ચ ।
તારકાય તમોઘ્નાય તત્ત્વાય ચ તપસ્વિને ॥ 35 ॥

તક્ષકાય તનુત્રાય તટિને તરલાય ચ ।
શતરૂપાય શાંતાય શતધારાય તે નમઃ ॥ 36 ॥

શતપત્રાયતાક્ષાય સ્થિતયે શતમૂર્તયે ।
શતક્રતુસ્વરૂપાય શાશ્વતાય શતાત્મને ॥ 37 ॥

નમઃ સહસ્રશિરસે સહસ્રવદનાય ચ ।
સહસ્રાક્ષાય દેવાય દિશશ્રોત્રાય તે નમઃ ॥ 38 ॥

નમઃ સહસ્રજિહ્વાય મહાજિહ્વાય તે નમઃ ।
સહસ્રનામધેયાય સહસ્રાક્ષિધરાય ચ ॥ 39 ॥

સહસ્રબાહવે તુભ્યં સહસ્રચરણાય ચ ।
સહસ્રાર્કપ્રકાશાય સહસ્રાયુધધારિણે ॥ 40 ॥

નમઃ સ્થૂલાય સૂક્ષ્માય સુસૂક્ષ્માય નમો નમઃ ।
સુક્ષુણ્ણાય સુભિક્ષાય સુરાધ્યક્ષાય શૌરિણે ॥ 41 ॥

ધર્માધ્યક્ષાય ધર્માય લોકાધ્યક્ષાય વૈ નમઃ ।
પ્રજાધ્યક્ષાય શિક્ષાય વિપક્ષક્ષયમૂર્તયે ॥ 42 ॥

કાલાધ્યક્ષાય તીક્ષ્ણાય મૂલાધ્યક્ષાય તે નમઃ ।
અધોક્ષજાય મિત્રાય સુમિત્રવરુણાય ચ ॥ 43 ॥

શત્રુઘ્નાય અવિઘ્નાય વિઘ્નકોટિહરાય ચ ।
રક્ષોઘ્નાય તમોઘ્નાય ભૂતઘ્નાય નમો નમઃ ॥ 44 ॥

ભૂતપાલાય ભૂતાય ભૂતાવાસાય ભૂતિને ।
ભૂતવેતાળઘાતાય ભૂતાધિપતયે નમઃ ॥ 45 ॥

ભૂતગ્રહવિનાશાય ભૂતસંયમતે નમઃ ।
મહાભૂતાય ભૃગવે સર્વભૂતાત્મને નમઃ ॥ 46 ॥

સર્વારિષ્ટવિનાશાય સર્વસંપત્કરાય ચ ।
સર્વાધારાય શર્વાય સર્વાર્તિહરયે નમઃ ॥ 47 ॥

સર્વદુઃખપ્રશાંતાય સર્વસૌભાગ્યદાયિને ।
સર્વજ્ઞાયાપ્યનંતાય સર્વશક્તિધરાય ચ ॥ 48 ॥

સર્વૈશ્વર્યપ્રદાત્રે ચ સર્વકાર્યવિધાયિને ।
સર્વજ્વરવિનાશાય સર્વરોગાપહારિણે ॥ 49 ॥

સર્વાભિચારહંત્રે ચ સર્વૈશ્વર્યવિધાયિને ।
પિંગાક્ષાયૈકશૃંગાય દ્વિશૃંગાય મરીચયે ॥ 50 ॥

બહુશૃંગાય લિંગાય મહાશૃંગાય તે નમઃ ।
માંગળ્યાય મનોજ્ઞાય મંતવ્યાય મહાત્મને ॥ 51 ॥

મહાદેવાય દેવાય માતુલિંગધરાય ચ ।
મહામાયાપ્રસૂતાય પ્રસ્તુતાય ચ માયિને ॥ 52 ॥

અનંતાનંતરૂપાય માયિને જલશાયિને ।
મહોદરાય મંદાય મદદાય મદાય ચ ॥ 53 ॥

મધુકૈટભહંત્રે ચ માધવાય મુરારયે ।
મહાવીર્યાય ધૈર્યાય ચિત્રવીર્યાય તે નમઃ ॥ 54 ॥

ચિત્રકૂર્માય ચિત્રાય નમસ્તે ચિત્રભાનવે ।
માયાતીતાય માયાય મહાવીરાય તે નમઃ ॥ 55 ॥

મહાતેજાય બીજાય તેજોધામ્ને ચ બીજિને ।
તેજોમયનૃસિંહાય નમસ્તે ચિત્રભાનવે ॥ 56 ॥

મહાદંષ્ટ્રાય તુષ્ટાય નમઃ પુષ્ટિકરાય ચ ।
શિપિવિષ્ટાય હૃષ્ટાય પુષ્ટાય પરમેષ્ઠિને ॥ 57 ॥

વિશિષ્ટાય ચ શિષ્ટાય ગરિષ્ઠાયેષ્ટદાયિને ।
નમો જ્યેષ્ઠાય શ્રેષ્ઠાય તુષ્ટાયામિતતેજસે ॥ 58 ॥

અષ્ટાંગન્યસ્તરૂપાય સર્વદુષ્ટાંતકાય ચ ।
વૈકુંઠાય વિકુંઠાય કેશિકંઠાય તે નમઃ ॥ 59 ॥

કંઠીરવાય લુંઠાય નિશ્શઠાય હઠાય ચ ।
સત્વોદ્રિક્તાય રુદ્રાય ઋગ્યજુસ્સામગાય ચ ॥ 60 ॥

ઋતુધ્વજાય વજ્રાય મંત્રરાજાય મંત્રિણે ।
ત્રિનેત્રાય ત્રિવર્ગાય ત્રિધામ્ને ચ ત્રિશૂલિને ॥ 61 ॥

