අථාපරමහං වක්ෂ්යේऽමෘතසංජීවනං ස්තවම් ।
යස්යානුෂ්ඨානමාත්රේණ මෘත්යුර්දූරාත්පලායතේ ॥ 1 ॥

අසාධ්යාඃ කෂ්ටසාධ්යාශ්ච මහාරෝගා භයංකරාඃ ।
ශීඝ්රං නශ්යංති පඨනාදස්යායුශ්ච ප්රවර්ධතේ ॥ 2 ॥

ශාකිනීඩාකිනීදෝෂාඃ කුදෘෂ්ටිග්රහශත්රුජාඃ ।
ප්රේතවේතාලයක්ෂෝත්ථා බාධා නශ්යංති චාඛිලාඃ ॥ 3 ॥

දුරිතානි සමස්තානි නානාජන්මෝද්භවානි ච ।
සංසර්ගජවිකාරාණි විලීයංතේऽස්ය පාඨතඃ ॥ 4 ॥

සර්වෝපද්රවනාශාය සර්වබාධාප්රශාංතයේ ।
ආයුඃ ප්රවෘද්ධයේ චෛතත් ස්තෝත්රං පරමමද්භුතම් ॥ 5 ॥

බාලග්රහාභිභූතානාං බාලානාං සුඛදායකම් ।
සර්වාරිෂ්ටහරං චෛතද්බලපුෂ්ටිකරං පරම් ॥ 6 ॥

බාලානාං ජීවනායෛතත් ස්තෝත්රං දිව්යං සුධෝපමම් ।
මෘතවත්සත්වහරණං චිරංජීවිත්වකාරකම් ॥ 7 ॥

මහාරෝගාභිභූතානාං භයව්යාකුලිතාත්මනාම් ।
සර්වාධිව්යාධිහරණං භයඝ්නමමෘතෝපමම් ॥ 8 ॥

අල්පමෘත්යුශ්චාපමෘත්යුඃ පාඨාදස්යඃ ප්රණශ්යති ।
ජලාऽග්නිවිෂශස්ත්රාරි න හි ශෘංගි භයං තථා ॥ 9 ॥

ගර්භරක්ෂාකරං ස්ත්රීණාං බාලානාං ජීවනප්රදම් ।
මහාරෝගහරං නॄණාමල්පමෘත්යුහරං පරම් ॥ 10 ॥

බාලා වෘද්ධාශ්ච තරුණා නරා නාර්යශ්ච දුඃඛිතාඃ ।
භවංති සුඛිනඃ පාඨාදස්ය ලෝකේ චිරායුෂඃ ॥ 11 ॥

අස්මාත්පරතරං නාස්ති ජීවනෝපාය ඓහිකඃ ।
තස්මාත් සර්වප්රයත්නේන පාඨමස්ය සමාචරේත් ॥ 12 ॥

අයුතාවෘත්තිකං වාථ සහස්රාවෘත්තිකං තථා ।
තදර්ධං වා තදර්ධං වා පඨේදේතච්ච භක්තිතඃ ॥ 13 ॥

කලශේ විෂ්ණුමාරාධ්ය දීපං ප්රජ්වාල්ය යත්නතඃ ।
සායං ප්රාතශ්ච විධිවත් ස්තෝත්රමේතත් පඨේත් සුධීඃ ॥ 14 ॥

සර්පිෂා හවිෂා වාऽපි සංයාවේනාථ භක්තිතඃ ।
දශාංශමානතෝ හෝමං කුර්යාත් සර්වාර්ථසිද්ධයේ ॥ 15 ॥

අථ ස්තෝත්රම්
නමෝ නමෝ විශ්වවිභාවනාය
නමෝ නමෝ ලෝකසුඛප්රදාය ।
නමෝ නමෝ විශ්වසෘජේශ්වරාය
නමෝ නමෝ මුක්තිවරප්රදාය ॥ 1 ॥

නමෝ නමස්තේऽඛිලලෝකපාය
නමෝ නමස්තේऽඛිලකාමදාය ।
නමෝ නමස්තේऽඛිලකාරණාය
නමෝ නමස්තේऽඛිලරක්ෂකාය ॥ 2 ॥

නමෝ නමස්තේ සකලාර්තිහර්ත්රේ
නමෝ නමස්තේ විරුජඃ ප්රකර්ත්රේ ।
නමෝ නමස්තේऽඛිලවිශ්වධර්ත්රේ
නමෝ නමස්තේऽඛිලලෝකභර්ත්රේ ॥ 3 ॥

සෘෂ්ටං දේව චරාචරං ජගදිදං බ්රහ්මස්වරූපේණ තේ
සර්වං තත්පරිපාල්යතේ ජගදිදං විෂ්ණුස්වරූපේණ තේ ।
විශ්වං සංහ්රිතයේ තදේව නිඛිලං රුද්රස්වරූපේණ තේ
සංසිච්යාමෘතශීකරෛර්හර මහාරිෂ්ටං චිරං ජීවය ॥ 4 ॥

යෝ ධන්වංතරිසංජ්ඤයා නිගදිතඃ ක්ෂීරාබ්ධිතෝ නිඃසෘතෝ
හස්තාභ්යාං ජනජීවනාය කලශං පීයූෂපූර්ණං දධත් ।
ආයුර්වේදමරීරචජ්ජනරුජාං නාශාය ස ත්වං මුදා
සංසිච්යාමෘතශීකරෛර්හර මහාරිෂ්ටං චිරං ජීවය ॥ 5 ॥

ස්ත්රීරූපං වරභූෂණාංබරධරං ත්රෛලෝක්යසම්මෝහනං
කෘත්වා පායයති ස්ම යඃ සුරගණාන් පීයූෂමත්යුත්තමම් ।
චක්රේ දෛත්යගණාන් සුධාවිරහිතාන් සංමෝහ්ය ස ත්වං මුදා
සංසිච්යාමෘතශීකරෛර්හර මහාරිෂ්ටං චිරං ජීවය ॥ 6 ॥

චාක්ෂුෂෝදධිසංප්ලාව භූවේදප ඣෂාකෘතේ ।
සිංච සිංචාමෘතකණෛශ්චිරං ජීවය ජීවය ॥ 7 ॥

පෘෂ්ඨමංදරනිර්ඝූර්ණනිද්රාක්ෂ කමඨාකෘතේ ।
සිංච සිංචාමෘතකණෛශ්චිරං ජීවය ජීවය ॥ 8 ॥

යාංචාච්ඡලබලිත්රාසමුක්තනිර්ජර වාමන ।
සිංච සිංචාමෘතකණෛශ්චිරං ජීවය ජීවය ॥ 9 ॥

ධරෝද්ධාර හිරණ්යාක්ෂඝාත ක්රෝඩාකෘතේ ප්රභෝ ।
සිංච සිංචාමෘතකණෛශ්චිරං ජීවය ජීවය ॥ 10 ॥

භක්තත්රාසවිනාශාත්තචංඩත්ව නෘහරේ විභෝ ।
සිංච සිංචාමෘතකණෛශ්චිරං ජීවය ජීවය ॥ 11 ॥

ක්ෂත්රියාරණ්යසංඡේදකුඨාරකරරෛණුක ।
සිංච සිංචාමෘතකණෛශ්චිරං ජීවය ජීවය ॥ 12 ॥

රක්ෂෝරාජප්රතාපාබ්ධිශෝෂණාශුග රාඝව ।
සිංච සිංචාමෘතකණෛශ්චිරං ජීවය ජීවය ॥ 13 ॥

භූභාරාසුරසංදෝහකාලාග්නේ රුක්මිණීපතේ ।
සිංච සිංචාමෘතකණෛශ්චිරං ජීවය ජීවය ॥ 14 ॥

වේදමාර්ගරතානර්හවිභ්රාංත්යෛ බුද්ධරූපධෘක් ।
සිංච සිංචාමෘතකණෛශ්චිරං ජීවය ජීවය ॥ 15 ॥

කලිවර්ණාශ්රමාස්පෂ්ටධර්මර්ධ්යෛ කල්කිරූපභාක් ।
සිංච සිංචාමෘතකණෛශ්චිරං ජීවය ජීවය ॥ 16 ॥

