ଅଥାପରମହଂ ଵକ୍ଷ୍ୟେଽମୃତସଂଜୀଵନଂ ସ୍ତଵମ୍ ।
ୟସ୍ୟାନୁଷ୍ଠାନମାତ୍ରେଣ ମୃତ୍ୟୁର୍ଦୂରାତ୍ପଲାୟତେ ॥ 1 ॥

ଅସାଧ୍ୟାଃ କଷ୍ଟସାଧ୍ୟାଶ୍ଚ ମହାରୋଗା ଭୟଂକରାଃ ।
ଶୀଘ୍ରଂ ନଶ୍ୟଂତି ପଠନାଦସ୍ୟାୟୁଶ୍ଚ ପ୍ରଵର୍ଧତେ ॥ 2 ॥

ଶାକିନୀଡାକିନୀଦୋଷାଃ କୁଦୃଷ୍ଟିଗ୍ରହଶତ୍ରୁଜାଃ ।
ପ୍ରେତଵେତାଲୟକ୍ଷୋତ୍ଥା ବାଧା ନଶ୍ୟଂତି ଚାଖିଲାଃ ॥ 3 ॥

ଦୁରିତାନି ସମସ୍ତାନି ନାନାଜନ୍ମୋଦ୍ଭଵାନି ଚ ।
ସଂସର୍ଗଜଵିକାରାଣି ଵିଲୀୟଂତେଽସ୍ୟ ପାଠତଃ ॥ 4 ॥

ସର୍ଵୋପଦ୍ରଵନାଶାୟ ସର୍ଵବାଧାପ୍ରଶାଂତୟେ ।
ଆୟୁଃ ପ୍ରଵୃଦ୍ଧୟେ ଚୈତତ୍ ସ୍ତୋତ୍ରଂ ପରମମଦ୍ଭୁତମ୍ ॥ 5 ॥

ବାଲଗ୍ରହାଭିଭୂତାନାଂ ବାଲାନାଂ ସୁଖଦାୟକମ୍ ।
ସର୍ଵାରିଷ୍ଟହରଂ ଚୈତଦ୍ବଲପୁଷ୍ଟିକରଂ ପରମ୍ ॥ 6 ॥

ବାଲାନାଂ ଜୀଵନାୟୈତତ୍ ସ୍ତୋତ୍ରଂ ଦିଵ୍ୟଂ ସୁଧୋପମମ୍ ।
ମୃତଵତ୍ସତ୍ଵହରଣଂ ଚିରଂଜୀଵିତ୍ଵକାରକମ୍ ॥ 7 ॥

ମହାରୋଗାଭିଭୂତାନାଂ ଭୟଵ୍ୟାକୁଲିତାତ୍ମନାମ୍ ।
ସର୍ଵାଧିଵ୍ୟାଧିହରଣଂ ଭୟଘ୍ନମମୃତୋପମମ୍ ॥ 8 ॥

ଅଲ୍ପମୃତ୍ୟୁଶ୍ଚାପମୃତ୍ୟୁଃ ପାଠାଦସ୍ୟଃ ପ୍ରଣଶ୍ୟତି ।
ଜଲାଽଗ୍ନିଵିଷଶସ୍ତ୍ରାରି ନ ହି ଶୃଂଗି ଭୟଂ ତଥା ॥ 9 ॥

ଗର୍ଭରକ୍ଷାକରଂ ସ୍ତ୍ରୀଣାଂ ବାଲାନାଂ ଜୀଵନପ୍ରଦମ୍ ।
ମହାରୋଗହରଂ ନୄଣାମଲ୍ପମୃତ୍ୟୁହରଂ ପରମ୍ ॥ 10 ॥

ବାଲା ଵୃଦ୍ଧାଶ୍ଚ ତରୁଣା ନରା ନାର୍ୟଶ୍ଚ ଦୁଃଖିତାଃ ।
ଭଵଂତି ସୁଖିନଃ ପାଠାଦସ୍ୟ ଲୋକେ ଚିରାୟୁଷଃ ॥ 11 ॥

ଅସ୍ମାତ୍ପରତରଂ ନାସ୍ତି ଜୀଵନୋପାୟ ଐହିକଃ ।
ତସ୍ମାତ୍ ସର୍ଵପ୍ରୟତ୍ନେନ ପାଠମସ୍ୟ ସମାଚରେତ୍ ॥ 12 ॥

