කෛලාසශිඛරේ රම්යේ ගෞරී පප්රච්ඡ ශංකරම් ।
බ්රහ්මාංඩාඛිලනාථස්ත්වං සෘෂ්ටිසංහාරකාරකඃ ॥ 1 ॥

ත්වමේව පූජ්යසේ ලෝකෛර්බ්රහ්මවිෂ්ණුසුරාදිභිඃ ।
නිත්යං පඨසි දේවේශ කස්ය ස්තෝත්රං මහේශ්වර ॥ 2 ॥

ආශ්චර්යමිදමත්යංතං ජායතේ මම ශංකර ।
තත්ප්රාණේශ මහාප්රාජ්ඤ සංශයං ඡිංධි මේ ප්රභෝ ॥ 3 ॥

ශ්රීමහාදේව උවාච-
ධන්යාසි කෘතපුණ්යාසි පාර්වති ප්රාණවල්ලභේ ।
රහස්යාතිරහස්යං ච යත්පෘච්ඡසි වරානනේ ॥ 4 ॥

ස්ත්රීස්වභාවාන්මහාදේවි පුනස්ත්වං පරිපෘච්ඡසි ।
ගෝපනීයං ගෝපනීයං ගෝපනීයං ප්රයත්නතඃ ॥ 5 ॥

දත්තේ ච සිද්ධිහානිඃ ස්යාත්තස්මාද්යත්නේන ගෝපයේත් ।
ඉදං රහස්යං පරමං පුරුෂාර්ථප්රදායකම් ॥ 6 ॥

ධනරත්නෞඝමාණික්යං තුරංගං ච ගජාදිකම් ।
දදාති ස්මරණාදේව මහාමෝක්ෂප්රදායකම් ॥ 7 ॥

තත්තේऽහං සංප්රවක්ෂ්යාමි ශෘණුෂ්වාවහිතා ප්රියේ ।
යෝऽසෞ නිරංජනෝ දේවශ්චිත්ස්වරූපී ජනාර්දනඃ ॥ 8 ॥

සංසාරසාගරෝත්තාරකාරණාය නෘණාං සදා ।
ශ්රීරංගාදිකරූපේණ ත්රෛලෝක්යං ව්යාප්ය තිෂ්ඨති ॥ 9 ॥

තතෝ ලෝකා මහාමූඪා විෂ්ණුභක්තිවිවර්ජිතාඃ ।
නිශ්චයං නාධිගච්ඡංති පුනර්නාරායණෝ හරිඃ ॥ 10 ॥

නිරංජනෝ නිරාකාරෝ භක්තානාං ප්රීතිකාමදඃ ।
බෘංදාවනවිහාරාය ගෝපාලං රූපමුද්වහන් ॥ 11 ॥

මුරළීවාදනාධාරී රාධායෛ ප්රීතිමාවහන් ।
අංශාංශේභ්යඃ සමුන්මීල්ය පූර්ණරූපකළායුතඃ ॥ 12 ॥

ශ්රීකෘෂ්ණචංද්රෝ භගවාන් නංදගෝපවරෝද්යතඃ ।
ධරණීරූපිණී මාතා යශෝදා නංදගේහිනී ॥ 13 ॥

ද්වාභ්යාං ප්රයාචිතෝ නාථෝ දේවක්යාං වසුදේවතඃ ।
බ්රහ්මණාऽභ්යර්ථිතෝ දේවෝ දේවෛරපි සුරේශ්වරඃ ॥ 14 ॥

ජාතෝऽවන්යාං ච මුදිතෝ මුරළීවාචනේච්ඡයා ।
ශ්රියා සාර්ධං වචඃ කෘත්වා තතෝ ජාතෝ මහීතලේ ॥ 15 ॥

සංසාරසාරසර්වස්වං ශ්යාමලං මහදුජ්ජ්වලම් ।
ඒතජ්ජ්යෝතිරහං වංද්යං චිංතයාමි සනාතනම් ॥ 16 ॥

ගෞරතේජෝ විනා යස්තු ශ්යාමතේජස්සමර්චයේත් ।
ජපේද්වා ධ්යායතේ වාපි ස භවේත්පාතකී ශිවේ ॥ 17 ॥

ස බ්රහ්මහා සුරාපී ච ස්වර්ණස්තේයී ච පංචමඃ ।
ඒතෛර්දෝෂෛර්විලිප්යේත තේජෝභේදාන්මහීශ්වරි ॥ 18 ॥

තස්මාජ්ජ්යෝතිරභූද්ද්වේධා රාධාමාධවරූපකම් ।
තස්මාදිදං මහාදේවි ගෝපාලේනෛව භාෂිතම් ॥ 19 ॥

දුර්වාසසෝ මුනේර්මෝහේ කාර්තික්යාං රාසමංඩලේ ।
තතඃ පෘෂ්ටවතී රාධා සංදේහං භේදමාත්මනඃ ॥ 20 ॥

නිරංජනාත්සමුත්පන්නං මායාතීතං ජගන්මයම් ।
ශ්රීකෘෂ්ණේන තතඃ ප්රෝක්තං රාධායෛ නාරදාය ච ॥ 21 ॥

තතෝ නාරදතස්සර්වං විරළා වෛෂ්ණවාස්තථා ।
කලෞ ජානංති දේවේශි ගෝපනීයං ප්රයත්නතඃ ॥ 22 ॥

ශඨාය කෘපණායාථ ඩාංභිකාය සුරේශ්වරි ।
බ්රහ්මහත්යාමවාප්නෝති තස්මාද්යත්නේන ගෝපයේත් ॥ 23 ॥

ඕං අස්ය ශ්රීගෝපාලසහස්රනාමස්තෝත්ර මහාමංත්රස්ය ශ්රීනාරද ඍෂිඃ, අනුෂ්ටුප් ඡංදඃ, ශ්රීගෝපාලෝ දේවතා, කාමෝ බීජං, මායා ශක්තිඃ, චංද්රඃ කීලකං, ශ්රීකෘෂ්ණචංද්ර භක්තිරූපඵලප්රාප්තයේ ශ්රීගෝපාලසහස්රනාමස්තෝත්රජපේ විනියෝගඃ ।

