କୈଲାସଶିଖରେ ରମ୍ୟେ ନାନାରତ୍ନୋପଶୋଭିତେ ।
ନରନାରୀହିତାର୍ଥାୟ ଶିଵଂ ପପ୍ରଚ୍ଛ ପାର୍ଵତୀ ॥ 1 ॥
ଦେଵ୍ୟୁଵାଚ
ଭୁଵନେଶୀ ମହାଵିଦ୍ୟା ନାମ୍ନାମଷ୍ଟୋତ୍ତରଂ ଶତମ୍ ।
କଥୟସ୍ଵ ମହାଦେଵ ୟଦ୍ୟହଂ ତଵ ଵଲ୍ଲଭା ॥ 2 ॥
ଈଶ୍ଵର ଉଵାଚ
ଶୃଣୁ ଦେଵି ମହାଭାଗେ ସ୍ତଵରାଜମିଦଂ ଶୁଭମ୍ ।
ସହସ୍ରନାମ୍ନାମଧିକଂ ସିଦ୍ଧିଦଂ ମୋକ୍ଷହେତୁକମ୍ ॥ 3 ॥
ଶୁଚିଭିଃ ପ୍ରାତରୁତ୍ଥାୟ ପଠିତଵ୍ୟଃ ସମାହିତୈଃ ।
ତ୍ରିକାଲଂ ଶ୍ରଦ୍ଧୟା ୟୁକ୍ତୈଃ ସର୍ଵକାମଫଲପ୍ରଦଃ ॥ 4 ॥
ଅସ୍ୟ ଶ୍ରୀଭୁଵନେଶ୍ଵର୍ୟଷ୍ଟୋତ୍ତରଶତନାମ ସ୍ତୋତ୍ରମଂତ୍ରସ୍ୟ ଶକ୍ତିରୃଷିଃ ଗାୟତ୍ରୀ ଛଂଦଃ ଶ୍ରୀଭୁଵନେଶ୍ଵରୀ ଦେଵତା ଚତୁର୍ଵିଧଫଲ ପୁରୁଷାର୍ଥ ସିଦ୍ଧ୍ୟର୍ଥେ ଜପେ ଵିନିୟୋଗଃ ॥
ଅଥ ସ୍ତୋତ୍ରମ୍
ଓଂ ମହାମାୟା ମହାଵିଦ୍ୟା ମହାୟୋଗା ମହୋତ୍କଟା ।
ମାହେଶ୍ଵରୀ କୁମାରୀ ଚ ବ୍ରହ୍ମାଣୀ ବ୍ରହ୍ମରୂପିଣୀ ॥ 5 ॥
ଵାଗୀଶ୍ଵରୀ ୟୋଗରୂପା ୟୋଗିନୀକୋଟିସେଵିତା ।
ଜୟା ଚ ଵିଜୟା ଚୈଵ କୌମାରୀ ସର୍ଵମଂଗଳା ॥ 6 ॥
ହିଂଗୁଳା ଚ ଵିଲାସୀ ଚ ଜ୍ଵାଲିନୀ ଜ୍ଵାଲରୂପିଣୀ ।
ଈଶ୍ଵରୀ କ୍ରୂରସଂହାରୀ କୁଲମାର୍ଗପ୍ରଦାୟିନୀ ॥ 7 ॥
ଵୈଷ୍ଣଵୀ ସୁଭଗାକାରା ସୁକୁଲ୍ୟା କୁଲପୂଜିତା ।
ଵାମାଂଗା ଵାମଚାରା ଚ ଵାମଦେଵପ୍ରିୟା ତଥା ॥ 8 ॥
ଡାକିନୀ ୟୋଗିନୀରୂପା ଭୂତେଶୀ ଭୂତନାୟିକା ।
ପଦ୍ମାଵତୀ ପଦ୍ମନେତ୍ରା ପ୍ରବୁଦ୍ଧା ଚ ସରସ୍ଵତୀ ॥ 9 ॥
ଭୂଚରୀ ଖେଚରୀ ମାୟା ମାତଂଗୀ ଭୁଵନେଶ୍ଵରୀ ।
କାଂତା ପତିଵ୍ରତା ସାକ୍ଷୀ ସୁଚକ୍ଷୁଃ କୁଂଡଵାସିନୀ ॥ 10 ॥
ଉମା କୁମାରୀ ଲୋକେଶୀ ସୁକେଶୀ ପଦ୍ମରାଗିଣୀ ।
ଇଂଦ୍ରାଣୀ ବ୍ରହ୍ମଚଂଡାଲୀ ଚଂଡିକା ଵାୟୁଵଲ୍ଲଭା ॥ 11 ॥
ସର୍ଵଧାତୁମୟୀମୂର୍ତିର୍ଜଲରୂପା ଜଲୋଦରୀ ।