අසාධ්යාඃ කෂ්ටසාධ්යා යේ මහාරෝගා භයංකරාඃ ।
ඡිංධි තානාශු චක්රේණ චිරං ජීවය ජීවය ॥ 17 ॥

අල්පමෘත්යුං චාපමෘත්යුං මහෝත්පාතානුපද්රවාන් ।
භිංධි භිංධි ගදාඝාතෛශ්චිරං ජීවය ජීවය ॥ 18 ॥

අහං න ජානේ කිමපි ත්වදන්යත්
සමාශ්රයේ නාථ පදාංබුජං තේ ।
කුරුෂ්ව තද්යන්මනසීප්සිතං තේ
සුකර්මණා කේන සමක්ෂමීයාම් ॥ 19 ॥

ත්වමේව තාතෝ ජනනී ත්වමේව
ත්වමේව නාථශ්ච ත්වමේව බංධුඃ ।
විද්යාධනාගාරකුලං ත්වමේව
ත්වමේව සර්වං මම දේවදේව ॥ 20 ॥

න මේऽපරාධං ප්රවිලෝකය ප්රභෝ-
-ऽපරාධසිංධෝශ්ච දයානිධිස්ත්වම් ।
තාතේන දුෂ්ටෝऽපි සුතඃ සුරක්ෂතේ
දයාලුතා තේऽවතු සර්වදාऽස්මාන් ॥ 21 ॥

අහහ විස්මර නාථ න මාං සදා
කරුණයා නිජයා පරිපූරිතඃ ।
භුවි භවාන් යදි මේ න හි රක්ෂකඃ
කථමහෝ මම ජීවනමත්ර වෛ ॥ 22 ॥

දහ දහ කෘපයා ත්වං ව්යාධිජාලං විශාලං
හර හර කරවාලං චාල්පමෘත්යෝඃ කරාලම් ।
නිජජනපරිපාලං ත්වාං භජේ භාවයාලං
කුරු කුරු බහුකාලං ජීවිතං මේ සදාऽලම් ॥ 23 ॥

න යත්ර ධර්මාචරණං න ජානං
ව්රතං න යෝගෝ න ච විෂ්ණුචර්චා ।
න පිතෘගෝවිප්රවරාමරාර්චා
ස්වල්පායුෂස්තත්ර ජනා භවංති ॥ 24 ॥

අථ මංත්රම්
ක්ලීං ශ්රීං ක්ලීං ශ්රීං නමෝ භගවතේ ජනාර්දනාය සකල දුරිතානි නාශය නාශය ।
ක්ෂ්රෞං ආරෝග්යං කුරු කුරු । හ්රීං දීර්ඝමායුර්දේහි දේහි ස්වාහා ॥

ඵලශ්රුතිඃ
අස්ය ධාරණතෝ ජාපාදල්පමෘත්යුඃ ප්රශාම්යති ।
ගර්භරක්ෂාකරං ස්ත්රීණාං බාලානාං ජීවනං පරම් ॥ 1 ॥

ශතං පංචාශතං ශක්ත්යාऽථවා පංචාධිවිංශතිම් ।
පුස්තකානාං ද්විජේභ්යස්තු දද්යාද්දීර්ඝායුෂාප්තයේ ॥ 2 ॥

භූර්ජපත්රේ විලිඛ්යේදං කංඨේ වා බාහුමූලකේ ।
සංධාරයේද්ගර්භරක්ෂා බාලරක්ෂා ච ජායතේ ॥ 3 ॥

සර්වේ රෝගා විනශ්යංති සර්වා බාධාඃ ප්රශාම්යති ।
කුදෘෂ්ටිජං භයං නශ්යේත් තථා ප්රේතාදිජං භයම් ॥ 4 ॥

මයා කථිතමේතත්තේऽමෘතසංජීවනං පරම් ।
අල්පමෘත්යුහරං ස්තෝත්රං මෘතවත්සත්වනාශනම් ॥ 5 ॥

ඉති සුදර්ශනසංහිතෝක්තං අමෘතසංජීවන ධන්වංතරි ස්තෝත්රම් ॥