ಶ್ರೀಮಾಧವೀ ಕಾನನಸ್ಥೇ ಗರ್ಭರಕ್ಷಾಮ್ಬಿಕೇ ಪಾಹಿ ಭಕ್ತಾಂ ಸ್ತುವನ್ತೀಮ್ ॥
ವಾಪೀತಟೇ ವಾಮಭಾಗೇ
ವಾಮದೇವಸ್ಯ ದೇವಸ್ಯ ದೇವಿ ಸ್ಥಿತಾ ತ್ವಮ್ ।
ಮಾನ್ಯಾ ವರೇಣ್ಯಾ ವದಾನ್ಯಾ
ಪಾಹಿ ಗರ್ಭಸ್ಥಜನ್ತೂನ್ ತಥಾ ಭಕ್ತಲೋಕಾನ್ ॥ 1 ॥
ಶ್ರೀಮಾಧವೀ ಕಾನನಸ್ಥೇ ಗರ್ಭರಕ್ಷಾಮ್ಬಿಕೇ ಪಾಹಿ ಭಕ್ತಾಂ ಸ್ತುವನ್ತೀಮ್ ॥
ಶ್ರೀಗರ್ಭರಕ್ಷಾಪುರೇ ಯಾ
ದಿವ್ಯಸೌನ್ದರ್ಯಯುಕ್ತಾ ಸುಮಾಙ್ಗಳ್ಯಗಾತ್ರೀ ।
ಧಾತ್ರೀ ಜನಿತ್ರೀ ಜನಾನಾಂ
ದಿವ್ಯರೂಪಾಂ ದಯಾರ್ದ್ರಾಂ ಮನೋಜ್ಞಾಂ ಭಜೇ ತ್ವಾಮ್ ॥ 2 ॥
ಶ್ರೀಮಾಧವೀ ಕಾನನಸ್ಥೇ ಗರ್ಭರಕ್ಷಾಮ್ಬಿಕೇ ಪಾಹಿ ಭಕ್ತಾಂ ಸ್ತುವನ್ತೀಮ್ ॥
ಆಷಾಢಮಾಸೇ ಸುಪುಣ್ಯೇ
ಶುಕ್ರವಾರೇ ಸುಗನ್ಧೇನ ಗನ್ಧೇನ ಲಿಪ್ತಾ ।
ದಿವ್ಯಾಮ್ಬರಾಕಲ್ಪವೇಷಾ
ವಾಜಪೇಯಾದಿಯಾಗಸ್ಥಭಕ್ತೈಃ ಸುದೃಷ್ಟಾ ॥ 3 ॥
ಶ್ರೀಮಾಧವೀ ಕಾನನಸ್ಥೇ ಗರ್ಭರಕ್ಷಾಮ್ಬಿಕೇ ಪಾಹಿ ಭಕ್ತಾಂ ಸ್ತುವನ್ತೀಮ್ ॥
ಕಲ್ಯಾಣದಾತ್ರೀಂ ನಮಸ್ಯೇ
ವೇದಿಕಾಢ್ಯಸ್ತ್ರಿಯಾ ಗರ್ಭರಕ್ಷಾಕರೀಂ ತ್ವಾಮ್ ।
ಬಾಲೈಸ್ಸದಾ ಸೇವಿತಾಙ್ಘ್ರಿಂ
ಗರ್ಭರಕ್ಷಾರ್ಥಮಾರಾದುಪೇತೈರುಪೇತಾಮ್ ॥ 4 ॥
ಶ್ರೀಮಾಧವೀ ಕಾನನಸ್ಥೇ ಗರ್ಭರಕ್ಷಾಮ್ಬಿಕೇ ಪಾಹಿ ಭಕ್ತಾಂ ಸ್ತುವನ್ತೀಮ್ ॥
ಬ್ರಹ್ಮೋತ್ಸವೇ ವಿಪ್ರವೀಥ್ಯಾಂ
ವಾದ್ಯಘೋಷೇಣ ತುಷ್ಟಾಂ ರಥೇ ಸನ್ನಿವಿಷ್ಟಾಮ್ ।
ಸರ್ವಾರ್ಥದಾತ್ರೀಂ ಭಜೇಽಹಂ
ದೇವವೃನ್ದೈರಪೀಡ್ಯಾಂ ಜಗನ್ಮಾತರಂ ತ್ವಾಮ್ ॥ 5 ॥
ಶ್ರೀಮಾಧವೀ ಕಾನನಸ್ಥೇ ಗರ್ಭರಕ್ಷಾಮ್ಬಿಕೇ ಪಾಹಿ ಭಕ್ತಾಂ ಸ್ತುವನ್ತೀಮ್ ॥
ಏತತ್ ಕೃತಂ ಸ್ತೋತ್ರರತ್ನಂ
ದೀಕ್ಷಿತಾನನ್ತರಾಮೇಣ ದೇವ್ಯಾಶ್ಚ ತುಷ್ಟ್ಯೈ ।
ನಿತ್ಯಂ ಪಠೇದ್ಯಸ್ತು ಭಕ್ತ್ಯಾ
ಪುತ್ರಪೌತ್ರಾದಿ ಭಾಗ್ಯಂ ಭವೇತ್ತಸ್ಯ ನಿತ್ಯಮ್ ॥ 6 ॥
ಶ್ರೀಮಾಧವೀ ಕಾನನಸ್ಥೇ ಗರ್ಭರಕ್ಷಾಮ್ಬಿಕೇ ಪಾಹಿ ಭಕ್ತಾಂ ಸ್ತುವನ್ತೀಮ್ ॥
ಇತಿ ಶ್ರೀಅನನ್ತರಾಮದೀಕ್ಷಿತವರ್ಯ ವಿರಚಿತಂ ಗರ್ಭರಕ್ಷಾಮ್ಬಿಕಾ ಸ್ತೋತ್ರಮ್ ॥
