(பத்³மபுராண, உத்தரக²ண்ட,³ 245.3௦4-318)
த்³ருஷ்ட்வா தஸ்மின் ஜலே தே³வம் விஸ்மயம் பரமம் யயௌ ।
துஷ்டாவாத² யது³ஶ்ரேஷ்டோ² ஹரிம் ஸர்வக³மீஶ்வரம் ॥ 3௦4 ॥
அக்ரூர உவாச ।
காலாத்மனே நமஸ்துப்⁴யமனாதி³னித⁴னாய ச ।
அவ்யக்தாய நமஸ்துப்⁴யமவிகாராய தே நம: ॥ 3௦5 ॥
பூ⁴தப⁴ர்த்ரே நமஸ்துப்⁴யம் பூ⁴தவ்யாக்⁴ர நமோ நம: ।
நமஸ்தே ஸர்வபூ⁴தானாம் நியந்த்ரே பரமாத்மனே ॥ 3௦6 ॥
விகாராயாவிகாராய ப்ரத்யக்ஷபுருஷாய ச ।
கு³ணப⁴ர்த்ரே நமஸ்துப்⁴யம் நியமாய நமோ நம: ॥ 3௦7 ॥
தே³ஶகாலாதி³னிர்பே⁴த³ரஹிதாய பராத்மனே ।
அனந்தாய நமஸ்துப்⁴யமச்யுதாய நமோ நம: ॥ 3௦8 ॥
கோ³விந்தா³ய நமஸ்துப்⁴யம் த்ரயீனாதா²ய ஶார்ங்கி³ணே ।
நாராயணாய விஶ்வாய வாஸுதே³வாய தே நம: ॥ 3௦9 ॥
விஷ்ணவே புருரூபாய ஶாஶ்வதாய நமோ நம: ।
பத்³மனேத்ராய நித்யாய ஶங்க³சக்ரத⁴ராய ச ॥ 31௦ ॥
உத்³யத்கோடிரவிப்ரக்²ய பூ⁴ஷணாஞ்சிதவர்சஸே ।
ஹரயே ஸர்வலோகானாமீஶ்வராய நமோ நம: ॥ 311 ॥
ஸவித்ரே ஸர்வஜக³தாம் பீ³ஜாய பரமாத்மனே ।
ஸங்கர்ஷணாய க்ருஷ்ணாய ப்ரத்³யும்னாய நமோ நம: ॥ 312 ॥
அனிருத்³தா⁴ய தா⁴த்ரே ச விதா⁴த்ரே விஶ்வயோனயே ।
ஸஹஸ்ரமூர்த்தயே துப்⁴யம் ப³ஹுமூர்த்³தா⁴ங்க்⁴ரிபா³ஹவே ॥ 313 ॥
ஸஹஸ்ரனாம்னே நித்யாய புருஷாய நமோ நம: ।
நமஸ்தே நாக³பர்யங்கஶாயினே ஸௌம்யரூபிணே ॥ 314 ॥
கேஶவாய நமஸ்துப்⁴யம் பீதவஸ்த்ரத⁴ராய ச ।
லக்ஷ்மீக⁴னகுசாஶ்லேஷவிமர்தோ³ஜ்ஜ்வலவர்சஸே ।
ஶ்ரீத⁴ராய நமஸ்துப்⁴யம் ஶ்ரீஶாயானந்தரூபிணே ॥ 315 ॥
ஈஶ்வர உவாச ।
ஸ்னானகாலே படே²த்³யஸ்து தே³வம் த்⁴யாயன்ஸனாதனம் ।
இமம் ஸ்தவம் நரோ ப⁴க்த்யா மஹத்³பி⁴ர்முச்யதே ஹ்யகை⁴: ॥ 316 ॥
ஸர்வதீர்த²ப²லம் ப்ராப்ய விஷ்ணுஸாயுஜ்யமாப்னுயாத் ।
ஏவமந்தர்ஜலே தே³வம் ஸ்துத்வா பா⁴க³வதோத்தம: ॥ 317 ॥
அர்சயாமாஸ ஸ ஜலை: குஸுமைஶ்ச ஸுக³ந்தி⁴பி⁴: ।
க்ருதக்ருத்யஸ்ததா³க்ரூரோ நிர்க³த்ய யமுனாஜலாத் ॥ 318 ॥
॥ இதி ஶ்ரீபத்³மபுராணே உத்தரக²ண்டே³ பஞ்சசத்வாரிம்ஶாதி⁴கத்³விஶததமாத்⁴யாயாந்தர்க³தம் அக்ரூரக்ருதா ஶ்ரீக்ருஷ்ணஸ்துதி: ஸமாப்தா ॥
