(ପଦ୍ମପୁରାଣ, ଉତ୍ତରଖଂଡ, 245.304-318)
ଦୃଷ୍ଟ୍ଵା ତସ୍ମିନ୍ ଜଲେ ଦେଵଂ ଵିସ୍ମୟଂ ପରମଂ ୟୟୌ ।
ତୁଷ୍ଟାଵାଥ ୟଦୁଶ୍ରେଷ୍ଠୋ ହରିଂ ସର୍ଵଗମୀଶ୍ଵରମ୍ ॥ 304 ॥
ଅକ୍ରୂର ଉଵାଚ ।
କାଲାତ୍ମନେ ନମସ୍ତୁଭ୍ୟମନାଦିନିଧନାୟ ଚ ।
ଅଵ୍ୟକ୍ତାୟ ନମସ୍ତୁଭ୍ୟମଵିକାରାୟ ତେ ନମଃ ॥ 305 ॥
ଭୂତଭର୍ତ୍ରେ ନମସ୍ତୁଭ୍ୟଂ ଭୂତଵ୍ୟାଘ୍ର ନମୋ ନମଃ ।
ନମସ୍ତେ ସର୍ଵଭୂତାନାଂ ନିୟଂତ୍ରେ ପରମାତ୍ମନେ ॥ 306 ॥
ଵିକାରାୟାଵିକାରାୟ ପ୍ରତ୍ୟକ୍ଷପୁରୁଷାୟ ଚ ।
ଗୁଣଭର୍ତ୍ରେ ନମସ୍ତୁଭ୍ୟଂ ନିୟମାୟ ନମୋ ନମଃ ॥ 307 ॥
ଦେଶକାଲାଦିନିର୍ଭେଦରହିତାୟ ପରାତ୍ମନେ ।
ଅନଂତାୟ ନମସ୍ତୁଭ୍ୟମଚ୍ୟୁତାୟ ନମୋ ନମଃ ॥ 308 ॥
ଗୋଵିଂଦାୟ ନମସ୍ତୁଭ୍ୟଂ ତ୍ରୟୀନାଥାୟ ଶାରଂଗିଣେ ।
ନାରାୟଣାୟ ଵିଶ୍ଵାୟ ଵାସୁଦେଵାୟ ତେ ନମଃ ॥ 309 ॥
ଵିଷ୍ଣଵେ ପୁରୁରୂପାୟ ଶାଶ୍ଵତାୟ ନମୋ ନମଃ ।
ପଦ୍ମନେତ୍ରାୟ ନିତ୍ୟାୟ ଶଂଖଚକ୍ରଧରାୟ ଚ ॥ 310 ॥
ଉଦ୍ୟତ୍କୋଟିରଵିପ୍ରଖ୍ୟ ଭୂଷଣାଂଚିତଵର୍ଚସେ ।
ହରୟେ ସର୍ଵଲୋକାନାମୀଶ୍ଵରାୟ ନମୋ ନମଃ ॥ 311 ॥
ସଵିତ୍ରେ ସର୍ଵଜଗତାଂ ବୀଜାୟ ପରମାତ୍ମନେ ।
ସଂକର୍ଷଣାୟ କୃଷ୍ଣାୟ ପ୍ରଦ୍ୟୁମ୍ନାୟ ନମୋ ନମଃ ॥ 312 ॥
ଅନିରୁଦ୍ଧାୟ ଧାତ୍ରେ ଚ ଵିଧାତ୍ରେ ଵିଶ୍ଵୟୋନୟେ ।
ସହସ୍ରମୂର୍ତ୍ତୟେ ତୁଭ୍ୟଂ ବହୁମୂର୍ଦ୍ଧାଂଘ୍ରିବାହଵେ ॥ 313 ॥
ସହସ୍ରନାମ୍ନେ ନିତ୍ୟାୟ ପୁରୁଷାୟ ନମୋ ନମଃ ।
ନମସ୍ତେ ନାଗପର୍ୟଂକଶାୟିନେ ସୌମ୍ୟରୂପିଣେ ॥ 314 ॥
କେଶଵାୟ ନମସ୍ତୁଭ୍ୟଂ ପୀତଵସ୍ତ୍ରଧରାୟ ଚ ।
ଲକ୍ଷ୍ମୀଘନକୁଚାଶ୍ଲେଷଵିମର୍ଦୋଜ୍ଜ୍ଵଲଵର୍ଚସେ ।
ଶ୍ରୀଧରାୟ ନମସ୍ତୁଭ୍ୟଂ ଶ୍ରୀଶାୟାନଂତରୂପିଣେ ॥ 315 ॥
ଈଶ୍ଵର ଉଵାଚ ।
ସ୍ନାନକାଲେ ପଠେଦ୍ୟସ୍ତୁ ଦେଵଂ ଧ୍ୟାୟନ୍ସନାତନମ୍ ।
ଇମଂ ସ୍ତଵଂ ନରୋ ଭକ୍ତ୍ୟା ମହଦ୍ଭିର୍ମୁଚ୍ୟତେ ହ୍ୟଘୈଃ ॥ 316 ॥
ସର୍ଵତୀର୍ଥଫଲଂ ପ୍ରାପ୍ୟ ଵିଷ୍ଣୁସାୟୁଜ୍ୟମାପ୍ନୁୟାତ୍ ।
ଏଵମଂତର୍ଜଲେ ଦେଵଂ ସ୍ତୁତ୍ଵା ଭାଗଵତୋତ୍ତମଃ ॥ 317 ॥
ଅର୍ଚୟାମାସ ସ ଜଲୈଃ କୁସୁମୈଶ୍ଚ ସୁଗଂଧିଭିଃ ।
କୃତକୃତ୍ୟସ୍ତଦାକ୍ରୂରୋ ନିର୍ଗତ୍ୟ ୟମୁନାଜଲାତ୍ ॥ 318 ॥
॥ ଇତି ଶ୍ରୀପଦ୍ମପୁରାଣେ ଉତ୍ତରଖଂଡେ ପଂଚଚତ୍ଵାରିଂଶାଧିକଦ୍ଵିଶତତମାଧ୍ୟାୟାଂତର୍ଗତଂ ଅକ୍ରୂରକୃତା ଶ୍ରୀକୃଷ୍ଣସ୍ତୁତିଃ ସମାପ୍ତା ॥
