యామునార్యసుధాంభోధిమవగాహ్య యథామతి ।
ఆదాయ భక్తియోగాఖ్యం రత్నం సందర్శయామ్యహమ్ ॥
స్వాధీన త్రివిధచేతనాచేతనస్వరూపస్థితి ప్రవృత్తిభేదం, క్లేశ కర్మాద్యశేషదోషాసంస్పృష్టం, స్వాభావికానవధికాతిశయ జ్ఞానబలైశ్వర్యవీర్యశక్తితేజః ప్రభృత్యసంఖ్యేయ కల్యాణగుణగణౌఘ మహార్ణవం, పరమపురుషం, భగవంతం, నారాయణం, స్వామిత్వేన సుహృత్వేన గురుత్వేన చ పరిగృహ్య ఐకాంతికాత్యంతిక తత్పాదాంబుజద్వయ పరిచర్యైకమనోరథః, తత్ప్రాప్తయే చ తత్పాదాంబుజద్వయ ప్రపత్తేరన్యన్న మే కల్పకోటిసహస్రేణాపి సాధనమస్తీతి మన్వానః, తస్యైవ భగవతో నారాయణస్య అఖిలసత్త్వదయైకసాగరస్య అనాలోచిత గుణగుణాఖండ జనానుకూలామర్యాద శీలవతః, స్వాభావికానవధికాతిశయ గుణవత్తయా దేవతిర్యఙ్మనుష్యాద్యఖిలజన హృదయానందనస్య ఆశ్రితవాత్సల్యైకజలధేః భక్తజనసంశ్లేషైకభోగస్య నిత్యజ్ఞానక్రియైశ్వర్యాది భోగసామగ్రీసమృద్ధస్య, మహావిభూతేః, శ్రీమచ్చరణారవిందయుగళం అనన్యాత్మసంజీవనేన తద్గతసర్వభావేన శరణమనువ్రజేత్ । తతశ్చ ప్రత్యహమాత్మోజ్జీవనాయైవమనుస్మరేత్ । చతుర్దశభువనాత్మకం అండం, దశగుణితోత్తరం చ ఆవరణసప్తకం, సమస్తం కార్యకారణ(జాత)మతీత్య, వర్తమానే పరమవ్యోమశబ్దాభిధేయే, బ్రహ్మాదీనాం వాఙ్మనసాఽగోచరే, శ్రీమతి వైకుంఠే దివ్యలోకే, సనకవిధిశివాదిభిరపి అచింత్యస్వభావైశ్వర్యైః, నిత్యసిద్ధైరనంతైర్భగవదానుకూల్యైక భోగైర్దివ్యపురుషైః మహాత్మభిః ఆపూరితే, తేషామపి ఇయత్పరిమాణం, ఇయదైశ్వర్యం, ఈదృశస్వభావమితి పరిచ్ఛేత్తుమయోగ్యే, దివ్యావరణశతసహస్రావృతే, దివ్యకల్పకతరూపశోభితే, దివ్యోద్యాన శతసహస్రకోటిభిరావృతే, అతిప్రమాణే దివ్యాయతనే, కస్మింశ్చిద్విచిత్ర దివ్యరత్నమయ దివ్యాస్థానమండపే, దివ్యరత్నస్తంభ శతసహస్రకోటిభిరుపశోభితే,
దివ్యనానారత్నకృతస్థల విచిత్రితే, దివ్యాలంకారాలంకృతే, పరితః పతితైః పతమానైః పాదపస్థైశ్చ నానాగంధవర్ణైర్దివ్యపుష్పైః శోభమానైర్దివ్యపుష్పోపవనైరుపశోభితే, సంకీర్ణపారిజాతాది కల్పద్రుమోపశోభితైః, అసంకీర్ణైశ్చ కైశ్చిదంతస్స్థపుష్పరత్నాదినిర్మిత దివ్యలీలామండప శతసహస్రోపశోభితైః, సర్వదాఽనుభూయమానైరప్యపూర్వవదాశ్చర్యమావహద్భిః క్రీడాశైల శతసహస్రైరలంకృతైః, కైశ్చిన్నారాయణదివ్యలీలాఽసాధారణైః, కైశ్చిత్పద్మవనాలయా దివ్యలీలాఽసాధారణైః, సాధారణైశ్చ కైశ్చిత్ శుకశారికామయూరకోకిలాదిభిః కోమలకూజితైరాకులైః, దివ్యోద్యాన శతసహస్రైరావృతే, మణిముక్తాప్రవాల