અથાપરમહં વક્ષ્યેઽમૃતસંજીવનં સ્તવમ્ ।
યસ્યાનુષ્ઠાનમાત્રેણ મૃત્યુર્દૂરાત્પલાયતે ॥ 1 ॥

અસાધ્યાઃ કષ્ટસાધ્યાશ્ચ મહારોગા ભયંકરાઃ ।
શીઘ્રં નશ્યંતિ પઠનાદસ્યાયુશ્ચ પ્રવર્ધતે ॥ 2 ॥

શાકિનીડાકિનીદોષાઃ કુદૃષ્ટિગ્રહશત્રુજાઃ ।
પ્રેતવેતાલયક્ષોત્થા બાધા નશ્યંતિ ચાખિલાઃ ॥ 3 ॥

દુરિતાનિ સમસ્તાનિ નાનાજન્મોદ્ભવાનિ ચ ।
સંસર્ગજવિકારાણિ વિલીયંતેઽસ્ય પાઠતઃ ॥ 4 ॥

સર્વોપદ્રવનાશાય સર્વબાધાપ્રશાંતયે ।
આયુઃ પ્રવૃદ્ધયે ચૈતત્ સ્તોત્રં પરમમદ્ભુતમ્ ॥ 5 ॥

બાલગ્રહાભિભૂતાનાં બાલાનાં સુખદાયકમ્ ।
સર્વારિષ્ટહરં ચૈતદ્બલપુષ્ટિકરં પરમ્ ॥ 6 ॥

બાલાનાં જીવનાયૈતત્ સ્તોત્રં દિવ્યં સુધોપમમ્ ।
મૃતવત્સત્વહરણં ચિરંજીવિત્વકારકમ્ ॥ 7 ॥

મહારોગાભિભૂતાનાં ભયવ્યાકુલિતાત્મનામ્ ।
સર્વાધિવ્યાધિહરણં ભયઘ્નમમૃતોપમમ્ ॥ 8 ॥

અલ્પમૃત્યુશ્ચાપમૃત્યુઃ પાઠાદસ્યઃ પ્રણશ્યતિ ।
જલાઽગ્નિવિષશસ્ત્રારિ ન હિ શૃંગિ ભયં તથા ॥ 9 ॥

ગર્ભરક્ષાકરં સ્ત્રીણાં બાલાનાં જીવનપ્રદમ્ ।
મહારોગહરં નૄણામલ્પમૃત્યુહરં પરમ્ ॥ 10 ॥

બાલા વૃદ્ધાશ્ચ તરુણા નરા નાર્યશ્ચ દુઃખિતાઃ ।
ભવંતિ સુખિનઃ પાઠાદસ્ય લોકે ચિરાયુષઃ ॥ 11 ॥

અસ્માત્પરતરં નાસ્તિ જીવનોપાય ઐહિકઃ ।
તસ્માત્ સર્વપ્રયત્નેન પાઠમસ્ય સમાચરેત્ ॥ 12 ॥

અયુતાવૃત્તિકં વાથ સહસ્રાવૃત્તિકં તથા ।
તદર્ધં વા તદર્ધં વા પઠેદેતચ્ચ ભક્તિતઃ ॥ 13 ॥

કલશે વિષ્ણુમારાધ્ય દીપં પ્રજ્વાલ્ય યત્નતઃ ।
સાયં પ્રાતશ્ચ વિધિવત્ સ્તોત્રમેતત્ પઠેત્ સુધીઃ ॥ 14 ॥

સર્પિષા હવિષા વાઽપિ સંયાવેનાથ ભક્તિતઃ ।
દશાંશમાનતો હોમં કુર્યાત્ સર્વાર્થસિદ્ધયે ॥ 15 ॥

અથ સ્તોત્રમ્
નમો નમો વિશ્વવિભાવનાય
નમો નમો લોકસુખપ્રદાય ।
નમો નમો વિશ્વસૃજેશ્વરાય
નમો નમો મુક્તિવરપ્રદાય ॥ 1 ॥

નમો નમસ્તેઽખિલલોકપાય
નમો નમસ્તેઽખિલકામદાય ।
નમો નમસ્તેઽખિલકારણાય
નમો નમસ્તેઽખિલરક્ષકાય ॥ 2 ॥

