নারদ উবাচ
ভগবন্ দেবদেবেশ সৃষ্টিস্থিতিলযেশ্বর ।
শতমষ্টোত্তরং নাম্নাং বগলাযা বদাধুনা ॥ 1 ॥
শ্রী ভগবানুবাচ
শৃণু বত্স প্রবক্ষ্যামি নাম্নামষ্টোত্তরং শতম্ ।
পীতাংবর্যা মহাদেব্যাঃ স্তোত্রং পাপপ্রণাশনম্ ॥ 2 ॥
যস্য প্রপঠনাত্সদ্যো বাদী মূকোভবেত্ ক্ষণাত্ ।
রিপবস্স্তংভনং যাংতি সত্যং সত্যং বদাম্যহম্ ॥ 3 ॥
ওং অস্য শ্রীপীতাংবর্যষ্টোত্তরশতনামস্তোত্রস্য সদাশিব ঋষিঃ অনুষ্টুপ্ছংদঃ শ্রীপীতাংবরী দেবতা শ্রীপীতাংবরী প্রীতযে জপে বিনিযোগঃ ।
ওং বগলা বিষ্ণুবনিতা বিষ্ণুশংকরভামিনী ।
বহুলা দেবমাতা চ মহাবিষ্ণুপ্রসূরপি ॥ 4 ॥
মহামত্স্যা মহাকূর্মা মহাবারাহরূপিণী ।
নারসিংহপ্রিযা রম্যা বামনা পটুরূপিণী ॥ 5 ॥
জামদগ্ন্যস্বরূপা চ রামা রামপ্রপূজিতা ।
কৃষ্ণা কপর্দিনী কৃত্যা কলহা চ বিকারিণী ॥ 6 ॥
বুদ্ধিরূপা বুদ্ধভার্যা বৌদ্ধপাষংডখংডিনী ।
কল্কিরূপা কলিহরা কলিদুর্গতিনাশিনী ॥ 7 ॥
কোটিসূর্যপ্রতীকাশা কোটিকংদর্পমোহিনী ।
কেবলা কঠিনা কালী কলা কৈবল্যদাযিনী ॥ 8 ॥
কেশবী কেশবারাধ্যা কিশোরী কেশবস্তুতা ।
রুদ্ররূপা রুদ্রমূর্তী রুদ্রাণী রুদ্রদেবতা ॥ 9 ॥
নক্ষত্ররূপা নক্ষত্রা নক্ষত্রেশপ্রপূজিতা ।
নক্ষত্রেশপ্রিযা নিত্যা নক্ষত্রপতিবংদিতা ॥ 10 ॥
নাগিনী নাগজননী নাগরাজপ্রবংদিতা ।
নাগেশ্বরী নাগকন্যা নাগরী চ নগাত্মজা ॥ 11 ॥
নগাধিরাজতনযা নগরাজপ্রপূজিতা ।
নবীনা নীরদা পীতা শ্যামা সৌংদর্যকারিণী ॥ 12 ॥
রক্তা নীলা ঘনা শুভ্রা শ্বেতা সৌভাগ্যদাযিনী ।
সুংদরী সৌভগা সৌম্যা স্বর্ণাভা স্বর্গতিপ্রদা ॥ 13 ॥
রিপুত্রাসকরী রেখা শত্রুসংহারকারিণী ।
ভামিনী চ তথা মাযা স্তংভিনী মোহিনী শুভা ॥ 14 ॥
রাগদ্বেষকরী রাত্রী রৌরবধ্বংসকারিণী ।
যক্ষিণী সিদ্ধনিবহা সিদ্ধেশা সিদ্ধিরূপিণী ॥ 15 ॥
লংকাপতিধ্বংসকরী লংকেশরিপুবংদিতা ।
লংকানাথকুলহরা মহারাবণহারিণী ॥ 16 ॥
দেবদানবসিদ্ধৌঘপূজিতাপরমেশ্বরী ।
পরাণুরূপা পরমা পরতংত্রবিনাশিনী ॥ 17 ॥
বরদা বরদারাধ্যা বরদানপরাযণা ।
বরদেশপ্রিযা বীরা বীরভূষণভূষিতা ॥ 18 ॥
বসুদা বহুদা বাণী ব্রহ্মরূপা বরাননা ।
বলদা পীতবসনা পীতভূষণভূষিতা ॥ 19 ॥
পীতপুষ্পপ্রিযা পীতহারা পীতস্বরূপিণী ।
ইতি তে কথিতং বিপ্র নাম্নামষ্টোত্তরং শতম্ ॥ 20 ॥
যঃ পঠেত্পাঠযেদ্বাপি শৃণুযাদ্বা সমাহিতঃ ।
তস্য শত্রুঃ ক্ষযং সদ্যো যাতি নৈবাত্র সংশযঃ ॥ 21 ॥
প্রভাতকালে প্রযতো মনুষ্যঃ
পঠেত্সুভক্ত্যা পরিচিংত্য পীতাম্ ।
ধ্রুবং ভবেত্তস্য সমস্তবৃদ্ধিঃ
বিনাশমাযাতি চ তস্য শত্রুঃ ॥ 22 ॥
ইতি শ্রীবিষ্ণুযামলে নারদবিষ্ণুসংবাদে শ্রীবগলাষ্টোত্তরশতনামস্তোত্রম্ ।