ඕං ඓං ක්ලීං බීජං, ශ්රීං හ්රීං ශක්තිඃ, ශ්රී බෘංදාවනනිවාසඃ කීලකං, ශ්රීරාධාප්රියං පරං බ්රහ්මේති මංත්රඃ, ධර්මාදි චතුර්විධ පුරුෂාර්ථසිද්ධ්යර්ථේ ජපේ විනියෝගඃ ।

න්යාසඃ ।
ඕං නාරද ඍෂයේ නමඃ ශිරසි ।
අනුෂ්ටුප් ඡංදසේ නමඃ මුඛේ ।
ශ්රීගෝපාලදේවතායෛ නමඃ හෘදයේ ।
ක්ලීං කීලකාය නමඃ නාභෞ ।
හ්රීං ශක්තයේ නමඃ ගුහ්යේ ।
ශ්රීං කීලකාය නමඃ ඵාලයෝඃ ।
ඕං ක්ලීං කෘෂ්ණාය ගෝවිංදාය ගෝපීජනවල්ලභාය ස්වාහා ඉති මූලමංත්රඃ ।

කරන්යාසඃ ।
ඕං ක්ලාං අංගුෂ්ඨාභ්යාං නමඃ ।
ඕං ක්ලීං තර්ජනීභ්යාං නමඃ ।
ඕං ක්ලූං මධ්යමාභ්යාං නමඃ ।
ඕං ක්ලෛං අනාමිකාභ්යාං නමඃ ।
ඕං ක්ලෞං කනිෂ්ඨිකාභ්යාං නමඃ ।
ඕං ක්ලඃ කරතලකරපෘෂ්ඨාභ්යාං නමඃ ।

හෘදයාදින්යාසඃ ।
ඕං ක්ලාං හෘදයාය නමඃ ।
ඕං ක්ලීං ශිරසේ ස්වාහා ।
ඕං ක්ලූං ශිඛායෛ වෂට් ।
ඕං ක්ලෛං කවචාය හුම් ।
ඕං ක්ලෞං නේත්රත්රයාය වෞෂට් ।
ඕං ක්ලඃ අස්ත්රාය ඵට් ।

මූලමංත්රන්යාසඃ ।
ක්ලීං අංගුෂ්ඨාභ්යාං නමඃ ।
කෘෂ්ණාය තර්ජනීභ්යාං නමඃ ।
ගෝවිංදාය මධ්යමාභ්යාං නමඃ ।
ගෝපීජන අනාමිකාභ්යාං නමඃ ।
වල්ලභාය කනිෂ්ඨිකාභ්යාං නමඃ ।
ස්වාහා කරතලකරපෘෂ්ඨාභ්යාං නමඃ ।
ක්ලීං හෘදයාය නමඃ ।
කෘෂ්ණාය ශිරසේ ස්වාහා ।
ගෝවිංදාය ශිඛායෛ වෂට් ।
ගෝපීජන කවචාය හුම් ।
වල්ලභාය නේත්රත්රයාය වෞෂට් ।
ස්වාහා අස්ත්රාය ඵට් ।

ධ්යානම් ।

ඵුල්ලේංදීවරකාංතිමිංදුවදනං බර්හාවතංසප්රියං
ශ්රීවත්සාංකමුදාරකෞස්තුභධරං පීතාංබරං සුංදරම් ।
ගෝපීනාං නයනෝත්පලාර්චිතතනුං ගෝගෝපසංඝාවෘතං
ගෝවිංදං කලවේණුවාදනපරං දිව්යාංගභූෂං භජේ ॥ 1 ॥

කස්තූරීතිලකං ලලාටඵලකේ වක්ෂස්ස්ථලේ කෞස්තුභං
නාසාග්රේ වරමෞක්තිකං කරතලේ වේණුං කරේ කංකණම් ।
සර්වාංගේ හරිචංදනං ච කලයන් කංඨේ ච මුක්තාවලිං
ගෝපස්ත්රීපරිවේෂ්ටිතෝ විජයතේ ගෝපාලචූඩාමණිඃ ॥ 2 ॥

ඕං ක්ලීං දේවඃ කාමදේවඃ කාමබීජශිරෝමණිඃ ।
ශ්රීගෝපාලෝ මහීපාලෝ වේදවේදාංගපාරගඃ ॥ 1 ॥

කෘෂ්ණඃ කමලපත්රාක්ෂඃ පුංඩරීකඃ සනාතනඃ ।
ගෝපතිර්භූපතිඃ ශාස්තා ප්රහර්තා විශ්වතෝමුඛඃ ॥ 2 ॥

ආදිකර්තා මහාකර්තා මහාකාලඃ ප්රතාපවාන් ।
ජගජ්ජීවෝ ජගද්ධාතා ජගද්භර්තා ජගද්වසුඃ ॥ 3 ॥

මත්ස්යෝ භීමඃ කුහූභර්තා හර්තා වාරාහමූර්තිමාන් ।
නාරායණෝ හෘෂීකේශෝ ගෝවිංදෝ ගරුඩධ්වජඃ ॥ 4 ॥

ගෝකුලේශෝ මහාචංද්රඃ ශර්වරීප්රියකාරකඃ ।
කමලාමුඛලෝලාක්ෂඃ පුංඩරීකඃ ශුභාවහඃ ॥ 5 ॥

දුර්වාසාඃ කපිලෝ භෞමඃ සිංධුසාගරසංගමඃ ।
ගෝවිංදෝ ගෝපතිර්ගෝත්රඃ කාළිංදීප්රේමපූරකඃ ॥ 6 ॥

ගෝපස්වාමී ගෝකුලේංද්රඃ ගෝවර්ධනවරප්රදඃ ।
නංදාදිගෝකුලත්රාතා දාතා දාරිද්ර්යභංජනඃ ॥ 7 ॥

සර්වමංගළදාතා ච සර්වකාමවරප්රදඃ ।
ආදිකර්තා මහීභර්තා සර්වසාගරසිංධුජඃ ॥ 8 ॥

ගජගාමී ගජෝද්ධාරී කාමී කාමකලානිධිඃ ।
කළංකරහිතශ්චංද්රෝ බිංබාස්යෝ බිංබසත්තමඃ ॥ 9 ॥

මාලාකාරඃ කෘපාකාරඃ කෝකිලස්වරභූෂණඃ ।
රාමෝ නීලාංබරෝ දේහී හලී ද්විවිදමර්දනඃ ॥ 10 ॥

සහස්රාක්ෂපුරීභේත්තා මහාමාරීවිනාශනඃ ।
ශිවඃ ශිවතමෝ භේත්තා බලාරාතිප්රපූජකඃ ॥ 11 ॥

කුමාරීවරදායී ච වරේණ්යෝ මීනකේතනඃ ।
නරෝ නාරායණෝ ධීරෝ ධරාපතිරුදාරධීඃ ॥ 12 ॥

ශ්රීපතිඃ ශ්රීනිධිඃ ශ්රීමාන් මාපතිඃ ප්රතිරාජහා ।
බෘංදාපතිඃ කුලං ග්රාමී ධාම බ්රහ්මසනාතනඃ ॥ 13 ॥

