𑌶𑍍𑌰𑍀𑌭𑍈𑌰𑌵 𑌉𑌵𑌾𑌚 ।
𑌦𑍇𑌵𑍇𑌶𑌿 𑌦𑍇𑌹𑌰𑌕𑍍𑌷𑌾𑌰𑍍𑌥𑌂 𑌕𑌾𑌰𑌣𑌂 𑌕𑌥𑍍𑌯𑌤𑌾𑌂 𑌧𑍍𑌰𑍁𑌵𑌮𑍍 ।
𑌮𑍍𑌰𑌿𑌯𑌂𑌤𑍇 𑌸𑌾𑌧𑌕𑌾 𑌯𑍇𑌨 𑌵𑌿𑌨𑌾 𑌶𑍍𑌮𑌶𑌾𑌨𑌭𑍂𑌮𑌿𑌷𑍁 ॥
𑌰𑌣𑍇𑌷𑍁 𑌚𑌾𑌤𑌿𑌘𑍋𑌰𑍇𑌷𑍁 𑌮𑌹𑌾𑌵𑌾𑌯𑍁𑌜𑌲𑍇𑌷𑍁 𑌚 ।
𑌶𑍃𑌂𑌗𑌿𑌮𑌕𑌰𑌵𑌜𑍍𑌰𑍇𑌷𑍁 𑌜𑍍𑌵𑌰𑌾𑌦𑌿𑌵𑍍𑌯𑌾𑌧𑌿𑌵𑌹𑍍𑌨𑌿𑌷𑍁 ॥
𑌶𑍍𑌰𑍀𑌦𑍇𑌵𑍍𑌯𑍁𑌵𑌾𑌚 ।
𑌕𑌥𑌯𑌾𑌮𑌿 𑌶𑍃𑌣𑍁 𑌪𑍍𑌰𑌾𑌜𑍍𑌞 𑌬𑌟𑍋𑌸𑍍𑌤𑍁 𑌕𑌵𑌚𑌂 𑌶𑍁𑌭𑌮𑍍 ।
𑌗𑍋𑌪𑌨𑍀𑌯𑌂 𑌪𑍍𑌰𑌯𑌤𑍍𑌨𑍇𑌨 𑌮𑌾𑌤𑍃𑌜𑌾𑌰𑍋𑌪𑌮𑌂 𑌯𑌥𑌾 ॥
𑌤𑌸𑍍𑌯 𑌧𑍍𑌯𑌾𑌨𑌂 𑌤𑍍𑌰𑌿𑌧𑌾 𑌪𑍍𑌰𑍋𑌕𑍍𑌤𑌂 𑌸𑌾𑌤𑍍𑌤𑍍𑌵𑌿𑌕𑌾𑌦𑌿𑌪𑍍𑌰𑌭𑍇𑌦𑌤𑌃 ।
𑌸𑌾𑌤𑍍𑌤𑍍𑌵𑌿𑌕𑌂 𑌰𑌾𑌜𑌸𑌂 𑌚𑍈𑌵 𑌤𑌾𑌮𑌸𑌂 𑌦𑍇𑌵 𑌤𑌤𑍍 𑌶𑍃𑌣𑍁 ॥
𑌧𑍍𑌯𑌾𑌨𑌮𑍍 –
𑌵𑌂𑌦𑍇 𑌬𑌾𑌲𑌂 𑌸𑍍𑌫𑌟𑌿𑌕𑌸𑌦𑍃𑌶𑌂 𑌕𑍁𑌂𑌡𑌲𑍋𑌦𑍍𑌭𑌾𑌸𑌿𑌵𑌕𑍍𑌤𑍍𑌰𑌂
𑌦𑌿𑌵𑍍𑌯𑌾𑌕𑌲𑍍𑌪𑍈𑌰𑍍𑌨𑌵𑌮𑌣𑌿𑌮𑌯𑍈𑌃 𑌕𑌿𑌂𑌕𑌿𑌣𑍀𑌨𑍂𑌪𑍁𑌰𑌾𑌦𑍍𑌯𑍈𑌃 ।
