ॐ अस्य श्रीबगलामुखीस्तोत्रस्य
नारदृषिः
श्री बगलामुखी देवता
मम सन्निहितानां विरोधिनां वाङ्मुख-पदबुद्धीनां स्तंभनार्थे स्तोत्रपाठे विनियोगः
मध्येसुधाब्धि मणिमंटप रत्नवेदि
सिंहासनोपरिगतां परिपीतवर्णाम् ।
पीतांबराभरण माल्यविभूषितांगीं
देवीं भजामि धृतमुद्गरवैरि जिह्वाम् ॥ 1 ॥
जिह्वाग्रमादाय करेण देवीं
वामेन शत्रून् परिपीडयंतीम् ।
गदाभिघातेन च दक्षिणेन
पीतांबराढ्यां द्विभुजां भजामि ॥ 2 ॥
चलत्कनककुंडलोल्लसितचारुगंडस्थलां
लसत्कनकचंपक द्युतिमदिंदुबिंबाननाम् ।
गदाहत विपक्षकां कलितलोलजिह्वांचलां
स्मरामि बगलामुखीं विमुखवाङ्मनस्स्तंभिनीम् ॥ 3 ॥
पीयूषो दधिमध्यचारु विलस द्रक्तोत्पले मंटपे
सत्सिंहासन मौलिपातितरिपुं प्रेतासनाध्यासिनीम् ।
स्वर्णाभां करपीडितारिरसनां भ्राम्यद्गदां विभ्रमां
इत्थं ध्यायति यांति तस्य विलयं सद्योथ सर्वापदः ॥ 4 ॥
देवित्त्वच्चरणांबुजार्चनकृते यः पीत पुष्पांजलीन्
भक्त्या वामकरे निधाय च मनुं मंत्री मनोज्ञाक्षरम् ।
पीठध्यानपरोऽथ कुंभकवशाद्बीजं स्मरेत्पार्थिव-
स्तस्यामित्रमुखस्य वाचि हृदये जाड्यं भवेत्तत्क्षणात् ॥ 5 ॥
वादी मूकति कंकति क्षितिपतिर्वैश्वानरश्शीतिति
क्रोधीशाम्यति दुर्जनस्सुजनति क्षिप्रानुगः खंजति ।
गर्वी खर्वति सर्वविच्च जडति त्वद्यंत्रणा यंत्रितः
श्रीनित्ये बगलामुखि प्रतिदिनं कल्याणि तुभ्यं नमः ॥ 6 ॥
मंत्रस्तावदयं विपक्षदलने स्तोत्रं पवित्रं च ते
यंत्रं वादिनियंत्रणं त्रिजगतां जैत्रं च चित्रं च ते ।
मातः श्रीबगलेति नाम ललितं यस्यास्ति जंतोर्मुखे
त्वन्नामग्रहणेन संसदि मुख स्तंभो भवेद्वादिनाम् ॥ 7 ॥
दुष्टस्तंभनमुग्रविघ्नशमनं दारिद्र्यविद्रावणं
भूभृद्भीशमनं चलन्मृगदृशां चेतस्समाकर्षणम् ।
सौभाग्यैकनिकेतनं समदृशः कारुण्यपूर्णामृतं
मृत्योर्मारणमाविरस्तु पुरतो मातस्त्वदीयं वपुः ॥ 8 ॥
मातर्भंजय मे विपक्षवदनां जिह्वां च संकीलय
ब्राह्मीं मुद्रय नाशयाशुधिषणामुग्रां गतिं स्तंभय ।
शत्रूंश्चूर्णय देवि तीक्ष्णगदया गौरांगि पीतांबरे
विघ्नौघं बगले हर प्रणमतां कारुण्यपूर्णेक्षणे ॥ 9 ॥
मातर्भैरवि भद्रकालि विजये वाराहि विश्वाश्रये
श्रीविद्ये समये महेशि बगले कामेशि रामे रमे ।
मातंगि त्रिपुरे परात्परतरे स्वर्गापवर्गप्रदे
दासोऽहं शरणागतः करुणया विश्वेश्वरि त्राहिमाम् ॥ 10 ॥
संरंभे सौरसंघे प्रहरणसमये बंधनेवारिमध्ये
विद्यावादेविवादे प्रतिकृतिनृपतौ दिव्यकाले निशायाम् ।
वश्ये वा स्तंभने वा रिपुवधसमये निर्जने वा वने वा
गच्छंस्तिष्ठंस्त्रिकालं यदि पठति शिवं प्राप्नुयादाशु धीरः ॥ 11 ॥
त्वं विद्या परमा त्रिलोकजननी विघ्नौघसंछेदिनी
योषाकर्षणकारिणी त्रिजगतामानंदसंवर्धिनी ।
दुस्फोटोच्चाटनकारिणी जनमनस्संमोहसंदायिनी
जिह्वाकीलनभैरवी विजयते ब्रह्मास्त्रमंत्रो यथा ॥ 12 ॥
विद्यालक्ष्मीस्सर्वसौभाग्यमायुः
पुत्रैः पौत्रैः सर्वसाम्राज्यसिद्धिः ।
मानो भोगो वश्यमारोग्यसौख्यं
प्राप्तं तत्तद्भूतलेऽस्मिन्नरेण ॥ 13 ॥
यत्कृतं च जपं होमं गदितं परमेश्वरी ।
दुष्टानां निग्रहार्थाय तद्गृहाण नमोऽस्तु ते ॥ 14 ॥
पीतांबरां तां द्विभुजां त्रिनेत्रां गात्रगोज्ज्वलाम् ।
शिलामुद्गरहस्तां च स्मरेत्तां बगलामुखीम् ॥ 15 ॥
ब्रह्मास्त्रमिति विख्यातं त्रिषु लोकेषु विश्रुतम् ।
गुरुभक्ताय दातव्यं नदेयं यस्य कस्यचित् ॥ 16 ॥
नित्यं स्तोत्रमिदं पवित्रमिह यो देव्याः पठत्यादरात्
धृत्वायंत्रमिदं तथैव समरे बाहौ करे वा गले ।
राजानोऽप्यरयो मदांधकरिणस्सर्पा मृगेंद्रादिकाः
ते वै यांति विमोहिता रिपुगणा लक्ष्मीः स्थिरास्सिद्धयः ॥ 17 ॥
इति श्री रुद्रयामले तंत्रे श्री बगलामुखी स्तोत्रम् ॥
