నారద ఉవాచ
భగవన్ దేవదేవేశ సృష్టిస్థితిలయేశ్వర ।
శతమష్టోత్తరం నామ్నాం బగళాయా వదాధునా ॥ 1 ॥
శ్రీ భగవానువాచ
శృణు వత్స ప్రవక్ష్యామి నామ్నామష్టోత్తరం శతమ్ ।
పీతామ్బర్యా మహాదేవ్యాః స్తోత్రం పాపప్రణాశనమ్ ॥ 2 ॥
యస్య ప్రపఠనాత్సద్యో వాదీ మూకోభవేత్ క్షణాత్ ।
రిపవస్స్తమ్భనం యాన్తి సత్యం సత్యం వదామ్యహమ్ ॥ 3 ॥
ఓం అస్య శ్రీపీతామ్బర్యష్టోత్తరశతనామస్తోత్రస్య సదాశివ ఋషిః అనుష్టుప్ఛన్దః శ్రీపీతామ్బరీ దేవతా శ్రీపీతామ్బరీ ప్రీతయే జపే వినియోగః ।
ఓం బగళా విష్ణువనితా విష్ణుశఙ్కరభామినీ ।
బహుళా దేవమాతా చ మహావిష్ణుప్రసూరపి ॥ 4 ॥
మహామత్స్యా మహాకూర్మా మహావారాహరూపిణీ ।
నారసింహప్రియా రమ్యా వామనా పటురూపిణీ ॥ 5 ॥
జామదగ్న్యస్వరూపా చ రామా రామప్రపూజితా ।
కృష్ణా కపర్దినీ కృత్యా కలహా చ వికారిణీ ॥ 6 ॥
బుద్ధిరూపా బుద్ధభార్యా బౌద్ధపాషణ్డఖణ్డినీ ।
కల్కిరూపా కలిహరా కలిదుర్గతినాశినీ ॥ 7 ॥
కోటిసూర్యప్రతీకాశా కోటికన్దర్పమోహినీ ।
కేవలా కఠినా కాళీ కలా కైవల్యదాయినీ ॥ 8 ॥
కేశవీ కేశవారాధ్యా కిశోరీ కేశవస్తుతా ।
రుద్రరూపా రుద్రమూర్తీ రుద్రాణీ రుద్రదేవతా ॥ 9 ॥
నక్షత్రరూపా నక్షత్రా నక్షత్రేశప్రపూజితా ।
నక్షత్రేశప్రియా నిత్యా నక్షత్రపతివన్దితా ॥ 10 ॥
నాగినీ నాగజననీ నాగరాజప్రవన్దితా ।
నాగేశ్వరీ నాగకన్యా నాగరీ చ నగాత్మజా ॥ 11 ॥
నగాధిరాజతనయా నగరాజప్రపూజితా ।
నవీనా నీరదా పీతా శ్యామా సౌన్దర్యకారిణీ ॥ 12 ॥
రక్తా నీలా ఘనా శుభ్రా శ్వేతా సౌభాగ్యదాయినీ ।
సున్దరీ సౌభగా సౌమ్యా స్వర్ణాభా స్వర్గతిప్రదా ॥ 13 ॥
రిపుత్రాసకరీ రేఖా శత్రుసంహారకారిణీ ।
భామినీ చ తథా మాయా స్తమ్భినీ మోహినీ శుభా ॥ 14 ॥
రాగద్వేషకరీ రాత్రీ రౌరవధ్వంసకారిణీ ।
యక్షిణీ సిద్ధనివహా సిద్ధేశా సిద్ధిరూపిణీ ॥ 15 ॥
లఙ్కాపతిధ్వంసకరీ లఙ్కేశరిపువన్దితా ।
లఙ్కానాథకులహరా మహారావణహారిణీ ॥ 16 ॥
దేవదానవసిద్ధౌఘపూజితాపరమేశ్వరీ ।
పరాణురూపా పరమా పరతన్త్రవినాశినీ ॥ 17 ॥
వరదా వరదారాధ్యా వరదానపరాయణా ।
వరదేశప్రియా వీరా వీరభూషణభూషితా ॥ 18 ॥
వసుదా బహుదా వాణీ బ్రహ్మరూపా వరాననా ।
బలదా పీతవసనా పీతభూషణభూషితా ॥ 19 ॥
పీతపుష్పప్రియా పీతహారా పీతస్వరూపిణీ ।
ఇతి తే కథితం విప్ర నామ్నామష్టోత్తరం శతమ్ ॥ 20 ॥
యః పఠేత్పాఠయేద్వాపి శృణుయాద్వా సమాహితః ।
తస్య శత్రుః క్షయం సద్యో యాతి నైవాత్ర సంశయః ॥ 21 ॥
ప్రభాతకాలే ప్రయతో మనుష్యః
పఠేత్సుభక్త్యా పరిచిన్త్య పీతామ్ ।
ధ్రువం భవేత్తస్య సమస్తవృద్ధిః
వినాశమాయాతి చ తస్య శత్రుః ॥ 22 ॥
ఇతి శ్రీవిష్ణుయామలే నారదవిష్ణుసంవాదే శ్రీబగళాష్టోత్తరశతనామస్తోత్రమ్ ।
