ଶ୍ରୀଦେଵ୍ୟୁଵାଚ ।
ଦେଵଦେଵ ମହାବାହୋ ଭକ୍ତାନାଂ ସୁଖଵର୍ଧନ ।
କେନ ସିଦ୍ଧିଂ ଦଦାତ୍ୟାଶୁ କାଲୀ ତ୍ରୈଲୋକ୍ୟମୋହନ ॥ 1॥

ତନ୍ମେ ଵଦ ଦୟାଽଽଧାର ସାଧକାଭୀଷ୍ଟସିଦ୍ଧୟେ ।
କୃପାଂ କୁରୁ ଜଗନ୍ନାଥ ଵଦ ଵେଦଵିଦାଂ ଵର ॥ 2॥

ଶ୍ରୀଭୈରଵ ଉଵାଚ ।
ଗୋପନୀୟଂ ପ୍ରୟତ୍ନେନ ତତ୍ତ୍ଵାତ୍ ତତ୍ତ୍ଵଂ ପରାତ୍ପରମ୍ ।
ଏଷ ସିଦ୍ଧିକରଃ ସମ୍ୟକ୍ କିମଥୋ କଥୟାମ୍ୟହମ୍ ॥ 3॥

ମହାକାଲମହଂ ଵଂଦେ ସର୍ଵସିଦ୍ଧିପ୍ରଦାୟକମ୍ ।
ଦେଵଦାନଵଗଂଧର୍ଵକିନ୍ନରପରିସେଵିତମ୍ ॥ 4॥

କଵଚଂ ତତ୍ତ୍ଵଦେଵସ୍ୟ ପଠନାଦ୍ ଘୋରଦର୍ଶନେ ।
ସତ୍ୟଂ ଭଵତି ସାନ୍ନିଧ୍ୟଂ କଵଚସ୍ତଵନାଂତରାତ୍ ॥ 5॥

ସିଦ୍ଧିଂ ଦଦାତି ସା ତୁଷ୍ଟା କୃତ୍ଵା କଵଚମୁତ୍ତମମ୍ ।
ସାମ୍ରାଜ୍ୟତ୍ଵଂ ପ୍ରିୟଂ ଦତ୍ଵା ପୁତ୍ରଵତ୍ ପରିପାଲୟେତ୍ ॥ 6॥

କଵଚସ୍ୟ ଋଷିର୍ଦେଵୀ କାଲିକା ଦକ୍ଷିଣା ତଥା
ଵିରାଟ୍ଛଂଦଃ ସୁଵିଜ୍ଞେୟଂ ମହାକାଲସ୍ତୁ ଦେଵତା ।
କାଲିକା ସାଧନେ ଚୈଵ ଵିନିୟୋଗଃ ପ୍ରକୀର୍ତ୍ତିତଃ ॥ 7॥

ଓଂ ଶ୍ମଶାନସ୍ଥୋ ମହାରୁଦ୍ରୋ ମହାକାଲୋ ଦିଗଂବରଃ ।
କପାଲକର୍ତୃକା ଵାମେ ଶୂଲଂ ଖଟ୍ଵାଂଗଂ ଦକ୍ଷିଣେ ॥ 8॥

ଭୁଜଂଗଭୂଷିତେ ଦେଵି ଭସ୍ମାସ୍ଥିମଣିମଂଡିତଃ ।
ଜ୍ଵଲତ୍ପାଵକମଧ୍ୟସ୍ଥୋ ଭସ୍ମଶୟ୍ୟାଵ୍ୟଵସ୍ଥିତଃ ॥ 9॥

ଵିପରୀତରତାଂ ତତ୍ର କାଲିକାଂ ହୃଦୟୋପରି ।
ପେୟଂ ଖାଦ୍ୟଂ ଚ ଚୋଷ୍ୟଂ ଚ ତୌ କୃତ୍ଵା ତୁ ପରସ୍ପରମ୍ ।
ଏଵଂ ଭକ୍ତ୍ୟା ୟଜେଦ୍ ଦେଵଂ ସର୍ଵସିଦ୍ଧିଃ ପ୍ରଜାୟତେ ॥ 10॥

