ఈశ్వర ఉవాచ
ఓం ధూమావతీ ధూమ్రవర్ణా ధూమ్రపానపరాయణా ।
ధూమ్రాక్షమథినీ ధన్యా ధన్యస్థాననివాసినీ ॥ 1 ॥
అఘోరాచారసన్తుష్టా అఘోరాచారమణ్డితా ।
అఘోరమన్త్రసమ్ప్రీతా అఘోరమన్త్రపూజితా ॥ 2 ॥
అట్టాట్టహాసనిరతా మలినామ్బరధారిణీ ।
వృద్ధా విరూపా విధవా విద్యా చ విరళద్విజా ॥ 3 ॥
ప్రవృద్ధఘోణా కుముఖీ కుటిలా కుటిలేక్షణా ।
కరాళీ చ కరాళాస్యా కఙ్కాళీ శూర్పధారిణీ ॥ 4 ॥
కాకధ్వజరథారూఢా కేవలా కఠినా కుహూః ।
క్షుత్పిపాసార్దితా నిత్యా లలజ్జిహ్వా దిగమ్బరీ ॥ 5 ॥
దీర్ఘోదరీ దీర్ఘరవా దీర్ఘాఙ్గీ దీర్ఘమస్తకా ।
విముక్తకున్తలా కీర్త్యా కైలాసస్థానవాసినీ ॥ 6 ॥
క్రూరా కాలస్వరూపా చ కాలచక్రప్రవర్తినీ ।
వివర్ణా చఞ్చలా దుష్టా దుష్టవిధ్వంసకారిణీ ॥ 7 ॥
చణ్డీ చణ్డస్వరూపా చ చాముణ్డా చణ్డనిఃస్వనా ।
చణ్డవేగా చణ్డగతిశ్చణ్డముణ్డవినాశినీ ॥ 8 ॥
చాణ్డాలినీ చిత్రరేఖా చిత్రాఙ్గీ చిత్రరూపిణీ ।
కృష్ణా కపర్దినీ కుల్లా కృష్ణారూపా క్రియావతీ ॥ 9 ॥
కుమ్భస్తనీ మహోన్మత్తా మదిరాపానవిహ్వలా ।
చతుర్భుజా లలజ్జిహ్వా శత్రుసంహారకారిణీ ॥ 10 ॥
శవారూఢా శవగతా శ్మశానస్థానవాసినీ ।
దురారాధ్యా దురాచారా దుర్జనప్రీతిదాయినీ ॥ 11 ॥
నిర్మాంసా చ నిరాకారా ధూమహస్తా వరాన్వితా ।
కలహా చ కలిప్రీతా కలికల్మషనాశినీ ॥ 12 ॥
మహాకాలస్వరూపా చ మహాకాలప్రపూజితా ।
మహాదేవప్రియా మేధా మహాసఙ్కటనాశినీ ॥ 13 ॥
భక్తప్రియా భక్తగతిర్భక్తశత్రువినాశినీ ।
భైరవీ భువనా భీమా భారతీ భువనాత్మికా ॥ 14 ॥
భేరుణ్డా భీమనయనా త్రినేత్రా బహురూపిణీ ।
త్రిలోకేశీ త్రికాలజ్ఞా త్రిస్వరూపా త్రయీతనుః ॥ 15 ॥
త్రిమూర్తిశ్చ తథా తన్వీ త్రిశక్తిశ్చ త్రిశూలినీ ।
ఇతి ధూమామహత్ స్తోత్రం నామ్నామష్టశతాత్మకమ్ ॥ 16 ॥
మయా తే కథితం దేవి శత్రుసఙ్ఘవినాశనమ్ ।
కారాగారే రిపుగ్రస్తే మహోత్పాతే మహాభయే ॥ 17 ॥
ఇదం స్తోత్రం పఠేన్మర్త్యో ముచ్యతే సర్వసఙ్కటైః ।
గుహ్యాద్గుహ్యతరం గుహ్యం గోపనీయం ప్రయత్నతః ॥ 18 ॥
చతుష్పదార్థదం నౄణాం సర్వసమ్పత్ప్రదాయకమ్ ॥ 19 ॥
ఇతి శ్రీధూమావత్యష్టోత్తరశతనామస్తోత్రమ్ ।
