(𑌪𑌦𑍍𑌮𑌪𑍁𑌰𑌾𑌣, 𑌉𑌤𑍍𑌤𑌰𑌖𑌂𑌡, 245.304-31)
𑌦𑍃𑌷𑍍𑌟𑍍𑌵𑌾 𑌤𑌸𑍍𑌮𑌿𑌨𑍍 𑌜𑌲𑍇 𑌦𑍇𑌵𑌂 𑌵𑌿𑌸𑍍𑌮𑌯𑌂 𑌪𑌰𑌮𑌂 𑌯𑌯𑍌 ।
𑌤𑍁𑌷𑍍𑌟𑌾𑌵𑌾𑌥 𑌯𑌦𑍁𑌶𑍍𑌰𑍇𑌷𑍍𑌠𑍋 𑌹𑌰𑌿𑌂 𑌸𑌰𑍍𑌵𑌗𑌮𑍀𑌶𑍍𑌵𑌰𑌮𑍍 ॥ 304 ॥
𑌅𑌕𑍍𑌰𑍂𑌰 𑌉𑌵𑌾𑌚 ।
𑌕𑌾𑌲𑌾𑌤𑍍𑌮𑌨𑍇 𑌨𑌮𑌸𑍍𑌤𑍁𑌭𑍍𑌯𑌮𑌨𑌾𑌦𑌿𑌨𑌿𑌧𑌨𑌾𑌯 𑌚 ।
𑌅𑌵𑍍𑌯𑌕𑍍𑌤𑌾𑌯 𑌨𑌮𑌸𑍍𑌤𑍁𑌭𑍍𑌯𑌮𑌵𑌿𑌕𑌾𑌰𑌾𑌯 𑌤𑍇 𑌨𑌮𑌃 ॥ 305 ॥
𑌭𑍂𑌤𑌭𑌰𑍍𑌤𑍍𑌰𑍇 𑌨𑌮𑌸𑍍𑌤𑍁𑌭𑍍𑌯𑌂 𑌭𑍂𑌤𑌵𑍍𑌯𑌾𑌘𑍍𑌰 𑌨𑌮𑍋 𑌨𑌮𑌃 ।
𑌨𑌮𑌸𑍍𑌤𑍇 𑌸𑌰𑍍𑌵𑌭𑍂𑌤𑌾𑌨𑌾𑌂 𑌨𑌿𑌯𑌂𑌤𑍍𑌰𑍇 𑌪𑌰𑌮𑌾𑌤𑍍𑌮𑌨𑍇 ॥ 306 ॥
𑌵𑌿𑌕𑌾𑌰𑌾𑌯𑌾𑌵𑌿𑌕𑌾𑌰𑌾𑌯 𑌪𑍍𑌰𑌤𑍍𑌯𑌕𑍍𑌷𑌪𑍁𑌰𑍁𑌷𑌾𑌯 𑌚 ।
𑌗𑍁𑌣𑌭𑌰𑍍𑌤𑍍𑌰𑍇 𑌨𑌮𑌸𑍍𑌤𑍁𑌭𑍍𑌯𑌂 𑌨𑌿𑌯𑌮𑌾𑌯 𑌨𑌮𑍋 𑌨𑌮𑌃 ॥ 30 ॥
𑌦𑍇𑌶𑌕𑌾𑌲𑌾𑌦𑌿𑌨𑌿𑌰𑍍𑌭𑍇𑌦𑌰𑌹𑌿𑌤𑌾𑌯 𑌪𑌰𑌾𑌤𑍍𑌮𑌨𑍇 ।
𑌅𑌨𑌂𑌤𑌾𑌯 𑌨𑌮𑌸𑍍𑌤𑍁𑌭𑍍𑌯𑌮𑌚𑍍𑌯𑍁𑌤𑌾𑌯 𑌨𑌮𑍋 𑌨𑌮𑌃 ॥ 30 ॥
𑌗𑍋𑌵𑌿𑌂𑌦𑌾𑌯 𑌨𑌮𑌸𑍍𑌤𑍁𑌭𑍍𑌯𑌂 𑌤𑍍𑌰𑌯𑍀𑌨𑌾𑌥𑌾𑌯 𑌶𑌾𑌰𑌂𑌗𑌿𑌣𑍇 ।