රේවතීරමණෝ රාමඃ ප්රියශ්චංචලලෝචනඃ ।
රාමායණශරීරශ්ච රාමෝ රාමඃ ශ්රියඃපතිඃ ॥ 14 ॥

ශර්වරඃ ශර්වරී ශර්වඃ සර්වත්ර ශුභදායකඃ ।
රාධාරාධයිතාරාධී රාධාචිත්තප්රමෝදකඃ ॥ 15 ॥

රාධාරතිසුඛෝපේතෝ රාධාමෝහනතත්පරඃ ।
රාධාවශීකරෝ රාධාහෘදයාංභෝජෂට්පදඃ ॥ 16 ॥

රාධාලිංගනසම්මෝදෝ රාධානර්තනකෞතුකඃ ।
රාධාසංජාතසංප්රීතෝ රාධාකාමඵලප්රදඃ ॥ 17 ॥

බෘංදාපතිඃ කෝකනිධිඃ කෝකශෝකවිනාශනඃ ।
චංද්රාපතිශ්චංද්රපතිශ්චංඩකෝදංඩභංජනඃ ॥ 18 ॥

රාමෝ දාශරථී රාමෝ භෘගුවංශසමුද්භවඃ ।
ආත්මාරාමෝ ජිතක්රෝධෝ මෝහෝ මෝහාංධභංජනඃ ॥ 19 ॥

වෘෂභානුභවෝ භාවී කාශ්යපිඃ කරුණානිධිඃ ।
කෝලාහලෝ හලෝ හාලී හලී හලධරප්රියඃ ॥ 20 ॥

රාධාමුඛාබ්ජමාර්තාංඩෝ භාස්කරෝ රවිජෝ විධුඃ ।
විධිර්විධාතා වරුණෝ වාරුණෝ වාරුණීප්රියඃ ॥ 21 ॥

රෝහිණීහෘදයානංදී වසුදේවාත්මජෝ බලිඃ ।
නීලාංබරෝ රෞහිණේයෝ ජරාසංධවධෝऽමලඃ ॥ 22 ॥

නාගෝ ජවාංභෝ විරුදෝ වීරහා වරදෝ බලී ।
ගෝපදෝ විජයී විද්වාන් ශිපිවිෂ්ටඃ සනාතනඃ ॥ 23 ॥

පරශුරාමවචෝග්රාහී වරග්රාහී සෘගාලහා ।
දමඝෝෂෝපදේෂ්ටා ච රථග්රාහී සුදර්ශනඃ ॥ 24 ॥

වීරපත්නීයශස්ත්රාතා ජරාව්යාධිවිඝාතකඃ ।
ද්වාරකාවාසතත්ත්වජ්ඤෝ හුතාශනවරප්රදඃ ॥ 25 ॥

යමුනාවේගසංහාරී නීලාංබරධරඃ ප්රභුඃ ।
විභුඃ ශරාසනෝ ධන්වී ගණේශෝ ගණනායකඃ ॥ 26 ॥

ලක්ෂ්මණෝ ලක්ෂණෝ ලක්ෂ්යෝ රක්ෂෝවංශවිනාශකඃ ।
වාමනෝ වාමනීභූතෝ වමනෝ වමනාරුහඃ ॥ 27 ॥

යශෝදානංදනඃ කර්තා යමළාර්ජුනමුක්තිදඃ ।
උලූඛලී මහාමානෝ දාමබද්ධාහ්වයී ශමී ॥ 28 ॥

භක්තානුකාරී භගවාන් කේශවෝऽචලධාරකඃ ।
කේශිහා මධුහා මෝහී වෘෂාසුරවිඝාතකඃ ॥ 29 ॥

අඝාසුරවිඝාතී ච පූතනාමෝක්ෂදායකඃ ।
කුබ්ජාවිනෝදී භගවාන් කංසමෘත්යුර්මහාමුඛී ॥ 30 ॥

අශ්වමේධෝ වාජපේයෝ ගෝමේධෝ නරමේධවාන් ।
කංදර්පකෝටිලාවණ්යශ්චංද්රකෝටිසුශීතලඃ ॥ 31 ॥

රවිකෝටිප්රතීකාශෝ වායුකෝටිමහාබලඃ ।
බ්රහ්මා බ්රහ්මාංඩකර්තා ච කමලාවාංඡිතප්රදඃ ॥ 32 ॥

කමලී කමලාක්ෂශ්ච කමලාමුඛලෝලුපඃ ।
කමලාව්රතධාරී ච කමලාභඃ පුරංදරඃ ॥ 33 ॥

සෞභාග්යාධිකචිත්තශ්ච මහාමායී මදෝත්කටඃ ।
තාටකාරිඃ සුරත්රාතා මාරීචක්ෂෝභකාරකඃ ॥ 34 ॥

විශ්වාමිත්රප්රියෝ දාංතෝ රාමෝ රාජීවලෝචනඃ ।
ලංකාධිපකුලධ්වංසී විභීෂණවරප්රදඃ ॥ 35 ॥

සීතානංදකරෝ රාමෝ වීරෝ වාරිධිබංධනඃ ।
ඛරදූෂණසංහාරී සාකේතපුරවාසවාන් ॥ 36 ॥

චංද්රාවළිපතිඃ කූලඃ කේශිකංසවධෝऽමරඃ ।
මාධවෝ මධුහා මාධ්වී මාධ්වීකෝ මාධවී විභුඃ ॥ 37 ॥