𑌦𑍀𑌪𑍍𑌤𑌾𑌕𑌾𑌰𑌂 𑌵𑌿𑌶𑌦𑌵𑌦𑌨𑌂 𑌸𑍁𑌪𑍍𑌰𑌸𑌨𑍍𑌨𑌂 𑌤𑍍𑌰𑌿𑌨𑍇𑌤𑍍𑌰𑌂
𑌹𑌸𑍍𑌤𑌾𑌬𑍍𑌜𑌾𑌭𑍍𑌯𑌾𑌂 𑌬𑌟𑍁𑌕𑌮𑌨𑌿𑌶𑌂 𑌶𑍂𑌲𑌖𑌡𑍍𑌗𑍌𑌦𑌧𑌾𑌨𑌮𑍍 ॥ 1 ॥
𑌉𑌦𑍍𑌯𑌦𑍍𑌭𑌾𑌸𑍍𑌕𑌰𑌸𑌨𑍍𑌨𑌿𑌭𑌂 𑌤𑍍𑌰𑌿𑌨𑌯𑌨𑌂 𑌰𑌕𑍍𑌤𑌾𑌂𑌗𑌰𑌾𑌗𑌸𑍍𑌰𑌜𑌂
𑌸𑍍𑌮𑍇𑌰𑌾𑌸𑍍𑌯𑌂 𑌵𑌰𑌦𑌂 𑌕𑌪𑌾𑌲𑌮𑌭𑌯𑌂 𑌶𑍂𑌲𑌂 𑌦𑌧𑌾𑌨𑌂 𑌕𑌰𑍈𑌃 ।
𑌨𑍀𑌲𑌗𑍍𑌰𑍀𑌵𑌮𑍁𑌦𑌾𑌰𑌭𑍂𑌷𑌣𑌶𑌤𑌂 𑌶𑍀𑌤𑌾𑌂𑌶𑍁𑌚𑍂𑌡𑍋𑌜𑍍𑌜𑍍𑌵𑌲𑌂
𑌬𑌂𑌧𑍂𑌕𑌾𑌰𑍁𑌣𑌵𑌾𑌸𑌸𑌂 𑌭𑌯𑌹𑌰𑌂 𑌦𑍇𑌵𑌂 𑌸𑌦𑌾 𑌭𑌾𑌵𑌯𑍇 ॥ 2 ॥
𑌧𑍍𑌯𑌾𑌯𑍇𑌨𑍍𑌨𑍀𑌲𑌾𑌦𑍍𑌰𑌿𑌕𑌾𑌂𑌤𑌂 𑌶𑌶𑌿𑌶𑌕𑌲𑌧𑌰𑌂 𑌮𑍁𑌂𑌡𑌮𑌾𑌲𑌂 𑌮𑌹𑍇𑌶𑌂
𑌦𑌿𑌗𑍍𑌵𑌸𑍍𑌤𑍍𑌰𑌂 𑌪𑌿𑌂𑌗𑌕𑍇𑌶𑌂 𑌡𑌮𑌰𑍁𑌮𑌥 𑌸𑍃𑌣𑌿𑌂 𑌖𑌡𑍍𑌗𑌶𑍂𑌲𑌾𑌭𑌯𑌾𑌨𑌿 ।
𑌨𑌾𑌗𑌂 𑌘𑌂𑌟𑌾𑌂 𑌕𑌪𑌾𑌲𑌂 𑌕𑌰𑌸𑌰𑌸𑌿𑌰𑍁𑌹𑍈𑌰𑍍𑌵𑌿𑌭𑍍𑌰𑌤𑌂 𑌭𑍀𑌮𑌦𑌂𑌷𑍍𑌟𑍍𑌰𑌂
𑌸𑌰𑍍𑌪𑌾𑌕𑌲𑍍𑌪𑌂 𑌤𑍍𑌰𑌿𑌨𑍇𑌤𑍍𑌰𑌂 𑌮𑌣𑌿𑌮𑌯𑌵𑌿𑌲𑌸𑌤𑍍𑌕𑌿𑌂𑌕𑌿𑌣𑍀 𑌨𑍂𑌪𑍁𑌰𑌾𑌢𑍍𑌯𑌮𑍍 ॥ 3 ॥