ત્રિકાલજ્ઞાનરૂપાય ત્રિદેહાય ત્રિધાત્મને ।
નમસ્ત્રિમૂર્તિવિદ્યાય ત્રિતત્ત્વજ્ઞાનિને નમઃ ॥ 62 ॥

અક્ષોભ્યાયાનિરુદ્ધાય અપ્રમેયાય ભાનવે ।
અમૃતાય અનંતાય અમિતાયામિતૌજસે ॥ 63 ॥

અપમૃત્યુવિનાશાય અપસ્મારવિઘાતિને ।
અન્નદાયાન્નરૂપાય અન્નાયાન્નભુજે નમઃ ॥ 64 ॥

નાદ્યાય નિરવદ્યાય વિદ્યાયાદ્ભુતકર્મણે ।
સદ્યોજાતાય સંઘાય વૈદ્યુતાય નમો નમઃ ॥ 65 ॥

અધ્વાતીતાય સત્ત્વાય વાગતીતાય વાગ્મિને ।
વાગીશ્વરાય ગોપાય ગોહિતાય ગવાં પતે ॥ 66 ॥

ગંધર્વાય ગભીરાય ગર્જિતાયોર્જિતાય ચ ।
પર્જન્યાય પ્રબુદ્ધાય પ્રધાનપુરુષાય ચ ॥ 67 ॥

પદ્માભાય સુનાભાય પદ્મનાભાય માનિને ।
પદ્મનેત્રાય પદ્માય પદ્માયાઃ પતયે નમઃ ॥ 68 ॥

પદ્મોદરાય પૂતાય પદ્મકલ્પોદ્ભવાય ચ ।
નમો હૃત્પદ્મવાસાય ભૂપદ્મોદ્ધરણાય ચ ॥ 69 ॥

શબ્દબ્રહ્મસ્વરૂપાય બ્રહ્મરૂપધરાય ચ ।
બ્રહ્મણે બ્રહ્મરૂપાય પદ્મનેત્રાય તે નમઃ ॥ 70 ॥

બ્રહ્મદાય બ્રાહ્મણાય બ્રહ્મબ્રહ્માત્મને નમઃ ।
સુબ્રહ્મણ્યાય દેવાય બ્રહ્મણ્યાય ત્રિવેદિને ॥ 71 ॥

પરબ્રહ્મસ્વરૂપાય પંચબ્રહ્માત્મને નમઃ ।
નમસ્તે બ્રહ્મશિરસે તથાઽશ્વશિરસે નમઃ ॥ 72 ॥

અથર્વશિરસે નિત્યમશનિપ્રમિતાય ચ ।
નમસ્તે તીક્ષ્ણદંષ્ટ્રાય લોલાય લલિતાય ચ ॥ 73 ॥

લાવણ્યાય લવિત્રાય નમસ્તે ભાસકાય ચ ।
લક્ષણજ્ઞાય લક્ષાય લક્ષણાય નમો નમઃ ॥ 74 ॥

લસદ્દીપ્તાય લિપ્તાય વિષ્ણવે પ્રભવિષ્ણવે ।
વૃષ્ણિમૂલાય કૃષ્ણાય શ્રીમહાવિષ્ણવે નમઃ ॥ 75 ॥

પશ્યામિ ત્વાં મહાસિંહં હારિણં વનમાલિનમ્ ।
કિરીટિનં કુંડલિનં સર્વાંગં સર્વતોમુખમ્ ॥ 76 ॥

સર્વતઃ પાણિપાદોરઃ સર્વતોઽક્ષિશિરોમુખમ્ ।
સર્વેશ્વરં સદાતુષ્ટં સમર્થં સમરપ્રિયમ્ ॥ 77 ॥

બહુયોજનવિસ્તીર્ણં બહુયોજનમાયતમ્ ।
બહુયોજનહસ્તાંઘ્રિં બહુયોજનનાસિકમ્ ॥ 78 ॥

મહારૂપં મહાવક્ત્રં મહાદંષ્ટ્રં મહાભુજમ્ ।
મહાનાદં મહારૌદ્રં મહાકાયં મહાબલમ્ ॥ 79 ॥

આનાભેર્બ્રહ્મણો રૂપમાગલાદ્વૈષ્ણવં તથા ।
આશીર્ષાદ્રુદ્રમીશાનં તદગ્રે સર્વતઃ શિવમ્ ॥ 80 ॥

નમોઽસ્તુ નારાયણનારસિંહ
નમોઽસ્તુ નારાયણવીરસિંહ ।
નમોઽસ્તુ નારાયણક્રૂરસિંહ
નમોઽસ્તુ નારાયણદિવ્યસિંહ ॥ 81 ॥

નમોઽસ્તુ નારાયણવ્યાઘ્રસિંહ
નમોઽસ્તુ નારાયણપુચ્છસિંહ ।
નમોઽસ્તુ નારાયણપૂર્ણસિંહ
નમોઽસ્તુ નારાયણરૌદ્રસિંહ ॥ 82 ॥

નમો નમો ભીષણભદ્રસિંહ
નમો નમો વિહ્વલનેત્રસિંહ ।
નમો નમો બૃંહિતભૂતસિંહ
નમો નમો નિર્મલચિત્રસિંહ ॥ 83 ॥

નમો નમો નિર્જિતકાલસિંહ
નમો નમઃ કલ્પિતકલ્પસિંહ ।
નમો નમો કામદકામસિંહ
નમો નમસ્તે ભુવનૈકસિંહ ॥ 84 ॥

