ముచుకుంద స్తుతిః

విమోహితోఽయం జన ఈశ మాయయా
త్వదీయయా త్వాం చ భజత్యనర్థదృక్ ।
సుఖాయ దుఃఖప్రభవేషు సజ్జతే
గృహేషు యోషిత్పురుషశ్చ వంచితః ॥ 1 ॥
లబ్ధ్వా జనో దుర్లభమత్ర మానుషం
కథంచిదవ్యంగమయత్నతోఽనఘ ।
పాదారవిందం న భజత్యసన్మతి-
ర్గృహాంధకూపే పతితో యథా పశుః ॥ 2 ॥
మమైష కాలోఽజిత నిష్ఫలో గతో
రాజ్యశ్రియోన్నద్ధమదస్య భూపతే ।
మర్త్యాత్మబుద్ధేః సుతదారకోశభూ-
ష్వాసజ్జమానస్య దురంతచింతయా ॥ 3 ॥
కలేవరేఽస్మిన్ ఘటకుడ్యసన్నిభే
నిరూఢమానో నరదేవ ఇత్యహమ్ ।
వృతో రథేభాశ్వపదాత్యనీకపైర్గాం
పర్యటంస్త్వాగణయన్ సుదుర్మదః ॥ 4 ॥
ప్రమత్తముచ్చైరితి కృత్యచింతయా
ప్రభుద్ధలోభం విషయేషు లాలసమ్ ।
త్వమప్రమత్తః సహసాఽభిపద్యసే
క్షుల్లేలిహానోఽహిరివాఖుమంతకః ॥ 5 ॥
పురా రథైర్హేమపరిష్కృతైశ్చరన్
మతంగజైర్వా నరదేవసంజ్ఞితః ।
స ఏవ కాలేన దురత్యయేన తే
కలేవరో విట్కృమిభస్మసంజ్ఞితః ॥ 6 ॥
నిర్జిత్య దిక్చక్రమభూతవిగ్రహో
వరాసనస్థః సమరాజవందితః ।
గృహేషు మైథున్యసుఖేషు యోషితాం
క్రీడామృగ పూరుష ఈశ నీయతే ॥ 7 ॥
కరోతి కర్మాణి తపఃసు నిష్ఠితో
నివృత్తభోగస్తదపేక్షయా దదత్ ।
పునశ్చ భూయేయమహం స్వరాడితి
ప్రబుద్ధతర్షో న సుఖాయ కల్పతే ॥ 8 ॥
భవాపవర్గో భ్రమతో యదా భవే-
జ్జనస్య తర్హ్యచ్యుత సత్సమాగమః ।
సత్సంగమో యర్హి తదైవ సద్గతౌ
పరావరేశే త్వయి జాయతే మతిః ॥ 9 ॥
మన్యే మమానుగ్రహ ఈశ తే కృతో
రాజ్యానుబంధాపగమో యదృచ్ఛయా ।
యః ప్రార్థ్యతే సాధుభిరేకచర్యయా
వనం వివిక్షద్భిరఖండభూమిపైః ॥ 10 ॥
న కామయేఽన్యం తవ పాదసేవనాద్-
అకించనప్రార్థ్యతమాద్వరం విభో ।
ఆరాధ్య కస్త్వాం హ్యపవర్గదం హరే
వృణీత ఆర్యో వరమాత్మబంధనమ్ ॥ 11 ॥
తస్మాద్విసృజ్యాశిష ఈశ సర్వతో
రజస్తమఃసత్త్వగుణానుబంధనాః ।
నిరంజనం నిర్గుణమద్వయం పరం
త్వాం జ్ఞప్తిమాత్రం పురుషం వ్రజామ్యహమ్ ॥ 12 ॥
చిరమిహ వృజినార్తస్తప్యమానోఽనుతాపైః
అవితృషషడమిత్రో లబ్ధశాంతిః కథంచిత్ ।
శరణద సముపేతస్త్వత్పదాబ్జం పరాత్మన్
అభయమమృతమశోకం పాహి మాఽపన్నమీశ ॥ 13 ॥

ఇతి శ్రీమద్భాగవతాంతర్గతా ముచుకుందకృతా శ్రీవిష్ణుస్తుతిః సమాప్తా ।

Browse Related Categories: