යාමුනාර්යසුධාංභෝධිමවගාහ්ය යථාමති ।
ආදාය භක්තියෝගාඛ්යං රත්නං සංදර්ශයාම්යහම් ॥
ස්වාධීන ත්රිවිධචේතනාචේතනස්වරූපස්ථිති ප්රවෘත්තිභේදං, ක්ලේශ කර්මාද්යශේෂදෝෂාසංස්පෘෂ්ටං, ස්වාභාවිකානවධිකාතිශය ජ්ඤානබලෛශ්වර්යවීර්යශක්තිතේජඃ ප්රභෘත්යසංඛ්යේය කල්යාණගුණගණෞඝ මහාර්ණවං, පරමපුරුෂං, භගවංතං, නාරායණං, ස්වාමිත්වේන සුහෘත්වේන ගුරුත්වේන ච පරිගෘහ්ය ඓකාංතිකාත්යංතික තත්පාදාංබුජද්වය පරිචර්යෛකමනෝරථඃ, තත්ප්රාප්තයේ ච තත්පාදාංබුජද්වය ප්රපත්තේරන්යන්න මේ කල්පකෝටිසහස්රේණාපි සාධනමස්තීති මන්වානඃ, තස්යෛව භගවතෝ නාරායණස්ය අඛිලසත්ත්වදයෛකසාගරස්ය අනාලෝචිත ගුණගුණාඛංඩ ජනානුකූලාමර්යාද ශීලවතඃ, ස්වාභාවිකානවධිකාතිශය ගුණවත්තයා දේවතිර්යඞ්මනුෂ්යාද්යඛිලජන හෘදයානංදනස්ය ආශ්රිතවාත්සල්යෛකජලධේඃ භක්තජනසංශ්ලේෂෛකභෝගස්ය නිත්යජ්ඤානක්රියෛශ්වර්යාදි භෝගසාමග්රීසමෘද්ධස්ය, මහාවිභූතේඃ, ශ්රීමච්චරණාරවිංදයුගළං අනන්යාත්මසංජීවනේන තද්ගතසර්වභාවේන ශරණමනුව්රජේත් । තතශ්ච ප්රත්යහමාත්මෝජ්ජීවනායෛවමනුස්මරේත් । චතුර්දශභුවනාත්මකං අංඩං, දශගුණිතෝත්තරං ච ආවරණසප්තකං, සමස්තං කාර්යකාරණ(ජාත)මතීත්ය, වර්තමානේ පරමව්යෝමශබ්දාභිධේයේ, බ්රහ්මාදීනාං වාඞ්මනසාऽගෝචරේ, ශ්රීමති වෛකුංඨේ දිව්යලෝකේ, සනකවිධිශිවාදිභිරපි අචිංත්යස්වභාවෛශ්වර්යෛඃ, නිත්යසිද්ධෛරනංතෛර්භගවදානුකූල්යෛක භෝගෛර්දිව්යපුරුෂෛඃ මහාත්මභිඃ ආපූරිතේ, තේෂාමපි ඉයත්පරිමාණං, ඉයදෛශ්වර්යං, ඊදෘශස්වභාවමිති පරිච්ඡේත්තුමයෝග්යේ, දිව්යාවරණශතසහස්රාවෘතේ, දිව්යකල්පකතරූපශෝභිතේ, දිව්යෝද්යාන ශතසහස්රකෝටිභිරාවෘතේ, අතිප්රමාණේ දිව්යායතනේ, කස්මිංශ්චිද්විචිත්ර දිව්යරත්නමය දිව්යාස්ථානමංඩපේ, දිව්යරත්නස්තංභ ශතසහස්රකෝටිභිරුපශෝභිතේ,
දිව්යනානාරත්නකෘතස්ථල විචිත්රිතේ, දිව්යාලංකාරාලංකෘතේ, පරිතඃ පතිතෛඃ පතමානෛඃ පාදපස්ථෛශ්ච නානාගංධවර්ණෛර්දිව්යපුෂ්පෛඃ ශෝභමානෛර්දිව්යපුෂ්පෝපවනෛරුපශෝභිතේ, සංකීර්ණපාරිජාතාදි කල්පද්රුමෝපශෝභිතෛඃ, අසංකීර්ණෛශ්ච කෛශ්චිදංතස්ස්ථපුෂ්පරත්නාදිනිර්මිත දිව්යලීලාමංඩප ශතසහස්රෝපශෝභිතෛඃ, සර්වදාऽනුභූයමානෛරප්යපූර්වවදාශ්චර්යමාවහද්භිඃ ක්රීඩාශෛල ශතසහස්රෛරලංකෘතෛඃ, කෛශ්චින්නාරායණදිව්යලීලාऽසාධාරණෛඃ, කෛශ්චිත්පද්මවනාලයා දිව්යලීලාऽසාධාරණෛඃ, සාධාරණෛශ්ච කෛශ්චිත් ශුකශාරිකාමයූරකෝකිලාදිභිඃ කෝමලකූජිතෛරාකුලෛඃ, දිව්යෝද්යාන ශතසහස්රෛරාවෘතේ, මණිමුක්තාප්රවාල