මුංජාටවීගාහමානෝ ධේනුකාරිර්දශාත්මජඃ ।
වංශීවටවිහාරී ච ගෝවර්ධනවනාශ්රයඃ ॥ 38 ॥

තථා තාළවනෝද්දේශී භාංඩීරවනශංකරඃ ।
තෘණාවර්තකෘපාකාරී වෘෂභානුසුතාපතිඃ ॥ 39 ॥

රාධාප්රාණසමෝ රාධාවදනාබ්ජමධූත්කටඃ ।
ගෝපීරංජනදෛවජ්ඤඃ ලීලාකමලපූජිතඃ ॥ 40 ॥

ක්රීඩාකමලසංදෝහෝ ගෝපිකාප්රීතිරංජනඃ ।
රංජකෝ රංජනෝ රංගෝ රංගී රංගමහීරුහඃ ॥ 41 ॥

කාමඃ කාමාරිභක්තශ්ච පුරාණපුරුෂඃ කවිඃ ।
නාරදෝ දේවලෝ භීමෝ බාලෝ බාලමුඛාංබුජඃ ॥ 42 ॥

අංබුජෝ බ්රහ්මසාක්ෂී ච යෝගී දත්තවරෝ මුනිඃ ।
ඍෂභඃ පර්වතෝ ග්රාමෝ නදීපවනවල්ලභඃ ॥ 43 ॥

පද්මනාභඃ සුරජ්යේෂ්ඨෝ බ්රහ්මා රුද්රෝऽහිභූෂිතඃ ।
ගණානාං ත්රාණකර්තා ච ගණේශෝ ග්රහිළෝ ග්රහිඃ ॥ 44 ॥

ගණාශ්රයෝ ගණාධ්යක්ෂෝ ක්රෝඩීකෘතජගත්ත්රයඃ ।
යාදවේංද්රෝ ද්වාරකේංද්රෝ මථුරාවල්ලභෝ ධුරී ॥ 45 ॥

භ්රමරඃ කුංතලී කුංතීසුතරක්ෂී මහාමනාඃ ।
යමුනාවරදාතා ච කාශ්යපස්ය වරප්රදඃ ॥ 46 ॥

ශංඛචූඩවධෝද්දාමෝ ගෝපීරක්ෂණතත්පරඃ ।
පාංචජන්යකරෝ රාමී ත්රිරාමී වනජෝ ජයඃ ॥ 47 ॥

ඵාල්ගුණඃ ඵල්ගුනසඛෝ විරාධවධකාරකඃ ।
රුක්මිණීප්රාණනාථශ්ච සත්යභාමාප්රියංකරඃ ॥ 48 ॥

කල්පවෘක්ෂෝ මහාවෘක්ෂෝ දානවෘක්ෂෝ මහාඵලඃ ।
අංකුශෝ භූසුරෝ භාවෝ භාමකෝ භ්රාමකෝ හරිඃ ॥ 49 ॥

සරළඃ ශාශ්වතෝ වීරෝ යදුවංශශිවාත්මකඃ ।
ප්රද්යුම්නෝ බලකර්තා ච ප්රහර්තා දෛත්යහා ප්රභුඃ ॥ 50 ॥

මහාධනෝ මහාවීරෝ වනමාලාවිභූෂණඃ ।
තුලසීදාමශෝභාඪ්යෝ ජාලංධරවිනාශනඃ ॥ 51 ॥

සූරඃ සූර්යෝ මෘකංඩුශ්ච භාස්වරෝ විශ්වපූජිතඃ ।
රවිස්තමෝහා වහ්නිශ්ච බාඩබෝ බඩබානලඃ ॥ 52 ॥

දෛත්යදර්පවිනාශී ච ගරුඩෝ ගරුඩාග්රජඃ ।
ගෝපීනාථෝ මහීනාථෝ බෘංදානාථෝऽවරෝධකඃ ॥ 53 ॥

ප්රපංචී පංචරූපශ්ච ලතාගුල්මශ්ච ගෝමතිඃ ।
ගංගා ච යමුනාරූපෝ ගෝදා වේත්රවතී තථා ॥ 54 ॥

කාවේරී නර්මදා තාපී ගංඩකී සරයූ රජඃ ।
රාජසස්තාමසස්සත්ත්වී සර්වාංගී සර්වලෝචනඃ ॥ 55 ॥

සුධාමයෝऽමෘතමයෝ යෝගිනාං වල්ලභඃ ශිවඃ ।
බුද්ධෝ බුද්ධිමතාං ශ්රේෂ්ඨෝ විෂ්ණුර්ජිෂ්ණුඃ ශචීපතිඃ ॥ 56 ॥

වංශී වංශධරෝ ලෝකෝ විලෝකෝ මෝහනාශනඃ ।
රවරාවෝ රවෝ රාවෝ වලෝ වාලෝ වලාහකඃ ॥ 57 ॥

ශිවෝ රුද්රෝ නලෝ නීලෝ ලාංගලී ලාංගලාශ්රයඃ ।
පාරදඃ පාවනෝ හංසෝ හංසාරූඪෝ ජගත්පතිඃ ॥ 58 ॥

මෝහිනීමෝහනෝ මායී මහාමායෝ මහාසුඛී ।
වෘෂෝ වෘෂාකපිඃ කාලඃ කාලීදමනකාරකඃ ॥ 59 ॥

කුබ්ජාභාග්යප්රදෝ වීරෝ රජකක්ෂයකාරකඃ ।
කෝමලෝ වාරුණී රාජා ජලජෝ ජලධාරකඃ ॥ 60 ॥

හාරකඃ සර්වපාපඝ්නඃ පරමේෂ්ඨී පිතාමහඃ ।
ඛඩ්ගධාරී කෘපාකාරී රාධාරමණසුංදරඃ ॥ 61 ॥

ද්වාදශාරණ්යසංභෝගී ශේෂනාගඵණාලයඃ ।
කාමඃ ශ්යාමඃ සුඛශ්රීදඃ ශ්රීපතිඃ ශ්රීනිධිඃ කෘතිඃ ॥ 62 ॥

හරිර්හරෝ නරෝ නාරෝ නරෝත්තම ඉෂුප්රියඃ ।
ගෝපාලචිත්තහර්තා ච කර්තා සංසාරතාරකඃ ॥ 63 ॥

ආදිදේවෝ මහාදේවෝ ගෞරීගුරුරනාශ්රයඃ ।
සාධුර්මධුර්විධුර්ධාතා ත්රාතාऽක්රූරපරායණඃ ॥ 64 ॥

