දේවෝ නශ්ශුභමාතනෝතු දශධා නිර්වර්තයන්භූමිකාං
රංගේ ධාමනි ලබ්ධනිර්භරරසෛරධ්යක්ෂිතෝ භාවුකෛඃ ।
යද්භාවේෂු පෘථග්විධේෂ්වනුගුණාන්භාවාන්ස්වයං බිභ්රතී
යද්ධර්මෛරිහ ධර්මිණී විහරතේ නානාකෘතිර්නායිකා ॥ 1 ॥
නිර්මග්නශ්රුතිජාලමාර්ගණදශාදත්තක්ෂණෛර්වීක්ෂණෛ-
රංතස්තන්වදිවාරවිංදගහනාන්යෞදන්වතීනාමපාම් ।
නිෂ්ප්රත්යූහතරංගරිංඛණමිථඃ ප්රත්යූඪපාථශ්ඡටා-
ඩෝලාරෝහසදෝහළං භගවතෝ මාත්ස්යං වපුඃ පාතු නඃ ॥ 2 ॥
අව්යාසුර්භුවනත්රයීමනිභෘතං කංඩූයනෛරද්රිණා
නිද්රාණස්ය පරස්ය කූර්මවපුෂෝ නිශ්වාසවාතෝර්මයඃ ।
යද්වික්ෂේපණසංස්කෘතෝදධිපයඃ ප්රේංඛෝළපර්යංකිකා-
නිත්යාරෝහණනිර්වෘතෝ විහරතේ දේවස්සහෛව ශ්රියා ॥ 3 ॥
ගෝපායේදනිශං ජගංති කුහනාපෝත්රී පවිත්රීකෘත-
බ්රහ්මාංඩප්රළයෝර්මිඝෝෂගුරුභිර්ඝෝණාරවෛර්ඝුර්ඝුරෛඃ ।
යද්දංෂ්ට්රාංකුරකෝටිගාඪඝටනානිෂ්කංපනිත්යස්ථිති-
ර්බ්රහ්මස්තංබමසෞදසෞ භගවතීමුස්තේවවිශ්වංභරා ॥ 4 ॥
ප්රත්යාදිෂ්ටපුරාතනප්රහරණග්රාමඃක්ෂණං පාණිජෛ-
රව්යාත්ත්රීණි ජගංත්යකුංඨමහිමා වෛකුංඨකංඨීරවඃ ।
යත්ප්රාදුර්භවනාදවංධ්යජඨරායාදෘච්ඡිකාද්වේධසාං-
යා කාචිත්සහසා මහාසුරගෘහස්ථූණාපිතාමහ්යභෘත් ॥ 5 ॥
ව්රීඩාවිද්ධවදාන්යදානවයශෝනාසීරධාටීභට-
ස්ත්රෛයක්ෂං මකුටං පුනන්නවතු නස්ත්රෛවික්රමෝ වික්රමඃ ।
යත්ප්රස්තාවසමුච්ඡ්රිතධ්වජපටීවෘත්තාංතසිද්ධාංතිභි-
ස්ස්රෝතෝභිස්සුරසිංධුරෂ්ටසුදිශාසෞධේෂු දෝධූයතේ ॥ 6 ॥
ක්රෝධාග්නිං ජමදග්නිපීඩනභවං සංතර්පයිෂ්යන් ක්රමා-
දක්ෂත්රාමිහ සංතතක්ෂ ය ඉමාං ත්රිස්සප්තකෘත්වඃ ක්ෂිතිම් ।
දත්වා කර්මණි දක්ෂිණාං ක්වචන තාමාස්කංද්ය සිංධුං වස-
න්නබ්රහ්මණ්යමපාකරෝතු භගවානාබ්රහ්මකීටං මුනිඃ ॥ 7 ॥
පාරාවාරපයෝවිශෝෂණකලාපාරීණකාලානල-
ජ්වාලාජාලවිහාරහාරිවිශිඛව්යාපාරඝෝරක්රමඃ ।
සර්වාවස්ථසකෘත්ප්රපන්නජනතාසංරක්ෂණෛකව්රතී
ධර්මෝ විග්රහවානධර්මවිරතිං ධන්වී සතන්වීතු නඃ ॥ 8 ॥
ඵක්කත්කෞරවපට්ටණප්රභෘතයඃ ප්රාස්තප්රලංබාදය-
ස්තාලාංකාස්යතථාවිධා විහෘතයස්තන්වංතු භද්රාණි නඃ ।
ක්ෂීරං ශර්කරයේව යාභිරපෘථග්භූතාඃ ප්රභූතෛර්ගුණෛ-
රාකෞමාරකමස්වදංතජගතේ කෘෂ්ණස්ය තාඃ කේළයඃ ॥ 9 ॥
නාථායෛව නමඃ පදං භවතු නශ්චිත්රෛශ්චරිත්රක්රමෛ-
ර්භූයෝභිර්භුවනාන්යමූනිකුහනාගෝපාය ගෝපායතේ ।
කාළිංදීරසිකායකාළියඵණිස්ඵාරස්ඵටාවාටිකා-
රංගෝත්සංගවිශංකචංක්රමධුරාපර්යාය චර්යායතේ ॥ 10 ॥
භාවින්යා දශයාභවන්නිහ භවධ්වංසාය නඃ කල්පතාං
කල්කී විෂ්ණුයශස්සුතඃ කලිකථාකාලුෂ්යකූලංකෂඃ ।
නිශ්ශේෂක්ෂතකංටකේ ක්ෂිතිතලේ ධාරාජලෞඝෛර්ධ්රුවං
ධර්මං කාර්තයුගං ප්රරෝහයති යන්නිස්ත්රිංශධාරාධරඃ ॥ 11 ॥
ඉච්ඡාමීන විහාරකච්ඡප මහාපෝත්රින් යදෘච්ඡාහරේ
රක්ෂාවාමන රෝෂරාම කරුණාකාකුත්ස්ථ හේලාහලින් ।
ක්රීඩාවල්ලව කල්කිවාහන දශාකල්කින්නිති ප්රත්යහං
ජල්පංතඃ පුරුෂාඃ පුනංතු භුවනං පුණ්යෞඝපණ්යාපණාඃ ॥
විද්යෝදන්වති වේංකටේශ්වරකවෞ ජාතං ජගන්මංගළං
දේවේශස්යදශාවතාරවිෂයං ස්තෝත්රං විවක්ෂේත යඃ ।
වක්ත්රේ තස්ය සරස්වතී බහුමුඛී භක්තිඃ පරා මානසේ
ශුද්ධිඃ කාපි තනෞ දිශාසු දශසු ඛ්යාතිශ්ශුභා ජෘංභතේ ॥
ඉති කවිතාර්කිකසිංහස්ය සර්වතංත්රස්වතංත්රස්ය ශ්රීමද්වේංකටනාථස්ය වේදාංතාචාර්යස්ය කෘතිෂු දශාවතාරස්තෝත්රම් ।