ଅୟୁତାଵୃତ୍ତିକଂ ଵାଥ ସହସ୍ରାଵୃତ୍ତିକଂ ତଥା ।
ତଦର୍ଧଂ ଵା ତଦର୍ଧଂ ଵା ପଠେଦେତଚ୍ଚ ଭକ୍ତିତଃ ॥ 13 ॥

କଲଶେ ଵିଷ୍ଣୁମାରାଧ୍ୟ ଦୀପଂ ପ୍ରଜ୍ଵାଲ୍ୟ ୟତ୍ନତଃ ।
ସାୟଂ ପ୍ରାତଶ୍ଚ ଵିଧିଵତ୍ ସ୍ତୋତ୍ରମେତତ୍ ପଠେତ୍ ସୁଧୀଃ ॥ 14 ॥

ସର୍ପିଷା ହଵିଷା ଵାଽପି ସଂୟାଵେନାଥ ଭକ୍ତିତଃ ।
ଦଶାଂଶମାନତୋ ହୋମଂ କୁର୍ୟାତ୍ ସର୍ଵାର୍ଥସିଦ୍ଧୟେ ॥ 15 ॥

ଅଥ ସ୍ତୋତ୍ରମ୍
ନମୋ ନମୋ ଵିଶ୍ଵଵିଭାଵନାୟ
ନମୋ ନମୋ ଲୋକସୁଖପ୍ରଦାୟ ।
ନମୋ ନମୋ ଵିଶ୍ଵସୃଜେଶ୍ଵରାୟ
ନମୋ ନମୋ ମୁକ୍ତିଵରପ୍ରଦାୟ ॥ 1 ॥

ନମୋ ନମସ୍ତେଽଖିଲଲୋକପାୟ
ନମୋ ନମସ୍ତେଽଖିଲକାମଦାୟ ।
ନମୋ ନମସ୍ତେଽଖିଲକାରଣାୟ
ନମୋ ନମସ୍ତେଽଖିଲରକ୍ଷକାୟ ॥ 2 ॥

ନମୋ ନମସ୍ତେ ସକଲାର୍ତିହର୍ତ୍ରେ
ନମୋ ନମସ୍ତେ ଵିରୁଜଃ ପ୍ରକର୍ତ୍ରେ ।
ନମୋ ନମସ୍ତେଽଖିଲଵିଶ୍ଵଧର୍ତ୍ରେ
ନମୋ ନମସ୍ତେଽଖିଲଲୋକଭର୍ତ୍ରେ ॥ 3 ॥

ସୃଷ୍ଟଂ ଦେଵ ଚରାଚରଂ ଜଗଦିଦଂ ବ୍ରହ୍ମସ୍ଵରୂପେଣ ତେ
ସର୍ଵଂ ତତ୍ପରିପାଲ୍ୟତେ ଜଗଦିଦଂ ଵିଷ୍ଣୁସ୍ଵରୂପେଣ ତେ ।
ଵିଶ୍ଵଂ ସଂହ୍ରିତୟେ ତଦେଵ ନିଖିଲଂ ରୁଦ୍ରସ୍ଵରୂପେଣ ତେ
ସଂସିଚ୍ୟାମୃତଶୀକରୈର୍ହର ମହାରିଷ୍ଟଂ ଚିରଂ ଜୀଵୟ ॥ 4 ॥

ୟୋ ଧନ୍ଵଂତରିସଂଜ୍ଞୟା ନିଗଦିତଃ କ୍ଷୀରାବ୍ଧିତୋ ନିଃସୃତୋ
ହସ୍ତାଭ୍ୟାଂ ଜନଜୀଵନାୟ କଲଶଂ ପୀୟୂଷପୂର୍ଣଂ ଦଧତ୍ ।
ଆୟୁର୍ଵେଦମରୀରଚଜ୍ଜନରୁଜାଂ ନାଶାୟ ସ ତ୍ଵଂ ମୁଦା
ସଂସିଚ୍ୟାମୃତଶୀକରୈର୍ହର ମହାରିଷ୍ଟଂ ଚିରଂ ଜୀଵୟ ॥ 5 ॥

ସ୍ତ୍ରୀରୂପଂ ଵରଭୂଷଣାଂବରଧରଂ ତ୍ରୈଲୋକ୍ୟସମ୍ମୋହନଂ
କୃତ୍ଵା ପାୟୟତି ସ୍ମ ୟଃ ସୁରଗଣାନ୍ ପୀୟୂଷମତ୍ୟୁତ୍ତମମ୍ ।
ଚକ୍ରେ ଦୈତ୍ୟଗଣାନ୍ ସୁଧାଵିରହିତାନ୍ ସଂମୋହ୍ୟ ସ ତ୍ଵଂ ମୁଦା
ସଂସିଚ୍ୟାମୃତଶୀକରୈର୍ହର ମହାରିଷ୍ଟଂ ଚିରଂ ଜୀଵୟ ॥ 6 ॥

