(পদ্মপুরাণ, উত্তরখংড, 245.304-318)
দৃষ্ট্বা তস্মিন্ জলে দেবং বিস্মযং পরমং যযৌ ।
তুষ্টাবাথ যদুশ্রেষ্ঠো হরিং সর্বগমীশ্বরম্ ॥ 304 ॥
অক্রূর উবাচ ।
কালাত্মনে নমস্তুভ্যমনাদিনিধনায চ ।
অব্যক্তায নমস্তুভ্যমবিকারায তে নমঃ ॥ 305 ॥
ভূতভর্ত্রে নমস্তুভ্যং ভূতব্যাঘ্র নমো নমঃ ।
নমস্তে সর্বভূতানাং নিযংত্রে পরমাত্মনে ॥ 306 ॥
বিকারাযাবিকারায প্রত্যক্ষপুরুষায চ ।
গুণভর্ত্রে নমস্তুভ্যং নিযমায নমো নমঃ ॥ 307 ॥
দেশকালাদিনির্ভেদরহিতায পরাত্মনে ।
অনংতায নমস্তুভ্যমচ্যুতায নমো নমঃ ॥ 308 ॥
গোবিংদায নমস্তুভ্যং ত্রযীনাথায শারংগিণে ।
নারাযণায বিশ্বায বাসুদেবায তে নমঃ ॥ 309 ॥
বিষ্ণবে পুরুরূপায শাশ্বতায নমো নমঃ ।
পদ্মনেত্রায নিত্যায শংখচক্রধরায চ ॥ 310 ॥
উদ্যত্কোটিরবিপ্রখ্য ভূষণাংচিতবর্চসে ।
হরযে সর্বলোকানামীশ্বরায নমো নমঃ ॥ 311 ॥
সবিত্রে সর্বজগতাং বীজায পরমাত্মনে ।
সংকর্ষণায কৃষ্ণায প্রদ্যুম্নায নমো নমঃ ॥ 312 ॥
অনিরুদ্ধায ধাত্রে চ বিধাত্রে বিশ্বযোনযে ।
সহস্রমূর্ত্তযে তুভ্যং বহুমূর্দ্ধাংঘ্রিবাহবে ॥ 313 ॥
সহস্রনাম্নে নিত্যায পুরুষায নমো নমঃ ।
নমস্তে নাগপর্যংকশাযিনে সৌম্যরূপিণে ॥ 314 ॥
কেশবায নমস্তুভ্যং পীতবস্ত্রধরায চ ।
লক্ষ্মীঘনকুচাশ্লেষবিমর্দোজ্জ্বলবর্চসে ।
শ্রীধরায নমস্তুভ্যং শ্রীশাযানংতরূপিণে ॥ 315 ॥
ঈশ্বর উবাচ ।
স্নানকালে পঠেদ্যস্তু দেবং ধ্যাযন্সনাতনম্ ।
ইমং স্তবং নরো ভক্ত্যা মহদ্ভির্মুচ্যতে হ্যঘৈঃ ॥ 316 ॥
সর্বতীর্থফলং প্রাপ্য বিষ্ণুসাযুজ্যমাপ্নুযাত্ ।
এবমংতর্জলে দেবং স্তুত্বা ভাগবতোত্তমঃ ॥ 317 ॥
অর্চযামাস স জলৈঃ কুসুমৈশ্চ সুগংধিভিঃ ।
কৃতকৃত্যস্তদাক্রূরো নির্গত্য যমুনাজলাত্ ॥ 318 ॥
॥ ইতি শ্রীপদ্মপুরাণে উত্তরখংডে পংচচত্বারিংশাধিকদ্বিশততমাধ্যাযাংতর্গতং অক্রূরকৃতা শ্রীকৃষ্ণস্তুতিঃ সমাপ্তা ॥
