(પદ્મપુરાણ, ઉત્તરખંડ, 245.304-318)
દૃષ્ટ્વા તસ્મિન્ જલે દેવં વિસ્મયં પરમં યયૌ ।
તુષ્ટાવાથ યદુશ્રેષ્ઠો હરિં સર્વગમીશ્વરમ્ ॥ 304 ॥
અક્રૂર ઉવાચ ।
કાલાત્મને નમસ્તુભ્યમનાદિનિધનાય ચ ।
અવ્યક્તાય નમસ્તુભ્યમવિકારાય તે નમઃ ॥ 305 ॥
ભૂતભર્ત્રે નમસ્તુભ્યં ભૂતવ્યાઘ્ર નમો નમઃ ।
નમસ્તે સર્વભૂતાનાં નિયંત્રે પરમાત્મને ॥ 306 ॥
વિકારાયાવિકારાય પ્રત્યક્ષપુરુષાય ચ ।
ગુણભર્ત્રે નમસ્તુભ્યં નિયમાય નમો નમઃ ॥ 307 ॥
દેશકાલાદિનિર્ભેદરહિતાય પરાત્મને ।
અનંતાય નમસ્તુભ્યમચ્યુતાય નમો નમઃ ॥ 308 ॥
ગોવિંદાય નમસ્તુભ્યં ત્રયીનાથાય શારંગિણે ।
નારાયણાય વિશ્વાય વાસુદેવાય તે નમઃ ॥ 309 ॥
વિષ્ણવે પુરુરૂપાય શાશ્વતાય નમો નમઃ ।
પદ્મનેત્રાય નિત્યાય શંખચક્રધરાય ચ ॥ 310 ॥
ઉદ્યત્કોટિરવિપ્રખ્ય ભૂષણાંચિતવર્ચસે ।
હરયે સર્વલોકાનામીશ્વરાય નમો નમઃ ॥ 311 ॥
સવિત્રે સર્વજગતાં બીજાય પરમાત્મને ।
સંકર્ષણાય કૃષ્ણાય પ્રદ્યુમ્નાય નમો નમઃ ॥ 312 ॥
અનિરુદ્ધાય ધાત્રે ચ વિધાત્રે વિશ્વયોનયે ।
સહસ્રમૂર્ત્તયે તુભ્યં બહુમૂર્દ્ધાંઘ્રિબાહવે ॥ 313 ॥
સહસ્રનામ્ને નિત્યાય પુરુષાય નમો નમઃ ।
નમસ્તે નાગપર્યંકશાયિને સૌમ્યરૂપિણે ॥ 314 ॥
કેશવાય નમસ્તુભ્યં પીતવસ્ત્રધરાય ચ ।
લક્ષ્મીઘનકુચાશ્લેષવિમર્દોજ્જ્વલવર્ચસે ।
શ્રીધરાય નમસ્તુભ્યં શ્રીશાયાનંતરૂપિણે ॥ 315 ॥
ઈશ્વર ઉવાચ ।
સ્નાનકાલે પઠેદ્યસ્તુ દેવં ધ્યાયન્સનાતનમ્ ।
ઇમં સ્તવં નરો ભક્ત્યા મહદ્ભિર્મુચ્યતે હ્યઘૈઃ ॥ 316 ॥
સર્વતીર્થફલં પ્રાપ્ય વિષ્ણુસાયુજ્યમાપ્નુયાત્ ।
એવમંતર્જલે દેવં સ્તુત્વા ભાગવતોત્તમઃ ॥ 317 ॥
અર્ચયામાસ સ જલૈઃ કુસુમૈશ્ચ સુગંધિભિઃ ।
કૃતકૃત્યસ્તદાક્રૂરો નિર્ગત્ય યમુનાજલાત્ ॥ 318 ॥
॥ ઇતિ શ્રીપદ્મપુરાણે ઉત્તરખંડે પંચચત્વારિંશાધિકદ્વિશતતમાધ્યાયાંતર્ગતં અક્રૂરકૃતા શ્રીકૃષ્ણસ્તુતિઃ સમાપ્તા ॥
