ୟାମୁନାର୍ୟସୁଧାଂଭୋଧିମଵଗାହ୍ୟ ୟଥାମତି ।
ଆଦାୟ ଭକ୍ତିୟୋଗାଖ୍ୟଂ ରତ୍ନଂ ସଂଦର୍ଶୟାମ୍ୟହମ୍ ॥
ସ୍ଵାଧୀନ ତ୍ରିଵିଧଚେତନାଚେତନସ୍ଵରୂପସ୍ଥିତି ପ୍ରଵୃତ୍ତିଭେଦଂ, କ୍ଲେଶ କର୍ମାଦ୍ୟଶେଷଦୋଷାସଂସ୍ପୃଷ୍ଟଂ, ସ୍ଵାଭାଵିକାନଵଧିକାତିଶୟ ଜ୍ଞାନବଲୈଶ୍ଵର୍ୟଵୀର୍ୟଶକ୍ତିତେଜଃ ପ୍ରଭୃତ୍ୟସଂଖ୍ୟେୟ କଲ୍ୟାଣଗୁଣଗଣୌଘ ମହାର୍ଣଵଂ, ପରମପୁରୁଷଂ, ଭଗଵଂତଂ, ନାରାୟଣଂ, ସ୍ଵାମିତ୍ଵେନ ସୁହୃତ୍ଵେନ ଗୁରୁତ୍ଵେନ ଚ ପରିଗୃହ୍ୟ ଐକାଂତିକାତ୍ୟଂତିକ ତତ୍ପାଦାଂବୁଜଦ୍ଵୟ ପରିଚର୍ୟୈକମନୋରଥଃ, ତତ୍ପ୍ରାପ୍ତୟେ ଚ ତତ୍ପାଦାଂବୁଜଦ୍ଵୟ ପ୍ରପତ୍ତେରନ୍ୟନ୍ନ ମେ କଲ୍ପକୋଟିସହସ୍ରେଣାପି ସାଧନମସ୍ତୀତି ମନ୍ଵାନଃ, ତସ୍ୟୈଵ ଭଗଵତୋ ନାରାୟଣସ୍ୟ ଅଖିଲସତ୍ତ୍ଵଦୟୈକସାଗରସ୍ୟ ଅନାଲୋଚିତ ଗୁଣଗୁଣାଖଂଡ ଜନାନୁକୂଲାମର୍ୟାଦ ଶୀଲଵତଃ, ସ୍ଵାଭାଵିକାନଵଧିକାତିଶୟ ଗୁଣଵତ୍ତୟା ଦେଵତିର୍ୟଙ୍ମନୁଷ୍ୟାଦ୍ୟଖିଲଜନ ହୃଦୟାନଂଦନସ୍ୟ ଆଶ୍ରିତଵାତ୍ସଲ୍ୟୈକଜଲଧେଃ ଭକ୍ତଜନସଂଶ୍ଲେଷୈକଭୋଗସ୍ୟ ନିତ୍ୟଜ୍ଞାନକ୍ରିୟୈଶ୍ଵର୍ୟାଦି ଭୋଗସାମଗ୍ରୀସମୃଦ୍ଧସ୍ୟ, ମହାଵିଭୂତେଃ, ଶ୍ରୀମଚ୍ଚରଣାରଵିଂଦୟୁଗଳଂ ଅନନ୍ୟାତ୍ମସଂଜୀଵନେନ ତଦ୍ଗତସର୍ଵଭାଵେନ ଶରଣମନୁଵ୍ରଜେତ୍ । ତତଶ୍ଚ ପ୍ରତ୍ୟହମାତ୍ମୋଜ୍ଜୀଵନାୟୈଵମନୁସ୍ମରେତ୍ । ଚତୁର୍ଦଶଭୁଵନାତ୍ମକଂ ଅଂଡଂ, ଦଶଗୁଣିତୋତ୍ତରଂ ଚ ଆଵରଣସପ୍ତକଂ, ସମସ୍ତଂ କାର୍ୟକାରଣ(ଜାତ)ମତୀତ୍ୟ, ଵର୍ତମାନେ ପରମଵ୍ୟୋମଶବ୍ଦାଭିଧେୟେ, ବ୍ରହ୍ମାଦୀନାଂ ଵାଙ୍ମନସାଽଗୋଚରେ, ଶ୍ରୀମତି ଵୈକୁଂଠେ ଦିଵ୍ୟଲୋକେ, ସନକଵିଧିଶିଵାଦିଭିରପି ଅଚିଂତ୍ୟସ୍ଵଭାଵୈଶ୍ଵର୍ୟୈଃ, ନିତ୍ୟସିଦ୍ଧୈରନଂତୈର୍ଭଗଵଦାନୁକୂଲ୍ୟୈକ ଭୋଗୈର୍ଦିଵ୍ୟପୁରୁଷୈଃ ମହାତ୍ମଭିଃ ଆପୂରିତେ, ତେଷାମପି ଇୟତ୍ପରିମାଣଂ, ଇୟଦୈଶ୍ଵର୍ୟଂ, ଈଦୃଶସ୍ଵଭାଵମିତି ପରିଚ୍ଛେତ୍ତୁମୟୋଗ୍ୟେ, ଦିଵ୍ୟାଵରଣଶତସହସ୍ରାଵୃତେ, ଦିଵ୍ୟକଲ୍ପକତରୂପଶୋଭିତେ, ଦିଵ୍ୟୋଦ୍ୟାନ ଶତସହସ୍ରକୋଟିଭିରାଵୃତେ, ଅତିପ୍ରମାଣେ ଦିଵ୍ୟାୟତନେ, କସ୍ମିଂଶ୍ଚିଦ୍ଵିଚିତ୍ର ଦିଵ୍ୟରତ୍ନମୟ ଦିଵ୍ୟାସ୍ଥାନମଂଡପେ, ଦିଵ୍ୟରତ୍ନସ୍ତଂଭ ଶତସହସ୍ରକୋଟିଭିରୁପଶୋଭିତେ,
ଦିଵ୍ୟନାନାରତ୍ନକୃତସ୍ଥଲ ଵିଚିତ୍ରିତେ, ଦିଵ୍ୟାଲଂକାରାଲଂକୃତେ, ପରିତଃ ପତିତୈଃ ପତମାନୈଃ ପାଦପସ୍ଥୈଶ୍ଚ ନାନାଗଂଧଵର୍ଣୈର୍ଦିଵ୍ୟପୁଷ୍ପୈଃ ଶୋଭମାନୈର୍ଦିଵ୍ୟପୁଷ୍ପୋପଵନୈରୁପଶୋଭିତେ, ସଂକୀର୍ଣପାରିଜାତାଦି କଲ୍ପଦ୍ରୁମୋପଶୋଭିତୈଃ, ଅସଂକୀର୍ଣୈଶ୍ଚ କୈଶ୍ଚିଦଂତସ୍ସ୍ଥପୁଷ୍ପରତ୍ନାଦିନିର୍ମିତ ଦିଵ୍ୟଲୀଲାମଂଡପ ଶତସହସ୍ରୋପଶୋଭିତୈଃ, ସର୍ଵଦାଽନୁଭୂୟମାନୈରପ୍ୟପୂର୍ଵଵଦାଶ୍ଚର୍ୟମାଵହଦ୍ଭିଃ କ୍ରୀଡାଶୈଲ ଶତସହସ୍ରୈରଲଂକୃତୈଃ, କୈଶ୍ଚିନ୍ନାରାୟଣଦିଵ୍ୟଲୀଲାଽସାଧାରଣୈଃ, କୈଶ୍ଚିତ୍ପଦ୍ମଵନାଲୟା ଦିଵ୍ୟଲୀଲାଽସାଧାରଣୈଃ, ସାଧାରଣୈଶ୍ଚ କୈଶ୍ଚିତ୍ ଶୁକଶାରିକାମୟୂରକୋକିଲାଦିଭିଃ କୋମଲକୂଜିତୈରାକୁଲୈଃ, ଦିଵ୍ୟୋଦ୍ୟାନ ଶତସହସ୍ରୈରାଵୃତେ, ମଣିମୁକ୍ତାପ୍ରଵାଲ କୃତସୋପାନୈଃ, ଦିଵ୍ୟାମଲାମୃତରସୋଦକୈଃ, ଦିଵ୍ୟାଂଡଜଵରୈଃ, ଅତିରମଣୀୟଦର୍ଶନୈଃ ଅତିମନୋହରମଧୁରସ୍ଵରୈଃ ଆକୁଲୈଃ, ଅଂତସ୍ଥ ମୁକ୍ତାମୟ ଦିଵ୍ୟକ୍ରୀଡାସ୍ଥାନୋପଶୋଭିତୈଃ ଦିଵ୍ୟସୌଗଂଧିକଵାପୀଶତସହସ୍ରୈଃ, ଦିଵ୍ୟରାଜହଂସାଵଳୀଵିରାଜିତୈରାଵୃତେ, ନିରସ୍ତାତିଶୟାନଂଦୈକରସତୟା ଚାନଂତ୍ୟାଚ୍ଚ ପ୍ରଵିଷ୍ଟାନୁନ୍ମାଦୟଦ୍ଭିଃ କ୍ରୀଡୋଦ୍ଦେଶୈର୍ଵିରାଜିତେ, ତତ୍ର ତତ୍ର କୃତ ଦିଵ୍ୟପୁଷ୍ପପର୍ୟଂକୋପଶୋଭିତେ, ନାନାପୁଷ୍ପାସଵାସ୍ଵାଦ ମତ୍ତଭୃଂଗାଵଲୀଭିଃ ଉଦ୍ଗୀୟମାନ ଦିଵ୍ୟଗାଂଧର୍ଵେଣାପୂରିତେ, ଚଂଦନାଗରୁକର୍ପୂର ଦିଵ୍ୟପୁଷ୍ପାଵଗାହି ମଂଦାନିଲାସେଵ୍ୟମାନେ, ମଧ୍ୟେ ପୁଷ୍ପସଂଚୟ ଵିଚିତ୍ରିତେ, ମହତି ଦିଵ୍ୟୟୋଗପର୍ୟଂକେ ଅନଂତଭୋଗିନି, ଶ୍ରୀମଦ୍ଵୈକୁଂଠୈଶ୍ଵର୍ୟାଦି ଦିଵ୍ୟଲୋକଂ ଆତ୍ମକାଂତ୍ୟା ଵିଶ୍ଵମାପ୍ୟାୟୟଂତ୍ୟା ଶେଷ ଶେଷାଶନାଦି ସର୍ଵପରିଜନଂ ଭଗଵତସ୍ତତ୍ତଦଵସ୍ଥୋଚିତ ପରିଚର୍ୟାୟାଂ ଆଜ୍ଞାପୟଂତ୍ୟା, ଶୀଲରୂପଗୁଣ ଵିଲାସାଦିଭିଃ ଆତ୍ମାନୁରୂପୟା ଶ୍ରିୟା ସହାସୀନଂ, ପ୍ରତ୍ୟଗ୍ରୋନ୍ମୀଲିତ ସରସିଜସଦୃଶ ନୟନୟୁଗଳଂ, ସ୍ଵଚ୍ଛନୀଲଜୀମୂତସଂକାଶଂ, ଅତ୍ୟୁଜ୍ଜ୍ଵଲପୀତଵାସସଂ, ସ୍ଵୟା ପ୍ରଭୟାଽତିନିର୍ମଲୟା ଅତିଶୀତଲୟା ଅତିକୋମଲୟା ସ୍ଵଚ୍ଛମାଣିକ୍ୟାଭୟା କୃତ୍ସ୍ନଂ ଜଗଦ୍ଭାସୟଂତଂ,