દ્યાવાપૃથિવ્યોરિદમંતરં હિ
વ્યાપ્તં ત્વયૈકેન દિશશ્ચ સર્વાઃ ।
દૃષ્ટ્વાદ્ભુતં રૂપમુગ્રં તવેદં
લોકત્રયં પ્રવ્યથિતં મહાત્મન્ ॥ 85 ॥

અમી હિત્વા સુરસંઘા વિશંતિ
કેચિદ્ભીતાઃ પ્રાંજલયો ગૃણંતિ ।
સ્વસ્તીત્યુક્ત્વા મુનયઃ સિદ્ધસંઘાઃ
સ્તુવંતિ ત્વાં સ્તુતિભિઃ પુષ્કલાભિઃ ॥ 86 ॥

રુદ્રાદિત્યાવસવો યે ચ સાધ્યા
વિશ્વેદેવા મરુતશ્ચોષ્મપાશ્ચ ।
ગંધર્વયક્ષાસુરસિદ્ધસંઘા
વીક્ષંતિ ત્વાં વિસ્મિતાશ્ચૈવ સર્વે ॥ 87 ॥

લેલિહ્યસે ગ્રસમાનઃ સમંતા-
-લ્લોકાન્ સમગ્રાન્વદનૈર્જ્વલદ્ભિઃ ।
તેજોભિરાપૂર્ય જગત્સમગ્રં
ભાસસ્તવોગ્રાઃ પ્રતપંતિ વિષ્ણો ॥ 88 ॥

ભવિષ્ણુસ્ત્વં સહિષ્ણુસ્ત્વં ભ્રાજિષ્ણુર્જિષ્ણુરેવ ચ ।
પૃથિવીમંતરિક્ષં ત્વં પર્વતારણ્યમેવ ચ ॥ 89 ॥

કલાકાષ્ઠાવિલિપ્તસ્ત્વં મુહૂર્તપ્રહરાદિકમ્ ।
અહોરાત્રં ત્રિસંધ્યા ચ પક્ષમાસર્તુવત્સરાઃ ॥ 90 ॥

યુગાદિર્યુગભેદસ્ત્વં સંયુગો યુગસંધયઃ ।
નિત્યં નૈમિત્તિકં દૈનં મહાપ્રલયમેવ ચ ॥ 91 ॥

કરણં કારણં કર્તા ભર્તા હર્તા ત્વમીશ્વરઃ ।
સત્કર્તા સત્કૃતિર્ગોપ્તા સચ્ચિદાનંદવિગ્રહઃ ॥ 92 ॥

પ્રાણસ્ત્વં પ્રાણિનાં પ્રત્યગાત્મા ત્વં સર્વદેહિનામ્ ।
સુજ્યોતિસ્ત્વં પરંજ્યોતિરાત્મજ્યોતિઃ સનાતનઃ ॥ 93 ॥

જ્યોતિર્લોકસ્વરૂપસ્ત્વં જ્ઞો જ્યોતિર્જ્યોતિષાં પતિઃ । [જ્યોતિર્જ્ઞો]
સ્વાહાકારઃ સ્વધાકારો વષટ્કારઃ કૃપાકરઃ ॥ 94 ॥

હંતકારો નિરાકારો વેગાકારશ્ચ શંકરઃ ।
અકારાદિહકારાંત ઓંકારો લોકકારકઃ ॥ 95 ॥

એકાત્મા ત્વમનેકાત્મા ચતુરાત્મા ચતુર્ભુજઃ ।
ચતુર્મૂર્તિશ્ચતુર્દંષ્ટ્રશ્ચતુર્વેદમયોત્તમઃ ॥ 96 ॥

લોકપ્રિયો લોકગુરુર્લોકેશો લોકનાયકઃ ।
લોકસાક્ષી લોકપતિર્લોકાત્મા લોકલોચનઃ ॥ 97 ॥

લોકાધારો બૃહલ્લોકો લોકાલોકમયો વિભુઃ ।
લોકકર્તા વિશ્વકર્તા કૃતાવર્તઃ કૃતાગમઃ ॥ 98 ॥

અનાદિસ્ત્વમનંતસ્ત્વમભૂતો ભૂતવિગ્રહઃ ।
સ્તુતિઃ સ્તુત્યઃ સ્તવપ્રીતઃ સ્તોતા નેતા નિયામકઃ ॥ 99 ॥

ત્વં ગતિસ્ત્વં મતિર્મહ્યં પિતા માતા ગુરુઃ સખા ।
સુહૃદશ્ચાત્મરૂપસ્ત્વં ત્વાં વિના નાસ્તિ મે ગતિઃ ॥ 100 ॥

નમસ્તે મંત્રરૂપાય અસ્ત્રરૂપાય તે નમઃ ।
બહુરૂપાય રૂપાય પંચરૂપધરાય ચ ॥ 101 ॥

ભદ્રરૂપાય રૂઢાય યોગરૂપાય યોગિને ।
સમરૂપાય યોગાય યોગપીઠસ્થિતાય ચ ॥ 102 ॥

યોગગમ્યાય સૌમ્યાય ધ્યાનગમ્યાય ધ્યાયિને ।
ધ્યેયગમ્યાય ધામ્ને ચ ધામાધિપતયે નમઃ ॥ 103 ॥