కృతసోపానైః, దివ్యామలామృతరసోదకైః, దివ్యాండజవరైః, అతిరమణీయదర్శనైః అతిమనోహరమధురస్వరైః ఆకులైః, అంతస్థ ముక్తామయ దివ్యక్రీడాస్థానోపశోభితైః దివ్యసౌగంధికవాపీశతసహస్రైః, దివ్యరాజహంసావళీవిరాజితైరావృతే, నిరస్తాతిశయానందైకరసతయా చానంత్యాచ్చ ప్రవిష్టానున్మాదయద్భిః క్రీడోద్దేశైర్విరాజితే, తత్ర తత్ర కృత దివ్యపుష్పపర్యంకోపశోభితే, నానాపుష్పాసవాస్వాద మత్తభృంగావలీభిః ఉద్గీయమాన దివ్యగాంధర్వేణాపూరితే, చందనాగరుకర్పూర దివ్యపుష్పావగాహి మందానిలాసేవ్యమానే, మధ్యే పుష్పసంచయ విచిత్రితే, మహతి దివ్యయోగపర్యంకే అనంతభోగిని, శ్రీమద్వైకుంఠైశ్వర్యాది దివ్యలోకం ఆత్మకాంత్యా విశ్వమాప్యాయయంత్యా శేష శేషాశనాది సర్వపరిజనం భగవతస్తత్తదవస్థోచిత పరిచర్యాయాం ఆజ్ఞాపయంత్యా, శీలరూపగుణ విలాసాదిభిః ఆత్మానురూపయా శ్రియా సహాసీనం, ప్రత్యగ్రోన్మీలిత సరసిజసదృశ నయనయుగళం, స్వచ్ఛనీలజీమూతసంకాశం, అత్యుజ్జ్వలపీతవాససం, స్వయా ప్రభయాఽతినిర్మలయా అతిశీతలయా అతికోమలయా స్వచ్ఛమాణిక్యాభయా కృత్స్నం జగద్భాసయంతం,
అచింత్యదివ్యాద్భుత నిత్యయౌవన స్వభావలావణ్యమయామృతసాగరం, అతిసౌకుమార్యాది ఈషత్ ప్రస్విన్నవదాలక్ష్యమాణ లలాటఫలక దివ్యాలకావలీవిరాజితం, ప్రబుద్ధముగ్ధాంబుజ చారులోచనం, సవిభ్రమభ్రూలతం, ఉజ్జ్వలాధరం, శుచిస్మితం, కోమలగండం, ఉన్నసం, ఉదగ్రపీనాంస విలంబికుండలాలకావలీ బంధుర కంబుకంధరం, ప్రియావతం‍సోత్పల కర్ణభూషణశ్లథాలకాబంధ విమర్దశంసిభిః చతుర్భిరాజానువిలంబిభిర్భుజైర్విరాజితం, అతికోమల దివ్యరేఖాలంకృతాతామ్రకరతలం, దివ్యాంగుళీయకవిరాజితం, అతికోమల దివ్యనఖావళీవిరాజితం, అతిరక్తాంగులీభిరలంకృతం, తత్క్షణోన్మీలిత పుండరీక సదృశచరణయుగళం, అతిమనోహర కిరీటమకుట చూడావతంస మకరకుండల గ్రైవేయక హార కేయూర కటక శ్రీవత్స కౌస్తుభ ముక్తాదామోదరబంధన పీతాంబర కాంచీగుణ నూపురాదిభిరత్యంత సుఖస్పర్శైః దివ్యగంధైర్భూషణైర్భూషితం, శ్రీమత్యా వైజయంత్యా వనమాలయా విరాజితం, శంఖచక్రగదాఽసి శారంగాది దివ్యాయుధైః సేవ్యమానం, స్వసంకల్పమాత్రావక్లుప్త జగజ్జన్మస్థితిధ్వంసాదికే శ్రీమతి విష్వక్సేనే న్యస్త సమస్తాత్మైశ్వర్యం, వైనతేయాదిభిః స్వభావతో నిరస్త సమస్త సాంసారిక స్వభావైః భగవత్పరిచర్యాకరణ యోగ్యైర్భగవత్పరిచర్యైకభోగై-ర్నిత్యసిద్ధైరనంతైః యథా యోగం సేవ్యమానం, ఆత్మభోగేన అననుసంహితపరాదికాల దివ్యామల కోమలావలోకనేన విశ్వమాహ్లాదయంతం, ఈషదున్మీలిత ముఖాంబుజోదరవినిర్గతేన