ଅଚିଂତ୍ୟଦିଵ୍ୟାଦ୍ଭୁତ ନିତ୍ୟୟୌଵନ ସ୍ଵଭାଵଲାଵଣ୍ୟମୟାମୃତସାଗରଂ, ଅତିସୌକୁମାର୍ୟାଦି ଈଷତ୍ ପ୍ରସ୍ଵିନ୍ନଵଦାଲକ୍ଷ୍ୟମାଣ ଲଲାଟଫଲକ ଦିଵ୍ୟାଲକାଵଲୀଵିରାଜିତଂ, ପ୍ରବୁଦ୍ଧମୁଗ୍ଧାଂବୁଜ ଚାରୁଲୋଚନଂ, ସଵିଭ୍ରମଭ୍ରୂଲତଂ, ଉଜ୍ଜ୍ଵଲାଧରଂ, ଶୁଚିସ୍ମିତଂ, କୋମଲଗଂଡଂ, ଉନ୍ନସଂ, ଉଦଗ୍ରପୀନାଂସ ଵିଲଂବିକୁଂଡଲାଲକାଵଲୀ ବଂଧୁର କଂବୁକଂଧରଂ, ପ୍ରିୟାଵତଂସୋତ୍ପଲ କର୍ଣଭୂଷଣଶ୍ଲଥାଲକାବଂଧ ଵିମର୍ଦଶଂସିଭିଃ ଚତୁର୍ଭିରାଜାନୁଵିଲଂବିଭିର୍ଭୁଜୈର୍ଵିରାଜିତଂ, ଅତିକୋମଲ ଦିଵ୍ୟରେଖାଲଂକୃତାତାମ୍ରକରତଲଂ, ଦିଵ୍ୟାଂଗୁଳୀୟକଵିରାଜିତଂ, ଅତିକୋମଲ ଦିଵ୍ୟନଖାଵଳୀଵିରାଜିତଂ, ଅତିରକ୍ତାଂଗୁଲୀଭିରଲଂକୃତଂ, ତତ୍କ୍ଷଣୋନ୍ମୀଲିତ ପୁଂଡରୀକ ସଦୃଶଚରଣୟୁଗଳଂ, ଅତିମନୋହର କିରୀଟମକୁଟ ଚୂଡାଵତଂସ ମକରକୁଂଡଲ ଗ୍ରୈଵେୟକ ହାର କେୟୂର କଟକ ଶ୍ରୀଵତ୍ସ କୌସ୍ତୁଭ ମୁକ୍ତାଦାମୋଦରବଂଧନ ପୀତାଂବର କାଂଚୀଗୁଣ ନୂପୁରାଦିଭିରତ୍ୟଂତ ସୁଖସ୍ପର୍ଶୈଃ ଦିଵ୍ୟଗଂଧୈର୍ଭୂଷଣୈର୍ଭୂଷିତଂ, ଶ୍ରୀମତ୍ୟା ଵୈଜୟଂତ୍ୟା ଵନମାଲୟା ଵିରାଜିତଂ, ଶଂଖଚକ୍ରଗଦାଽସି ଶାରଂଗାଦି ଦିଵ୍ୟାୟୁଧୈଃ ସେଵ୍ୟମାନଂ, ସ୍ଵସଂକଲ୍ପମାତ୍ରାଵକ୍ଲୁପ୍ତ ଜଗଜ୍ଜନ୍ମସ୍ଥିତିଧ୍ଵଂସାଦିକେ ଶ୍ରୀମତି ଵିଷ୍ଵକ୍ସେନେ ନ୍ୟସ୍ତ ସମସ୍ତାତ୍ମୈଶ୍ଵର୍ୟଂ, ଵୈନତେୟାଦିଭିଃ ସ୍ଵଭାଵତୋ ନିରସ୍ତ ସମସ୍ତ ସାଂସାରିକ ସ୍ଵଭାଵୈଃ ଭଗଵତ୍ପରିଚର୍ୟାକରଣ ୟୋଗ୍ୟୈର୍ଭଗଵତ୍ପରିଚର୍ୟୈକଭୋଗୈ-ର୍ନିତ୍ୟସିଦ୍ଧୈରନଂତୈଃ ୟଥା ୟୋଗଂ ସେଵ୍ୟମାନଂ, ଆତ୍ମଭୋଗେନ ଅନନୁସଂହିତପରାଦିକାଲ ଦିଵ୍ୟାମଲ କୋମଲାଵଲୋକନେନ ଵିଶ୍ଵମାହ୍ଲାଦୟଂତଂ, ଈଷଦୁନ୍ମୀଲିତ ମୁଖାଂବୁଜୋଦରଵିନିର୍ଗତେନ ଦିଵ୍ୟାନନାରଵିଂଦ ଶୋଭାଜନନେନ ଦିଵ୍ୟଗାଂଭୀର୍ୟୌଦାର୍ୟ ସୌଂଦର୍ୟ ମାଧୁର୍ୟାଦ୍ୟନଵଧିକ ଗୁଣଗଣଵିଭୂଷିତେନ, ଅତିମନୋହର ଦିଵ୍ୟଭାଵଗର୍ଭେଣ ଦିଵ୍ୟଲୀଲାଽଽଲାପାମୃତେନ ଅଖିଲଜନ ହୃଦୟାଂତରାଣ୍ୟାପୂରୟଂତଂ ଭଗଵଂତଂ ନାରାୟଣଂ ଧ୍ୟାନୟୋଗେନ ଦୃଷ୍ଟ୍ଵା, ତତୋ ଭଗଵତୋ ନିତ୍ୟସ୍ଵାମ୍ୟମାତ୍ମନୋ ନିତ୍ୟଦାସ୍ୟଂ ଚ ୟଥାଵସ୍ଥିତମନୁସଂଧାୟ, କଦାଽହଂ ଭଗଵଂତଂ ନାରାୟଣଂ, ମମ କୁଲନାଥଂ, ମମ କୁଲଦୈଵତଂ, ମମ କୁଲଧନଂ, ମମ ଭୋଗ୍ୟଂ, ମମ ମାତରଂ, ମମ ପିତରଂ, ମମ ସର୍ଵଂ ସାକ୍ଷାତ୍କରଵାଣି ଚକ୍ଷୁଷା ।
କଦାଽହଂ ଭଗଵତ୍ପାଦାଂବୁଜଦ୍ଵୟଂ ଶିରସା ସଂଗ୍ରହୀଷ୍ୟାମି । କଦାଽହଂ ଭଗଵତ୍ପାଦାଂବୁଜଦ୍ଵୟ ପରିଚର୍ୟାଽଽଶୟା ନିରସ୍ତସମସ୍ତେତର ଭୋଗାଶଃ, ଅପଗତ ସମସ୍ତ ସାଂସାରିକସ୍ଵଭାଵଃ ତତ୍ପାଦାଂବୁଜଦ୍ଵୟଂ ପ୍ରଵେକ୍ଷ୍ୟାମି । କଦାଽହଂ ଭଗଵତ୍ପାଦାଂବୁଜଦ୍ଵୟ ପରିଚର୍ୟାକରଣୟୋଗ୍ୟ-ସ୍ତଦେକଭୋଗସ୍ତତ୍ପାଦୌ ପରିଚରିଷ୍ୟାମି । କଦା ମାଂ ଭଗଵାନ୍ ସ୍ଵକୀୟୟା ଅତିଶୀତଲୟା ଦୃଶା ଅଵଲୋକ୍ୟ, ସ୍ନିଗ୍ଧଗଂଭୀରମଧୁରୟା ଗିରା ପରିଚର୍ୟାୟାଂ ଆଜ୍ଞାପୟିଷ୍ୟତି, ଇତି ଭଗଵତ୍ପରିଚର୍ୟାୟାମାଶାଂ ଵର୍ଧୟିତ୍ଵା ତୟୈଵାଽଶୟା ତତ୍ପ୍ରସାଦୋପବୃଂହିତୟା ଭଗଵଂତମୁପେତ୍ୟ, ଦୂରାଦେଵ ଭଗଵଂତଂ ଶେଷଭୋଗେ ଶ୍ରିୟା ସହାସୀନଂ ଵୈନତେୟାଦିଭିଃ ସେଵ୍ୟମାନଂ, ସମସ୍ତପରିଵାରାୟ ଶ୍ରୀମତେ ନାରାୟଣାୟ ନମଃ, ଇତି ପ୍ରଣମ୍ୟ ଉତ୍ଥାୟୋତ୍ଥାୟ ପୁନଃ ପୁନଃ ପ୍ରଣମ୍ୟ ଅତ୍ୟଂତ ସାଧ୍ଵସଵିନୟାଵନତୋ ଭୂତ୍ଵା, ଭଗଵତ୍ପାରିଷଦଗଣନାୟକୈର୍ଦ୍ଵାରପାଲୈଃ କୃପୟା ସ୍ନେହଗର୍ଭୟା ଦୃଶାଽଵଲୋକିତଃ ସମ୍ୟଗଭିଵଂଦିତୈସ୍ତୈସ୍ତୈରେଵାନୁମତୋ ଭଗଵଂତମୁପେତ୍ୟ, ଶ୍ରୀମତା ମୂଲମଂତ୍ରେଣ ମାମୈକାଂତିକାତ୍ୟଂତିକ ପରିଚର୍ୟାକରଣାୟ ପରିଗୃହ୍ଣୀଷ୍ଵ ଇତି ୟାଚମାନଃ ପ୍ରଣମ୍ୟାତ୍ମାନଂ ଭଗଵତେ ନିଵେଦୟେତ୍ ।
ତତୋ ଭଗଵତା ସ୍ଵୟମେଵାତ୍ମସଂଜୀଵନେନ ଅମର୍ୟାଦଶୀଲଵତା ଅତିପ୍ରେମାନ୍ଵିତେନ ଅଵଲୋକନେନାଵଲୋକ୍ୟ ସର୍ଵଦେଶ ସର୍ଵକାଲ ସର୍ଵାଵସ୍ଥୋଚିତାତ୍ୟଂତଶେଷଭାଵାୟ ସ୍ଵୀକୃତୋଽନୁଜ୍ଞାତଶ୍ଚ ଅତ୍ୟଂତସାଧ୍ଵସଵିନୟାଵନତଃ କିଂକୁର୍ଵାଣଃ କୃତାଂଜଲିପୁଟୋ ଭଗଵଂତମୁପାସୀତ । ତତଶ୍ଚାନୁଭୂୟମାନ ଭାଵଵିଶେଷଃ ନିରତିଶୟପ୍ରୀତ୍ୟାଽନ୍ୟତ୍କିଂଚିତ୍କର୍ତୁଂ ଦ୍ରଷ୍ଟୁଂ ସ୍ମର୍ତୁମଶକ୍ତଃ ପୁନରପି ଶେଷଭାଵମେଵ ୟାଚମାନୋ ଭଗଵଂତମେଵାଵିଚ୍ଛିନ୍ନସ୍ରୋତୋରୂପେଣାଵଲୋକନେନ ଅଵଲୋକୟନ୍ନାସୀତ । ତତୋ ଭଗଵତା ସ୍ଵୟମେଵାତ୍ମସଂଜୀଵନେନାଵଲୋକନେନାଵଲୋକ୍ୟ ସସ୍ମିତମାହୂୟ ସମସ୍ତକ୍ଲେଶାପହଂ ନିରତିଶୟସୁଖାଵହମାତ୍ମୀୟଂ, ଶ୍ରୀମତ୍ପାଦାରଵିଂଦୟୁଗଳଂ ଶିରସି କୃତଂ ଧ୍ୟାତ୍ଵା, ଅମୃତସାଗରାଂତର୍ନିମଗ୍ନସର୍ଵାଵୟଵଃ ସୁଖମାସୀତ ।
ଲକ୍ଷ୍ମୀପତେର୍ୟତିପତେଶ୍ଚ ଦୟୈକଧାମ୍ନୋଃ
ୟୋଽସୌ ପୁରା ସମଜନିଷ୍ଟ ଜଗଦ୍ଧିତାର୍ଥମ୍ ।
ପ୍ରାପ୍ୟଂ ପ୍ରକାଶୟତୁ ନଃ ପରମଂ ରହସ୍ୟଂ
ସଂଵାଦ ଏଷ ଶରଣାଗତି ମଂତ୍ରସାରଃ ॥
ଇତି ଶ୍ରୀଭଗଵଦ୍ରାମାନୁଜଵିରଚିତେ ଶ୍ରୀଵୈକୁଂଠଗଦ୍ୟମ୍ ।