කෘතසෝපානෛඃ, දිව්යාමලාමෘතරසෝදකෛඃ, දිව්යාංඩජවරෛඃ, අතිරමණීයදර්ශනෛඃ අතිමනෝහරමධුරස්වරෛඃ ආකුලෛඃ, අංතස්ථ මුක්තාමය දිව්යක්රීඩාස්ථානෝපශෝභිතෛඃ දිව්යසෞගංධිකවාපීශතසහස්රෛඃ, දිව්යරාජහංසාවළීවිරාජිතෛරාවෘතේ, නිරස්තාතිශයානංදෛකරසතයා චානංත්යාච්ච ප්රවිෂ්ටානුන්මාදයද්භිඃ ක්රීඩෝද්දේශෛර්විරාජිතේ, තත්ර තත්ර කෘත දිව්යපුෂ්පපර්යංකෝපශෝභිතේ, නානාපුෂ්පාසවාස්වාද මත්තභෘංගාවලීභිඃ උද්ගීයමාන දිව්යගාංධර්වේණාපූරිතේ, චංදනාගරුකර්පූර දිව්යපුෂ්පාවගාහි මංදානිලාසේව්යමානේ, මධ්යේ පුෂ්පසංචය විචිත්රිතේ, මහති දිව්යයෝගපර්යංකේ අනංතභෝගිනි, ශ්රීමද්වෛකුංඨෛශ්වර්යාදි දිව්යලෝකං ආත්මකාංත්යා විශ්වමාප්යායයංත්යා ශේෂ ශේෂාශනාදි සර්වපරිජනං භගවතස්තත්තදවස්ථෝචිත පරිචර්යායාං ආජ්ඤාපයංත්යා, ශීලරූපගුණ විලාසාදිභිඃ ආත්මානුරූපයා ශ්රියා සහාසීනං, ප්රත්යග්රෝන්මීලිත සරසිජසදෘශ නයනයුගළං, ස්වච්ඡනීලජීමූතසංකාශං, අත්යුජ්ජ්වලපීතවාසසං, ස්වයා ප්රභයාऽතිනිර්මලයා අතිශීතලයා අතිකෝමලයා ස්වච්ඡමාණික්යාභයා කෘත්ස්නං ජගද්භාසයංතං,
අචිංත්යදිව්යාද්භුත නිත්යයෞවන ස්වභාවලාවණ්යමයාමෘතසාගරං, අතිසෞකුමාර්යාදි ඊෂත් ප්රස්වින්නවදාලක්ෂ්යමාණ ලලාටඵලක දිව්යාලකාවලීවිරාජිතං, ප්රබුද්ධමුග්ධාංබුජ චාරුලෝචනං, සවිභ්රමභ්රූලතං, උජ්ජ්වලාධරං, ශුචිස්මිතං, කෝමලගංඩං, උන්නසං, උදග්රපීනාංස විලංබිකුංඩලාලකාවලී බංධුර කංබුකංධරං, ප්රියාවතං‍සෝත්පල කර්ණභූෂණශ්ලථාලකාබංධ විමර්දශංසිභිඃ චතුර්භිරාජානුවිලංබිභිර්භුජෛර්විරාජිතං, අතිකෝමල දිව්යරේඛාලංකෘතාතාම්රකරතලං, දිව්යාංගුළීයකවිරාජිතං, අතිකෝමල දිව්යනඛාවළීවිරාජිතං, අතිරක්තාංගුලීභිරලංකෘතං, තත්ක්ෂණෝන්මීලිත පුංඩරීක සදෘශචරණයුගළං, අතිමනෝහර කිරීටමකුට චූඩාවතංස මකරකුංඩල ග්රෛවේයක හාර කේයූර කටක ශ්රීවත්ස කෞස්තුභ මුක්තාදාමෝදරබංධන පීතාංබර කාංචීගුණ නූපුරාදිභිරත්යංත සුඛස්පර්ශෛඃ දිව්යගංධෛර්භූෂණෛර්භූෂිතං, ශ්රීමත්යා වෛජයංත්යා වනමාලයා විරාජිතං, ශංඛචක්රගදාऽසි ශාරංගාදි දිව්යායුධෛඃ සේව්යමානං, ස්වසංකල්පමාත්රාවක්ලුප්ත ජගජ්ජන්මස්ථිතිධ්වංසාදිකේ ශ්රීමති විෂ්වක්සේනේ න්යස්ත සමස්තාත්මෛශ්වර්යං, වෛනතේයාදිභිඃ ස්වභාවතෝ නිරස්ත සමස්ත සාංසාරික ස්වභාවෛඃ භගවත්පරිචර්යාකරණ යෝග්යෛර්භගවත්පරිචර්යෛකභෝගෛ-ර්නිත්යසිද්ධෛරනංතෛඃ යථා යෝගං සේව්යමානං, ආත්මභෝගේන අනනුසංහිතපරාදිකාල දිව්යාමල කෝමලාවලෝකනේන විශ්වමාහ්ලාදයංතං, ඊෂදුන්මීලිත මුඛාංබුජෝදරවිනිර්ගතේන