শ্রীমান্ যস্যাঃ প্রিযস্সন্ সকলমপি জগজ্জংগমস্থাবরাদ্যং
স্বর্ভূপাতালভেদং বিবিধবিধমহাশিল্পসামর্থ্যসিদ্ধম্ ।
রংজন্ ব্রহ্মামরেংদ্রৈস্ত্রিভুবনজনকঃ স্তূযতে ভূরিশো যঃ
সা বিষ্ণোরেকপত্নী ত্রিভুবনজননী পাতু পদ্মাবতী নঃ ॥ 1 ॥
শ্রীশৃংগারৈকদেবীং বিধিমুখসুমনঃকোটিকোটীরজাগ্র-
দ্রত্নজ্যোত্স্নাপ্রসারপ্রকটিতচরণাংভোজনীরাজিতার্চাম্ ।
গীর্বাণস্ত্রৈণবাণীপরিফণিতমহাকীর্তিসৌভাগ্যভাগ্যাং
হেলানির্দগ্ধদৈন্যশ্রমবিষমমহারণ্যগণ্যাং নমামি ॥ 2 ॥
বিদ্যুত্কোটিপ্রকাশাং বিবিধমণিগণোন্নিদ্রসুস্নিগ্ধশোভা-
সংপত্সংপূর্ণহারাদ্যভিনববিভবালংক্রিযোল্লাসিকংঠাম্ ।
আদ্যাং বিদ্যোতমানস্মিতরুচিরচিতানল্পচংদ্রপ্রকাশাং
পদ্মাং পদ্মাযতাক্ষীং পদনলিননমত্পদ্মসদ্মাং নমামি ॥ 3 ॥
শশ্বত্তস্যাঃ শ্রযেঽহং চরণসরসিজং শার্ঙ্গপাণেঃ পুরংধ্র্যাঃ
স্তোকং যস্যাঃ প্রসাদঃ প্রসরতি মনুজে ক্রূরদারিদ্র্যদগ্ধে ।
সোঽযং সদ্যোঽনবদ্যস্থিরতররুচিরশ্রেষ্ঠভূযিষ্ঠনব্য-
স্তব্যপ্রাসাদপংক্তিপ্রসিতবহুবিধপ্রাভবো বোভবীতি ॥ 4 ॥
সৌংদর্যোদ্বেলহেমাংবুজমহিতমহাসিংহপীঠাশ্রযাঢ্যাং
পুষ্যন্নীলারবিংদপ্রতিমবরকৃপাপূরসংপূর্ণনেত্রাম্ ।
জ্যোত্স্নাপীযূষধারাবহনবসুষমক্ষৌমধামোজ্জ্বলাংগীং
বংদে সিদ্ধেশচেতস্সরসিজনিলযাং চক্রিসৌভাগ্যঋদ্ধিম্ ॥ 5 ॥
সংসারক্লেশহংত্রীং স্মিতরুচিরমুখীং সারশৃংগারশোভাং
সর্বৈশ্বর্যপ্রদাত্রীং সরসিজনযনাং সংস্তুতাং সাধুবৃংদৈঃ ।
সংসিদ্ধস্নিগ্ধভাবাং সুরহিতচরিতাং সিংধুরাজাত্মভূতাং
সেবে সংভাবনীযানুপমিতমহিমাং সচ্চিদানংদরূপাম্ ॥ 6 ॥
সিদ্ধস্বর্ণোপমানদ্যুতিলসিততনুং স্নিগ্ধসংপূর্ণচংদ্র-
ব্রীডাসংপাদিবক্ত্রাং তিলসুমবিজযোদ্যোগনির্নিদ্রনাসাম্ ।
তাদাত্বোত্ফুল্লনীলাংবুজহসনচণাত্মীযচক্ষুঃ প্রকাশাং
বালশ্রীলপ্রবালপ্রিযসখচরণদ্বংদ্বরম্যাং ভজেঽহম্ ॥ 7 ॥
যাং দেবীং মৌনিবর্যাঃ শ্রযদমরবধূমৌলিমাল্যার্চিতাংঘ্রিং
সংসারাসারবারান্নিধিতরতরণে সর্বদা ভাবযংতে ।
শ্রীকারোত্তুংগরত্নপ্রচুরিতকনকস্নিগ্ধশুদ্ধাংতলীলাং
তাং শশ্বত্পাদপদ্মশ্রযদখিলহৃদাহ্লাদিনীং হ্লাদযেঽহম্ ॥ 8 ॥
আকাশাধীশপুত্রীং শ্রিতজননিবহাধীনচেতঃপ্রবৃত্তিং
বংদে শ্রীবেংকটেশপ্রভুবরমহিষীং দীনচিত্তপ্রতোষাম্ ।
পুষ্যত্পাদারবিংদপ্রসৃমরসুমহশ্শামিতস্বাশ্রিতাংত-
স্তামিস্রাং তত্ত্বরূপাং শুকপুরনিলযাং সর্বসৌভাগ্যদাত্রীম্ ॥ 9 ॥
শ্রীশেষশর্মাভিনবোপক্লুপ্তা
প্রিযেণ ভক্ত্যা চ সমর্পিতেযম্ ।
পদ্মাবতীমংগলকংঠভূষা
বিরাজতাং শ্রীনবরত্নমালা ॥ 10 ॥
ইতি শ্রী পদ্মাবতী নবরত্নমালিকা স্তুতিঃ ।