ଚାକ୍ଷୁଷୋଦଧିସଂପ୍ଲାଵ ଭୂଵେଦପ ଝଷାକୃତେ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 7 ॥

ପୃଷ୍ଠମଂଦରନିର୍ଘୂର୍ଣନିଦ୍ରାକ୍ଷ କମଠାକୃତେ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 8 ॥

ୟାଂଚାଚ୍ଛଲବଲିତ୍ରାସମୁକ୍ତନିର୍ଜର ଵାମନ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 9 ॥

ଧରୋଦ୍ଧାର ହିରଣ୍ୟାକ୍ଷଘାତ କ୍ରୋଡାକୃତେ ପ୍ରଭୋ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 10 ॥

ଭକ୍ତତ୍ରାସଵିନାଶାତ୍ତଚଂଡତ୍ଵ ନୃହରେ ଵିଭୋ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 11 ॥

କ୍ଷତ୍ରିୟାରଣ୍ୟସଂଛେଦକୁଠାରକରରୈଣୁକ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 12 ॥

ରକ୍ଷୋରାଜପ୍ରତାପାବ୍ଧିଶୋଷଣାଶୁଗ ରାଘଵ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 13 ॥

ଭୂଭାରାସୁରସଂଦୋହକାଲାଗ୍ନେ ରୁକ୍ମିଣୀପତେ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 14 ॥

ଵେଦମାର୍ଗରତାନର୍ହଵିଭ୍ରାଂତ୍ୟୈ ବୁଦ୍ଧରୂପଧୃକ୍ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 15 ॥

କଲିଵର୍ଣାଶ୍ରମାସ୍ପଷ୍ଟଧର୍ମର୍ଧ୍ୟୈ କଲ୍କିରୂପଭାକ୍ ।
ସିଂଚ ସିଂଚାମୃତକଣୈଶ୍ଚିରଂ ଜୀଵୟ ଜୀଵୟ ॥ 16 ॥

ଅସାଧ୍ୟାଃ କଷ୍ଟସାଧ୍ୟା ୟେ ମହାରୋଗା ଭୟଂକରାଃ ।
ଛିଂଧି ତାନାଶୁ ଚକ୍ରେଣ ଚିରଂ ଜୀଵୟ ଜୀଵୟ ॥ 17 ॥

ଅଲ୍ପମୃତ୍ୟୁଂ ଚାପମୃତ୍ୟୁଂ ମହୋତ୍ପାତାନୁପଦ୍ରଵାନ୍ ।
ଭିଂଧି ଭିଂଧି ଗଦାଘାତୈଶ୍ଚିରଂ ଜୀଵୟ ଜୀଵୟ ॥ 18 ॥

ଅହଂ ନ ଜାନେ କିମପି ତ୍ଵଦନ୍ୟତ୍
ସମାଶ୍ରୟେ ନାଥ ପଦାଂବୁଜଂ ତେ ।
କୁରୁଷ୍ଵ ତଦ୍ୟନ୍ମନସୀପ୍ସିତଂ ତେ
ସୁକର୍ମଣା କେନ ସମକ୍ଷମୀୟାମ୍ ॥ 19 ॥

ତ୍ଵମେଵ ତାତୋ ଜନନୀ ତ୍ଵମେଵ
ତ୍ଵମେଵ ନାଥଶ୍ଚ ତ୍ଵମେଵ ବଂଧୁଃ ।
ଵିଦ୍ୟାଧନାଗାରକୁଲଂ ତ୍ଵମେଵ
ତ୍ଵମେଵ ସର୍ଵଂ ମମ ଦେଵଦେଵ ॥ 20 ॥

ନ ମେଽପରାଧଂ ପ୍ରଵିଲୋକୟ ପ୍ରଭୋ-
-ଽପରାଧସିଂଧୋଶ୍ଚ ଦୟାନିଧିସ୍ତ୍ଵମ୍ ।
ତାତେନ ଦୁଷ୍ଟୋଽପି ସୁତଃ ସୁରକ୍ଷତେ
ଦୟାଲୁତା ତେଽଵତୁ ସର୍ଵଦାଽସ୍ମାନ୍ ॥ 21 ॥

