(padmapurāṇa, uttarakhaṇḍa, 245.304-318)
dṛṣṭvā tasmin jalē dēvaṃ vismayaṃ paramaṃ yayau ।
tuṣṭāvātha yaduśrēṣṭhō hariṃ sarvagamīśvaram ॥ 304 ॥
akrūra uvācha ।
kālātmanē namastubhyamanādinidhanāya cha ।
avyaktāya namastubhyamavikārāya tē namaḥ ॥ 305 ॥
bhūtabhartrē namastubhyaṃ bhūtavyāghra namō namaḥ ।
namastē sarvabhūtānāṃ niyantrē paramātmanē ॥ 306 ॥
vikārāyāvikārāya pratyakṣapuruṣāya cha ।
guṇabhartrē namastubhyaṃ niyamāya namō namaḥ ॥ 307 ॥
dēśakālādinirbhēdarahitāya parātmanē ।
anantāya namastubhyamachyutāya namō namaḥ ॥ 308 ॥
gōvindāya namastubhyaṃ trayīnāthāya śārṅgiṇē ।
nārāyaṇāya viśvāya vāsudēvāya tē namaḥ ॥ 309 ॥
viṣṇavē pururūpāya śāśvatāya namō namaḥ ।
padmanētrāya nityāya śaṅkhachakradharāya cha ॥ 310 ॥
udyatkōṭiraviprakhya bhūṣaṇāñchitavarchasē ।
harayē sarvalōkānāmīśvarāya namō namaḥ ॥ 311 ॥
savitrē sarvajagatāṃ bījāya paramātmanē ।
saṅkarṣaṇāya kṛṣṇāya pradyumnāya namō namaḥ ॥ 312 ॥
aniruddhāya dhātrē cha vidhātrē viśvayōnayē ।
sahasramūrttayē tubhyaṃ bahumūrddhāṅghribāhavē ॥ 313 ॥
sahasranāmnē nityāya puruṣāya namō namaḥ ।
namastē nāgaparyaṅkaśāyinē saumyarūpiṇē ॥ 314 ॥
kēśavāya namastubhyaṃ pītavastradharāya cha ।
lakṣmīghanakuchāślēṣavimardōjjvalavarchasē ।
śrīdharāya namastubhyaṃ śrīśāyānantarūpiṇē ॥ 315 ॥
īśvara uvācha ।
snānakālē paṭhēdyastu dēvaṃ dhyāyansanātanam ।
imaṃ stavaṃ narō bhaktyā mahadbhirmuchyatē hyaghaiḥ ॥ 316 ॥
sarvatīrthaphalaṃ prāpya viṣṇusāyujyamāpnuyāt ।
ēvamantarjalē dēvaṃ stutvā bhāgavatōttamaḥ ॥ 317 ॥
archayāmāsa sa jalaiḥ kusumaiścha sugandhibhiḥ ।
kṛtakṛtyastadākrūrō nirgatya yamunājalāt ॥ 318 ॥
॥ iti śrīpadmapurāṇē uttarakhaṇḍē pañchachatvāriṃśādhikadviśatatamādhyāyāntargataṃ akrūrakṛtā śrīkṛṣṇastutiḥ samāptā ॥