රෝලංබී ච හයග්රීවෝ වානරාරිර්වනාශ්රයඃ ।
වනං වනී වනාධ්යක්ෂෝ මහාවංද්යෝ මහාමුනිඃ ॥ 65 ॥

ස්යමංතකමණිප්රාජ්ඤඃ විජ්ඤෝ විඝ්නවිඝාතකඃ ।
ගෝවර්ධනෝ වර්ධනීයෝ වර්ධනී වර්ධනප්රියඃ ॥ 66 ॥

වාර්ධන්යෝ වර්ධනෝ වර්ධී වර්ධිෂ්ණස්තු සුඛප්රියඃ ।
වර්ධිතෝ වර්ධකෝ වෘද්ධෝ බෘංදාරකජනප්රියඃ ॥ 67 ॥

ගෝපාලරමණීභර්තා සාංබකුෂ්ඨවිනාශනඃ ।
රුක්මිණීහරණප්රේමා ප්රේමී චංද්රාවලීපතිඃ ॥ 68 ॥

ශ්රීකර්තා විශ්වභර්තා ච නාරායණ නරෝ බලී ।
ගණෝ ගණපතිශ්චෛව දත්තාත්රේයෝ මහාමුනිඃ ॥ 69 ॥

ව්යාසෝ නාරායණෝ දිව්යෝ භව්යෝ භාවුකධාරකඃ ।
ශ්වඃශ්රේයසං ශිවං භද්රං භාවුකං භවුකං ශුභම් ॥ 70 ॥

ශුභාත්මකඃ ශුභඃ ශාස්තා ප්රශස්තෝ මේඝනාදහා ।
බ්රහ්මණ්යදේවෝ දීනානාමුද්ධාරකරණක්ෂමඃ ॥ 71 ॥

කෘෂ්ණඃ කමලපත්රාක්ෂඃ කෘෂ්ණඃ කමලලෝචනඃ ।
කෘෂ්ණඃ කාමී සදා කෘෂ්ණඃ සමස්තප්රියකාරකඃ ॥ 72 ॥

නංදෝ නංදී මහානංදී මාදී මාදනකඃ කිලී ।
මීලී හිලී ගිලී ගෝලී ගෝලෝ ගෝලාලයෝ ගුලී ॥ 73 ॥

ගුග්ගුලී මාරකී ශාඛී වටඃ පිප්පලකඃ කෘතී ।
ම්ලේච්ඡහා කාලහර්තා ච යශෝදා යශ ඒව ච ॥ 74 ॥

අච්යුතඃ කේශවෝ විෂ්ණුඃ හරිඃ සත්යෝ ජනාර්දනඃ ।
හංසෝ නාරායණෝ නීලෝ ලීනෝ භක්තිපරායණඃ ॥ 75 ॥

ජානකීවල්ලභෝ රාමෝ විරාමෝ විෂනාශනඃ ।
සිංහභානුර්මහාභානු-ර්වීරභානුර්මහෝදධිඃ ॥ 76 ॥

සමුද්රෝऽබ්ධිරකූපාරඃ පාරාවාරඃ සරිත්පතිඃ ।
ගෝකුලානංදකාරී ච ප්රතිජ්ඤාපරිපාලකඃ ॥ 77 ॥

සදාරාමඃ කෘපාරාමෝ මහාරාමෝ ධනුර්ධරඃ ।
පර්වතඃ පර්වතාකාරෝ ගයෝ ගේයෝ ද්විජප්රියඃ ॥ 78 ॥

කමලාශ්වතරෝ රාමෝ රාමායණප්රවර්තකඃ ।
ද්යෞර්දිවෝ දිවසෝ දිව්යෝ භව්යෝ භාගී භයාපහඃ ॥ 79 ॥

පාර්වතීභාග්යසහිතෝ භර්තා ලක්ෂ්මීසහායවාන් । [විලාසවාන්]
විලාසී සාහසී සර්වී ගර්වී ගර්විතලෝචනඃ ॥ 80 ॥

සුරාරිර්ලෝකධර්මජ්ඤෝ ජීවනෝ ජීවනාංතකඃ ।
යමෝ යමාරිර්යමනෝ යමී යාමවිඝාතකඃ ॥ 81 ॥

වංශුලී පාංශුලී පාංසුඃ පාංඩුරර්ජුනවල්ලභඃ ।
ලලිතා චංද්රිකාමාලා මාලී මාලාංබුජාශ්රයඃ ॥ 82 ॥

අංබුජාක්ෂෝ මහායක්ෂෝ දක්ෂශ්චිංතාමණිප්රභුඃ ।
මණිර්දිනමණිශ්චෛව කේදාරෝ බදරීශ්රයඃ ॥ 83 ॥

බදරීවනසංප්රීතෝ ව්යාසඃ සත්යවතීසුතඃ ।
අමරාරිනිහංතා ච සුධාසිංධුවිධූදයඃ ॥ 84 ॥

චංද්රෝ රවිඃ ශිවඃ ශූලී චක්රී චෛව ගදාධරඃ ।
ශ්රීකර්තා ශ්රීපතිඃ ශ්රීදඃ ශ්රීදේවෝ දේවකීසුතඃ ॥ 85 ॥

ශ්රීපතිඃ පුංඩරීකාක්ෂඃ පද්මනාභෝ ජගත්පතිඃ ।
වාසුදේවෝऽප්රමේයාත්මා කේශවෝ ගරුඩධ්වජඃ ॥ 86 ॥

නාරායණඃ පරං ධාම දේවදේවෝ මහේශ්වරඃ ।
චක්රපාණිඃ කළාපූර්ණෝ වේදවේද්යෝ දයානිධිඃ ॥ 87 ॥

භගවාන් සර්වභූතේශෝ ගෝපාලඃ සර්වපාලකඃ ।
අනංතෝ නිර්ගුණෝ නිත්යෝ නිර්විකල්පෝ නිරංජනඃ ॥ 88 ॥

නිරාධාරෝ නිරාකාරෝ නිරාභාසෝ නිරාශ්රයඃ ।
පුරුෂඃ ප්රණවාතීතෝ මුකුංදඃ පරමේශ්වරඃ ॥ 89 ॥

ක්ෂණාවනිඃ සාර්වභෞමෝ වෛකුංඨෝ භක්තවත්සලඃ ।
විෂ්ණුර්දාමෝදරඃ කෘෂ්ණෝ මාධවෝ මථුරාපතිඃ ॥ 90 ॥