ધરાધરાય ધર્માય ધારણાભિરતાય ચ ।
નમો ધાત્રે ચ સંધાત્રે વિધાત્રે ચ ધરાય ચ ॥ 104 ॥

દામોદરાય દાંતાય દાનવાંતકરાય ચ ।
નમઃ સંસારવૈદ્યાય ભેષજાય નમો નમઃ ॥ 105 ॥

સીરધ્વજાય શીતાય વાતાયાપ્રમિતાય ચ ।
સારસ્વતાય સંસારનાશનાયાક્ષમાલિને ॥ 106 ॥

અસિચર્મધરાયૈવ ષટ્કર્મનિરતાય ચ ।
વિકર્માય સુકર્માય પરકર્મવિધાયિને ॥ 107 ॥

સુશર્મણે મન્મથાય નમો વર્માય વર્મિણે ।
કરિચર્મવસાનાય કરાલવદનાય ચ ॥ 108 ॥

કવયે પદ્મગર્ભાય ભૂતગર્ભ ઘૃણાનિધે ।
બ્રહ્મગર્ભાય ગર્ભાય બૃહદ્ગર્ભાય ધૂર્જટે ॥ 109 ॥

નમસ્તે વિશ્વગર્ભાય શ્રીગર્ભાય જિતારયે ।
નમો હિરણ્યગર્ભાય હિરણ્યકવચાય ચ ॥ 110 ॥

હિરણ્યવર્ણદેહાય હિરણ્યાક્ષવિનાશિને ।
હિરણ્યકશિપોર્હંત્રે હિરણ્યનયનાય ચ ॥ 111 ॥

હિરણ્યરેતસે તુભ્યં હિરણ્યવદનાય ચ ।
નમો હિરણ્યશૃંગાય નિઃશૃંગાય ચ શૃંગિણે ॥ 112 ॥

ભૈરવાય સુકેશાય ભીષણાયાંત્રમાલિને ।
ચંડાય રુંડમાલાય નમો દંડધરાય ચ ॥ 113 ॥

અખંડતત્ત્વરૂપાય કમંડલુધરાય ચ ।
નમસ્તે ખંડસિંહાય સત્યસિંહાય તે નમઃ ॥ 114 ॥

નમસ્તે શ્વેતસિંહાય પીતસિંહાય તે નમઃ ।
નીલસિંહાય નીલાય રક્તસિંહાય તે નમઃ ॥ 115 ॥

નમો હારિદ્રસિંહાય ધૂમ્રસિંહાય તે નમઃ ।
મૂલસિંહાય મૂલાય બૃહત્સિંહાય તે નમઃ ॥ 116 ॥

પાતાલસ્થિતસિંહાય નમઃ પર્વતવાસિને ।
નમો જલસ્થસિંહાય અંતરિક્ષસ્થિતાય ચ ॥ 117 ॥

કાલાગ્નિરુદ્રસિંહાય ચંડસિંહાય તે નમઃ ।
અનંતસિંહસિંહાય અનંતગતયે નમઃ ॥ 118 ॥

નમો વિચિત્રસિંહાય બહુસિંહસ્વરૂપિણે ।
અભયંકરસિંહાય નરસિંહાય તે નમઃ ॥ 119 ॥

નમોઽસ્તુ સિંહરાજાય નારસિંહાય તે નમઃ ।
સપ્તાબ્ધિમેખલાયૈવ સત્યસત્યસ્વરૂપિણે ॥ 120 ॥

સપ્તલોકાંતરસ્થાય સપ્તસ્વરમયાય ચ ।
સપ્તાર્ચીરૂપદંષ્ટ્રાય સપ્તાશ્વરથરૂપિણે ॥ 121 ॥

સપ્તવાયુસ્વરૂપાય સપ્તચ્છંદોમયાય ચ ।
સ્વચ્છાય સ્વચ્છરૂપાય સ્વચ્છંદાય ચ તે નમઃ ॥ 122 ॥

શ્રીવત્સાય સુવેષાય શ્રુતયે શ્રુતિમૂર્તયે ।
શુચિશ્રવાય શૂરાય સુપ્રભાય સુધન્વિને ॥ 123 ॥

શુભ્રાય સુરનાથાય સુપ્રભાય શુભાય ચ ।
સુદર્શનાય સૂક્ષ્માય નિરુક્તાય નમો નમઃ ॥ 124 ॥

સુપ્રભાય સ્વભાવાય ભવાય વિભવાય ચ ।
સુશાખાય વિશાખાય સુમુખાય મુખાય ચ ॥ 125 ॥

સુનખાય સુદંષ્ટ્રાય સુરથાય સુધાય ચ ।
સાંખ્યાય સુરમુખ્યાય પ્રખ્યાતાય પ્રભાય ચ ॥ 126 ॥

નમઃ ખટ્વાંગહસ્તાય ખેટમુદ્ગરપાણયે ।
ખગેંદ્રાય મૃગેંદ્રાય નાગેંદ્રાય દૃઢાય ચ ॥ 127 ॥

નાગકેયૂરહારાય નાગેંદ્રાયાઘમર્દિને ।
નદીવાસાય નગ્નાય નાનારૂપધરાય ચ ॥ 128 ॥

નાગેશ્વરાય નાગાય નમિતાય નરાય ચ ।
નાગાંતકરથાયૈવ નરનારાયણાય ચ ॥ 129 ॥

નમો મત્સ્યસ્વરૂપાય કચ્છપાય નમો નમઃ ।
નમો યજ્ઞવરાહાય નરસિંહાય તે નમઃ ॥ 130 ॥

વિક્રમાક્રાંતલોકાય વામનાય મહૌજસે ।
નમો ભાર્ગવરામાય રાવણાંતકરાય ચ ॥ 131 ॥

નમસ્તે બલરામાય કંસપ્રધ્વંસકારિણે ।
બુદ્ધાય બુદ્ધરૂપાય તીક્ષ્ણરૂપાય કલ્કિને ॥ 132 ॥

