ఋషిరువాచ ।
జుష్టం బతాద్యాఖిలసత్త్వరాశేః
సాంసిదఃధ్యమక్ష్ణోస్తవ దర్శనాన్నః ।
యద్దర్శనం జన్మభిరీడ్య సద్భి-
రాశాసతే యోగినో రూఢయోగాః ॥ 13 ॥
యే మాయయా తే హతమేధసస్త్వ-
త్పాదారవిందం భవసింధుపోతమ్ ।
ఉపాసతే కామలవాయ తేషాం
రాసీశ కామాన్నిరయేఽపి యే స్యుః ॥ 14 ॥
తథా స చాహం పరివోఢుకామః
సమానశీలాం గృహమేధధేనుమ్ ।
ఉపేయివాన్ మూలమశేషమూలం
దురాశయః కామదుఘాంఘ్రిపస్య ॥ 15 ॥
ప్రజాపతేస్తే వచసాధీశ తంత్యా
లోకః కిలాయం కామహతోఽనుబద్ధః ।
అహం చ లోకానుగతో వహామి
బలిం చ శుక్లానిమిషాయ తుభ్యమ్ ॥ 16 ॥
లోకాంశ్చ లోకానుగతాన్ పశూంశ్చ
హిత్వా శ్రితాస్తే చరణాతపత్రమ్ ।
పరస్పరం త్వద్గుణవాదసీధు-
పీయూషనిర్యాపితదేహధర్మాః ॥ 17 ॥
న తేఽజరాక్షభ్రమిరాయురేషాం
త్రయోదశారం త్రిశతం షష్టిపర్వ ।
షణ్నేమ్యనంతచ్ఛది యత్త్రిణాభి-
కరాలస్రోతో జగదాచ్ఛిద్య ధావత్ ॥ 18 ॥
ఏకః స్వయం సన్ జగతః సిసృక్షయా
ద్వితీయయాఽత్మన్నధియోగమాయయా ।
సృజస్యదః పాసి పునర్గ్రసిష్యసే
యథోర్ణనాభిర్భగవన్ స్వశక్తిభిః ॥ 19 ॥
నైతద్బతాధీశ పదం తవేప్సితం
యన్మాయయా నస్తనుషే భూతసూక్ష్మమ్ ।
అనుగ్రహాయాస్త్వపి యర్హి మాయయా
లసత్తులస్యా తనువా విలక్షితః ॥ 20 ॥
తం త్వానుభూత్యోపరతక్రియార్థం
స్వమాయయా వర్తితలోకతంత్రమ్ ।
నమామ్యభీక్ష్ణం నమనీయపాద-
సరోజమల్పీయసి కామవర్షమ్ ॥ 21 ॥
ఇతి శ్రీమద్భాగవతమహాపురాణే తృతీయస్కంధే ఏకవింశాధ్యాయాంతర్గతం
కర్దమర్షికృతం విష్ణుస్తోత్రం సమాప్తమ్ ।
భాగవతపురాణ . అధ్యాయ 3/21/13-21 . ।