දේවකීගර්භසංභූතෝ යශෝදාවත්සලෝ හරිඃ ।
ශිවඃ සංකර්ෂණඃ ශංභුර්භූතනාථෝ දිවස්පතිඃ ॥ 91 ॥

අව්යයඃ සර්වධර්මජ්ඤෝ නිර්මලෝ නිරුපද්රවඃ ।
නිර්වාණනායකෝ නිත්යෝ නීලජීමූතසන්නිභඃ ॥ 92 ॥

කලාක්ෂයශ්ච සර්වජ්ඤඃ කමලාරූපතත්පරඃ ।
හෘෂීකේශඃ පීතවාසා වසුදේවප්රියාත්මජඃ ॥ 93 ॥

නංදගෝපකුමාරාර්යෝ නවනීතාශනෝ විභුඃ ।
පුරාණඃ පුරුෂශ්රේෂ්ඨඃ ශංඛපාණිඃ සුවික්රමඃ ॥ 94 ॥

අනිරුද්ධශ්චක්රධරඃ ශාර්ඞ්ගපාණිශ්චතුර්භුජඃ ।
ගදාධරඃ සුරාර්තිඝ්නෝ ගෝවිංදෝ නංදකායුධඃ ॥ 95 ॥

බෘංදාවනචරඃ ශෞරිර්වේණුවාද්යවිශාරදඃ ।
තෘණාවර්තාංතකෝ භීමසාහසෝ බහුවික්රමඃ ॥ 96 ॥

ශකටාසුරසංහාරී බකාසුරවිනාශනඃ ।
ධේනුකාසුරසංහාරී පූතනාරිර්නෘකේසරී ॥ 97 ॥

පිතාමහෝ ගුරුස්සාක්ෂී ප්රත්යගාත්මා සදාශිවඃ ।
අප්රමේයඃ ප්රභුඃ ප්රාජ්ඤෝऽප්රතර්ක්යඃ ස්වප්නවර්ධනඃ ॥ 98 ॥

ධන්යෝ මාන්යෝ භවෝ භාවෝ ධීරඃ ශාංතෝ ජගද්ගුරුඃ ।
අංතර්යාමීශ්වරෝ දිව්යෝ දෛවජ්ඤෝ දේවසංස්තුතඃ ॥ 99 ॥

ක්ෂීරාබ්ධිශයනෝ ධාතා ලක්ෂ්මීවාන් ලක්ෂ්මණාග්රජඃ ।
ධාත්රීපතිරමේයාත්මා චංද්රශේඛරපූජිතඃ ॥ 100 ॥

ලෝකසාක්ෂී ජගච්චක්ෂුඃ පුණ්යචාරිත්රකීර්තනඃ ।
කෝටිමන්මථසෞංදර්යෝ ජගන්මෝහනවිග්රහඃ ॥ 101 ॥

මංදස්මිතතනුර්ගෝපගෝපිකාපරිවේෂ්ටිතඃ ।
ඵුල්ලාරවිංදනයනශ්චාණූරාංධ්රනිෂූදනඃ ॥ 102 ॥

ඉංදීවරදළශ්යාමෝ බර්හිබර්හාවතංසකඃ ।
මුරළීනිනදාහ්ලාදෝ දිව්යමාලාංබරාවෘතඃ ॥ 103 ॥

සුකපෝලයුගඃ සුභ්රූයුගළඃ සුලලාටකම් ।
කංබුග්රීවෝ විශාලාක්ෂෝ ලක්ෂ්මීවාංඡුභලක්ෂණඃ ॥ 104 ॥

පීනවක්ෂාශ්චතුර්බාහුශ්චතුර්මූර්තිස්ත්රිවික්රමඃ ।
කළංකරහිතඃ ශුද්ධෝ දුෂ්ටශත්රුනිබර්හණඃ ॥ 105 ॥

කිරීටකුංඩලධරඃ කටකාංගදමංඩිතඃ ।
මුද්රිකාභරණෝපේතඃ කටිසූත්රවිරාජිතඃ ॥ 106 ॥

මංජීරරංජිතපදඃ සර්වාභරණභූෂිතඃ ।
වින්යස්තපාදයුගළෝ දිව්යමංගළවිග්රහඃ ॥ 107 ॥

ගෝපිකානයනානංදඃ පූර්ණචංද්රනිභානනඃ ।
සමස්තජගදානංදඃ සුංදරෝ ලෝකනංදනඃ ॥ 108 ॥

යමුනාතීරසංචාරී රාධාමන්මථවෛභවඃ ।
ගෝපනාරීප්රියෝ දාංතෝ ගෝපීවස්ත්රාපහාරකඃ ॥ 109 ॥

ශෘංගාරමූර්තිඃ ශ්රීධාමා තාරකෝ මූලකාරණම් ।
සෘෂ්ටිසංරක්ෂණෝපායඃ ක්රූරාසුරවිභංජනඃ ॥ 110 ॥

නරකාසුරසංහාරී මුරාරිර්වෛරිමර්දනඃ ।
ආදිතේයප්රියෝ දෛත්යභීකරෝ යදුශේඛරඃ ॥ 111 ॥

ජරාසංධකුලධ්වංසී කංසාරාතිඃ සුවික්රමඃ ।
පුණ්යශ්ලෝකඃ කීර්තනීයෝ යාදවේංද්රෝ ජගන්නුතඃ ॥ 112 ॥

රුක්මිණීරමණඃ සත්යභාමාජාංබවතීප්රියඃ ।
මිත්රවිංදානාග්නජිතීලක්ෂ්මණාසමුපාසිතඃ ॥ 113 ॥

සුධාකරකුලේ ජාතෝऽනංතඃ ප්රබලවික්රමඃ ।
සර්වසෞභාග්යසංපන්නෝ ද්වාරකාපට්ටණස්ථිතඃ ॥ 114 ॥

භද්රාසූර්යසුතානාථෝ ලීලාමානුෂවිග්රහඃ ।
සහස්රෂෝඩශස්ත්රීශෝ භෝගමෝක්ෂෛකදායකඃ ॥ 115 ॥

වේදාංතවේද්යඃ සංවේද්යෝ වෛද්යෝ බ්රහ්මාංඩනායකඃ ।
ගෝවර්ධනධරෝ නාථඃ සර්වජීවදයාපරඃ ॥ 116 ॥