දිව්යානනාරවිංද ශෝභාජනනේන දිව්යගාංභීර්යෞදාර්ය සෞංදර්ය මාධුර්යාද්යනවධික ගුණගණවිභූෂිතේන, අතිමනෝහර දිව්යභාවගර්භේණ දිව්යලීලාऽऽලාපාමෘතේන අඛිලජන හෘදයාංතරාණ්යාපූරයංතං භගවංතං නාරායණං ධ්යානයෝගේන දෘෂ්ට්වා, තතෝ භගවතෝ නිත්යස්වාම්යමාත්මනෝ නිත්යදාස්යං ච යථාවස්ථිතමනුසංධාය, කදාऽහං භගවංතං නාරායණං, මම කුලනාථං, මම කුලදෛවතං, මම කුලධනං, මම භෝග්යං, මම මාතරං, මම පිතරං, මම සර්වං සාක්ෂාත්කරවාණි චක්ෂුෂා ।
කදාऽහං භගවත්පාදාංබුජද්වයං ශිරසා සංග්රහීෂ්යාමි । කදාऽහං භගවත්පාදාංබුජද්වය පරිචර්යාऽऽශයා නිරස්තසමස්තේතර භෝගාශඃ, අපගත සමස්ත සාංසාරිකස්වභාවඃ තත්පාදාංබුජද්වයං ප්රවේක්ෂ්යාමි । කදාऽහං භගවත්පාදාංබුජද්වය පරිචර්යාකරණයෝග්ය-ස්තදේකභෝගස්තත්පාදෞ පරිචරිෂ්යාමි । කදා මාං භගවාන් ස්වකීයයා අතිශීතලයා දෘශා අවලෝක්ය, ස්නිග්ධගංභීරමධුරයා ගිරා පරිචර්යායාං ආජ්ඤාපයිෂ්යති, ඉති භගවත්පරිචර්යායාමාශාං වර්ධයිත්වා තයෛවාऽශයා තත්ප්රසාදෝපබෘංහිතයා භගවංතමුපේත්ය, දූරාදේව භගවංතං ශේෂභෝගේ ශ්රියා සහාසීනං වෛනතේයාදිභිඃ සේව්යමානං, සමස්තපරිවාරාය ශ්රීමතේ නාරායණාය නමඃ, ඉති ප්රණම්ය උත්ථායෝත්ථාය පුනඃ පුනඃ ප්රණම්ය අත්යංත සාධ්වසවිනයාවනතෝ භූත්වා, භගවත්පාරිෂදගණනායකෛර්ද්වාරපාලෛඃ කෘපයා ස්නේහගර්භයා දෘශාऽවලෝකිතඃ සම්යගභිවංදිතෛස්තෛස්තෛරේවානුමතෝ භගවංතමුපේත්ය, ශ්රීමතා මූලමංත්රේණ මාමෛකාංතිකාත්යංතික පරිචර්යාකරණාය පරිගෘහ්ණීෂ්ව ඉති යාචමානඃ ප්රණම්යාත්මානං භගවතේ නිවේදයේත් ।
තතෝ භගවතා ස්වයමේවාත්මසංජීවනේන අමර්යාදශීලවතා අතිප්රේමාන්විතේන අවලෝකනේනාවලෝක්ය සර්වදේශ සර්වකාල සර්වාවස්ථෝචිතාත්යංතශේෂභාවාය ස්වීකෘතෝऽනුජ්ඤාතශ්ච අත්යංතසාධ්වසවිනයාවනතඃ කිංකුර්වාණඃ කෘතාංජලිපුටෝ භගවංතමුපාසීත । තතශ්චානුභූයමාන භාවවිශේෂඃ නිරතිශයප්රීත්යාऽන්යත්කිංචිත්කර්තුං ද්රෂ්ටුං ස්මර්තුමශක්තඃ පුනරපි ශේෂභාවමේව යාචමානෝ භගවංතමේවාවිච්ඡින්නස්රෝතෝරූපේණාවලෝකනේන අවලෝකයන්නාසීත । තතෝ භගවතා ස්වයමේවාත්මසංජීවනේනාවලෝකනේනාවලෝක්ය සස්මිතමාහූය සමස්තක්ලේශාපහං නිරතිශයසුඛාවහමාත්මීයං, ශ්රීමත්පාදාරවිංදයුගළං ශිරසි කෘතං ධ්යාත්වා, අමෘතසාගරාංතර්නිමග්නසර්වාවයවඃ සුඛමාසීත ।
ලක්ෂ්මීපතේර්යතිපතේශ්ච දයෛකධාම්නෝඃ
යෝऽසෞ පුරා සමජනිෂ්ට ජගද්ධිතාර්ථම් ।
ප්රාප්යං ප්රකාශයතු නඃ පරමං රහස්යං
සංවාද ඒෂ ශරණාගති මංත්රසාරඃ ॥
ඉති ශ්රීභගවද්රාමානුජවිරචිතේ ශ්රීවෛකුංඨගද්යම් ।
