ભૃગુરુવાચ
ચતુર્વક્ત્ર જગન્નાથ સ્તોત્રં વદ મયિ પ્રભો ।
યસ્યાનુષ્ઠાનમાત્રેણ નરો ભક્તિમવાપ્નુયાત્ ॥ 1 ॥
બ્રહ્મોવાચ
સહસ્રનામ્નામાકૃષ્ય નામ્નામષ્ટોત્તરં શતમ્ ।
ગુહ્યાદ્ગુહ્યતરં ગુહ્યં સુંદર્યાઃ પરિકીર્તિતમ્ ॥ 2 ॥
અસ્ય શ્રીષોડશ્યષ્ટોત્તરશતનામસ્તોત્રસ્ય શંભુરૃષિઃ અનુષ્ટુપ્ છંદઃ શ્રીષોડશી દેવતા ધર્માર્થકામમોક્ષસિદ્ધ્યર્થે જપે વિનિયોગઃ ।
ત્રિપુરા ષોડશી માતા ત્ર્યક્ષરા ત્રિતયા ત્રયી ।
સુંદરી સુમુખી સેવ્યા સામવેદપરાયણા ॥ 3 ॥
શારદા શબ્દનિલયા સાગરા સરિદંબરા ।
શુદ્ધા શુદ્ધતનુઃ સાધ્વી શિવધ્યાનપરાયણા ॥ 4 ॥
સ્વામિની શંભુવનિતા શાંભવી ચ સરસ્વતી ।
સમુદ્રમથિની શીઘ્રગામિની શીઘ્રસિદ્ધિદા ॥ 5 ॥
સાધુસેવ્યા સાધુગમ્યા સાધુસંતુષ્ટમાનસા ।
ખટ્વાંગધારિણી ખર્વા ખડ્ગખર્પરધારિણી ॥ 6 ॥
ષડ્વર્ગભાવરહિતા ષડ્વર્ગપરિચારિકા ।
ષડ્વર્ગા ચ ષડંગા ચ ષોઢા ષોડશવાર્ષિકી ॥ 7 ॥
ક્રતુરૂપા ક્રતુમતી ઋભુક્ષક્રતુમંડિતા ।
કવર્ગાદિપવર્ગાંતા અંતસ્થાઽનંતરૂપિણી ॥ 8 ॥
અકારાકારરહિતા કાલમૃત્યુજરાપહા ।
તન્વી તત્ત્વેશ્વરી તારા ત્રિવર્ષા જ્ઞાનરૂપિણી ॥ 9 ॥
કાલી કરાલી કામેશી છાયા સંજ્ઞાપ્યરુંધતી ।
નિર્વિકલ્પા મહાવેગા મહોત્સાહા મહોદરી ॥ 10 ॥
મેઘા બલાકા વિમલા વિમલજ્ઞાનદાયિની ।
ગૌરી વસુંધરા ગોપ્ત્રી ગવાં પતિનિષેવિતા ॥ 11 ॥
ભગાંગા ભગરૂપા ચ ભક્તિભાવપરાયણા ।
છિન્નમસ્તા મહાધૂમા તથા ધૂમ્રવિભૂષણા ॥ 12 ॥
ધર્મકર્માદિરહિતા ધર્મકર્મપરાયણા ।
સીતા માતંગિની મેધા મધુદૈત્યવિનાશિની ॥ 13 ॥
ભૈરવી ભુવના માતાઽભયદા ભવસુંદરી ।
ભાવુકા બગલા કૃત્યા બાલા ત્રિપુરસુંદરી ॥ 14 ॥
રોહિણી રેવતી રમ્યા રંભા રાવણવંદિતા ।
શતયજ્ઞમયી સત્ત્વા શતક્રતુવરપ્રદા ॥ 15 ॥
શતચંદ્રાનના દેવી સહસ્રાદિત્યસન્નિભા ।
સોમસૂર્યાગ્નિનયના વ્યાઘ્રચર્માંબરાવૃતા ॥ 16 ॥
અર્ધેંદુધારિણી મત્તા મદિરા મદિરેક્ષણા ।
ઇતિ તે કથિતં ગોપ્યં નામ્નામષ્ટોત્તરં શતમ્ ॥ 17 ॥
સુંદર્યાઃ સર્વદં સેવ્યં મહાપાતકનાશનમ્ ।
ગોપનીયં ગોપનીયં ગોપનીયં કલૌ યુગે ॥ 18 ॥
સહસ્રનામપાઠસ્ય ફલં યદ્વૈ પ્રકીર્તિતમ્ ।
તસ્માત્કોટિગુણં પુણ્યં સ્તવસ્યાસ્ય પ્રકીર્તનાત્ ॥ 19 ॥
પઠેત્સદા ભક્તિયુતો નરો યો
નિશીથકાલેઽપ્યરુણોદયે વા ।
પ્રદોષકાલે નવમીદિનેઽથવા
લભેત ભોગાન્પરમાદ્ભુતાન્પ્રિયાન્ ॥ 20 ॥
ઇતિ બ્રહ્મયામલે પૂર્વખંડે ષોડશ્યષ્ટોત્તરશતનામ સ્તોત્રમ્ ।