මූර්තිමාන් සර්වභූතාත්මා ආර්තත්රාණපරායණඃ ।
සර්වජ්ඤඃ සර්වසුලභඃ සර්වශාස්ත්රවිශාරදඃ ॥ 117 ॥

ෂඩ්ගුණෛශ්වර්යසංපන්නඃ පූර්ණකාමෝ ධුරංධරඃ ।
මහානුභාවඃ කෛවල්යදායකෝ ලෝකනායකඃ ॥ 118 ॥

ආදිමධ්යාංතරහිතඃ ශුද්ධසාත්ත්විකවිග්රහඃ ।
අසමානඃ සමස්තාත්මා ශරණාගතවත්සලඃ ॥ 119 ॥

උත්පත්තිස්ථිතිසංහාරකාරණං සර්වකාරණම් ।
ගංභීරඃ සර්වභාවජ්ඤඃ සච්චිදානංදවිග්රහඃ ॥ 120 ॥

විෂ්වක්සේනඃ සත්යසංධඃ සත්යවාක් සත්යවික්රමඃ ।
සත්යව්රතඃ සත්යරතඃ සත්යධර්මපරායණඃ ॥ 121 ॥

ආපන්නාර්තිප්රශමනඃ ද්රෞපදීමානරක්ෂකඃ ।
කංදර්පජනකඃ ප්රාජ්ඤෝ ජගන්නාටකවෛභවඃ ॥ 122 ॥

භක්තිවශ්යෝ ගුණාතීතඃ සර්වෛශ්වර්යප්රදායකඃ ।
දමඝෝෂසුතද්වේෂී බාණබාහුවිඛංඩනඃ ॥ 123 ॥

භීෂ්මභක්තිප්රදෝ දිව්යඃ කෞරවාන්වයනාශනඃ ।
කෞංතේයප්රියබංධුශ්ච පාර්ථස්යංදනසාරථිඃ ॥ 124 ॥

නාරසිංහෝ මහාවීරඃ ස්තංභජාතෝ මහාබලඃ ।
ප්රහ්ලාදවරදඃ සත්යෝ දේවපූජ්යෝऽභයංකරඃ ॥ 125 ॥

උපේංද්ර ඉංද්රාවරජෝ වාමනෝ බලිබංධනඃ ।
ගජේංද්රවරදඃ ස්වාමී සර්වදේවනමස්කෘතඃ ॥ 126 ॥

ශේෂපර්යංකශයනෝ වෛනතේයරථෝ ජයී ।
අව්යාහතබලෛශ්වර්යසංපන්නඃ පූර්ණමානසඃ ॥ 127 ॥

යෝගීශ්වරේශ්වරඃ සාක්ෂී ක්ෂේත්රජ්ඤෝ ජ්ඤානදායකඃ ।
යෝගිහෘත්පංකජාවාසෝ යෝගමායාසමන්විතඃ ॥ 128 ॥

නාදබිංදුකළාතීතශ්චතුර්වර්ගඵලප්රදඃ ।
සුෂුම්නාමාර්ගසංචාරී දේහස්යාංතරසංස්ථිතඃ ॥ 129 ॥

දේහේංද්රියමනඃප්රාණසාක්ෂී චේතඃප්රසාදකඃ ।
සූක්ෂ්මඃ සර්වගතෝ දේහී ජ්ඤානදර්පණගෝචරඃ ॥ 130 ॥

තත්ත්වත්රයාත්මකෝऽව්යක්තඃ කුංඩලී සමුපාශ්රිතඃ ।
බ්රහ්මණ්යඃ සර්වධර්මජ්ඤඃ ශාංතෝ දාංතෝ ගතක්ලමඃ ॥ 131 ॥

ශ්රීනිවාසඃ සදානංදෝ විශ්වමූර්තිර්මහාප්රභුඃ ।
සහස්රශීර්ෂා පුරුෂඃ සහස්රාක්ෂඃ සහස්රපාත් ॥ 132 ॥

සමස්තභුවනාධාරඃ සමස්තප්රාණරක්ෂකඃ ।
සමස්තස්සර්වභාවජ්ඤෝ ගෝපිකාප්රාණවල්ලභඃ ॥ 133 ॥

නිත්යෝත්සවෝ නිත්යසෞඛ්යෝ නිත්යශ්රීර්නිත්යමංගළම් ।
ව්යූහාර්චිතෝ ජගන්නාථඃ ශ්රීවෛකුංඨපුරාධිපඃ ॥ 134 ॥

පූර්ණානංදඝනීභූතෝ ගෝපවේෂධරෝ හරිඃ ।
කලාපකුසුමශ්යාමඃ කෝමලඃ ශාංතවිග්රහඃ ॥ 135 ॥

ගෝපාංගනාවෘතෝऽනංතෝ බෘංදාවනසමාශ්රයඃ ।
වේණුනාදරතඃ ශ්රේෂ්ඨෝ දේවානාං හිතකාරකඃ ॥ 136 ॥

ජලක්රීඩාසමාසක්තෝ නවනීතස්ය තස්කරඃ ।
ගෝපාලකාමිනීජාරශ්චෝරජාරශිඛාමණිඃ ॥ 137 ॥

පරංජ්යෝතිඃ පරාකාශඃ පරාවාසඃ පරිස්ඵුටඃ ।
අෂ්ටාදශාක්ෂරෝ මංත්රෝ ව්යාපකෝ ලෝකපාවනඃ ॥ 138 ॥

සප්තකෝටිමහාමංත්රශේඛරෝ දේවශේඛරඃ ।
විජ්ඤානජ්ඤානසංධානස්තේජෝරාශිර්ජගත්පතිඃ ॥ 139 ॥

භක්තලෝකප්රසන්නාත්මා භක්තමංදාරවිග්රහඃ ।
භක්තදාරිද්ර්යශමනෝ භක්තානාං ප්රීතිදායකඃ ॥ 140 ॥

භක්තාධීනමනාඃ පූජ්යෝ භක්තලෝකශිවංකරඃ ।
භක්තාභීෂ්ටප්රදඃ සර්වභක්තාඝෞඝනිකෘංතකඃ ॥ 141 ॥

අපාරකරුණාසිංධුර්භගවාන් භක්තතත්පරඃ ॥ 142 ॥

[ඉති ශ්රීරාධිකානාථ නාම්නාං සාහස්රමීරිතම් । ]
ස්මරණාත්පාපරාශීනාං ඛංඩනං මෘත්යුනාශනම් ॥ 1 ॥

