శ్రీ పార్వత్యువాచ
నామ్నాం సహస్రం పరమం ఛిన్నమస్తాప్రియం శుభమ్ ।
కథితం భవతా శమ్భోస్సద్యశ్శత్రునికృన్తనమ్ ॥ 1 ॥
పునః పృచ్ఛామ్యహం దేవ కృపాం కురు మమోపరి ।
సహస్రనామపాఠే చ అశక్తో యః పుమాన్ భవేత్ ॥ 2 ॥
తేన కిం పఠ్యతే నాథ తన్మే బ్రూహి కృపామయ ।
శ్రీ సదాశివ ఉవాచ
అష్టోత్తరశతం నామ్నాం పఠ్యతే తేన సర్వదా ॥ 3 ॥
సహస్రనామపాఠస్య ఫలం ప్రాప్నోతి నిశ్చితమ్ ।
ఓం అస్య శ్రీఛిన్నమస్తాదేవ్యష్టోత్తర శతనామ స్తోత్రమహామన్త్రస్య సదాశివ
ఋషిః అనుష్టుప్ ఛన్దః శ్రీఛిన్నమస్తా దేవతా మమ సకలసిద్ధి ప్రాప్తయే జపే వినియోగః ॥
ఓం ఛిన్నమస్తా మహావిద్యా మహాభీమా మహోదరీ ।
చణ్డేశ్వరీ చణ్డమాతా చణ్డముణ్డప్రభఞ్జినీ ॥ 4 ॥
మహాచణ్డా చణ్డరూపా చణ్డికా చణ్డఖణ్డినీ ।
క్రోధినీ క్రోధజననీ క్రోధరూపా కుహూః కళా ॥ 5 ॥
కోపాతురా కోపయుతా కోపసంహారకారిణీ ।
వజ్రవైరోచనీ వజ్రా వజ్రకల్పా చ డాకినీ ॥ 6 ॥
డాకినీకర్మనిరతా డాకినీకర్మపూజితా ।
డాకినీసఙ్గనిరతా డాకినీప్రేమపూరితా ॥ 7 ॥
ఖట్వాఙ్గధారిణీ ఖర్వా ఖడ్గఖర్పరధారిణీ ।
ప్రేతాసనా ప్రేతయుతా ప్రేతసఙ్గవిహారిణీ ॥ 8 ॥
ఛిన్నముణ్డధరా ఛిన్నచణ్డవిద్యా చ చిత్రిణీ ।
ఘోరరూపా ఘోరదృష్టిః ఘోరరావా ఘనోదరీ ॥ 9 ॥
యోగినీ యోగనిరతా జపయజ్ఞపరాయణా ।
యోనిచక్రమయీ యోనిర్యోనిచక్రప్రవర్తినీ ॥ 10 ॥
యోనిముద్రా యోనిగమ్యా యోనియన్త్రనివాసినీ ।
యన్త్రరూపా యన్త్రమయీ యన్త్రేశీ యన్త్రపూజితా ॥ 11 ॥
కీర్త్యా కపర్దినీ కాళీ కఙ్కాళీ కలకారిణీ ।
ఆరక్తా రక్తనయనా రక్తపానపరాయణా ॥ 12 ॥
భవానీ భూతిదా భూతిర్భూతిధాత్రీ చ భైరవీ ।
భైరవాచారనిరతా భూతభైరవసేవితా ॥ 13 ॥
భీమా భీమేశ్వరీ దేవీ భీమనాదపరాయణా ।
భవారాధ్యా భవనుతా భవసాగరతారిణీ ॥ 14 ॥
భద్రకాళీ భద్రతనుర్భద్రరూపా చ భద్రికా ।
భద్రరూపా మహాభద్రా సుభద్రా భద్రపాలినీ ॥ 15 ॥
సుభవ్యా భవ్యవదనా సుముఖీ సిద్ధసేవితా ।
సిద్ధిదా సిద్ధినివహా సిద్ధా సిద్ధనిషేవితా ॥ 16 ॥
శుభదా శుభగా శుద్ధా శుద్ధసత్త్వా శుభావహా ।
శ్రేష్ఠా దృష్టిమయీ దేవీ దృష్టిసంహారకారిణీ ॥ 17 ॥
శర్వాణీ సర్వగా సర్వా సర్వమఙ్గళకారిణీ ।
శివా శాన్తా శాన్తిరూపా మృడానీ మదానతురా ॥ 18 ॥
ఇతి తే కథితం దేవీ స్తోత్రం పరమదుర్లభమ్ ।
గుహ్యాద్గుహ్యతరం గోప్యం గోపనియం ప్రయత్నతః ॥ 19 ॥
కిమత్ర బహునోక్తేన త్వదగ్రే ప్రాణవల్లభే ।
మారణం మోహనం దేవి హ్యుచ్చాటనమతః పరమ్ ॥ 20 ॥
స్తమ్భనాదికకర్మాణి ఋద్ధయస్సిద్ధయోఽపి చ ।
త్రికాలపఠనాదస్య సర్వే సిద్ధ్యన్త్యసంశయః ॥ 21 ॥
మహోత్తమం స్తోత్రమిదం వరాననే
మయేరితం నిత్యమనన్యబుద్ధయః ।
పఠన్తి యే భక్తియుతా నరోత్తమా
భవేన్న తేషాం రిపుభిః పరాజయః ॥ 22 ॥
ఇతి శ్రీఛిన్నమస్తాదేవ్యష్టోత్తరశతనామ స్తోత్రమ్ ॥
