ଓଂ ଅସ୍ୟ ଶ୍ରୀବଗଳାମୁଖୀସ୍ତୋତ୍ରସ୍ୟ
ନାରଦୃଷିଃ
ଶ୍ରୀ ବଗଳାମୁଖୀ ଦେଵତା
ମମ ସନ୍ନିହିତାନାଂ ଵିରୋଧିନାଂ ଵାଙ୍ମୁଖ-ପଦବୁଦ୍ଧୀନାଂ ସ୍ତଂଭନାର୍ଥେ ସ୍ତୋତ୍ରପାଠେ ଵିନିୟୋଗଃ
ମଧ୍ୟେସୁଧାବ୍ଧି ମଣିମଂଟପ ରତ୍ନଵେଦି
ସିଂହାସନୋପରିଗତାଂ ପରିପୀତଵର୍ଣାମ୍ ।
ପୀତାଂବରାଭରଣ ମାଲ୍ୟଵିଭୂଷିତାଂଗୀଂ
ଦେଵୀଂ ଭଜାମି ଧୃତମୁଦ୍ଗରଵୈରି ଜିହ୍ଵାମ୍ ॥ 1 ॥
ଜିହ୍ଵାଗ୍ରମାଦାୟ କରେଣ ଦେଵୀଂ
ଵାମେନ ଶତ୍ରୂନ୍ ପରିପୀଡୟଂତୀମ୍ ।
ଗଦାଭିଘାତେନ ଚ ଦକ୍ଷିଣେନ
ପୀତାଂବରାଢ୍ୟାଂ ଦ୍ଵିଭୁଜାଂ ଭଜାମି ॥ 2 ॥
ଚଲତ୍କନକକୁଂଡଲୋଲ୍ଲସିତଚାରୁଗଂଡସ୍ଥଲାଂ
ଲସତ୍କନକଚଂପକ ଦ୍ୟୁତିମଦିଂଦୁବିଂବାନନାମ୍ ।
ଗଦାହତ ଵିପକ୍ଷକାଂ କଲିତଲୋଲଜିହ୍ଵାଂଚଲାଂ
ସ୍ମରାମି ବଗଳାମୁଖୀଂ ଵିମୁଖଵାଙ୍ମନସ୍ସ୍ତଂଭିନୀମ୍ ॥ 3 ॥
ପୀୟୂଷୋ ଦଧିମଧ୍ୟଚାରୁ ଵିଲସ ଦ୍ରକ୍ତୋତ୍ପଲେ ମଂଟପେ
ସତ୍ସିଂହାସନ ମୌଳିପାତିତରିପୁଂ ପ୍ରେତାସନାଧ୍ୟାସିନୀମ୍ ।
ସ୍ଵର୍ଣାଭାଂ କରପୀଡିତାରିରସନାଂ ଭ୍ରାମ୍ୟଦ୍ଗଦାଂ ଵିଭ୍ରମାଂ
ଇତ୍ଥଂ ଧ୍ୟାୟତି ୟାଂତି ତସ୍ୟ ଵିଲୟଂ ସଦ୍ୟୋଥ ସର୍ଵାପଦଃ ॥ 4 ॥
ଦେଵିତ୍ତ୍ଵଚ୍ଚରଣାଂବୁଜାର୍ଚନକୃତେ ୟଃ ପୀତ ପୁଷ୍ପାଂଜଲୀନ୍
ଭକ୍ତ୍ୟା ଵାମକରେ ନିଧାୟ ଚ ମନୁଂ ମଂତ୍ରୀ ମନୋଜ୍ଞାକ୍ଷରମ୍ ।
ପୀଠଧ୍ୟାନପରୋଽଥ କୁଂଭକଵଶାଦ୍ବୀଜଂ ସ୍ମରେତ୍ପାର୍ଥିଵ-
ସ୍ତସ୍ୟାମିତ୍ରମୁଖସ୍ୟ ଵାଚି ହୃଦୟେ ଜାଡ୍ୟଂ ଭଵେତ୍ତତ୍କ୍ଷଣାତ୍ ॥ 5 ॥
ଵାଦୀ ମୂକତି କଂକତି କ୍ଷିତିପତିର୍ଵୈଶ୍ଵାନରଶ୍ଶୀତିତି