𑌅𑌸𑍍𑌯 𑌵𑌟𑍁𑌕𑌭𑍈𑌰𑌵𑌕𑌵𑌚𑌸𑍍𑌯 𑌮𑌹𑌾𑌕𑌾𑌲 𑌋𑌷𑌿𑌰𑌨𑍁𑌷𑍍𑌟𑍁𑌪𑍍𑌛𑌂𑌦𑌃 𑌶𑍍𑌰𑍀𑌵𑌟𑍁𑌕𑌭𑍈𑌰𑌵𑍋 𑌦𑍇𑌵𑌤𑌾 𑌬𑌂 𑌬𑍀𑌜𑌂 𑌹𑍍𑌰𑍀𑌂 𑌶𑌕𑍍𑌤𑌿𑌰𑌾𑌪𑌦𑍁𑌦𑍍𑌧𑌾𑌰𑌣𑌾𑌯𑍇𑌤𑌿 𑌕𑍀𑌲𑌕𑌂 𑌮𑌮 𑌸𑌰𑍍𑌵𑌾𑌭𑍀𑌷𑍍𑌟𑌸𑌿𑌦𑍍𑌧𑍍𑌯𑌰𑍍𑌥𑍇 𑌵𑌿𑌨𑌿𑌯𑍋𑌗𑌃 ।
𑌕𑌵𑌚𑌮𑍍 –
𑌓𑌂 𑌶𑌿𑌰𑍋 𑌮𑍇 𑌭𑍈𑌰𑌵𑌃 𑌪𑌾𑌤𑍁 𑌲𑌲𑌾𑌟𑌂 𑌭𑍀𑌷𑌣𑌸𑍍𑌤𑌥𑌾 ।
𑌨𑍇𑌤𑍍𑌰𑍇 𑌚 𑌭𑍂𑌤𑌹𑌨𑌨𑌃 𑌸𑌾𑌰𑌮𑍇𑌯𑌾𑌨𑍁𑌗𑍋 𑌭𑍍𑌰𑍁𑌵𑍌 ॥ 1
𑌭𑍂𑌤𑌨𑌾𑌥𑌶𑍍𑌚 𑌮𑍇 𑌕𑌰𑍍𑌣𑍌 𑌕𑌪𑍋𑌲𑍌 𑌪𑍍𑌰𑍇𑌤𑌵𑌾𑌹𑌨𑌃 ।
𑌨𑌾𑌸𑌾𑌪𑍁𑌟𑍌 𑌤𑌥𑍋𑌷𑍍𑌠𑍌 𑌚 𑌭𑌸𑍍𑌮𑌾𑌂𑌗𑌃 𑌸𑌰𑍍𑌵𑌭𑍂𑌷𑌣𑌃 ॥ 2
𑌭𑍀𑌷𑌣𑌾𑌸𑍍𑌯𑍋 𑌮𑌮𑌾𑌸𑍍𑌯𑌂 𑌚 𑌶𑌕𑍍𑌤𑌿𑌹𑌸𑍍𑌤𑍋 𑌗𑌲𑌂 𑌮𑌮 ।
𑌸𑍍𑌕𑌂𑌧𑍌 𑌦𑍈𑌤𑍍𑌯𑌰𑌿𑌪𑍁𑌃 𑌪𑌾𑌤𑍁 𑌬𑌾𑌹𑍂 𑌅𑌤𑍁𑌲𑌵𑌿𑌕𑍍𑌰𑌮𑌃 ॥ 3
𑌪𑌾𑌣𑍀 𑌕𑌪𑌾𑌲𑍀 𑌮𑍇 𑌪𑌾𑌤𑍁 𑌮𑍁𑌂𑌡𑌮𑌾𑌲𑌾𑌧𑌰𑍋 𑌹𑍃𑌦𑌮𑍍 ।
𑌵𑌕𑍍𑌷𑌃𑌸𑍍𑌥𑌲𑌂 𑌤𑌥𑌾 𑌶𑌾𑌂𑌤𑌃 𑌕𑌾𑌮𑌚𑌾𑌰𑍀 𑌸𑍍𑌤𑌨𑌂 𑌮𑌮 ॥ 4