𑌨𑌾𑌰𑌾𑌯𑌣𑌾𑌯 𑌵𑌿𑌶𑍍𑌵𑌾𑌯 𑌵𑌾𑌸𑍁𑌦𑍇𑌵𑌾𑌯 𑌤𑍇 𑌨𑌮𑌃 ॥ 30 ॥
𑌵𑌿𑌷𑍍𑌣𑌵𑍇 𑌪𑍁𑌰𑍁𑌰𑍂𑌪𑌾𑌯 𑌶𑌾𑌶𑍍𑌵𑌤𑌾𑌯 𑌨𑌮𑍋 𑌨𑌮𑌃 ।
𑌪𑌦𑍍𑌮𑌨𑍇𑌤𑍍𑌰𑌾𑌯 𑌨𑌿𑌤𑍍𑌯𑌾𑌯 𑌶𑌂𑌖𑌚𑌕𑍍𑌰𑌧𑌰𑌾𑌯 𑌚 ॥ 310 ॥
𑌉𑌦𑍍𑌯𑌤𑍍𑌕𑍋𑌟𑌿𑌰𑌵𑌿𑌪𑍍𑌰𑌖𑍍𑌯 𑌭𑍂𑌷𑌣𑌾𑌂𑌚𑌿𑌤𑌵𑌰𑍍𑌚𑌸𑍇 ।
𑌹𑌰𑌯𑍇 𑌸𑌰𑍍𑌵𑌲𑍋𑌕𑌾𑌨𑌾𑌮𑍀𑌶𑍍𑌵𑌰𑌾𑌯 𑌨𑌮𑍋 𑌨𑌮𑌃 ॥ 311 ॥
𑌸𑌵𑌿𑌤𑍍𑌰𑍇 𑌸𑌰𑍍𑌵𑌜𑌗𑌤𑌾𑌂 𑌬𑍀𑌜𑌾𑌯 𑌪𑌰𑌮𑌾𑌤𑍍𑌮𑌨𑍇 ।
𑌸𑌂𑌕𑌰𑍍𑌷𑌣𑌾𑌯 𑌕𑍃𑌷𑍍𑌣𑌾𑌯 𑌪𑍍𑌰𑌦𑍍𑌯𑍁𑌮𑍍𑌨𑌾𑌯 𑌨𑌮𑍋 𑌨𑌮𑌃 ॥ 312 ॥
𑌅𑌨𑌿𑌰𑍁𑌦𑍍𑌧𑌾𑌯 𑌧𑌾𑌤𑍍𑌰𑍇 𑌚 𑌵𑌿𑌧𑌾𑌤𑍍𑌰𑍇 𑌵𑌿𑌶𑍍𑌵𑌯𑍋𑌨𑌯𑍇 ।
𑌸𑌹𑌸𑍍𑌰𑌮𑍂𑌰𑍍𑌤𑍍𑌤𑌯𑍇 𑌤𑍁𑌭𑍍𑌯𑌂 𑌬𑌹𑍁𑌮𑍂𑌰𑍍𑌦𑍍𑌧𑌾𑌂𑌘𑍍𑌰𑌿𑌬𑌾𑌹𑌵𑍇 ॥ 313 ॥
𑌸𑌹𑌸𑍍𑌰𑌨𑌾𑌮𑍍𑌨𑍇 𑌨𑌿𑌤𑍍𑌯𑌾𑌯 𑌪𑍁𑌰𑍁𑌷𑌾𑌯 𑌨𑌮𑍋 𑌨𑌮𑌃 ।
𑌨𑌮𑌸𑍍𑌤𑍇 𑌨𑌾𑌗𑌪𑌰𑍍𑌯𑌂𑌕𑌶𑌾𑌯𑌿𑌨𑍇 𑌸𑍌𑌮𑍍𑌯𑌰𑍂𑌪𑌿𑌣𑍇 ॥ 314 ॥
𑌕𑍇𑌶𑌵𑌾𑌯 𑌨𑌮𑌸𑍍𑌤𑍁𑌭𑍍𑌯𑌂 𑌪𑍀𑌤𑌵𑌸𑍍𑌤𑍍𑌰𑌧𑌰𑌾𑌯 𑌚 ।