આત્રેયાયાગ્નિનેત્રાય કપિલાય દ્વિજાય ચ ।
ક્ષેત્રાય પશુપાલાય પશુવક્ત્રાય તે નમઃ ॥ 133 ॥

ગૃહસ્થાય વનસ્થાય યતયે બ્રહ્મચારિણે ।
સ્વર્ગાપવર્ગદાત્રે ચ તદ્ભોક્ત્રે ચ મુમુક્ષવે ॥ 134 ॥

શાલગ્રામનિવાસાય ક્ષીરાબ્ધિશયનાય ચ ।
શ્રીશૈલાદ્રિનિવાસાય શિલાવાસાય તે નમઃ ॥ 135 ॥

યોગિહૃત્પદ્મવાસાય મહાહાસાય તે નમઃ ।
ગુહાવાસાય ગુહ્યાય ગુપ્તાય ગુરવે નમઃ ॥ 136 ॥

નમો મૂલાધિવાસાય નીલવસ્ત્રધરાય ચ ।
પીતવસ્ત્રાય શસ્ત્રાય રક્તવસ્ત્રધરાય ચ ॥ 137 ॥

રક્તમાલાવિભૂષાય રક્તગંધાનુલેપિને ।
ધુરંધરાય ધૂર્તાય દુર્ધરાય ધરાય ચ ॥ 138 ॥

દુર્મદાય દુરંતાય દુર્ધરાય નમો નમઃ ।
દુર્નિરીક્ષ્યાય નિષ્ઠાય દુર્દર્શાય દ્રુમાય ચ ॥ 139 ॥

દુર્ભેદાય દુરાશાય દુર્લભાય નમો નમઃ ।
દૃપ્તાય દૃપ્તવક્ત્રાય અદૃપ્તનયનાય ચ ॥ 140 ॥

ઉન્મત્તાય પ્રમત્તાય નમો દૈત્યારયે નમઃ ।
રસજ્ઞાય રસેશાય આરક્તરસનાય ચ ॥ 141 ॥

પથ્યાય પરિતોષાય રથ્યાય રસિકાય ચ ।
ઊર્ધ્વકેશોર્ધ્વરૂપાય નમસ્તે ચોર્ધ્વરેતસે ॥ 142 ॥

ઊર્ધ્વસિંહાય સિંહાય નમસ્તે ચોર્ધ્વબાહવે ।
પરપ્રધ્વંસકાયૈવ શંખચક્રધરાય ચ ॥ 143 ॥

ગદાપદ્મધરાયૈવ પંચબાણધરાય ચ ।
કામેશ્વરાય કામાય કામપાલાય કામિને ॥ 144 ॥

નમઃ કામવિહારાય કામરૂપધરાય ચ ।
સોમસૂર્યાગ્નિનેત્રાય સોમપાય નમો નમઃ ॥ 145 ॥

નમઃ સોમાય વામાય વામદેવાય તે નમઃ ।
સામસ્વનાય સૌમ્યાય ભક્તિગમ્યાય વૈ નમઃ ॥ 146 ॥

કૂષ્માંડગણનાથાય સર્વશ્રેયસ્કરાય ચ ।
ભીષ્માય ભીષદાયૈવ ભીમવિક્રમણાય ચ ॥ 147 ॥

મૃગગ્રીવાય જીવાય જિતાયાજિતકારિણે ।
જટિને જામદગ્ન્યાય નમસ્તે જાતવેદસે ॥ 148 ॥

જપાકુસુમવર્ણાય જપ્યાય જપિતાય ચ ।
જરાયુજાયાંડજાય સ્વેદજાયોદ્ભિજાય ચ ॥ 149 ॥

જનાર્દનાય રામાય જાહ્નવીજનકાય ચ ।
જરાજન્માદિદૂરાય પ્રદ્યુમ્નાય પ્રમોદિને ॥ 150 ॥

જિહ્વારૌદ્રાય રુદ્રાય વીરભદ્રાય તે નમઃ ।
ચિદ્રૂપાય સમુદ્રાય કદ્રુદ્રાય પ્રચેતસે ॥ 151 ॥

ઇંદ્રિયાયેંદ્રિયજ્ઞાય નમોઽસ્ત્વિંદ્રાનુજાય ચ ।
અતીંદ્રિયાય સારાય ઇંદિરાપતયે નમઃ ॥ 152 ॥

ઈશાનાય ચ ઈડ્યાય ઈશિતાય ઇનાય ચ ।
વ્યોમાત્મને ચ વ્યોમ્ને ચ નમસ્તે વ્યોમકેશિને ॥ 153 ॥

વ્યોમાધારાય ચ વ્યોમવક્ત્રાયાસુરઘાતિને ।
નમસ્તે વ્યોમદંષ્ટ્રાય વ્યોમવાસાય તે નમઃ ॥ 154 ॥

સુકુમારાય રામાય શુભાચારાય વૈ નમઃ ।
વિશ્વાય વિશ્વરૂપાય નમો વિશ્વાત્મકાય ચ ॥ 155 ॥

જ્ઞાનાત્મકાય જ્ઞાનાય વિશ્વેશાય પરાત્મને ।
એકાત્મને નમસ્તુભ્યં નમસ્તે દ્વાદશાત્મને ॥ 156 ॥

ચતુર્વિંશતિરૂપાય પંચવિંશતિમૂર્તયે ।
ષડ્વિંશકાત્મને નિત્યં સપ્તવિંશતિકાત્મને ॥ 157 ॥