𑌉𑌦𑌰𑌂 𑌚 𑌸 𑌮𑍇 𑌤𑍁𑌷𑍍𑌟𑌃 𑌕𑍍𑌷𑍇𑌤𑍍𑌰𑍇𑌶𑌃 𑌪𑌾𑌰𑍍𑌶𑍍𑌵𑌤𑌸𑍍𑌤𑌥𑌾 ।
𑌕𑍍𑌷𑍇𑌤𑍍𑌰𑌪𑌾𑌲𑌃 𑌪𑍃𑌷𑍍𑌠𑌦𑍇𑌶𑌂 𑌕𑍍𑌷𑍇𑌤𑍍𑌰𑌾𑌖𑍍𑌯𑍋 𑌨𑌾𑌭𑌿𑌤𑌸𑍍𑌤𑌥𑌾 ॥ 5
𑌕𑌟𑌿𑌂 𑌪𑌾𑌪𑍌𑌘𑌨𑌾𑌶𑌶𑍍𑌚 𑌬𑌟𑍁𑌕𑍋 𑌲𑌿𑌂𑌗𑌦𑍇𑌶𑌕𑌮𑍍 ।
𑌗𑍁𑌦𑌂 𑌰𑌕𑍍𑌷𑌾𑌕𑌰𑌃 𑌪𑌾𑌤𑍁 𑌊𑌰𑍂 𑌰𑌕𑍍𑌷𑌾𑌕𑌰𑌃 𑌸𑌦𑌾 ॥ 6
𑌜𑌾𑌨𑍂 𑌚 𑌘𑍁𑌰𑍍𑌘𑍁𑌰𑌾𑌰𑌾𑌵𑍋 𑌜𑌂𑌘𑍇 𑌰𑌕𑍍𑌷𑌤𑍁 𑌰𑌕𑍍𑌤𑌪𑌃 ।
𑌗𑍁𑌲𑍍𑌫𑍌 𑌚 𑌪𑌾𑌦𑍁𑌕𑌾𑌸𑌿𑌦𑍍𑌧𑌃 𑌪𑌾𑌦𑌪𑍃𑌷𑍍𑌠𑌂 𑌸𑍁𑌰𑍇𑌶𑍍𑌵𑌰𑌃 ॥
𑌆𑌪𑌾𑌦𑌮𑌸𑍍𑌤𑌕𑌂 𑌚𑍈𑌵 𑌆𑌪𑌦𑍁𑌦𑍍𑌧𑌾𑌰𑌣𑌸𑍍𑌤𑌥𑌾 ।
𑌸𑌹𑌸𑍍𑌰𑌾𑌰𑍇 𑌮𑌹𑌾𑌪𑌦𑍍𑌮𑍇 𑌕𑌰𑍍𑌪𑍂𑌰𑌧𑌵𑌲𑍋 𑌗𑍁𑌰𑍁𑌃 ॥
𑌪𑌾𑌤𑍁 𑌮𑌾𑌂 𑌵𑌟𑍁𑌕𑍋 𑌦𑍇𑌵𑍋 𑌭𑍈𑌰𑌵𑌃 𑌸𑌰𑍍𑌵𑌕𑌰𑍍𑌮𑌸𑍁 ।
𑌪𑍂𑌰𑍍𑌵 𑌸𑍍𑌯𑌾𑌮𑌸𑌿𑌤𑌾𑌂𑌗𑍋 𑌮𑍇 𑌦𑌿𑌶𑌿 𑌰𑌕𑍍𑌷𑌤𑍁 𑌸𑌰𑍍𑌵𑌦𑌾 ॥
𑌆𑌗𑍍𑌨𑍇𑌯𑍍𑌯𑌾𑌂 𑌚 𑌰𑍁𑌰𑍁𑌃 𑌪𑌾𑌤𑍁 𑌦𑌕𑍍𑌷𑌿𑌣𑍇 𑌚𑌂𑌡𑌭𑍈𑌰𑌵𑌃 ।