ଆକାଶୀ ରଣଗା ଚୈଵ ନୃକପାଲଵିଭୂଷଣା ॥ 12 ॥
ନର୍ମଦା ମୋକ୍ଷଦା ଚୈଵ ଧର୍ମକାମାର୍ଥଦାୟିନୀ ।
ଗାୟତ୍ରୀ ଚାଽଥ ସାଵିତ୍ରୀ ତ୍ରିସଂଧ୍ୟା ତୀର୍ଥଗାମିନୀ ॥ 13 ॥
ଅଷ୍ଟମୀ ନଵମୀ ଚୈଵ ଦଶମ୍ୟୈକାଦଶୀ ତଥା ।
ପୌର୍ଣମାସୀ କୁହୂରୂପା ତିଥିମୂର୍ତିସ୍ଵରୂପିଣୀ ॥ 14 ॥
ସୁରାରିନାଶକାରୀ ଚ ଉଗ୍ରରୂପା ଚ ଵତ୍ସଲା ।
ଅନଲା ଅର୍ଧମାତ୍ରା ଚ ଅରୁଣା ପୀତଲୋଚନା ॥ 15 ॥
ଲଜ୍ଜା ସରସ୍ଵତୀ ଵିଦ୍ୟା ଭଵାନୀ ପାପନାଶିନୀ ।
ନାଗପାଶଧରା ମୂର୍ତିରଗାଧା ଧୃତକୁଂଡଲା ॥ 16 ॥
କ୍ଷତ୍ରରୂପା କ୍ଷୟକରୀ ତେଜସ୍ଵିନୀ ଶୁଚିସ୍ମିତା ।
ଅଵ୍ୟକ୍ତାଵ୍ୟକ୍ତଲୋକା ଚ ଶଂଭୁରୂପା ମନସ୍ଵିନୀ ॥ 17 ॥
ମାତଂଗୀ ମତ୍ତମାତଂଗୀ ମହାଦେଵପ୍ରିୟା ସଦା ।
ଦୈତ୍ୟଘ୍ନୀ ଚୈଵ ଵାରାହୀ ସର୍ଵଶାସ୍ତ୍ରମୟୀ ଶୁଭା ॥ 18 ॥
ୟ ଇଦଂ ପଠତେ ଭକ୍ତ୍ୟା ଶୃଣୁୟାଦ୍ଵା ସମାହିତଃ ।
ଅପୁତ୍ରୋ ଲଭତେ ପୁତ୍ରଂ ନିର୍ଧନୋ ଧନଵାନ୍ ଭଵେତ୍ ॥ 19 ॥
ମୂର୍ଖୋଽପି ଲଭତେ ଶାସ୍ତ୍ରଂ ଚୋରୋଽପି ଲଭତେ ଗତିମ୍ ।
ଵେଦାନାଂ ପାଠକୋ ଵିପ୍ରଃ କ୍ଷତ୍ରିୟୋ ଵିଜୟୀ ଭଵେତ୍ ॥ 20 ॥
ଵୈଶ୍ୟସ୍ତୁ ଧନଵାନ୍ ଭୂୟାଚ୍ଛୂଦ୍ରସ୍ତୁ ସୁଖମେଧତେ ।
ଅଷ୍ଟମ୍ୟାଂ ଚ ଚତୁର୍ଦଶ୍ୟାଂ ନଵମ୍ୟାଂ ଚୈକଚେତସଃ ॥ 21 ॥
ୟେ ପଠଂତି ସଦା ଭକ୍ତ୍ୟା ନ ତେ ଵୈ ଦୁଃଖଭାଗିନଃ ।
ଏକକାଲଂ ଦ୍ଵିକାଲଂ ଵା ତ୍ରିକାଲଂ ଵା ଚତୁର୍ଥକମ୍ ॥ 22 ॥
ୟେ ପଠଂତି ସଦା ଭକ୍ତ୍ୟା ସ୍ଵର୍ଗଲୋକେ ଚ ପୂଜିତାଃ ।
ରୁଦ୍ରଂ ଦୃଷ୍ଟ୍ଵା ୟଥା ଦେଵାଃ ପନ୍ନଗା ଗରୁଡଂ ୟଥା ।
ଶତ୍ରଵଃ ପ୍ରପଲାୟଂତେ ତସ୍ୟ ଵକ୍ତ୍ରଵିଲୋକନାତ୍ ॥ 23 ॥
ଇତି ଶ୍ରୀରୁଦ୍ରୟାମଲେ ଦେଵୀଶ୍ଵରସଂଵାଦେ ଶ୍ରୀ ଭୁଵନେଶ୍ଵର୍ୟଷ୍ଟୋତ୍ତରଶତନାମ ସ୍ତୋତ୍ରମ୍ ।