ધર્માર્થકામમોક્ષાય વિરક્તાય નમો નમઃ ।
ભાવશુદ્ધાય સિદ્ધાય સાધ્યાય શરભાય ચ ॥ 158 ॥

પ્રબોધાય સુબોધાય નમો બુદ્ધિપ્રિયાય ચ ।
સ્નિગ્ધાય ચ વિદગ્ધાય મુગ્ધાય મુનયે નમઃ ॥ 159 ॥

પ્રિયંવદાય શ્રવ્યાય સ્રુક્સ્રુવાય શ્રિતાય ચ ।
ગૃહેશાય મહેશાય બ્રહ્મેશાય નમો નમઃ ॥ 160 ॥

શ્રીધરાય સુતીર્થાય હયગ્રીવાય તે નમઃ ।
ઉગ્રાય ઉગ્રવેગાય ઉગ્રકર્મરતાય ચ ॥ 161 ॥

ઉગ્રનેત્રાય વ્યગ્રાય સમગ્રગુણશાલિને ।
બાલગ્રહવિનાશાય પિશાચગ્રહઘાતિને ॥ 162 ॥

દુષ્ટગ્રહનિહંત્રે ચ નિગ્રહાનુગ્રહાય ચ ।
વૃષધ્વજાય વૃષ્ણ્યાય વૃષાય વૃષભાય ચ ॥ 163 ॥

ઉગ્રશ્રવાય શાંતાય નમઃ શ્રુતિધરાય ચ ।
નમસ્તે દેવદેવેશ નમસ્તે મધુસૂદન ॥ 164 ॥

નમસ્તે પુંડરીકાક્ષ નમસ્તે દુરિતક્ષય ।
નમસ્તે કરુણાસિંધો નમસ્તે સમિતિંજય ॥ 165 ॥

નમસ્તે નરસિંહાય નમસ્તે ગરુડધ્વજ ।
યજ્ઞનેત્ર નમસ્તેઽસ્તુ કાલધ્વજ જયધ્વજ ॥ 166 ॥

અગ્નિનેત્ર નમસ્તેઽસ્તુ નમસ્તે હ્યમરપ્રિય ।
મહાનેત્ર નમસ્તેઽસ્તુ નમસ્તે ભક્તવત્સલ ॥ 167 ॥

ધર્મનેત્ર નમસ્તેઽસ્તુ નમસ્તે કરુણાકર ।
પુણ્યનેત્ર નમસ્તેઽસ્તુ નમસ્તેઽભીષ્ટદાયક ॥ 168 ॥

નમો નમસ્તે જયસિંહરૂપ
નમો નમસ્તે નરસિંહરૂપ ।
નમો નમસ્તે રણસિંહરૂપ
નમો નમસ્તે નરસિંહરૂપ ॥ 169 ॥

ઉદ્ધૃત્ય ગર્વિતં દૈત્યં નિહત્યાજૌ સુરદ્વિષમ્ ।
દેવકાર્યં મહત્કૃત્વા ગર્જસે સ્વાત્મતેજસા ॥ 170 ॥

અતિરૌદ્રમિદં રૂપં દુસ્સહં દુરતિક્રમમ્ ।
દૃષ્ટ્વા તુ શંકિતાઃ સર્વા દેવતાસ્ત્વામુપાગતાઃ ॥ 171 ॥

એતાન્પશ્ય મહેશાનં બ્રહ્માણં માં શચીપતિમ્ ।
દિક્પાલાન્ દ્વાદશાદિત્યાન્ રુદ્રાનુરગરાક્ષસાન્ ॥ 172 ॥

સર્વાન્ ઋષિગણાન્ સપ્તમાતૃર્ગૌરીં સરસ્વતીમ્ ।
લક્ષ્મીં નદીશ્ચ તીર્થાનિ રતિં ભૂતગણાન્યપિ ॥ 173 ॥

પ્રસીદ ત્વં મહાસિંહ ઉગ્રભાવમિમં ત્યજ ।
પ્રકૃતિસ્થો ભવ ત્વં હિ શાંતિભાવં ચ ધારય ॥ 174 ॥

ઇત્યુક્ત્વા દંડવદ્ભૂમૌ પપાત સ પિતામહઃ ।
પ્રસીદ ત્વં પ્રસીદ ત્વં પ્રસીદેતિ પુનઃ પુનઃ ॥ 175 ॥

માર્કંડેય ઉવાચ ।
દૃષ્ટ્વા તુ દેવતાઃ સર્વાઃ શ્રુત્વા તાં બ્રહ્મણો ગિરમ્ ।
સ્તોત્રેણાપિ ચ સંહૃષ્ટઃ સૌમ્યભાવમધારયત્ ॥ 176 ॥

અબ્રવીન્નારસિંહસ્તુ વીક્ષ્ય સર્વાન્ સુરોત્તમાન્ ।
સંત્રસ્તાન્ ભયસંવિગ્નાન્ શરણં સમુપાગતાન્ ॥ 177 ॥

શ્રીનૃસિંહ ઉવાચ ।
ભો ભો દેવવરાઃ સર્વે પિતામહપુરોગમાઃ ।
શૃણુધ્વં મમ વાક્યં ચ ભવંતુ વિગતજ્વરાઃ ॥ 178 ॥

યદ્ધિતં ભવતાં નૂનં તત્કરિષ્યામિ સાંપ્રતમ્ ।
એવં નામસહસ્રં મે ત્રિસંધ્યં યઃ પઠેત્ શુચિઃ ॥ 179 ॥