𑌨𑍈𑌰𑍃𑌤𑍍𑌯𑌾𑌂 𑌕𑍍𑌰𑍋𑌧𑌨𑌃 𑌪𑌾𑌤𑍁 𑌮𑌾𑌮𑍁𑌨𑍍𑌮𑌤𑍍𑌤𑌸𑍍𑌤𑍁 𑌪𑌶𑍍𑌚𑌿𑌮𑍇 ॥ 10
𑌵𑌾𑌯𑌵𑍍𑌯𑌾𑌂 𑌮𑍇 𑌕𑌪𑌾𑌲𑍀 𑌚 𑌨𑌿𑌤𑍍𑌯𑌂 𑌪𑌾𑌯𑌾𑌤𑍍 𑌸𑍁𑌰𑍇𑌶𑍍𑌵𑌰𑌃 ।
𑌭𑍀𑌷𑌣𑍋 𑌭𑍈𑌰𑌵𑌃 𑌪𑌾𑌤𑍂𑌤𑍍𑌤𑌰𑌸𑍍𑌯𑌾𑌂 𑌦𑌿𑌶𑌿 𑌸𑌰𑍍𑌵𑌦𑌾 ॥ 11
𑌸𑌂𑌹𑌾𑌰𑌭𑍈𑌰𑌵𑌃 𑌪𑌾𑌤𑍁 𑌦𑌿𑌶𑍍𑌯𑍈𑌶𑌾𑌨𑍍𑌯𑌾𑌂 𑌮𑌹𑍇𑌶𑍍𑌵𑌰𑌃 ।
𑌊𑌰𑍍𑌧𑍍𑌵𑍇 𑌪𑌾𑌤𑍁 𑌵𑌿𑌧𑌾𑌤𑌾 𑌵𑍈 𑌪𑌾𑌤𑌾𑌲𑍇 𑌨𑌂𑌦𑌿𑌕𑍋 𑌵𑌿𑌭𑍁𑌃 ॥ 12
𑌸𑌦𑍍𑌯𑍋𑌜𑌾𑌤𑌸𑍍𑌤𑍁 𑌮𑌾𑌂 𑌪𑌾𑌯𑌾𑌤𑍍 𑌸𑌰𑍍𑌵𑌤𑍋 𑌦𑍇𑌵𑌸𑍇𑌵𑌿𑌤𑌃 ।
𑌵𑌾𑌮𑌦𑍇𑌵𑍋𑌽𑌵𑌤𑍁 𑌪𑍍𑌰𑍀𑌤𑍋 𑌰𑌣𑍇 𑌘𑍋𑌰𑍇 𑌤𑌥𑌾𑌵𑌤𑍁 ॥ 13
𑌜𑌲𑍇 𑌤𑌤𑍍𑌪𑍁𑌰𑍁𑌷𑌃 𑌪𑌾𑌤𑍁 𑌸𑍍𑌥𑌲𑍇 𑌪𑌾𑌤𑍁 𑌗𑍁𑌰𑍁𑌃 𑌸𑌦𑌾 ।
𑌡𑌾𑌕𑌿𑌨𑍀𑌪𑍁𑌤𑍍𑌰𑌕𑌃 𑌪𑌾𑌤𑍁 𑌦𑌾𑌰𑌾𑌂𑌸𑍍𑌤𑍁 𑌲𑌾𑌕𑌿𑌨𑍀𑌸𑍁𑌤𑌃 ॥ 14
𑌪𑌾𑌤𑍁 𑌸𑌾𑌕𑌲𑌕𑍋 𑌭𑍍𑌰𑌾𑌤𑍄𑌨𑍍 𑌶𑍍𑌰𑌿𑌯𑌂 𑌮𑍇 𑌸𑌤𑌤𑌂 𑌗𑌿𑌰𑌃 ।
𑌲𑌾𑌕𑌿𑌨𑍀𑌪𑍁𑌤𑍍𑌰𑌕𑌃 𑌪𑌾𑌤𑍁 𑌪𑌶𑍂𑌨𑌶𑍍𑌵𑌾𑌨𑌜𑌾𑌂𑌸𑍍𑌤𑌥𑌾 ॥ 15
