ōṃ asya śrībagaḻāmukhīstōtrasya
nāradṛṣiḥ
śrī bagaḻāmukhī dēvatā
mama sannihitānāṃ virōdhināṃ vāṅmukha-padabuddhīnāṃ stambhanārthē stōtrapāṭhē viniyōgaḥ
madhyēsudhābdhi maṇimaṇṭapa ratnavēdi
siṃhāsanōparigatāṃ paripītavarṇām ।
pītāmbarābharaṇa mālyavibhūṣitāṅgīṃ
dēvīṃ bhajāmi dhṛtamudgaravairi jihvām ॥ 1 ॥
jihvāgramādāya karēṇa dēvīṃ
vāmēna śatrūn paripīḍayantīm ।
gadābhighātēna cha dakṣiṇēna
pītāmbarāḍhyāṃ dvibhujāṃ bhajāmi ॥ 2 ॥
chalatkanakakuṇḍalōllasitachārugaṇḍasthalāṃ
lasatkanakachampaka dyutimadindubimbānanām ।
gadāhata vipakṣakāṃ kalitalōlajihvāñchalāṃ
smarāmi bagaḻāmukhīṃ vimukhavāṅmanasstambhinīm ॥ 3 ॥
pīyūṣō dadhimadhyachāru vilasa draktōtpalē maṇṭapē
satsiṃhāsana mauḻipātitaripuṃ prētāsanādhyāsinīm ।
svarṇābhāṃ karapīḍitārirasanāṃ bhrāmyadgadāṃ vibhramāṃ
itthaṃ dhyāyati yānti tasya vilayaṃ sadyōtha sarvāpadaḥ ॥ 4 ॥
dēvittvachcharaṇāmbujārchanakṛtē yaḥ pīta puṣpāñjalīn
bhaktyā vāmakarē nidhāya cha manuṃ mantrī manōjñākṣaram ।
pīṭhadhyānaparō'tha kumbhakavaśādbījaṃ smarētpārthiva-
stasyāmitramukhasya vāchi hṛdayē jāḍyaṃ bhavēttatkṣaṇāt ॥ 5 ॥
vādī mūkati kaṅkati kṣitipatirvaiśvānaraśśītiti
krōdhīśāmyati durjanassujanati kṣiprānugaḥ khañjati ।
garvī kharvati sarvavichcha jaḍati tvadyantraṇā yantritaḥ
śrīnityē bagaḻāmukhi pratidinaṃ kalyāṇi tubhyaṃ namaḥ ॥ 6 ॥
mantrastāvadayaṃ vipakṣadalanē stōtraṃ pavitraṃ cha tē
yantraṃ vādiniyantraṇaṃ trijagatāṃ jaitraṃ cha chitraṃ cha tē ।
mātaḥ śrībagaḻēti nāma lalitaṃ yasyāsti jantōrmukhē
tvannāmagrahaṇēna saṃsadi mukha stambhō bhavēdvādinām ॥ 7 ॥
duṣṭastambhanamugravighnaśamanaṃ dāridryavidrāvaṇaṃ
bhūbhṛdbhīśamanaṃ chalanmṛgadṛśāṃ chētassamākarṣaṇam ।
saubhāgyaikanikētanaṃ samadṛśaḥ kāruṇyapūrṇāmṛtaṃ
mṛtyōrmāraṇamāvirastu puratō mātastvadīyaṃ vapuḥ ॥ 8 ॥
mātarbhañjaya mē vipakṣavadanāṃ jihvāṃ cha saṅkīlaya
brāhmīṃ mudraya nāśayāśudhiṣaṇāmugrāṃ gatiṃ stambhaya ।
śatrūṃśchūrṇaya dēvi tīkṣṇagadayā gaurāṅgi pītāmbarē
vighnaughaṃ bagaḻē hara praṇamatāṃ kāruṇyapūrṇēkṣaṇē ॥ 9 ॥
mātarbhairavi bhadrakāḻi vijayē vārāhi viśvāśrayē
śrīvidyē samayē mahēśi bagaḻē kāmēśi rāmē ramē ।
mātaṅgi tripurē parātparatarē svargāpavargapradē
dāsō'haṃ śaraṇāgataḥ karuṇayā viśvēśvari trāhimām ॥ 10 ॥
saṃrambhē saurasaṅghē praharaṇasamayē bandhanēvārimadhyē
vidyāvādēvivādē pratikṛtinṛpatau divyakālē niśāyām ।
vaśyē vā stambhanē vā ripuvadhasamayē nirjanē vā vanē vā
gachChaṃstiṣṭhaṃstrikālaṃ yadi paṭhati śivaṃ prāpnuyādāśu dhīraḥ ॥ 11 ॥
tvaṃ vidyā paramā trilōkajananī vighnaughasañChēdinī
yōṣākarṣaṇakāriṇī trijagatāmānandasaṃvardhinī ।
dusphōṭōchchāṭanakāriṇī janamanassammōhasandāyinī
jihvākīlanabhairavī vijayatē brahmāstramantrō yathā ॥ 12 ॥
vidyālakṣmīssarvasaubhāgyamāyuḥ
putraiḥ pautraiḥ sarvasāmrājyasiddhiḥ ।
mānō bhōgō vaśyamārōgyasaukhyaṃ
prāptaṃ tattadbhūtalē'sminnarēṇa ॥ 13 ॥
yatkṛtaṃ cha japaṃ hōmaṃ gaditaṃ paramēśvarī ।
duṣṭānāṃ nigrahārthāya tadgṛhāṇa namō'stu tē ॥ 14 ॥
pītāmbarāṃ tāṃ dvibhujāṃ trinētrāṃ gātragōjjvalām ।
śilāmudgarahastāṃ cha smarēttāṃ bagaḻāmukhīm ॥ 15 ॥
brahmāstramiti vikhyātaṃ triṣu lōkēṣu viśrutam ।
gurubhaktāya dātavyaṃ nadēyaṃ yasya kasyachit ॥ 16 ॥
nityaṃ stōtramidaṃ pavitramiha yō dēvyāḥ paṭhatyādarāt
dhṛtvāyantramidaṃ tathaiva samarē bāhau karē vā gaḻē ।
rājānō'pyarayō madāndhakariṇassarpā mṛgēndrādikāḥ
tē vai yānti vimōhitā ripugaṇā lakṣmīḥ sthirāssiddhayaḥ ॥ 17 ॥
iti śrī rudrayāmaḻē tantrē śrī bagaḻāmukhī stōtram ॥