దివ్యాననారవింద శోభాజననేన దివ్యగాంభీర్యౌదార్య సౌందర్య మాధుర్యాద్యనవధిక గుణగణవిభూషితేన, అతిమనోహర దివ్యభావగర్భేణ దివ్యలీలాఽఽలాపామృతేన అఖిలజన హృదయాంతరాణ్యాపూరయంతం భగవంతం నారాయణం ధ్యానయోగేన దృష్ట్వా, తతో భగవతో నిత్యస్వామ్యమాత్మనో నిత్యదాస్యం చ యథావస్థితమనుసంధాయ, కదాఽహం భగవంతం నారాయణం, మమ కులనాథం, మమ కులదైవతం, మమ కులధనం, మమ భోగ్యం, మమ మాతరం, మమ పితరం, మమ సర్వం సాక్షాత్కరవాణి చక్షుషా ।
కదాఽహం భగవత్పాదాంబుజద్వయం శిరసా సంగ్రహీష్యామి । కదాఽహం భగవత్పాదాంబుజద్వయ పరిచర్యాఽఽశయా నిరస్తసమస్తేతర భోగాశః, అపగత సమస్త సాంసారికస్వభావః తత్పాదాంబుజద్వయం ప్రవేక్ష్యామి । కదాఽహం భగవత్పాదాంబుజద్వయ పరిచర్యాకరణయోగ్య-స్తదేకభోగస్తత్పాదౌ పరిచరిష్యామి । కదా మాం భగవాన్ స్వకీయయా అతిశీతలయా దృశా అవలోక్య, స్నిగ్ధగంభీరమధురయా గిరా పరిచర్యాయాం ఆజ్ఞాపయిష్యతి, ఇతి భగవత్పరిచర్యాయామాశాం వర్ధయిత్వా తయైవాఽశయా తత్ప్రసాదోపబృంహితయా భగవంతముపేత్య, దూరాదేవ భగవంతం శేషభోగే శ్రియా సహాసీనం వైనతేయాదిభిః సేవ్యమానం, సమస్తపరివారాయ శ్రీమతే నారాయణాయ నమః, ఇతి ప్రణమ్య ఉత్థాయోత్థాయ పునః పునః ప్రణమ్య అత్యంత సాధ్వసవినయావనతో భూత్వా, భగవత్పారిషదగణనాయకైర్ద్వారపాలైః కృపయా స్నేహగర్భయా దృశాఽవలోకితః సమ్యగభివందితైస్తైస్తైరేవానుమతో భగవంతముపేత్య, శ్రీమతా మూలమంత్రేణ మామైకాంతికాత్యంతిక పరిచర్యాకరణాయ పరిగృహ్ణీష్వ ఇతి యాచమానః ప్రణమ్యాత్మానం భగవతే నివేదయేత్ ।
తతో భగవతా స్వయమేవాత్మసంజీవనేన అమర్యాదశీలవతా అతిప్రేమాన్వితేన అవలోకనేనావలోక్య సర్వదేశ సర్వకాల సర్వావస్థోచితాత్యంతశేషభావాయ స్వీకృతోఽనుజ్ఞాతశ్చ అత్యంతసాధ్వసవినయావనతః కింకుర్వాణః కృతాంజలిపుటో భగవంతముపాసీత । తతశ్చానుభూయమాన భావవిశేషః నిరతిశయప్రీత్యాఽన్యత్కించిత్కర్తుం ద్రష్టుం స్మర్తుమశక్తః పునరపి శేషభావమేవ యాచమానో భగవంతమేవావిచ్ఛిన్నస్రోతోరూపేణావలోకనేన అవలోకయన్నాసీత । తతో భగవతా స్వయమేవాత్మసంజీవనేనావలోకనేనావలోక్య సస్మితమాహూయ సమస్తక్లేశాపహం నిరతిశయసుఖావహమాత్మీయం, శ్రీమత్పాదారవిందయుగళం శిరసి కృతం ధ్యాత్వా, అమృతసాగరాంతర్నిమగ్నసర్వావయవః సుఖమాసీత ।
లక్ష్మీపతేర్యతిపతేశ్చ దయైకధామ్నోః
యోఽసౌ పురా సమజనిష్ట జగద్ధితార్థమ్ ।
ప్రాప్యం ప్రకాశయతు నః పరమం రహస్యం
సంవాద ఏష శరణాగతి మంత్రసారః ॥
ఇతి శ్రీభగవద్రామానుజవిరచితే శ్రీవైకుంఠగద్యమ్ ।