ପ୍ରଣଵଂ ପୂର୍ଵମୁଚ୍ଚାର୍ୟ ମହାକାଲାୟ ତତ୍ପଦମ୍ ।
ନମଃ ପାତୁ ମହାମଂତ୍ରଃ ସର୍ଵଶାସ୍ତ୍ରାର୍ଥପାରଗଃ ॥ 11॥

ଅଷ୍ଟକ୍ଷରୋ ମହା ମଂତ୍ରଃ ସର୍ଵାଶାପରିପୂରକଃ ।
ସର୍ଵପାପକ୍ଷୟଂ ୟାତି ଗ୍ରହଣେ ଭକ୍ତଵତ୍ସଲେ ॥ 12॥

କୂର୍ଚଦ୍ଵଂଦ୍ଵଂ ମହାକାଲ ପ୍ରସୀଦେତି ପଦଦ୍ଵୟମ୍ ।
ଲଜ୍ଜାୟୁଗ୍ମଂ ଵହ୍ନିଜାୟା ସ ତୁ ରାଜେଶ୍ଵରୋ ମହାନ୍ ॥ 13॥

ମଂତ୍ରଗ୍ରହଣମାତ୍ରେଣ ଭଵେତ ସତ୍ୟଂ ମହାକଵିଃ ।
ଗଦ୍ୟପଦ୍ୟମୟୀ ଵାଣୀ ଗଂଗାନିର୍ଝରିତା ତଥା ॥ 14॥

ତସ୍ୟ ନାମ ତୁ ଦେଵେଶି ଦେଵା ଗାୟଂତି ଭାଵୁକାଃ ।
ଶକ୍ତିବୀଜଦ୍ଵୟଂ ଦତ୍ଵା କୂର୍ଚଂ ସ୍ୟାତ୍ ତଦନଂତରମ୍ ॥ 15॥

ମହାକାଲପଦଂ ଦତ୍ଵା ମାୟାବୀଜୟୁଗଂ ତଥା ।
କୂର୍ଚମେକଂ ସମୁଦ୍ଧୃତ୍ୟ ମହାମଂତ୍ରୋ ଦଶାକ୍ଷରଃ ॥ 16॥

ରାଜସ୍ଥାନେ ଦୁର୍ଗମେ ଚ ପାତୁ ମାଂ ସର୍ଵତୋ ମୁଦା ।
ଵେଦାଦିବୀଜମାଦାୟ ଭଗମାନ୍ ତଦନଂତରମ୍ ॥ 17॥

ମହାକାଲାୟ ସଂପ୍ରୋଚ୍ୟ କୂର୍ଚଂ ଦତ୍ଵା ଚ ଠଦ୍ଵୟମ୍ ।
ହ୍ରୀଂକାରପୂର୍ଵମୁଦ୍ଧୃତ୍ୟ ଵେଦାଦିସ୍ତଦନଂତରମ୍ ॥ 18॥

ମହାକାଲସ୍ୟାଂତଭାଗେ ସ୍ଵାହାଂତମନୁମୁତ୍ତମମ୍ ।
ଧନଂ ପୁତ୍ରଂ ସଦା ପାତୁ ବଂଧୁଦାରାନିକେତନମ୍ ॥ 19॥

ପିଂଗଲାକ୍ଷୋ ମଂଜୁୟୁଦ୍ଧେ ୟୁଦ୍ଧେ ନିତ୍ୟଂ ଜୟପ୍ରଦଃ ।
ସଂଭାଵ୍ୟଃ ସର୍ଵଦୁଷ୍ଟଘ୍ନଃ ପାତୁ ସ୍ଵସ୍ଥାନଵଲ୍ଲଭଃ ॥ 20॥

ଇତି ତେ କଥିତଂ ତୁଭ୍ୟଂ ଦେଵାନାମପି ଦୁର୍ଲଭମ୍ ।
ଅନେନ ପଠନାଦ୍ ଦେଵି ଵିଘ୍ନନାଶୋ ୟଥା ଭଵେତ୍ ॥ 21॥