નમો નમસ્તે સકલાર્તિહર્ત્રે
નમો નમસ્તે વિરુજઃ પ્રકર્ત્રે ।
નમો નમસ્તેઽખિલવિશ્વધર્ત્રે
નમો નમસ્તેઽખિલલોકભર્ત્રે ॥ 3 ॥

સૃષ્ટં દેવ ચરાચરં જગદિદં બ્રહ્મસ્વરૂપેણ તે
સર્વં તત્પરિપાલ્યતે જગદિદં વિષ્ણુસ્વરૂપેણ તે ।
વિશ્વં સંહ્રિતયે તદેવ નિખિલં રુદ્રસ્વરૂપેણ તે
સંસિચ્યામૃતશીકરૈર્હર મહારિષ્ટં ચિરં જીવય ॥ 4 ॥

યો ધન્વંતરિસંજ્ઞયા નિગદિતઃ ક્ષીરાબ્ધિતો નિઃસૃતો
હસ્તાભ્યાં જનજીવનાય કલશં પીયૂષપૂર્ણં દધત્ ।
આયુર્વેદમરીરચજ્જનરુજાં નાશાય સ ત્વં મુદા
સંસિચ્યામૃતશીકરૈર્હર મહારિષ્ટં ચિરં જીવય ॥ 5 ॥

સ્ત્રીરૂપં વરભૂષણાંબરધરં ત્રૈલોક્યસમ્મોહનં
કૃત્વા પાયયતિ સ્મ યઃ સુરગણાન્ પીયૂષમત્યુત્તમમ્ ।
ચક્રે દૈત્યગણાન્ સુધાવિરહિતાન્ સંમોહ્ય સ ત્વં મુદા
સંસિચ્યામૃતશીકરૈર્હર મહારિષ્ટં ચિરં જીવય ॥ 6 ॥

ચાક્ષુષોદધિસંપ્લાવ ભૂવેદપ ઝષાકૃતે ।
સિંચ સિંચામૃતકણૈશ્ચિરં જીવય જીવય ॥ 7 ॥

પૃષ્ઠમંદરનિર્ઘૂર્ણનિદ્રાક્ષ કમઠાકૃતે ।
સિંચ સિંચામૃતકણૈશ્ચિરં જીવય જીવય ॥ 8 ॥

યાંચાચ્છલબલિત્રાસમુક્તનિર્જર વામન ।
સિંચ સિંચામૃતકણૈશ્ચિરં જીવય જીવય ॥ 9 ॥

ધરોદ્ધાર હિરણ્યાક્ષઘાત ક્રોડાકૃતે પ્રભો ।
સિંચ સિંચામૃતકણૈશ્ચિરં જીવય જીવય ॥ 10 ॥

ભક્તત્રાસવિનાશાત્તચંડત્વ નૃહરે વિભો ।
સિંચ સિંચામૃતકણૈશ્ચિરં જીવય જીવય ॥ 11 ॥

ક્ષત્રિયારણ્યસંછેદકુઠારકરરૈણુક ।
સિંચ સિંચામૃતકણૈશ્ચિરં જીવય જીવય ॥ 12 ॥

રક્ષોરાજપ્રતાપાબ્ધિશોષણાશુગ રાઘવ ।
સિંચ સિંચામૃતકણૈશ્ચિરં જીવય જીવય ॥ 13 ॥

ભૂભારાસુરસંદોહકાલાગ્ને રુક્મિણીપતે ।
સિંચ સિંચામૃતકણૈશ્ચિરં જીવય જીવય ॥ 14 ॥

વેદમાર્ગરતાનર્હવિભ્રાંત્યૈ બુદ્ધરૂપધૃક્ ।
સિંચ સિંચામૃતકણૈશ્ચિરં જીવય જીવય ॥ 15 ॥

કલિવર્ણાશ્રમાસ્પષ્ટધર્મર્ધ્યૈ કલ્કિરૂપભાક્ ।
સિંચ સિંચામૃતકણૈશ્ચિરં જીવય જીવય ॥ 16 ॥