શૃણોતિ વા શ્રાવયતિ પૂજાંતે ભક્તિસંયુતઃ ।
સર્વાન્ કામાનવાપ્નોતિ જીવેચ્ચ શરદાં શતમ્ ॥ 180 ॥

યો નામભિર્નૃસિંહાદ્યૈરર્ચયેત્ક્રમશો મમ ।
સર્વતીર્થેષુ યત્પુણ્યં સર્વતીર્થેષુ યત્ફલમ્ ॥ 181 ॥

સર્વપૂજાસુ યત્પ્રોક્તં તત્સર્વં લભતે ભૃશમ્ ।
જાતિસ્મરત્વં લભતે બ્રહ્મજ્ઞાનં સનાતનમ્ ॥ 182 ॥

સર્વપાપવિનિર્મુક્તઃ તદ્વિષ્ણોઃ પરમં પદમ્ ।
મન્નામકવચં બધ્વા વિચરેદ્વિગતજ્વરઃ ॥ 183 ॥

ભૂતભેતાલકૂષ્માંડ પિશાચબ્રહ્મરાક્ષસાઃ ।
શાકિનીડાકિનીજ્યેષ્ઠા નીલી બાલગ્રહાદિકાઃ ॥ 184 ॥

દુષ્ટગ્રહાશ્ચ નશ્યંતિ યક્ષરાક્ષસપન્નગાઃ ।
યે ચ સંધ્યાગ્રહાઃ સર્વે ચાંડાલગ્રહસંજ્ઞિકાઃ ॥ 185 ॥

નિશાચરગ્રહાઃ સર્વે પ્રણશ્યંતિ ચ દૂરતઃ ।
કુક્ષિરોગં ચ હૃદ્રોગં શૂલાપસ્મારમેવ ચ ॥ 186 ॥

ઐકાહિકં દ્વ્યાહિકં ચ ચાતુર્થિકમથ જ્વરમ્ ।
આધયો વ્યાધયઃ સર્વે રોગા રોગાધિદેવતાઃ ॥ 187 ॥

શીઘ્રં નશ્યંતિ તે સર્વે નૃસિંહસ્મરણાત્ સુરાઃ ।
રાજાનો દાસતાં યાંતિ શત્રવો યાંતિ મિત્રતામ્ ॥ 188 ॥

જલાનિ સ્થલતાં યાંતિ વહ્નયો યાંતિ શીતતામ્ ।
વિષાણ્યપ્યમૃતા યાંતિ નૃસિંહસ્મરણાત્સુરાઃ ॥ 189 ॥

રાજ્યકામો લભેદ્રાજ્યં ધનકામો લભેદ્ધનમ્ ।
વિદ્યાકામો લભેદ્વિદ્યાં બદ્ધો મુચ્યેત બંધનાત્ ॥ 190 ॥

વ્યાલવ્યાઘ્રભયં નાસ્તિ ચોરસર્પાદિકં તથા ।
અનુકૂલા ભવેદ્ભાર્યા લોકૈશ્ચ પ્રતિપૂજ્યતે ॥ 191 ॥

સુપુત્રં ધનધાન્યં ચ ભવંતિ વિગતજ્વરાઃ ।
એતત્સર્વં સમાપ્નોતિ નૃસિંહસ્ય પ્રસાદતઃ ॥ 192 ॥

જલસંતરણે ચૈવ પર્વતારણ્યમેવ ચ ।
વનેઽપિ વિચિરન્મર્ત્યો દુર્ગમે વિષમે પથિ ॥ 193 ॥

બિલપ્રવેશને ચાપિ નારસિંહં ન વિસ્મરેત્ ।
બ્રહ્મઘ્નશ્ચ પશુઘ્નશ્ચ ભ્રૂણહા ગુરુતલ્પગઃ ॥ 194 ॥

મુચ્યતે સર્વપાપેભ્યઃ કૃતઘ્નઃ સ્ત્રીવિઘાતકઃ ।
વેદાનાં દૂષકશ્ચાપિ માતાપિતૃવિનિંદકઃ ॥ 195 ॥

અસત્યસ્તુ તેથા યજ્ઞનિંદકો લોકનિંદકઃ ।
સ્મૃત્વા સકૃન્નૃસિંહં તુ મુચ્યતે સર્વકિલ્બિષૈઃ ॥ 196 ॥

બહુનાત્ર કિમુક્તેન સ્મૃત્વા માં શુદ્ધમાનસઃ ।
યત્ર યત્ર ચરેન્મર્ત્યો નૃસિંહસ્તત્ર રક્ષતિ ॥ 197 ॥

ગચ્છન્ તિષ્ઠન્ સ્વપન્ ભુંજન્ જાગ્રન્નપિ હસન્નપિ ।
નૃસિંહેતિ નૃસિંહેતિ નૃસિંહેતિ સદા સ્મરન્ ॥ 198 ॥

પુમાન્ન લિપ્યતે પાપૈર્ભુક્તિં મુક્તિં ચ વિંદતિ ।
નારી સુભગતામેતિ સૌભાગ્યં ચ સ્વરૂપતામ્ ॥ 199 ॥

ભર્તુઃ પ્રિયત્વં લભતે ન વૈધવ્યં ચ વિંદતિ ।
ન સપત્નીં ચ જન્માંતે સમ્યક્ જ્ઞાની ભવેદ્વિજઃ ॥ 200 ॥

ભૂમિપ્રદક્ષિણાન્મર્ત્યો યત્ફલં લભતે ચિરાત્ ।
તત્ફલં લભતે નારસિંહમૂર્તિપ્રદક્ષિણાત્ ॥ 201 ॥

