॥ ઇંદ્રાદયો ઊચુઃ ॥
જટાકટાહયુક્તમુંડપ્રાંતવિસ્તૃતં હરેઃ
અપાંગક્રુદ્ધદર્શનોપહાર ચૂર્ણકુંતલઃ ।
પ્રચંડવેગકારણેન પિંજલઃ પ્રતિગ્રહઃ
સ ક્રુદ્ધતાંડવસ્વરૂપધૃગ્વિરાજતે હરિઃ ॥ 1 ॥
અથેહ વ્યૂહપાર્ષ્ણિપ્રાગ્વરૂથિની નિષંગિનઃ
તથાંજનેયૃક્ષભૂપસૌરબાલિનંદનાઃ ।
પ્રચંડદાનવાનલં સમુદ્રતુલ્યનાશકાઃ
નમોઽસ્તુતે સુરારિચક્રભક્ષકાય મૃત્યવે ॥ 2 ॥
કલેવરે કષાયવાસહસ્તકાર્મુકં હરેઃ
ઉપાસનોપસંગમાર્થધૃગ્વિશાખમંડલમ્ ।
હૃદિ સ્મરન્ દશાકૃતેઃ કુચક્રચૌર્યપાતકં
વિદાર્યતે પ્રચંડતાંડવાકૃતિઃ સ રાઘવઃ ॥ 3 ॥
પ્રકાંડકાંડકાંડકર્મદેહછિદ્રકારણં
કુકૂટકૂટકૂટકૌણપાત્મજાભિમર્દનમ્ ।
તથાગુણંગુણંગુણંગુણંગુણેન દર્શયન્
કૃપીટકેશલંઘ્યમીશમેકરાઘવં ભજે ॥ 4 ॥
સવાનરાન્વિતઃ તથાપ્લુતં શરીરમસૃજા
વિરોધિમેદસાગ્રમાંસગુલ્મકાલખંડનૈઃ ।
મહાસિપાશશક્તિદંડધારકૈઃ નિશાચરૈઃ
પરિપ્લુતં કૃતં શવૈશ્ચ યેન ભૂમિમંડલમ્ ॥ 5 ॥
વિશાલદંષ્ટ્રકુંભકર્ણમેઘરાવકારકૈઃ
તથાહિરાવણાદ્યકંપનાતિકાયજિત્વરૈઃ ।
સુરક્ષિતાં મનોરમાં સુવર્ણલંકનાગરીં
નિજાસ્ત્રસંકુલૈરભેદ્યકોટમર્દનં કૃતઃ ॥ 6 ॥
પ્રબુદ્ધબુદ્ધયોગિભિઃ મહર્ષિસિદ્ધચારણૈઃ
વિદેહજાપ્રિયઃ સદાનુતો સ્તુતો ચ સ્વસ્તિભિઃ ।
પુલસ્ત્યનંદનાત્મજસ્ય મુંડરુંડછેદનં
સુરારિયૂથભેદનં વિલોકયામિ સાંપ્રતમ્ ॥ 7 ॥
કરાલકાલરૂપિણં મહોગ્રચાપધારિણં
કુમોહગ્રસ્તમર્કટાચ્છભલ્લત્રાણકારણમ્ ।
વિભીષણાદિભિઃ સદાભિષેણનેઽભિચિંતકં
ભજામિ જિત્વરં તથોર્મિલાપતેઃ પ્રિયાગ્રજમ્ ॥ 8 ॥
ઇતસ્તતઃ મુહુર્મુહુઃ પરિભ્રમંતિ કૌંતિકાઃ
અનુપ્લવપ્રવાહપ્રાસિકાશ્ચ વૈજયંતિકાઃ ।
મૃધે પ્રભાકરસ્ય વંશકીર્તિનોઽપદાનતાં
અભિક્રમેણ રાઘવસ્ય તાંડવાકૃતેઃ ગતાઃ ॥ 9 ॥
નિરાકૃતિં નિરામયં તથાદિસૃષ્ટિકારણં
મહોજ્જ્વલં અજં વિભું પુરાણપૂરુષં હરિમ્ ।
નિરંકુશં નિજાત્મભક્તજન્મમૃત્યુનાશકં
અધર્મમાર્ગઘાતકં કપીશવ્યૂહનાયકમ્ ॥ 10 ॥
કરાલપાલિચક્રશૂલતીક્ષ્ણભિંદિપાલકૈઃ
કુઠારસર્વલાસિધેનુકેલિશલ્યમુદ્ગરૈઃ ।
સુપુષ્કરેણ પુષ્કરાંચ પુષ્કરાસ્ત્રમારણૈઃ
સદાપ્લુતં નિશાચરૈઃ સુપુષ્કરંચ પુષ્કરમ્ ॥ 11 ॥
પ્રપન્નભક્તરક્ષકં વસુંધરાત્મજાપ્રિયં
કપીશવૃંદસેવિતં સમસ્તદૂષણાપહમ્ ।
સુરાસુરાભિવંદિતં નિશાચરાંતકં વિભું
જગત્પ્રશસ્તિકારણં ભજેહ રામમીશ્વરમ્ ॥ 12 ॥
॥ ઇતિ શ્રીભાગવતાનંદગુરુણા વિરચિતે શ્રીરાઘવેંદ્રચરિતે
ઇંદ્રાદિ દેવગણૈઃ કૃતં શ્રીરામતાંડવસ્તોત્રં સંપૂર્ણમ્ ॥