𑌲𑌕𑍍𑌷𑍍𑌮𑍀𑌘𑌨𑌕𑍁𑌚𑌾𑌶𑍍𑌲𑍇𑌷𑌵𑌿𑌮𑌰𑍍𑌦𑍋𑌜𑍍𑌜𑍍𑌵𑌲𑌵𑌰𑍍𑌚𑌸𑍇 ।
𑌶𑍍𑌰𑍀𑌧𑌰𑌾𑌯 𑌨𑌮𑌸𑍍𑌤𑍁𑌭𑍍𑌯𑌂 𑌶𑍍𑌰𑍀𑌶𑌾𑌯𑌾𑌨𑌂𑌤𑌰𑍂𑌪𑌿𑌣𑍇 ॥ 315 ॥
𑌈𑌶𑍍𑌵𑌰 𑌉𑌵𑌾𑌚 ।
𑌸𑍍𑌨𑌾𑌨𑌕𑌾𑌲𑍇 𑌪𑌠𑍇𑌦𑍍𑌯𑌸𑍍𑌤𑍁 𑌦𑍇𑌵𑌂 𑌧𑍍𑌯𑌾𑌯𑌨𑍍𑌸𑌨𑌾𑌤𑌨𑌮𑍍 ।
𑌇𑌮𑌂 𑌸𑍍𑌤𑌵𑌂 𑌨𑌰𑍋 𑌭𑌕𑍍𑌤𑍍𑌯𑌾 𑌮𑌹𑌦𑍍𑌭𑌿𑌰𑍍𑌮𑍁𑌚𑍍𑌯𑌤𑍇 𑌹𑍍𑌯𑌘𑍈𑌃 ॥ 316 ॥
𑌸𑌰𑍍𑌵𑌤𑍀𑌰𑍍𑌥𑌫𑌲𑌂 𑌪𑍍𑌰𑌾𑌪𑍍𑌯 𑌵𑌿𑌷𑍍𑌣𑍁𑌸𑌾𑌯𑍁𑌜𑍍𑌯𑌮𑌾𑌪𑍍𑌨𑍁𑌯𑌾𑌤𑍍 ।
𑌏𑌵𑌮𑌂𑌤𑌰𑍍𑌜𑌲𑍇 𑌦𑍇𑌵𑌂 𑌸𑍍𑌤𑍁𑌤𑍍𑌵𑌾 𑌭𑌾𑌗𑌵𑌤𑍋𑌤𑍍𑌤𑌮𑌃 ॥ 31 ॥
𑌅𑌰𑍍𑌚𑌯𑌾𑌮𑌾𑌸 𑌸 𑌜𑌲𑍈𑌃 𑌕𑍁𑌸𑍁𑌮𑍈𑌶𑍍𑌚 𑌸𑍁𑌗𑌂𑌧𑌿𑌭𑌿𑌃 ।
𑌕𑍃𑌤𑌕𑍃𑌤𑍍𑌯𑌸𑍍𑌤𑌦𑌾𑌕𑍍𑌰𑍂𑌰𑍋 𑌨𑌿𑌰𑍍𑌗𑌤𑍍𑌯 𑌯𑌮𑍁𑌨𑌾𑌜𑌲𑌾𑌤𑍍 ॥ 31 ॥
॥ 𑌇𑌤𑌿 𑌶𑍍𑌰𑍀𑌪𑌦𑍍𑌮𑌪𑍁𑌰𑌾𑌣𑍇 𑌉𑌤𑍍𑌤𑌰𑌖𑌂𑌡𑍇 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌾𑌧𑌿𑌕𑌦𑍍𑌵𑌿𑌶𑌤𑌤𑌮𑌾𑌧𑍍𑌯𑌾𑌯𑌾𑌂𑌤𑌰𑍍𑌗𑌤𑌂 𑌅𑌕𑍍𑌰𑍂𑌰𑌕𑍃𑌤𑌾 𑌶𑍍𑌰𑍀𑌕𑍃𑌷𑍍𑌣𑌸𑍍𑌤𑍁𑌤𑌿𑌃 𑌸𑌮𑌾𑌪𑍍𑌤𑌾 ॥