𑌮𑌹𑌾𑌕𑌾𑌲𑍋𑌽𑌵𑌤𑍁 𑌚𑍍𑌛𑌤𑍍𑌰𑌂 𑌸𑍈𑌨𑍍𑌯𑌂 𑌵𑍈 𑌕𑌾𑌲𑌭𑍈𑌰𑌵𑌃 ।
𑌰𑌾𑌜𑍍𑌯𑌂 𑌰𑌾𑌜𑍍𑌯𑌶𑍍𑌰𑌿𑌯𑌂 𑌪𑌾𑌯𑌾𑌤𑍍 𑌭𑍈𑌰𑌵𑍋 𑌭𑍀𑌤𑌿𑌹𑌾𑌰𑌕𑌃 ॥ 16
𑌰𑌕𑍍𑌷𑌾𑌹𑍀𑌨𑌂𑌤𑍁 𑌯𑌤𑍍 𑌸𑍍𑌥𑌾𑌨𑌂 𑌵𑌰𑍍𑌜𑌿𑌤𑌂 𑌕𑌵𑌚𑍇𑌨 𑌚 ।
𑌤𑌤𑍍 𑌸𑌰𑍍𑌵𑌂 𑌰𑌕𑍍𑌷 𑌮𑍇 𑌦𑍇𑌵 𑌤𑍍𑌵𑌂 𑌯𑌤𑌃 𑌸𑌰𑍍𑌵𑌰𑌕𑍍𑌷𑌕𑌃 ॥ 1
𑌏𑌤𑌤𑍍 𑌕𑌵𑌚𑌮𑍀𑌶𑌾𑌨 𑌤𑌵 𑌸𑍍𑌨𑍇𑌹𑌾𑌤𑍍 𑌪𑍍𑌰𑌕𑌾𑌶𑌿𑌤𑌮𑍍 ।
𑌨𑌾𑌖𑍍𑌯𑍇𑌯𑌂 𑌨𑌰𑌲𑍋𑌕𑍇𑌷𑍁 𑌸𑌾𑌰𑌭𑍂𑌤𑌂 𑌚 𑌸𑍁𑌶𑍍𑌰𑌿𑌯𑌮𑍍 ॥ 1
𑌯𑌸𑍍𑌮𑍈 𑌕𑌸𑍍𑌮𑍈 𑌨 𑌦𑌾𑌤𑌵𑍍𑌯𑌂 𑌕𑌵𑌚𑍇𑌶𑌂 𑌸𑍁𑌦𑍁𑌰𑍍𑌲𑌭𑌮𑍍 ।
𑌨 𑌦𑍇𑌯𑌂 𑌪𑌰𑌶𑌿𑌷𑍍𑌯𑍇𑌭𑍍𑌯𑌃 𑌕𑍃𑌪𑌣𑍇𑌭𑍍𑌯𑌶𑍍𑌚 𑌶𑌂𑌕𑌰 ॥ 1
𑌯𑍋 𑌦𑌦𑌾𑌤𑌿 𑌨𑌿𑌷𑌿𑌦𑍍𑌧𑍇𑌭𑍍𑌯𑌃 𑌸 𑌵𑍈 𑌭𑍍𑌰𑌷𑍍𑌟𑍋 𑌭𑌵𑍇𑌦𑍍𑌧𑍍𑌰𑍁𑌵𑌮𑍍 ।
𑌅𑌨𑍇𑌨 𑌕𑌵𑌚𑍇𑌶𑍇𑌨 𑌰𑌕𑍍𑌷𑌾𑌂 𑌕𑍃𑌤𑍍𑌵𑌾 𑌦𑍍𑌵𑌿𑌜𑍋𑌤𑍍𑌤𑌮𑌃 ॥ 20