କ୍ରୋଧୀଶାମ୍ୟତି ଦୁର୍ଜନସ୍ସୁଜନତି କ୍ଷିପ୍ରାନୁଗଃ ଖଂଜତି ।
ଗର୍ଵୀ ଖର୍ଵତି ସର୍ଵଵିଚ୍ଚ ଜଡତି ତ୍ଵଦ୍ୟଂତ୍ରଣା ୟଂତ୍ରିତଃ
ଶ୍ରୀନିତ୍ୟେ ବଗଳାମୁଖି ପ୍ରତିଦିନଂ କଲ୍ୟାଣି ତୁଭ୍ୟଂ ନମଃ ॥ 6 ॥
ମଂତ୍ରସ୍ତାଵଦୟଂ ଵିପକ୍ଷଦଲନେ ସ୍ତୋତ୍ରଂ ପଵିତ୍ରଂ ଚ ତେ
ୟଂତ୍ରଂ ଵାଦିନିୟଂତ୍ରଣଂ ତ୍ରିଜଗତାଂ ଜୈତ୍ରଂ ଚ ଚିତ୍ରଂ ଚ ତେ ।
ମାତଃ ଶ୍ରୀବଗଳେତି ନାମ ଲଲିତଂ ୟସ୍ୟାସ୍ତି ଜଂତୋର୍ମୁଖେ
ତ୍ଵନ୍ନାମଗ୍ରହଣେନ ସଂସଦି ମୁଖ ସ୍ତଂଭୋ ଭଵେଦ୍ଵାଦିନାମ୍ ॥ 7 ॥
ଦୁଷ୍ଟସ୍ତଂଭନମୁଗ୍ରଵିଘ୍ନଶମନଂ ଦାରିଦ୍ର୍ୟଵିଦ୍ରାଵଣଂ
ଭୂଭୃଦ୍ଭୀଶମନଂ ଚଲନ୍ମୃଗଦୃଶାଂ ଚେତସ୍ସମାକର୍ଷଣମ୍ ।
ସୌଭାଗ୍ୟୈକନିକେତନଂ ସମଦୃଶଃ କାରୁଣ୍ୟପୂର୍ଣାମୃତଂ
ମୃତ୍ୟୋର୍ମାରଣମାଵିରସ୍ତୁ ପୁରତୋ ମାତସ୍ତ୍ଵଦୀୟଂ ଵପୁଃ ॥ 8 ॥
ମାତର୍ଭଂଜୟ ମେ ଵିପକ୍ଷଵଦନାଂ ଜିହ୍ଵାଂ ଚ ସଂକୀଲୟ
ବ୍ରାହ୍ମୀଂ ମୁଦ୍ରୟ ନାଶୟାଶୁଧିଷଣାମୁଗ୍ରାଂ ଗତିଂ ସ୍ତଂଭୟ ।
ଶତ୍ରୂଂଶ୍ଚୂର୍ଣୟ ଦେଵି ତୀକ୍ଷ୍ଣଗଦୟା ଗୌରାଂଗି ପୀତାଂବରେ
ଵିଘ୍ନୌଘଂ ବଗଳେ ହର ପ୍ରଣମତାଂ କାରୁଣ୍ୟପୂର୍ଣେକ୍ଷଣେ ॥ 9 ॥
ମାତର୍ଭୈରଵି ଭଦ୍ରକାଳି ଵିଜୟେ ଵାରାହି ଵିଶ୍ଵାଶ୍ରୟେ
ଶ୍ରୀଵିଦ୍ୟେ ସମୟେ ମହେଶି ବଗଳେ କାମେଶି ରାମେ ରମେ ।
ମାତଂଗି ତ୍ରିପୁରେ ପରାତ୍ପରତରେ ସ୍ଵର୍ଗାପଵର୍ଗପ୍ରଦେ
ଦାସୋଽହଂ ଶରଣାଗତଃ କରୁଣୟା ଵିଶ୍ଵେଶ୍ଵରି ତ୍ରାହିମାମ୍ ॥ 10 ॥
ସଂରଂଭେ ସୌରସଂଘେ ପ୍ରହରଣସମୟେ ବଂଧନେଵାରିମଧ୍ୟେ
ଵିଦ୍ୟାଵାଦେଵିଵାଦେ ପ୍ରତିକୃତିନୃପତୌ ଦିଵ୍ୟକାଲେ ନିଶାୟାମ୍ ।
