(පද්මපුරාණ, උත්තරඛංඩ, 245.304-318)
දෘෂ්ට්වා තස්මින් ජලේ දේවං විස්මයං පරමං යයෞ ।
තුෂ්ටාවාථ යදුශ්රේෂ්ඨෝ හරිං සර්වගමීශ්වරම් ॥ 304 ॥
අක්රූර උවාච ।
කාලාත්මනේ නමස්තුභ්යමනාදිනිධනාය ච ।
අව්යක්තාය නමස්තුභ්යමවිකාරාය තේ නමඃ ॥ 305 ॥
භූතභර්ත්රේ නමස්තුභ්යං භූතව්යාඝ්ර නමෝ නමඃ ।
නමස්තේ සර්වභූතානාං නියංත්රේ පරමාත්මනේ ॥ 306 ॥
විකාරායාවිකාරාය ප්රත්යක්ෂපුරුෂාය ච ।
ගුණභර්ත්රේ නමස්තුභ්යං නියමාය නමෝ නමඃ ॥ 307 ॥
දේශකාලාදිනිර්භේදරහිතාය පරාත්මනේ ।
අනංතාය නමස්තුභ්යමච්යුතාය නමෝ නමඃ ॥ 308 ॥
ගෝවිංදාය නමස්තුභ්යං ත්රයීනාථාය ශාරංගිණේ ।
නාරායණාය විශ්වාය වාසුදේවාය තේ නමඃ ॥ 309 ॥
විෂ්ණවේ පුරුරූපාය ශාශ්වතාය නමෝ නමඃ ।
පද්මනේත්රාය නිත්යාය ශංඛචක්රධරාය ච ॥ 310 ॥
උද්යත්කෝටිරවිප්රඛ්ය භූෂණාංචිතවර්චසේ ।
හරයේ සර්වලෝකානාමීශ්වරාය නමෝ නමඃ ॥ 311 ॥
සවිත්රේ සර්වජගතාං බීජාය පරමාත්මනේ ।
සංකර්ෂණාය කෘෂ්ණාය ප්රද්යුම්නාය නමෝ නමඃ ॥ 312 ॥
අනිරුද්ධාය ධාත්රේ ච විධාත්රේ විශ්වයෝනයේ ।
සහස්රමූර්ත්තයේ තුභ්යං බහුමූර්ද්ධාංඝ්රිබාහවේ ॥ 313 ॥
සහස්රනාම්නේ නිත්යාය පුරුෂාය නමෝ නමඃ ।
නමස්තේ නාගපර්යංකශායිනේ සෞම්යරූපිණේ ॥ 314 ॥
කේශවාය නමස්තුභ්යං පීතවස්ත්රධරාය ච ।
ලක්ෂ්මීඝනකුචාශ්ලේෂවිමර්දෝජ්ජ්වලවර්චසේ ।
ශ්රීධරාය නමස්තුභ්යං ශ්රීශායානංතරූපිණේ ॥ 315 ॥
ඊශ්වර උවාච ।
ස්නානකාලේ පඨේද්යස්තු දේවං ධ්යායන්සනාතනම් ।
ඉමං ස්තවං නරෝ භක්ත්යා මහද්භිර්මුච්යතේ හ්යඝෛඃ ॥ 316 ॥
සර්වතීර්ථඵලං ප්රාප්ය විෂ්ණුසායුජ්යමාප්නුයාත් ।
ඒවමංතර්ජලේ දේවං ස්තුත්වා භාගවතෝත්තමඃ ॥ 317 ॥
අර්චයාමාස ස ජලෛඃ කුසුමෛශ්ච සුගංධිභිඃ ।
කෘතකෘත්යස්තදාක්රූරෝ නිර්ගත්ය යමුනාජලාත් ॥ 318 ॥
॥ ඉති ශ්රීපද්මපුරාණේ උත්තරඛංඩේ පංචචත්වාරිංශාධිකද්විශතතමාධ්යායාංතර්ගතං අක්රූරකෘතා ශ්රීකෘෂ්ණස්තුතිඃ සමාප්තා ॥