ସଂପୂଜକଃ ଶୁଚିସ୍ନାତଃ ଭକ୍ତିୟୁକ୍ତଃ ସମାହିତଃ ।
ସର୍ଵଵ୍ୟାଧିଵିନିର୍ମୁକ୍ତଃ ଵୈରିମଧ୍ୟେ ଵିଶେଷତଃ ॥ 22॥

ମହାଭୀମଃ ସଦା ପାତୁ ସର୍ଵସ୍ଥାନ ଵଲ୍ଲଭମ୍ । ?
କାଲୀପାର୍ଶ୍ଵସ୍ଥିତୋ ଦେଵଃ ସର୍ଵଦା ପାତୁ ମେ ମୁଖେ ॥ 23॥

॥ ଫଲ ଶ୍ରୁତି॥

ପଠନାତ୍ କାଲିକାଦେଵୀ ପଠେତ୍ କଵଚମୁତ୍ତମମ୍ ।
ଶ୍ରୁଣୁୟାଦ୍ ଵା ପ୍ରୟତ୍ନେନ ସଦାଽଽନଂଦମୟୋ ଭଵେତ୍ ॥ 1॥

ଶ୍ରଦ୍ଧୟାଽଶ୍ରଦ୍ଧୟା ଵାପି ପଠନାତ୍ କଵଚସ୍ୟ ୟତ୍ ।
ସର୍ଵସିଦ୍ଧିମଵାପ୍ନୋତି ୟଦ୍ୟନ୍ମନସି ଵର୍ତତେ ॥ 2॥

ବିଲ୍ଵମୂଲେ ପଠେଦ୍ ୟସ୍ତୁ ପଠନାଦ୍ କଵଚସ୍ୟ ୟତ୍ ।
ତ୍ରିସଂଧ୍ୟଂ ପଠନାଦ୍ ଦେଵି ଭଵେନ୍ନିତ୍ୟଂ ମହାକଵିଃ ॥ 3॥

କୁମାରୀଂ ପୂଜୟିତ୍ଵା ତୁ ୟଃ ପଠେଦ୍ ଭାଵତତ୍ପରଃ ।
ନ କିଂଚିଦ୍ ଦୁର୍ଲଭଂ ତସ୍ୟ ଦିଵି ଵା ଭୁଵି ମୋଦତେ ॥ 4॥

ଦୁର୍ଭିକ୍ଷେ ରାଜପୀଡାୟାଂ ଗ୍ରାମେ ଵା ଵୈରିମଧ୍ୟକେ ।
ୟତ୍ର ୟତ୍ର ଭୟଂ ପ୍ରାପ୍ତଃ ସର୍ଵତ୍ର ପ୍ରପଠେନ୍ନରଃ ॥ 5॥

ତତ୍ର ତତ୍ରାଭୟଂ ତସ୍ୟ ଭଵତ୍ୟେଵ ନ ସଂଶୟଃ ।
ଵାମପାର୍ଶ୍ଵେ ସମାନୀୟ ଶୋଭିତାଂ ଵରକାମିନୀମ୍ ॥ 6॥

ଶ୍ରଦ୍ଧୟାଽଶ୍ରଦ୍ଧୟା ଵାପି ପଠନାତ୍ କଵଚସ୍ୟ ତୁ ।
ପ୍ରୟତ୍ନତଃ ପଠେଦ୍ ୟସ୍ତୁ ତସ୍ୟ ସିଦ୍ଧିଃ କରେ ସ୍ଥିତା ॥ 7॥

ଇଦଂ କଵଚମଜ୍ଞାତ୍ଵା କାଲଂ ୟୋ ଭଜତେ ନରଃ ।
ନୈଵ ସିଦ୍ଧିର୍ଭଵେତ୍ ତସ୍ୟ ଵିଘ୍ନସ୍ତସ୍ୟ ପଦେ ପଦେ ।
ଆଦୌ ଵର୍ମ ପଠିତ୍ଵା ତୁ ତସ୍ୟ ସିଦ୍ଧିର୍ଭଵିଷ୍ୟତି ॥ 8॥

॥ ଇତି ରୁଦ୍ରୟାମଲେ ମହାତଂତ୍ରେ ମହାକାଲଭୈରଵକଵଚଂ ସଂପୂର୍ଣମ୍॥