𑌵𑌿𑌚𑌰𑌨𑍍 𑌯𑌤𑍍𑌰 𑌕𑍁𑌤𑍍𑌰𑌾𑌪𑌿 𑌵𑌿𑌘𑍍𑌨𑍌𑌘𑍈𑌃 𑌪𑍍𑌰𑌾𑌪𑍍𑌯𑌤𑍇 𑌨 𑌸𑌃 ।
𑌮𑌂𑌤𑍍𑌰𑍇𑌣 𑌮𑍍𑌰𑌿𑌯𑌤𑍇 𑌯𑍋𑌗𑍀 𑌕𑌵𑌚𑌂 𑌯𑌨𑍍𑌨 𑌰𑌕𑍍𑌷𑌿𑌤𑌃 ॥ 21
𑌤𑌸𑍍𑌮𑌾𑌤𑍍 𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌦𑍁𑌰𑍍𑌲𑌭𑌂 𑌪𑌾𑌪𑌚𑍇𑌤𑌸𑌾𑌮𑍍 ।
𑌭𑍂𑌰𑍍𑌜𑍇 𑌰𑌂𑌭𑌾𑌤𑍍𑌵𑌚𑍇 𑌵𑌾𑌪𑌿 𑌲𑌿𑌖𑌿𑌤𑍍𑌵𑌾 𑌵𑌿𑌧𑌿𑌵𑌤𑍍 𑌪𑍍𑌰𑌭𑍋 ॥ 22
𑌧𑌾𑌰𑌯𑍇𑌤𑍍 𑌪𑌾𑌠𑌯𑍇𑌦𑍍𑌵𑌾𑌪𑌿 𑌸𑌂𑌪𑌠𑍇𑌦𑍍𑌵𑌾𑌪𑌿 𑌨𑌿𑌤𑍍𑌯𑌶𑌃 ।
𑌸𑌂𑌪𑍍𑌰𑌾𑌪𑍍𑌨𑍋𑌤𑌿 𑌪𑍍𑌰𑌭𑌾𑌵𑌂 𑌵𑍈 𑌕𑌵𑌚𑌸𑍍𑌯𑌾𑌸𑍍𑌯 𑌵𑌰𑍍𑌣𑌿𑌤𑌮𑍍 ॥ 23
𑌨𑌮𑍋 𑌭𑍈𑌰𑌵𑌦𑍇𑌵𑌾𑌯 𑌸𑌾𑌰𑌭𑍂𑌤𑌾𑌯 𑌵𑍈 𑌨𑌮𑌃 ।
𑌨𑌮𑌸𑍍𑌤𑍍𑌰𑍈𑌲𑍋𑌕𑍍𑌯𑌨𑌾𑌥𑌾𑌯 𑌨𑌾𑌥𑌨𑌾𑌥𑌾𑌯 𑌵𑍈 𑌨𑌮𑌃 ॥ 24
𑌇𑌤𑌿 𑌵𑌿𑌶𑍍𑌵𑌸𑌾𑌰𑍋𑌦𑍍𑌧𑌾𑌰𑌤𑌂𑌤𑍍𑌰𑍇 𑌆𑌪𑌦𑍁𑌦𑍍𑌧𑌾𑌰𑌕𑌲𑍍𑌪𑍇 𑌭𑍈𑌰𑌵𑌭𑍈𑌰𑌵𑍀𑌸𑌂𑌵𑌾𑌦𑍇 𑌵𑌟𑍁𑌕𑌭𑍈𑌰𑌵𑌕𑌵𑌚𑌂 𑌸𑌮𑌾𑌪𑍍𑌤𑌮𑍍 ॥