માર્કંડેય ઉવાચ ।
ઇત્યુક્ત્વા દેવદેવેશો લક્ષ્મીમાલિંગ્ય લીલયા ।
પ્રહ્લાદસ્યાભિષેકં તુ બ્રહ્મણે ચોપદિષ્ટવાન્ ॥ 202 ॥

શ્રીશૈલસ્ય પ્રસાદે તુ લોકાનાં ચ હિતાય વૈ ।
સ્વરૂપં સ્થાપયામાસ પ્રકૃતિસ્થોઽભવત્તદા ॥ 203 ॥

બ્રહ્માપિ દૈત્યરાજાનં પ્રહ્લાદમભ્યષેચયત્ ।
દૈવતૈઃ સહ સુપ્રીતો હ્યાત્મલોકં યયૌ સ્વયમ્ ॥ 204 ॥

હિરણ્યકશિપોર્ભીત્યા પ્રપલાય્ય શચીપતિઃ ।
સ્વર્ગરાજ્યપરિભ્રષ્ટો યુગાનામેકવિંશતિમ્ ॥ 205 ॥

નૃસિંહેન હતે દૈત્યે સ્વર્ગલોકમવાપ સઃ ।
દિક્પાલાશ્ચ સુસંપ્રાપ્તઃ સ્વસ્વસ્થાનમનુત્તમમ્ ॥ 206 ॥

ધર્મે મતિઃ સમસ્તાનાં પ્રજાનામભવત્તદા ।
એવં નામસહસ્રં મે બ્રહ્મણા નિર્મિતં પુરા ॥ 207 ॥

પુત્રાનધ્યાપયામાસ સનકાદીન્મહામતિઃ ।
ઊચુસ્તે ચ તતઃ સર્વલોકાનાં હિતકામ્યયા ॥ 208 ॥

દેવતા ઋષયઃ સિદ્ધા યક્ષવિદ્યાધરોરગાઃ ।
ગંધર્વાશ્ચ મનુષ્યાશ્ચ ઇહામુત્રફલૈષિણઃ ॥ 209 ॥

યસ્ય સ્તોત્રસ્ય પાઠાદ્ધિ વિશુદ્ધમનસોઽભવન્ ।
સનત્કુમારઃ સંપ્રાપ્તો ભારદ્વાજો મહામતિઃ ॥ 210 ॥

તસ્માદાંગિરસઃ પ્રાપ્તસ્તસ્માત્પ્રાપ્તો મહાક્રતુઃ ।
જગ્રાહ ભાર્ગવસ્તસ્માદગ્નિમિત્રાય સોઽબ્રવીત્ ॥ 211।

જૈગીષવ્યાય સ પ્રાહ સોઽબ્રવીચ્ચ્યવનાય ચ ।
તસ્મા ઉવાચ શાંડિલ્યો ગર્ગાય પ્રાહ વૈ મુનિઃ ॥ 212 ॥

ક્રતુંજયાય સ પ્રાહ જતુકર્ણ્યાય સંયમી ।
વિષ્ણુવૃદ્ધાય સોઽપ્યાહ સોઽપિ બોધાયનાય ચ ॥ 213 ॥

ક્રમાત્સ વિષ્ણવે પ્રાહ સ પ્રાહોદ્ધામકુક્ષયે ।
સિંહતેજાશ્ચ તસ્માચ્ચ શ્રીપ્રિયાય દદૌ ચ નઃ ॥ 214 ॥ [સઃ]

ઉપદિષ્ટોઽસ્મિ તેનાહમિદં નામસહસ્રકમ્ ।
તત્પ્રસાદાદમૃત્યુર્મે યસ્માત્કસ્માદ્ભયં ન હિ ॥ 215 ॥

મયા ચ કથિતં નારસિંહસ્તોત્રમિદં તવ ।
ત્વં હિ નિત્યં શુચિર્ભૂત્વા તમારાધય શાશ્વતમ્ ॥ 216 ॥

સર્વભૂતાશ્રયં દેવં નૃસિંહં ભક્તવત્સલમ્ ।
પૂજયિત્વા સ્તવં જપ્ત્વા હુત્વા નિશ્ચલમાનસઃ ॥ 217 ॥

પ્રાપ્યસે મહતીં સિદ્ધિં સર્વાન્ કામાન્વરોત્તમાન્ ।
અયમેવ પરોધર્મસ્ત્વિદમેવ પરં તપઃ ॥ 218 ॥

ઇદમેવ પરં જ્ઞાનમિદમેવ મહદ્વ્રતમ્ ।
અયમેવ સદાચારસ્ત્વયમેવ સદા મખઃ ॥ 219 ॥

ઇદમેવ ત્રયો વેદાઃ સચ્છાસ્ત્રાણ્યાગમાનિ ચ ।
નૃસિંહમંત્રાદન્યચ્ચ વૈદિકં તુ ન વિદ્યતે ॥ 220 ॥

યદિહાસ્તિ તદન્યત્ર યન્નેહાસ્તિ ન તત્ક્વચિત્ ।
કથિતં તે નૃસિંહસ્ય ચરિતં પાપનાશનમ્ ॥ 221 ॥

સર્વમંત્રમયં તાપત્રયોપશમનં પરમ્ ।
સર્વાર્થસાધનં દિવ્યં કિં ભૂયઃ શ્રોતુમિચ્છસિ ॥ 222 ॥

ઇતિ શ્રીનૃસિંહપુરાણે નૃસિંહપ્રાદુર્ભાવે શ્રીમદ્દિવ્ય લક્ષ્મીનૃસિંહ સહસ્રનામ સ્તોત્રમ્ ॥