॥ ইংদ্রাদযো ঊচুঃ ॥
জটাকটাহযুক্তমুংডপ্রাংতবিস্তৃতং হরেঃ
অপাংগক্রুদ্ধদর্শনোপহার চূর্ণকুংতলঃ ।
প্রচংডবেগকারণেন পিংজলঃ প্রতিগ্রহঃ
স ক্রুদ্ধতাংডবস্বরূপধৃগ্বিরাজতে হরিঃ ॥ 1 ॥
অথেহ ব্যূহপার্ষ্ণিপ্রাগ্বরূথিনী নিষংগিনঃ
তথাংজনেযৃক্ষভূপসৌরবালিনংদনাঃ ।
প্রচংডদানবানলং সমুদ্রতুল্যনাশকাঃ
নমোঽস্তুতে সুরারিচক্রভক্ষকায মৃত্যবে ॥ 2 ॥
কলেবরে কষাযবাসহস্তকার্মুকং হরেঃ
উপাসনোপসংগমার্থধৃগ্বিশাখমংডলম্ ।
হৃদি স্মরন্ দশাকৃতেঃ কুচক্রচৌর্যপাতকং
বিদার্যতে প্রচংডতাংডবাকৃতিঃ স রাঘবঃ ॥ 3 ॥
প্রকাংডকাংডকাংডকর্মদেহছিদ্রকারণং
কুকূটকূটকূটকৌণপাত্মজাভিমর্দনম্ ।
তথাগুণংগুণংগুণংগুণংগুণেন দর্শযন্
কৃপীটকেশলংঘ্যমীশমেকরাঘবং ভজে ॥ 4 ॥
সবানরান্বিতঃ তথাপ্লুতং শরীরমসৃজা
বিরোধিমেদসাগ্রমাংসগুল্মকালখংডনৈঃ ।
মহাসিপাশশক্তিদংডধারকৈঃ নিশাচরৈঃ
পরিপ্লুতং কৃতং শবৈশ্চ যেন ভূমিমংডলম্ ॥ 5 ॥
বিশালদংষ্ট্রকুংভকর্ণমেঘরাবকারকৈঃ
তথাহিরাবণাদ্যকংপনাতিকাযজিত্বরৈঃ ।
সুরক্ষিতাং মনোরমাং সুবর্ণলংকনাগরীং
নিজাস্ত্রসংকুলৈরভেদ্যকোটমর্দনং কৃতঃ ॥ 6 ॥
প্রবুদ্ধবুদ্ধযোগিভিঃ মহর্ষিসিদ্ধচারণৈঃ
বিদেহজাপ্রিযঃ সদানুতো স্তুতো চ স্বস্তিভিঃ ।
পুলস্ত্যনংদনাত্মজস্য মুংডরুংডছেদনং
সুরারিযূথভেদনং বিলোকযামি সাংপ্রতম্ ॥ 7 ॥
করালকালরূপিণং মহোগ্রচাপধারিণং
কুমোহগ্রস্তমর্কটাচ্ছভল্লত্রাণকারণম্ ।
বিভীষণাদিভিঃ সদাভিষেণনেঽভিচিংতকং
ভজামি জিত্বরং তথোর্মিলাপতেঃ প্রিযাগ্রজম্ ॥ 8 ॥
ইতস্ততঃ মুহুর্মুহুঃ পরিভ্রমংতি কৌংতিকাঃ
অনুপ্লবপ্রবাহপ্রাসিকাশ্চ বৈজযংতিকাঃ ।
মৃধে প্রভাকরস্য বংশকীর্তিনোঽপদানতাং
অভিক্রমেণ রাঘবস্য তাংডবাকৃতেঃ গতাঃ ॥ 9 ॥
নিরাকৃতিং নিরামযং তথাদিসৃষ্টিকারণং
মহোজ্জ্বলং অজং বিভুং পুরাণপূরুষং হরিম্ ।
নিরংকুশং নিজাত্মভক্তজন্মমৃত্যুনাশকং
অধর্মমার্গঘাতকং কপীশব্যূহনাযকম্ ॥ 10 ॥
করালপালিচক্রশূলতীক্ষ্ণভিংদিপালকৈঃ
কুঠারসর্বলাসিধেনুকেলিশল্যমুদ্গরৈঃ ।
সুপুষ্করেণ পুষ্করাংচ পুষ্করাস্ত্রমারণৈঃ
সদাপ্লুতং নিশাচরৈঃ সুপুষ্করংচ পুষ্করম্ ॥ 11 ॥
প্রপন্নভক্তরক্ষকং বসুংধরাত্মজাপ্রিযং
কপীশবৃংদসেবিতং সমস্তদূষণাপহম্ ।
সুরাসুরাভিবংদিতং নিশাচরাংতকং বিভুং
জগত্প্রশস্তিকারণং ভজেহ রামমীশ্বরম্ ॥ 12 ॥
॥ ইতি শ্রীভাগবতানংদগুরুণা বিরচিতে শ্রীরাঘবেংদ্রচরিতে
ইংদ্রাদি দেবগণৈঃ কৃতং শ্রীরামতাংডবস্তোত্রং সংপূর্ণম্ ॥
