ઓં અસ્ય શ્રીબગળામુખીસ્તોત્રસ્ય
નારદૃષિઃ
શ્રી બગળામુખી દેવતા
મમ સન્નિહિતાનાં વિરોધિનાં વાઙ્મુખ-પદબુદ્ધીનાં સ્તંભનાર્થે સ્તોત્રપાઠે વિનિયોગઃ
મધ્યેસુધાબ્ધિ મણિમંટપ રત્નવેદિ
સિંહાસનોપરિગતાં પરિપીતવર્ણામ્ ।
પીતાંબરાભરણ માલ્યવિભૂષિતાંગીં
દેવીં ભજામિ ધૃતમુદ્ગરવૈરિ જિહ્વામ્ ॥ 1 ॥
જિહ્વાગ્રમાદાય કરેણ દેવીં
વામેન શત્રૂન્ પરિપીડયંતીમ્ ।
ગદાભિઘાતેન ચ દક્ષિણેન
પીતાંબરાઢ્યાં દ્વિભુજાં ભજામિ ॥ 2 ॥
ચલત્કનકકુંડલોલ્લસિતચારુગંડસ્થલાં
લસત્કનકચંપક દ્યુતિમદિંદુબિંબાનનામ્ ।
ગદાહત વિપક્ષકાં કલિતલોલજિહ્વાંચલાં
સ્મરામિ બગળામુખીં વિમુખવાઙ્મનસ્સ્તંભિનીમ્ ॥ 3 ॥
પીયૂષો દધિમધ્યચારુ વિલસ દ્રક્તોત્પલે મંટપે
સત્સિંહાસન મૌળિપાતિતરિપું પ્રેતાસનાધ્યાસિનીમ્ ।
સ્વર્ણાભાં કરપીડિતારિરસનાં ભ્રામ્યદ્ગદાં વિભ્રમાં
ઇત્થં ધ્યાયતિ યાંતિ તસ્ય વિલયં સદ્યોથ સર્વાપદઃ ॥ 4 ॥
દેવિત્ત્વચ્ચરણાંબુજાર્ચનકૃતે યઃ પીત પુષ્પાંજલીન્
ભક્ત્યા વામકરે નિધાય ચ મનું મંત્રી મનોજ્ઞાક્ષરમ્ ।
પીઠધ્યાનપરોઽથ કુંભકવશાદ્બીજં સ્મરેત્પાર્થિવ-
સ્તસ્યામિત્રમુખસ્ય વાચિ હૃદયે જાડ્યં ભવેત્તત્ક્ષણાત્ ॥ 5 ॥
વાદી મૂકતિ કંકતિ ક્ષિતિપતિર્વૈશ્વાનરશ્શીતિતિ
ક્રોધીશામ્યતિ દુર્જનસ્સુજનતિ ક્ષિપ્રાનુગઃ ખંજતિ ।
ગર્વી ખર્વતિ સર્વવિચ્ચ જડતિ ત્વદ્યંત્રણા યંત્રિતઃ
શ્રીનિત્યે બગળામુખિ પ્રતિદિનં કલ્યાણિ તુભ્યં નમઃ ॥ 6 ॥
મંત્રસ્તાવદયં વિપક્ષદલને સ્તોત્રં પવિત્રં ચ તે
યંત્રં વાદિનિયંત્રણં ત્રિજગતાં જૈત્રં ચ ચિત્રં ચ તે ।
માતઃ શ્રીબગળેતિ નામ લલિતં યસ્યાસ્તિ જંતોર્મુખે
ત્વન્નામગ્રહણેન સંસદિ મુખ સ્તંભો ભવેદ્વાદિનામ્ ॥ 7 ॥
દુષ્ટસ્તંભનમુગ્રવિઘ્નશમનં દારિદ્ર્યવિદ્રાવણં
ભૂભૃદ્ભીશમનં ચલન્મૃગદૃશાં ચેતસ્સમાકર્ષણમ્ ।
સૌભાગ્યૈકનિકેતનં સમદૃશઃ કારુણ્યપૂર્ણામૃતં
મૃત્યોર્મારણમાવિરસ્તુ પુરતો માતસ્ત્વદીયં વપુઃ ॥ 8 ॥
માતર્ભંજય મે વિપક્ષવદનાં જિહ્વાં ચ સંકીલય
બ્રાહ્મીં મુદ્રય નાશયાશુધિષણામુગ્રાં ગતિં સ્તંભય ।
શત્રૂંશ્ચૂર્ણય દેવિ તીક્ષ્ણગદયા ગૌરાંગિ પીતાંબરે
વિઘ્નૌઘં બગળે હર પ્રણમતાં કારુણ્યપૂર્ણેક્ષણે ॥ 9 ॥
માતર્ભૈરવિ ભદ્રકાળિ વિજયે વારાહિ વિશ્વાશ્રયે
શ્રીવિદ્યે સમયે મહેશિ બગળે કામેશિ રામે રમે ।
માતંગિ ત્રિપુરે પરાત્પરતરે સ્વર્ગાપવર્ગપ્રદે
દાસોઽહં શરણાગતઃ કરુણયા વિશ્વેશ્વરિ ત્રાહિમામ્ ॥ 10 ॥
સંરંભે સૌરસંઘે પ્રહરણસમયે બંધનેવારિમધ્યે
વિદ્યાવાદેવિવાદે પ્રતિકૃતિનૃપતૌ દિવ્યકાલે નિશાયામ્ ।
વશ્યે વા સ્તંભને વા રિપુવધસમયે નિર્જને વા વને વા
ગચ્છંસ્તિષ્ઠંસ્ત્રિકાલં યદિ પઠતિ શિવં પ્રાપ્નુયાદાશુ ધીરઃ ॥ 11 ॥
ત્વં વિદ્યા પરમા ત્રિલોકજનની વિઘ્નૌઘસંછેદિની
યોષાકર્ષણકારિણી ત્રિજગતામાનંદસંવર્ધિની ।
દુસ્ફોટોચ્ચાટનકારિણી જનમનસ્સંમોહસંદાયિની
જિહ્વાકીલનભૈરવી વિજયતે બ્રહ્માસ્ત્રમંત્રો યથા ॥ 12 ॥
વિદ્યાલક્ષ્મીસ્સર્વસૌભાગ્યમાયુઃ
પુત્રૈઃ પૌત્રૈઃ સર્વસામ્રાજ્યસિદ્ધિઃ ।
માનો ભોગો વશ્યમારોગ્યસૌખ્યં
પ્રાપ્તં તત્તદ્ભૂતલેઽસ્મિન્નરેણ ॥ 13 ॥
યત્કૃતં ચ જપં હોમં ગદિતં પરમેશ્વરી ।
દુષ્ટાનાં નિગ્રહાર્થાય તદ્ગૃહાણ નમોઽસ્તુ તે ॥ 14 ॥
પીતાંબરાં તાં દ્વિભુજાં ત્રિનેત્રાં ગાત્રગોજ્જ્વલામ્ ।
શિલામુદ્ગરહસ્તાં ચ સ્મરેત્તાં બગળામુખીમ્ ॥ 15 ॥
બ્રહ્માસ્ત્રમિતિ વિખ્યાતં ત્રિષુ લોકેષુ વિશ્રુતમ્ ।
ગુરુભક્તાય દાતવ્યં નદેયં યસ્ય કસ્યચિત્ ॥ 16 ॥
નિત્યં સ્તોત્રમિદં પવિત્રમિહ યો દેવ્યાઃ પઠત્યાદરાત્
ધૃત્વાયંત્રમિદં તથૈવ સમરે બાહૌ કરે વા ગળે ।
રાજાનોઽપ્યરયો મદાંધકરિણસ્સર્પા મૃગેંદ્રાદિકાઃ
તે વૈ યાંતિ વિમોહિતા રિપુગણા લક્ષ્મીઃ સ્થિરાસ્સિદ્ધયઃ ॥ 17 ॥
ઇતિ શ્રી રુદ્રયામળે તંત્રે શ્રી બગળામુખી સ્તોત્રમ્ ॥