ଵଶ୍ୟେ ଵା ସ୍ତଂଭନେ ଵା ରିପୁଵଧସମୟେ ନିର୍ଜନେ ଵା ଵନେ ଵା
ଗଚ୍ଛଂସ୍ତିଷ୍ଠଂସ୍ତ୍ରିକାଲଂ ୟଦି ପଠତି ଶିଵଂ ପ୍ରାପ୍ନୁୟାଦାଶୁ ଧୀରଃ ॥ 11 ॥
ତ୍ଵଂ ଵିଦ୍ୟା ପରମା ତ୍ରିଲୋକଜନନୀ ଵିଘ୍ନୌଘସଂଛେଦିନୀ
ୟୋଷାକର୍ଷଣକାରିଣୀ ତ୍ରିଜଗତାମାନଂଦସଂଵର୍ଧିନୀ ।
ଦୁସ୍ଫୋଟୋଚ୍ଚାଟନକାରିଣୀ ଜନମନସ୍ସଂମୋହସଂଦାୟିନୀ
ଜିହ୍ଵାକୀଲନଭୈରଵୀ ଵିଜୟତେ ବ୍ରହ୍ମାସ୍ତ୍ରମଂତ୍ରୋ ୟଥା ॥ 12 ॥
ଵିଦ୍ୟାଲକ୍ଷ୍ମୀସ୍ସର୍ଵସୌଭାଗ୍ୟମାୟୁଃ
ପୁତ୍ରୈଃ ପୌତ୍ରୈଃ ସର୍ଵସାମ୍ରାଜ୍ୟସିଦ୍ଧିଃ ।
ମାନୋ ଭୋଗୋ ଵଶ୍ୟମାରୋଗ୍ୟସୌଖ୍ୟଂ
ପ୍ରାପ୍ତଂ ତତ୍ତଦ୍ଭୂତଲେଽସ୍ମିନ୍ନରେଣ ॥ 13 ॥
ୟତ୍କୃତଂ ଚ ଜପଂ ହୋମଂ ଗଦିତଂ ପରମେଶ୍ଵରୀ ।
ଦୁଷ୍ଟାନାଂ ନିଗ୍ରହାର୍ଥାୟ ତଦ୍ଗୃହାଣ ନମୋଽସ୍ତୁ ତେ ॥ 14 ॥
ପୀତାଂବରାଂ ତାଂ ଦ୍ଵିଭୁଜାଂ ତ୍ରିନେତ୍ରାଂ ଗାତ୍ରଗୋଜ୍ଜ୍ଵଲାମ୍ ।
ଶିଲାମୁଦ୍ଗରହସ୍ତାଂ ଚ ସ୍ମରେତ୍ତାଂ ବଗଳାମୁଖୀମ୍ ॥ 15 ॥
ବ୍ରହ୍ମାସ୍ତ୍ରମିତି ଵିଖ୍ୟାତଂ ତ୍ରିଷୁ ଲୋକେଷୁ ଵିଶ୍ରୁତମ୍ ।
ଗୁରୁଭକ୍ତାୟ ଦାତଵ୍ୟଂ ନଦେୟଂ ୟସ୍ୟ କସ୍ୟଚିତ୍ ॥ 16 ॥
ନିତ୍ୟଂ ସ୍ତୋତ୍ରମିଦଂ ପଵିତ୍ରମିହ ୟୋ ଦେଵ୍ୟାଃ ପଠତ୍ୟାଦରାତ୍
ଧୃତ୍ଵାୟଂତ୍ରମିଦଂ ତଥୈଵ ସମରେ ବାହୌ କରେ ଵା ଗଳେ ।
ରାଜାନୋଽପ୍ୟରୟୋ ମଦାଂଧକରିଣସ୍ସର୍ପା ମୃଗେଂଦ୍ରାଦିକାଃ
ତେ ଵୈ ୟାଂତି ଵିମୋହିତା ରିପୁଗଣା ଲକ୍ଷ୍ମୀଃ ସ୍ଥିରାସ୍ସିଦ୍ଧୟଃ ॥ 17 ॥
ଇତି ଶ୍ରୀ ରୁଦ୍ରୟାମଳେ ତଂତ୍ରେ ଶ୍ରୀ ବଗଳାମୁଖୀ ସ୍ତୋତ୍ରମ୍ ॥