ଅହହ ଵିସ୍ମର ନାଥ ନ ମାଂ ସଦା
କରୁଣୟା ନିଜୟା ପରିପୂରିତଃ ।
ଭୁଵି ଭଵାନ୍ ୟଦି ମେ ନ ହି ରକ୍ଷକଃ
କଥମହୋ ମମ ଜୀଵନମତ୍ର ଵୈ ॥ 22 ॥

ଦହ ଦହ କୃପୟା ତ୍ଵଂ ଵ୍ୟାଧିଜାଲଂ ଵିଶାଲଂ
ହର ହର କରଵାଲଂ ଚାଲ୍ପମୃତ୍ୟୋଃ କରାଲମ୍ ।
ନିଜଜନପରିପାଲଂ ତ୍ଵାଂ ଭଜେ ଭାଵୟାଲଂ
କୁରୁ କୁରୁ ବହୁକାଲଂ ଜୀଵିତଂ ମେ ସଦାଽଲମ୍ ॥ 23 ॥

ନ ୟତ୍ର ଧର୍ମାଚରଣଂ ନ ଜାନଂ
ଵ୍ରତଂ ନ ୟୋଗୋ ନ ଚ ଵିଷ୍ଣୁଚର୍ଚା ।
ନ ପିତୃଗୋଵିପ୍ରଵରାମରାର୍ଚା
ସ୍ଵଲ୍ପାୟୁଷସ୍ତତ୍ର ଜନା ଭଵଂତି ॥ 24 ॥

ଅଥ ମଂତ୍ରମ୍
କ୍ଲୀଂ ଶ୍ରୀଂ କ୍ଲୀଂ ଶ୍ରୀଂ ନମୋ ଭଗଵତେ ଜନାର୍ଦନାୟ ସକଲ ଦୁରିତାନି ନାଶୟ ନାଶୟ ।
କ୍ଷ୍ରୌଂ ଆରୋଗ୍ୟଂ କୁରୁ କୁରୁ । ହ୍ରୀଂ ଦୀର୍ଘମାୟୁର୍ଦେହି ଦେହି ସ୍ଵାହା ॥

ଫଲଶ୍ରୁତିଃ
ଅସ୍ୟ ଧାରଣତୋ ଜାପାଦଲ୍ପମୃତ୍ୟୁଃ ପ୍ରଶାମ୍ୟତି ।
ଗର୍ଭରକ୍ଷାକରଂ ସ୍ତ୍ରୀଣାଂ ବାଲାନାଂ ଜୀଵନଂ ପରମ୍ ॥ 1 ॥

ଶତଂ ପଂଚାଶତଂ ଶକ୍ତ୍ୟାଽଥଵା ପଂଚାଧିଵିଂଶତିମ୍ ।
ପୁସ୍ତକାନାଂ ଦ୍ଵିଜେଭ୍ୟସ୍ତୁ ଦଦ୍ୟାଦ୍ଦୀର୍ଘାୟୁଷାପ୍ତୟେ ॥ 2 ॥

ଭୂର୍ଜପତ୍ରେ ଵିଲିଖ୍ୟେଦଂ କଂଠେ ଵା ବାହୁମୂଲକେ ।
ସଂଧାରୟେଦ୍ଗର୍ଭରକ୍ଷା ବାଲରକ୍ଷା ଚ ଜାୟତେ ॥ 3 ॥

ସର୍ଵେ ରୋଗା ଵିନଶ୍ୟଂତି ସର୍ଵା ବାଧାଃ ପ୍ରଶାମ୍ୟତି ।
କୁଦୃଷ୍ଟିଜଂ ଭୟଂ ନଶ୍ୟେତ୍ ତଥା ପ୍ରେତାଦିଜଂ ଭୟମ୍ ॥ 4 ॥

ମୟା କଥିତମେତତ୍ତେଽମୃତସଂଜୀଵନଂ ପରମ୍ ।
ଅଲ୍ପମୃତ୍ୟୁହରଂ ସ୍ତୋତ୍ରଂ ମୃତଵତ୍ସତ୍ଵନାଶନମ୍ ॥ 5 ॥

ଇତି ସୁଦର୍ଶନସଂହିତୋକ୍ତଂ ଅମୃତସଂଜୀଵନ ଧନ୍ଵଂତରି ସ୍ତୋତ୍ରମ୍ ॥