કૈલાસશિખરે રમ્યે નાનારત્નોપશોભિતે ।
નરનારીહિતાર્થાય શિવં પપ્રચ્છ પાર્વતી ॥ 1 ॥
દેવ્યુવાચ
ભુવનેશી મહાવિદ્યા નામ્નામષ્ટોત્તરં શતમ્ ।
કથયસ્વ મહાદેવ યદ્યહં તવ વલ્લભા ॥ 2 ॥
ઈશ્વર ઉવાચ
શૃણુ દેવિ મહાભાગે સ્તવરાજમિદં શુભમ્ ।
સહસ્રનામ્નામધિકં સિદ્ધિદં મોક્ષહેતુકમ્ ॥ 3 ॥
શુચિભિઃ પ્રાતરુત્થાય પઠિતવ્યઃ સમાહિતૈઃ ।
ત્રિકાલં શ્રદ્ધયા યુક્તૈઃ સર્વકામફલપ્રદઃ ॥ 4 ॥
અસ્ય શ્રીભુવનેશ્વર્યષ્ટોત્તરશતનામ સ્તોત્રમંત્રસ્ય શક્તિરૃષિઃ ગાયત્રી છંદઃ શ્રીભુવનેશ્વરી દેવતા ચતુર્વિધફલ પુરુષાર્થ સિદ્ધ્યર્થે જપે વિનિયોગઃ ॥
અથ સ્તોત્રમ્
ઓં મહામાયા મહાવિદ્યા મહાયોગા મહોત્કટા ।
માહેશ્વરી કુમારી ચ બ્રહ્માણી બ્રહ્મરૂપિણી ॥ 5 ॥
વાગીશ્વરી યોગરૂપા યોગિનીકોટિસેવિતા ।
જયા ચ વિજયા ચૈવ કૌમારી સર્વમંગળા ॥ 6 ॥
હિંગુળા ચ વિલાસી ચ જ્વાલિની જ્વાલરૂપિણી ।
ઈશ્વરી ક્રૂરસંહારી કુલમાર્ગપ્રદાયિની ॥ 7 ॥
વૈષ્ણવી સુભગાકારા સુકુલ્યા કુલપૂજિતા ।
વામાંગા વામચારા ચ વામદેવપ્રિયા તથા ॥ 8 ॥
ડાકિની યોગિનીરૂપા ભૂતેશી ભૂતનાયિકા ।
પદ્માવતી પદ્મનેત્રા પ્રબુદ્ધા ચ સરસ્વતી ॥ 9 ॥
ભૂચરી ખેચરી માયા માતંગી ભુવનેશ્વરી ।
કાંતા પતિવ્રતા સાક્ષી સુચક્ષુઃ કુંડવાસિની ॥ 10 ॥
ઉમા કુમારી લોકેશી સુકેશી પદ્મરાગિણી ।
ઇંદ્રાણી બ્રહ્મચંડાલી ચંડિકા વાયુવલ્લભા ॥ 11 ॥
સર્વધાતુમયીમૂર્તિર્જલરૂપા જલોદરી ।
આકાશી રણગા ચૈવ નૃકપાલવિભૂષણા ॥ 12 ॥
નર્મદા મોક્ષદા ચૈવ ધર્મકામાર્થદાયિની ।
ગાયત્રી ચાઽથ સાવિત્રી ત્રિસંધ્યા તીર્થગામિની ॥ 13 ॥
અષ્ટમી નવમી ચૈવ દશમ્યૈકાદશી તથા ।
પૌર્ણમાસી કુહૂરૂપા તિથિમૂર્તિસ્વરૂપિણી ॥ 14 ॥
સુરારિનાશકારી ચ ઉગ્રરૂપા ચ વત્સલા ।
અનલા અર્ધમાત્રા ચ અરુણા પીતલોચના ॥ 15 ॥
લજ્જા સરસ્વતી વિદ્યા ભવાની પાપનાશિની ।
નાગપાશધરા મૂર્તિરગાધા ધૃતકુંડલા ॥ 16 ॥
ક્ષત્રરૂપા ક્ષયકરી તેજસ્વિની શુચિસ્મિતા ।
અવ્યક્તાવ્યક્તલોકા ચ શંભુરૂપા મનસ્વિની ॥ 17 ॥
માતંગી મત્તમાતંગી મહાદેવપ્રિયા સદા ।
દૈત્યઘ્ની ચૈવ વારાહી સર્વશાસ્ત્રમયી શુભા ॥ 18 ॥
ય ઇદં પઠતે ભક્ત્યા શૃણુયાદ્વા સમાહિતઃ ।
અપુત્રો લભતે પુત્રં નિર્ધનો ધનવાન્ ભવેત્ ॥ 19 ॥
મૂર્ખોઽપિ લભતે શાસ્ત્રં ચોરોઽપિ લભતે ગતિમ્ ।
વેદાનાં પાઠકો વિપ્રઃ ક્ષત્રિયો વિજયી ભવેત્ ॥ 20 ॥
વૈશ્યસ્તુ ધનવાન્ ભૂયાચ્છૂદ્રસ્તુ સુખમેધતે ।
અષ્ટમ્યાં ચ ચતુર્દશ્યાં નવમ્યાં ચૈકચેતસઃ ॥ 21 ॥
યે પઠંતિ સદા ભક્ત્યા ન તે વૈ દુઃખભાગિનઃ ।
એકકાલં દ્વિકાલં વા ત્રિકાલં વા ચતુર્થકમ્ ॥ 22 ॥
યે પઠંતિ સદા ભક્ત્યા સ્વર્ગલોકે ચ પૂજિતાઃ ।
રુદ્રં દૃષ્ટ્વા યથા દેવાઃ પન્નગા ગરુડં યથા ।
શત્રવઃ પ્રપલાયંતે તસ્ય વક્ત્રવિલોકનાત્ ॥ 23 ॥
ઇતિ શ્રીરુદ્રયામલે દેવીશ્વરસંવાદે શ્રી ભુવનેશ્વર્યષ્ટોત્તરશતનામ સ્તોત્રમ્ ।