වෛෂ්ණවානාං ප්රියකරං මහාදාරිද්ර්යනාශනම් ।
බ්රහ්මහත්යාසුරාපානං පරස්ත්රීගමනං තථා ॥ 2 ॥

පරද්රව්යාපහරණං පරද්වේෂසමන්විතම් ।
මානසං වාචිකං කායං යත්පාපං පාපසංභවම් ॥ 3 ॥

සහස්රනාමපඨනාත්සර්වේ නශ්යංති තත්ක්ෂණාත් ।
මහාදාරිද්ර්යයුක්තෝ වෛ වෛෂ්ණවෝ විෂ්ණුභක්තිමාන් ॥ 4 ॥

කාර්තික්යාං යඃ පඨේද්රාත්රෞ ශතමෂ්ටෝත්තරං ක්රමාත් ।
පීතාංබරධරෝ ධීමාන් සුගංධී පුෂ්පචංදනෛඃ ॥ 5 ॥

පුස්තකං පූජයිත්වා ච නෛවේද්යාදිභිරේව ච ।
රාධාධ්යානාංකිතෝ ධීරෝ වනමාලාවිභූෂිතඃ ॥ 6 ॥

ශතමෂ්ටෝත්තරං දේවි පඨේන්නාමසහස්රකම් ।
චෛත්රේ කෘෂ්ණේ ච ශුක්ලේ ච කුහූසංක්රාංතිවාසරේ ॥ 7 ॥

පඨිතව්යං ප්රයත්නේන ත්රෛලෝක්යං මෝහයේත් ක්ෂණාත් ।
තුලසීමාලයා යුක්තෝ වෛෂ්ණවෝ භක්තිතත්පරඃ ॥ 8 ॥

රවිවාරේ ච ශුක්රේ ච ද්වාදශ්යාං ශ්රාද්ධවාසරේ ।
බ්රාහ්මණං පූජයිත්වා ච භෝජයිත්වා විධානතඃ ॥ 9 ॥

පඨේන්නාමසහස්රං ච තතඃ සිද්ධිඃ ප්රජායතේ ।
මහානිශායාං සතතං වෛෂ්ණවෝ යඃ පඨේත්සදා ॥ 10 ॥

දේශාංතරගතා ලක්ෂ්මීඃ සමායාති න සංශයඃ ।
ත්රෛලෝක්යේ තු මහාදේවි සුංදර්යඃ කාමමෝහිතාඃ ॥ 11 ॥

මුග්ධාඃ ස්වයං සමායාංති වෛෂ්ණවං ච භජංති තාඃ ।
රෝගී රෝගාත්ප්රමුච්යේත බද්ධෝ මුච්යේත බංධනාත් ॥ 12 ॥

ගර්භිණී ජනයේත්පුත්රං කන්යා විංදති සත්පතිම් ।
රාජානෝ වශතාං යාංති කිං පුනඃ ක්ෂුද්රමානුෂාඃ ॥ 13 ॥

සහස්රනාමශ්රවණාත් පඨනාත් පූජනාත් ප්රියේ ।
ධාරණාත් සර්වමාප්නෝති වෛෂ්ණවෝ නාත්ර සංශයඃ ॥ 14 ॥

වංශීවටේ චාන්යවටේ තථා පිප්පලකේऽථ වා ।
කදංබපාදපතලේ ශ්රීගෝපාලස්ය සන්නිධෞ ॥ 15 ॥

යඃ පඨේද්වෛෂ්ණවෝ නිත්යං ස යාති හරිමංදිරම් ।
කෘෂ්ණේනෝක්තං රාධිකායෛ තයා ප්රෝක්තං පුරා ශිවේ ॥ 16 ॥

නාරදාය මයා ප්රෝක්තං නාරදේන ප්රකාශිතම් ।
මයා තව වරාරෝහේ ප්රෝක්තමේතත්සුදුර්ලභම් ॥ 17 ॥

ගෝපනීයං ප්රයත්නේන න ප්රකාශ්යං කදාචන ।
ශඨාය පාපිනේ චෛව ලංපටාය විශේෂතඃ ॥ 18 ॥

න දාතව්යං න දාතව්යං න දාතව්යං කදාචන ।
දේයං ශාංතාය ශිෂ්යාය විෂ්ණුභක්තිරතාය ච ॥ 19 ॥

ගෝදානබ්රහ්මයජ්ඤාදේර්වාජපේයශතස්ය ච ।
අශ්වමේධසහස්රස්ය ඵලං පාඨේ භවේද්ධ්රුවම් ॥ 20 ॥

මෝහනං ස්තංභනං චෛව මාරණෝච්චාටනාදිකම් ।
යද්යද්වාංඡති චිත්තේන තත්තත්ප්රාප්නෝති වෛෂ්ණවඃ ॥ 21 ॥

ඒකාදශ්යාං නරඃ ස්නාත්වා සුගංධද්රව්යතෛලකෛඃ ।
ආහාරං බ්රාහ්මණේ දත්ත්වා දක්ෂිණාං ස්වර්ණභූෂණම් ॥ 22 ॥

තතඃ ප්රාරංභකර්තාසෞ සර්වං ප්රාප්නෝති මානවඃ ।
ශතාවෘත්ත සහස්රං ච යඃ පඨේද්වෛෂ්ණවෝ ජනඃ ॥ 23 ॥

ශ්රීබෘංදාවනචංද්රස්ය ප්රසාදාත්සර්වමාප්නුයාත් ।
යද්ගෘහේ පුස්තකං දේවි පූජිතං චෛව තිෂ්ඨති ॥ 24 ॥

න මාරී න ච දුර්භික්ෂං නෝපසර්ගභයං ක්වචිත් ।
සර්පාදිභූතයක්ෂාද්යා නශ්යංතේ නාත්ර සංශයඃ ॥ 25 ॥

ශ්රීගෝපාලෝ මහාදේවි වසේත්තස්ය ගෘහේ සදා ।
යද්ගෘහේ ච සහස්රං ච නාම්නාං තිෂ්ඨති පූජිතම් ॥ 26 ॥

ඉති ශ්රීසම්මෝහනතංත්රේ හරගෞරීසංවාදේ ශ්රීගෝපාල සහස්රනාමස්තෝත්රම් ।