અસાધ્યાઃ કષ્ટસાધ્યા યે મહારોગા ભયંકરાઃ ।
છિંધિ તાનાશુ ચક્રેણ ચિરં જીવય જીવય ॥ 17 ॥

અલ્પમૃત્યું ચાપમૃત્યું મહોત્પાતાનુપદ્રવાન્ ।
ભિંધિ ભિંધિ ગદાઘાતૈશ્ચિરં જીવય જીવય ॥ 18 ॥

અહં ન જાને કિમપિ ત્વદન્યત્
સમાશ્રયે નાથ પદાંબુજં તે ।
કુરુષ્વ તદ્યન્મનસીપ્સિતં તે
સુકર્મણા કેન સમક્ષમીયામ્ ॥ 19 ॥

ત્વમેવ તાતો જનની ત્વમેવ
ત્વમેવ નાથશ્ચ ત્વમેવ બંધુઃ ।
વિદ્યાધનાગારકુલં ત્વમેવ
ત્વમેવ સર્વં મમ દેવદેવ ॥ 20 ॥

ન મેઽપરાધં પ્રવિલોકય પ્રભો-
-ઽપરાધસિંધોશ્ચ દયાનિધિસ્ત્વમ્ ।
તાતેન દુષ્ટોઽપિ સુતઃ સુરક્ષતે
દયાલુતા તેઽવતુ સર્વદાઽસ્માન્ ॥ 21 ॥

અહહ વિસ્મર નાથ ન માં સદા
કરુણયા નિજયા પરિપૂરિતઃ ।
ભુવિ ભવાન્ યદિ મે ન હિ રક્ષકઃ
કથમહો મમ જીવનમત્ર વૈ ॥ 22 ॥

દહ દહ કૃપયા ત્વં વ્યાધિજાલં વિશાલં
હર હર કરવાલં ચાલ્પમૃત્યોઃ કરાલમ્ ।
નિજજનપરિપાલં ત્વાં ભજે ભાવયાલં
કુરુ કુરુ બહુકાલં જીવિતં મે સદાઽલમ્ ॥ 23 ॥

ન યત્ર ધર્માચરણં ન જાનં
વ્રતં ન યોગો ન ચ વિષ્ણુચર્ચા ।
ન પિતૃગોવિપ્રવરામરાર્ચા
સ્વલ્પાયુષસ્તત્ર જના ભવંતિ ॥ 24 ॥

અથ મંત્રમ્
ક્લીં શ્રીં ક્લીં શ્રીં નમો ભગવતે જનાર્દનાય સકલ દુરિતાનિ નાશય નાશય ।
ક્ષ્રૌં આરોગ્યં કુરુ કુરુ । હ્રીં દીર્ઘમાયુર્દેહિ દેહિ સ્વાહા ॥

ફલશ્રુતિઃ
અસ્ય ધારણતો જાપાદલ્પમૃત્યુઃ પ્રશામ્યતિ ।
ગર્ભરક્ષાકરં સ્ત્રીણાં બાલાનાં જીવનં પરમ્ ॥ 1 ॥

શતં પંચાશતં શક્ત્યાઽથવા પંચાધિવિંશતિમ્ ।
પુસ્તકાનાં દ્વિજેભ્યસ્તુ દદ્યાદ્દીર્ઘાયુષાપ્તયે ॥ 2 ॥

ભૂર્જપત્રે વિલિખ્યેદં કંઠે વા બાહુમૂલકે ।
સંધારયેદ્ગર્ભરક્ષા બાલરક્ષા ચ જાયતે ॥ 3 ॥

સર્વે રોગા વિનશ્યંતિ સર્વા બાધાઃ પ્રશામ્યતિ ।
કુદૃષ્ટિજં ભયં નશ્યેત્ તથા પ્રેતાદિજં ભયમ્ ॥ 4 ॥

મયા કથિતમેતત્તેઽમૃતસંજીવનં પરમ્ ।
અલ્પમૃત્યુહરં સ્તોત્રં મૃતવત્સત્વનાશનમ્ ॥ 5 ॥

ઇતિ સુદર્શનસંહિતોક્તં અમૃતસંજીવન ધન્વંતરિ સ્તોત્રમ્ ॥